1. Ganelo yi vegidwego avba nya tshangano nya mughanga khu 1935 yi khuhide kharini lidzaha nyo khaguri?

GU DIRI ni ndranga mweyo nya Sihevbuli nya Bhibhiliya a gu edzi dzi nga ba dzi tidwa khidzo Dzifakazi dza Jehovha gale. Vavelegi vakona va diri ni sanana sivili nya sikhwathana ni sanana sivili nya sagadzyana. Avo va hevbudzide sanana sawe gu thumeya Jehovha Nungungulu ni gu pimedzeya Jesu Kristo. Gimwegyo nya sanana sawe nya gikhwathana gi diri ni 18 myaga tepo gi nga bhapatiswa khu 1926. Gu fana ni satshavbo Sihevbuli nya Bhibhiliya, lidzaha leli nyo tumbege li di gu hodza gibaba ni gu seya vhinyu mwaga ni mwaga avba nya Gilalelo gya Pfhumu. Ambari ulolo, gu vireya gwalo gu vbindrugedzide tepo li ngapwa ganelo nya lisima yi gu ni hungo nya mahungu wu gu khuwo: “Gidzemo nya gikhongolo.” Ganelo yeyi yi vegidwe khu ndriyathu J. F. Rutherford khu 1935 avba nya tshangano nya mughanga wu giregidego Washington, D.C., Estados Unidos de América. Ginani egi Sihevbuli nya Bhibhiliya si gi hevbudego avba nya tshangano wowu?

2. Lisine muni eli ndriyathu Rutherford a li tshamusedego avba nya ganelo yaye?

² Avba nya ganelo yaye, ndriyathu Rutherford tivegiside ava va nga hadzi lumba “gidzemo nya gikhongolo” kha nga si khumbugwago omu ga Gutuledwa 7:9. Kala avba, Sihevbuli nya Bhibhiliya si di gu pimisa gu khiso gidzemo nya gikhongolo tsawa nya vathu wu hongolago ndzadzini, ganiolu, wu gu mwalo gukhodwa nya gu khongolo gu fana ni ogu ga maKristo nyo todzwe. Ndriyathu Rutherford thumiside Milowo gasi gu tshamuseya gu khuye  gidzemo nya gikhongolo khandri vathu va hathidwego gasi guya vbanya ndzadzini, ganiolu, maKristo nya dzimbe dzinvuta * ma na vbulugago avba nya ‘tshanisa nya yikhongolo’ ma bwe ma vbanya mafuni kala gupindruga. (Gutu. 7:14) Jesu tumbiside gu khuye: “Nyi ngari ni dzimbe dzinvuta dzi si lumbigo liphandro leli; idzo nidzo nyi ngu fanela gu dzi havisa; dzi napwa lito langu. Khu kharato li na manega liphandro limwedo ni muhavisi moyo basi.” (Joh. 10:16) Dzimbe dzinvuta dzedzi go thudwa Dzifakazi dza Jehovha nyo tumbege dzi gu na ni gutumba nyo vbanye kala gupindruga paradhesini mafuni. (Mat. 25:31-33, 46) Hongoleni hi wona edzi mapwisiselo yaya nya maphya nya Bhibhiliya ma vbindrugedzidego khidzo womi nya vathu nya vangi va Jehovha gupata ni ndriyathu yoyu nya 18 myaga. — Ndzi. 97:11; Mav. 4:18.

3-4. Avba nya tshangano nya mughanga nya 1935, ginani egi dzimiliyoni nya vandriyathu va gi pwisisidego maningano ni gutumba gwawe nigu khu ginani?

³ Si tsakiside ngudzu avba nya tshangano tepo muganeyi a nga embeya vaengiseyi khuye: “Ava va gu ni gutumba nyo vbanye mafuni kala gupindruga va na khuge va ema.” Moyo nya ndriyathu a nga ba ari ga tshangano wowu, wari khuye gutala nya vathu va nga ba vari vbale va di khuga va ema. Khavbovbo ndriyathu Rutherford a di ganeya gu khuye: “Nga wona gidzemo nya gikhongolo.” Hwane nya isoso, vatshavbo vaengiseyi va di tala khu gutsaka. Vale va nga khuga va ema va di dzegeya gu si pwisisa gu khavo Jehovha kha nga ba a va hathide gasi vaya vbanya ndzadzini. Avo va wonide gu khavo kha va todzwa khu liphuvbo nya guage la Nungungulu. Ga litshigu li nga landreya nya tshangano nya mughanga, 840 nya Dzifakazi nya dziphya dzi di bhapatiswa nigu gutala nya avo gu diri va dzimbe dzinvuta.

⁴ Hwane nya ganelo yile, ndriyathu wule nya muphya a khumbugidwego gupheyani nya ndrima ni mambe mazanazana nya vandriyathu va di ema gu hodza gibaba ni gu seya vhinyu avba nya Gilalelo nya Pfhumu. Gutala nya avo va dzipwide nya nga edzi ndriyathu moyo a dzipwidego khidzo tepo a nga khuye: “Nyi hegiside gu hodza gibaba ni gu seya vhinyu khu 1935. Nyi tugude gu kheni Jehovha kha nyi todza khu liphuvbo laye nya guage gasi nyi manega ni gu tumba nyo vbanye ndzadzini, ganiolu, nyi diri ni gutumba nyo vbanye mafuni ni gu phasedzeya avba nya gu vbindrugedze mafu gasi ma khala paradhesi.” (Rom. 8:16, 17; 2 Kor. 1:21, 22) Gu khugeya avbovbo, ava nya gidzemo nya gikhongolo va gu engedzeya gu dandra nigu va gu thuma gumogo ni maKristo nyo todzwe ma tshadego. *

5. Jehovha a gu va wona kharini ava va emago gu hodza gibaba ni gu seya vhinyu?

⁵ Jehovha a va wonide kharini ava va emidego gu hodza gibaba ni gu seya vhinyu hwane ya 1935? Nigu Jehovha a gu dzi wona kharini Dzifakazi dzi bhapatiswago muhuno dzi hodzago gibaba ni gu seya vhinyu avba nya Gilalelo nya Pfhumu, ganiolu, khu gu gimbiya nya tepo dzi tugula gu khidzo kha dza todzwa khu liphuvbo nya guage? (1 Kor. 11:28) Vambe va ngu hodza gibaba ni gu seya vhinyu kholu va gu mba gu pwisisa gutumba gwawe. Ganiolu, va gu dzumeya gu khavo va hosiside, va ema gu hodza gibaba ni gu seya vhinyu va bwe va simama  gu thumeya Jehovha khu gu tumbega, uye a na va dzumeya kha nga gipandre nya dzimbe dzinvuta. Ambari olu avo va gu mba hodza gibaba ni gu seya vhinyu, avo va ngu simama gu hongola gidundrugisotunu kholu va ngu bonga ngudzu esi Jehovha ni Jesu a va giredego.

6. Ginani egi Jesu a rumidego dzingilozi gu gira?

⁶ Kha nga olu tshanisa nya yikhongolo yi hidzimeyago, si na hi tiyisa ha gu bhula khesi Gutuledwa gipimo 7 a ganeyago maningano ni maKristo nyo todzwe ni gidzemo nya gikhongolo nya dzimbe dzinvuta. Jesu embede dzingilozi gu dzi simama gu mola 4 dziphuvbo nya gu saseye. Idzo kha dzi yeli gu digeledza dziphuvbo dzodzo nya gu saseye mafu kala yatshavbo maKristo nyo todzwe ma lowa gifungo vbasiwombotunu, iso si thulago gu tsakedwa khu Jehovha. (Gutu. 7:1-4) Kha nga tshatshazelo nya gutumbege gwawe, maKristo nyo todzwe ma na khala dzipfhumu ni vaphasi nya mhamba ni Jesu ndzadzini. (Gutu. 20:6) Jehovha, Jesu ni dzingilozi va na tsaka ngudzu tepo va na wonago maKristo nyo todzwe nya 144 000 na ma gu hakha tshatshazelo wawe ndzadzini.

7. Kha nga si yeyedzwago omu ga Gutuledwa 7:9, 10, khu vamani va wonidwego khu Johane avba nya giwoniso nigu ginani va nga ba va gira? (Wona foto yi gomogo avba nya kapa.)

⁷ Hwane nyo ganeye khu ava nya 144 000 dzipfhumu, a gu vaphasi nya mhamba, Johane a di wona gimbe gilo nyo samadzise, a gu “gidzemo nya gikhongolo” gi vbulugidego avba nya Harmagedhoni. Gu hambana ni tsawa nyo pheye, tsawa wowu nya wuvili wa gu wumbwa khu vathu nya vangi ngudzu nya gu kha va kotaregi. (Leri Gutuledwa 7:9, 10.) Avo “va ambade dzingandzu nya guage” esi si thulago gu khiso avo va gu simama “gumba dzi nyenyezisa” khu silo sa litigo leli la Sathane va bwe va simama gu tumbega ga Nungungulu ni ga Kristo. (Jak. 1:27) Avo va gu huweleya khavo, va vbanyisidwe khu kotani nya esi Jehovha ni Jesu, a gu Nvutana ya Nungungulu va giridego. Nigu avo va pharide migindru, si yeyedzago gu khiso va ngu dzumeya Jesu kha nga Pfhumu yi hathidwego khu Jehovha. — Fananisa ni Johane 12:12, 13.

8. Ginani egi Gutuledwa 7:11, 12 a ganeyago maningano ni Jehovha, Jesu, dzingilozi ni maKristo nyo todzwe ma wusidwego khu gufani?

⁸ Leri Gutuledwa 7:11, 12. Va dzipwide kharini ava va nga ba vari ndzadzini tepo va nga wona gidzemo nya gikhongolo? Johane a di wona vatshavbo na va tsakide ndzadzini nigu avo va di dhumisa Nungungulu tepo va nga wona gidzemo nya gikhongolo. Jehovha, Jesu ni dzingilozi va na tsaka khu gu wona giwoniso gegi na gi gu tadzisega tepo gidzemo nya gikhongolo gi na dugago khomu nya tshanisa nya yikhongolo.

9. Guya khu Gutuledwa 7:13-15, ginani egi gidzemo nya gikhongolo gi girago olu?

⁹ Leri Gutuledwa 7:13-15. Johane lovide gu khuye gidzemo nya gikhongolo ‘gi handzide dzingadzu dzagyo dzi gi agisela novbani nya Nvutana.’ Esi sa gu thula gu khiso avo va agiside mavhalo yawe nigu va ngu tsakedwa khu Jehovha. (Isa. 1:18) Ayo maKristo ma dzi hendzeledzidego ni gu bhapatiswa ma gu ni gukhodwa nyo tiye avba nya muphaso wa Kristo nigu ma ni wupari nyo tiye ni Jehovha. (Joh. 3:36; 1 Ped. 3:21) Khu kharato, avo va ngu yedwa khu gu ema mbeli nya gikhalo nya wufumu wa Nungungulu “va mu thumela wutshigu ni mihani” avba mafuni. Olu avo va gu thuma khu sighingi avba nya thumo nyo tshumayele ni gu gira vapizane kholu Mufumo wa Nungungulu khwa lisima ngudzu gwawe. — Mat. 6:33; 24:14; 28:19, 20.

10. Ginani egi gidzemo nya gikhongolo gi tiyisegago khigyo, nigu gitumbiso muni gi na gi wonago na gi gu tadzisega?

¹⁰ Gidzemo nya gikhongolo egi gi vbulugidego avba nya tshanisa nya yikhongolo, gi ngu tiyisega  gu khigyo Nungungulu a na simama gu gi khathaleya kholu “Wule a khadego vbagikhalotunu nya wufumu a na va vhikela khu mwedzi waye.” Gitumbiso egi dzimbe dzinvuta dzi gi vireyago khu maho nyo fuviye gi na tadzisega kholu: “[Nungungulu] a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi” — Gutu. 21:3, 4.

11-12. a) Guya khu Gutuledwa 7:16, 17, makategwa muni ma na manwago khu gidzemo nya gikhongolo mindru watshigu? b) Ginani egi dzimbe dzinvuta dzi nga girago khu tepo nya gidundrugiso nigu khu ginani?

¹¹ Leri Gutuledwa 7:16, 17. Muhuno simbe sithumi sa Nungungulu si ngu tshaniseka khu kotani nya ndzala, kholu si mwalo dzitsapawu nyo eneye gasi gu renga guhodza gu vbwetegago mwendro khu kotani nya sigaradzo si vangwago khu dzinyimbi. Vambe va ngu khotedwa khu kotani nya gukhodwa gwawe. Ambari ulolo, gidzemo nya gikhongolo gi ngu tsaka ngudzu kholu igyo gi ngu dziti gu khigyo hwane nya gu vbuluge tepo litigo leli li na fuviswago, igyo gi na mana guhodza nya gungi khu liphuvboni ni nyamani. Tepo Jehovha a na fuvisago litigo leli nyo vivbe la Sathane, Uye a na vhikeya gidzemo nya gikhongolo avba nya zanga yaye. Hwane nya gu vbeye tshanisa nya yikhongolo, Jesu a na thangeya ava va na vbulugago a va yisa avba ma gomogo “mati nya womi [nyo pindruge].” Nga dundrugeya khu gu tumba nyo tsakise ogu gidzemo nya gikhongolo gi gu nago, a gu gu vbanya mafuni kala gupindruga! — Joh. 11:26.

¹² dzinvuta dzi na ni gutumba nyo tsakise, khu kharato idzo dzi ngu bonga ngudzu Jehovha ni Jesu. Ambari olu Jehovha a nga mba dzi hatha gasi guya vbanya ndzadzini, uye a ngu dzi haladza nya nga edzi a haladzago khidzo maKristo nyo todzwe. Makristo nyo todzwe ni ava nya dzimbe dzinvuta, va ngu bonga Nungungulu ni Kristo. Mweyo nya dzindziya nya gu gire isoso, khu gu manega gidundrugisotunu.

13-14. Khu ginani vatshavbo va yedego gu manega avba nya gidundrugiso nya gufe ga Kristo?

¹³ Ga myagana yeyi, avba nya 1000 vathu va manegago gidundrugisotunu, si nga gira nari muthu moyo basi a hodzago gibaba ni gu seya vhinyu. Gutala nya mabandla ma mwalo muthu a hodzago gibaba ni gu seya vhinyu gidundrugisotunu. Si thulago gu khiso nya vangi va manegago gidundrugisotunu va na ni gutumba nyo vbanye mafuni. Ginani gi va girago va manega  gidundrugisotunu? Gighelo gi va girago va hongola gidundrugisotunu, gi ngu fana ni gighelo gi girago vathu va hongola avba nya mutshadho wa pari yawe. Dzipari dza gu hongola mutshadhotunu gasi gu yeyedza gu khidzo dzi ngu haladza ni gu seketeya patwa wu tshadhago. Khu kharato, dzimbe dzinvuta dza gu manega gidundrugisotunu kholu dza gu vbweta gu yeyedza gu khidzo dzi ngu haladza ni gu seketeya Jesu ni maKristo nyo todzwe. Idzo dza gu hongola gambe gidundrugisotunu kholu dza gu vbweta gu yeyedza gubonga khu muphaso nya dzegiso wa Jesu owu wu dzi ningidego lithomo nya gu ta vbanya mafuni kala gupindruga.

¹⁴ Gimbe gighelo nya lisima gi girago dzimbe dzinvuta dzi manega gidundrugisotunu, khu gu dza gu vbweta gu engisa gileletelo gya Jesu. Tepo Jesu a nga gira gilalelo nyo pheye ni vapostoli vaye nyo tumbege, a di va embeya khuye: “Girani esi kha nga gialakanyo gyangu.” (1 Kor. 11:23-26) Khu kharato, dzimbe dzinvuta dzi ngu simama gu manega avba nya Gilalelo gya Pfhumu na ma ngo vbanya maKristo nyo todzwe avba mafuni nigu dzimbe dzinvuta dzi ngu rana vambe gasi vata manega avba nya gidundrugiso.

15. Ginani hi nga girago gasi hi bonga Nungungulu ni Kristo gidundrugisotunu?

¹⁵ Gidundrugisotunu hi na ni lithomo nya gu dhumise Nungungulu hi bwe hi yeyedza lihaladzo ni gu bonga gwathu gwaye ni Jesu Kristo khu ndzimo ni nombelo. Ganelo yi na vegwago mwaga wowu yi na ni hungo nya mahungu wu gu khuwo: “Bonga khesi Nungungulu ni Kristo va gu giredego!” Iyo yi na engedzeya gu bonga gwathu Jehovha ni Kristo. Khu kharato tepo gi na vbindriswago gibaba ni vhinyu, si na hi gira hi dundruga gu khethu iso sa gu emeya givili gya Jesu ni novba waye. Nigu hi na dundrugeya khu lihaladzo eli Jehovha a hi yeyedzidego tepo a nga dzumeleya gu khuye Gyanana gyaye gifa gasi hi mana womi. (Mat. 20:28) Vatshavbo ava va haladzago Papayi wathu wa ndzadzini ni Gyanana gyaye, va na manega gidundrugisotunu.

16. Makristo nyo todzwe ni dzimbe dzinvuta ma ngu fana khu dzindziya muni?

¹⁶ Makristo nyo todzwe ni dzimbe dzinvuta ma ngu fana khu dzindziya nyo khaguri kholu vatshavbo va na ni lisima mahoni ga Jehovha nigu a ngu va haladza khu ndziya yamweyo. Ha guti isoso kholu tengo wu livbidwego gasi gu tshudzisa maKristo nyo todzwe, khuwo wa mowo wu livbidwego gasi gi tshudzisa dzimbe dzinvuta, a gu womi wa Gyanana gyaye. Gu hambana gu gomogo avba nya mitsawa yeyi ya mivili, khu gu iyo yi na ni gutumba nyo hambane. Ganiolu, mitsawa yeyi va mivili yi yede gu simama na yi tumbegide ga Nungungulu ni ga Kristo. (Ndzi. 31:23) Nigu dundruga gu khuwe Jehovha a gu ninga liphuvbo laye nya guage khedzi si lombegago khidzo ga moyo ni moyo  wathu, gani maKristo nyo todzwe mwendro dzimbe dzinvuta.

17. Ginani egi maKristo nyo todzwe ma gi vireyago khu maho nyo fuviye?

¹⁷ Makristo nyo todzwe kha ma velegwi na mari ni gutumba nyo vbanye ndzadzini. Nungungulu khuye a ma ningago gutumba gogo. Ayo ma gu dundrugeya khu gutumba gwawo, ma gu gombeleya ma bwe ma vireya khu maho nyo fuviye gu hakha tshatshazelo wawe ndzadzini. Ayo kha ma dziti edzi givili gyawe gi na gu ba gi khade khidzo ndzadzini. (Filp. 3:20, 21; 1 Joh. 3:2) Ganiolu, ayo ma lambede guya tshangana ni Jehovha, Jesu, dzingilozi ni mambe maKristo nyo todzwe. Ayo ma na fuma gumogo ndzadzini.

18. Ginani egi dzimbe dzinvuta dzi gi vireyago khu maho nyo fuviye?

¹⁸ Dzimbe dzinvuta dza gu vireya khu maho nyo fuviye gu vbanya mafuni kala gupindruga. Gogo gudogoreya ogu ni wevbini muthu a gu nago. (Muh. 3:11) Idzo dza gu vireya khu maho nyo fuviye gu patega avba nyo vbindrugedze mafu ma khala paradhesi. Idzo dzi lambede gu vbaha dzinyumba, dzi lima mathenbwe dzi bwe dzi dandrisa sanana na siri ni womi nyo vbeleye. (Isa. 65:21-23) Idzo dzi virede khu maho nyo fuviye gu pasiyari omu nya malanga nya mangi mafuni, dzi wona sigomo, makhabi ni dziphwa dzi bwe dzi hevbula khu satshavbo silo esi Jehovha a vangidego. Ganiolu, egi gi va tsakisago ga satshavbo guti gu khavo wupari wawe ni Jehovha wu na simama gutiya.

19. Lithomo muni gidundrugiso gi ningago moyo ni moyo wathu, nigu gi na girega lini mwaga wowu?

¹⁹ Jehovha a ngu ninga gi gevbini githumi gyaye gutumba nyo tsakise khu wumindru. (Jer. 29:11) Gidundrugiso nya gufe ga Kristo gi ngu ninga moyo ni moyo wathu lithomo nyo dhumise Nungungulu ni gu bonga Kristo khu satshavbo va hi giredego gasi hi mana womi nyo pindruge. Gidundrugiso, tshangano nya lisima owu maKristo nya lisine ma manegago nawo mwaga ni mwaga. Igyo gi na girega khu Sabhadho vbasiyambotunu khu 27 nya Março nya 2021. Mwaga wowu gambe vatshavbo va tshulegide gu manega avba nya tshangano wowu nya lisima. Vambe va na si kodza gu manega ambari va wugedwago. Vambe va na patega gidundrugisotunu na vari omu nya mapaso. Tepo gu na giregago isoso, Jehovha, Jesu, dzingilozi ni maKristo nyo todzwe ma wusidwego va na ba va khedziseya. Khu kharato, yatshavbo mabandla, mitsawa, ambari vale va gu vonga va na tsaka gidundrugisotunu.