1-2. Sithumi nyo tumbege sa Jehovha si nga tshangana ni sigaradzo muni?

 SIMBE siemo nyo garadze hi tshanganago naso si nga vbindrugedza womi wathu. Khu giyeyedzo, ndriyathu nyo tumbege nyo pwani khu Luis a a di tugudwa gu pwani a na ni madwali nya câncer. Dhogodheya waye a di mu embeya gu khuye tshaledwe khu migima nya yidugwana na ngo vbanya. Monika ni mwama waye va di gu pharegide khu mithumo nya liphuvbo. Ganiolu, ga litshigu nyo khaguri Monika a di tugula gu khuye mwama waye a nga ba ari lidhota a di gu vbanya miwomi mivili khu myaga nya yingi. Ndriyathu nyo khaguri nyo pwani khu Olivia a nga si tshadhigo, a di gurumedzega gu khuga khu gaya gwaye khu kotani nya gingulo nya gikhongolo gi nga hadzi girega. Tepo a nga bweleya a di ya mana nyumba yaye na yi tshungunudwe khu gingulo. Khu gitepwana, womi wa Luis, Monika ni Olivia wu di vbindrugedza khu guvbeleya. U di nga tshangana ni giemo gi nga vbindrugedza womi wago khu guvbeleya?

² Ambari olu hi gu sithumi nyo tumbege sa Jehovha, hi ngu tshangana ni sigaradzo nya singi gu fana ni vambe. Vbavbandze nya isoso, tepo khiyo hi wugedwago khu valala va Jehovha si na vbwetega gu hi timiseya. Ambari olu Jehovha a gu mba hi vhikeya ga sigaradzo soso, Uye a ngu hi tumbisa gu hi phasa. (Isa. 41:10) Khu gu phaswa khu Jehovha, hi na si kodza gu simama na hi tsakide, gu hunga makungo nya yadi ni gu simama na hi tumbegide gwaye ambari ha gu tshangana ni sigaradzo. Avba nya ndrima yeyi, hi na wona 4 dzindziya edzi Jehovha a dzi thumisago gasi gu hi phasa tepo hi tshanganago ni sigaradzo. Hi na wona gambe esi hi yedego gu gira gasi hi wuyedwa khu giphaso gyaye.

 JEHOVHA A NA GU VHIKEYA

3. Tepo hi tshanganago ni gigaradzo nya gikhongolo hi nga dzipwa khu ndziya muni?

³ Gigaradzo. Tepo hi tshanganago ni gigaradzo nya gikhongolo si nga hi garadzeya gu pimisa gwadi ni gu hunga makungo nya yadi. Khu ginani? Khu kotani nya guvbisa hi gupwago monyoni, gu nga hi gira hi dzipwa na ha sa tsaka mwendro gu garadzega. Hi nga dzipwa gambe na hi dzimede hi si guti umo nyo hongole. Wona edzi vandriyathu vavili va khumbugidwego gupheyani va dzipwidego khidzo tepo va nga tshangana ni sigaradzo. Olivia wari, khuye: “Hwane nya gu ba nyumba yangu yi tshungunudwe khu gingulo, nyi di dzipwa na nyi dzimede ni gu garadzega ngudzu.” Hwane nya gu ba Monika a liphedwe khu mwama waye wari, khuye: “Nyi dzipwide na nyi khunguvanyegide ngudzu. Nyi pwide guvbisa nya gukhongolo ngudzu monyoni gwangu. Kha nya nga ba nyi giti ni gilo nyo gire. Iso si nga ba si wonega nga khatsi kha si kodzegi si nyi giregede.” Tepo hi garadzegago, Jehovha a gu tumbisa gu hi phasa khu ndziya muni?

4. Guya khu Vafilipi 4:6, 7, ginani egi Jehovha a hi tumbisago?

⁴ Jehovha a gu hi phasa kharini? Uye a gu tumbisa gu hi ninga esi Bhibhiliya yi gu khiyo “gurula ga Nungungulu.” (Leri Vafilipi 4:6, 7.) Ugo ga gu tshamuseya gu mba garadzega khu mapimoni ni monyoni khu kotani nya wupari hi gu nawo naye. Gurula gogu “gu vbindrago gupwisisa gwatshavbo” gu ngu hlamadzisa ngudzu. Ina u di nga dzipwa na wu rude hwane nya gu ba u gombede ga Jehovha khu monyo watshavbo? Gu dzipwa gogo “gurula ga Nungungulu.”

5. Gurula ga Nungungulu gu nga vhikeya kharini myonyo ni mapimo yathu?

⁵ Vafilipi 4:7 a gu ganeya gu khuye gurula ga Nungungulu, “gu na sayisa” mwendro gu vhikeya “myonyo yanu ni mapimo yanu.” Lito li gu khilo gu “sayisa” mwendro gu vhikeya li di gu thumiswa ga masotswa ma nga ba ma vhikeya lidhoropa gasi li si dhumedwi. Nigu vavbanyi va dhoropani momo va di gu lala ligovbe nyo rule, kholu va di gu vhikedwa. Khu ndziya nyo fane, gurula ga Nungungulu gu ngu vhikeya myonyo yathu ni mapimo yathu hi dzipwa na hi rude hi si garadzegi. (Ndzi. 4:8) Kha nga si dugeledego Hannah, ambari simbe sigaradzo sa gu mba vbindrugedza khavba ni avba, ethu hi nga mana gurula. (1 Sam. 1:16-18) Nigu tepo hi dzipwago na hi rude, si ngu hi vbevbugeya gu pimisa gwadi ni gu hunga makungo nya yadi.

6. Ginani hi yedego gu gira gasi hi wuyedwa khu gurula ga Nungungulu? (Wona fotu.)

⁶ Ginani hi yedego gu gira? Gufana ni vavbanyi nya lidhoropa va ranago lisotshwa gasi gu vhikeya lidhoropa lawe, anethu hi yede gu lomba Jehovha gasi gu hi vhikeya. Khu ndziya muni? Khu gu gombeya kala u mana gurula ga Nungungulu.  (Luka 11:9; 1 Tes. 5:17) Luis a khumbugidwego gupheyani a gu tshamuseya gu khuye, uye ni mwangadzi waye Ana, va si kodzide gu timiseya tepo va ngati gu khavo tshaledwe khu migima nya yidugwana gasi gu vbanya. Uye wari, khuye: “Si ngu garadza gu hunga makungo maningano khu mathumelo nya madwali ni simbe silo. Ganiolu, hi si kodzide gu mana gurula ga giemo gegi nyo garadze khu gu gombeya tepo yatshavbo.” Luis ni mwangadzi waye va gu ganeya gu khavo, va di gu gombeya tepo yatshavbo ga Jehovha khu monyo watshavbo, va lomba gu a va ninga gurula mapimoni ni monyoni, va bwe va lomba guti gasi gu hunga makungo nya yadi. Nigu va wonide giphaso gyaye. Wa gu ba u emisana ni gigaradzo nyo khaguri, gombeya ga Jehovha. U napwa gurula ga Nungungulu na gu vhikeya monyo ni mapimo yago. — Rom. 12:12.

JEHOVHA A NA GU NINGA GUKHADZISEGA

7. Hi nga dzipwa kharini tepo hi tshanganago ni gigaradzo nya gikhongolo?

⁷ Gigaradzo. Tepo hi tshanganago ni gigaradzo nya gikhongolo si nga hi garadzeya gu ninganiseya, gu pimisa gwadi ni gu dzipwa khu ndziya nya yadi. Gufana ni ngalava yi dzudzwago khu mavimbi tepo yi vetago phuvbo nya yikhongolo, anethu gudzipwa gwathu gu nga vbindrugedza tepo hi tshangango ni sigaradzo nya sikhongolo. Ana a khumbugidwego gupheyani a gu ganeya gu khuye hwane nya gu ba Luis a fude, gudzipwa gwaye gu di vbindrugedza khu dzindziya nya gu hambane-hambane. Uye wari khuye: “Tepo nyi nga ba nyi dzipwa na nyi garadzegide ngudzu nyi di gu dzi pweya-wusiwana. Nigu nyi di gu vbisega ngudzu khu gu ba mwama wangu a fude.” Dzimbe dzitepo, Ana, a di gu dzipwa enga tepo a nga ba a yede gu hunga makungo nya silo si nga hadzi gu khathaledwa gwadi khu Luis. Uye gambe a di gu dzipwa nari vbakari nya yiphwa, na yi gu veta phuvbo nya yikhongolo. Jehovha a nga hi phasa kharini tepo hi dzipwago khu ndziya nya mba yadi?

8. Kha nga si khumbugidwego ga Isaya 33:6, Jehovha a gu hi tiyisegisa ginani?

⁸ Jehovha a gu hi phasa kharini? Uye a gu hi tiyisegisa gu khuye a na hi niga gukhadzisega. (Leri Isaya 33:6.) Tepo ngalava yi tshanganago ni phuvbo nya yikhongolo, yi nga pheya gu hana-hana khu ndziya nyo thavise ngudzu. Gasi ngalava yi si hanahani, nya dzingi dzakoni dzi na ni silo si ranwago pwani dziestabhilizadhori, dzi yi phasago gu mba hana-hana ngudzu ni gu avo va gu romo ngalavani va dzipwa na va gu vhikelegide ni gu khadzisega. Ganiolu, dziestabhilizadhori dzedzi, dza gu thuma tepo khiyo ngalava yi gimbiyago. Khu ndziya nyo fane, Jehovha a ngu hi ninga gukhadzisega tepo hi simamago gu mu thumeya khu gutumbega ha gu tshangana ni sigaradzo.

9. Dziferameta dzathu nyo peskizari khidzo dzi nga hi phasa kharini tepo hi garadzegago? (Wona fotu.)

 ⁹ Ginani hi yedego gu gira? Wa gu ba u emisana ni gudzipwa nya mba gwadi, gira satshavbo u si kodzago gasi u simama gu gombeya, gu hongola mitshanganoni ni gu hongola thumoni nyo tshumayele. Lisine gu kha wu na nga si kodza gu gira nya singi nga gale, ganiolu dundruga gu khuwe Jehovha kha vireyi gu hi gira esi hi gu mba si kodza. (Fananisa ni Luka 21:1-4.) Nigu gambe, dzi vegeye tepo nya gu gire gihevbulo nya muthu enga ni gu dundrugeya. Khu ginani? Kholu Jehovha a ngu thumisa hengeledzano yaye gasi gu hi ninga dzindrima ni dzivhidhyu dzi hi phasago gu woneleya gudzipwa gwathu tepo hi emisanago ni sigaradzo. Gasi gu mana esi u si vbwetago, u nga thumisa dziferameta nya gu pesquisar khidzo khu lidimi lago, nya nga JW Library, Índice de Publicações da Torre de Vigia ni Libhuku nyo peskizari khilo nya Dzifakazi dza Jehovha. Monika hi ganedego khuye gupheyani ganede khuye, tepo a nga ba a garadzega tutumede dziferameta nyo peskizari khidzo gasi dzi mu phasa. Khu giyeyedzo, a di peskizari lito “likhulo.” Dzimbe dzitepo, a di gu peskizari malito ma gu khayo, “gu liphedwa” mwendro “gutumbega.” Khu gu landreya, a di gu leri kala a dzipwa gwadi. Uye wari, khuye: “Tepo khiyo nyi nga pheya gu gira dzipeskiza, nyi di gu garadzega ngudzu, ganiolu tepo nyi nga ba nyi simama gu leri nyi di gu dzipwa na nyi gu wugaredwa khu Jehovha ni gu tugula gu kheni Jehovha a ngu nyi pwisisa.” Giphaso gegi gya Jehovha, gi nga gu phasa anuwe gu woneleya gudzipwa gwago ni gu simama na wu rude. — Ndzi. 119:143, 144.

JEHOVHA A NA GU SEKETEYA NI GU GU PHASA

10. Hi nga dzipwa kharini hwane nya gu ba hi dugeledwe khu gigaradzo nyo khaguri?

¹⁰ Gigaradzo. Hwane nya gu ba hi dugeledwe khu gigaradzo, adzina hi nga vbedza matshigu nyo khaguri na hi gu vbede tshivba ni gu mba dzipwa gwadi. Hi nga fana ni mututumi nya khongolo a khudugidego litundru, olu a ndzedeyago. Si nga hi garadzeya gu gira silo si nga ba si hi vbevbugeya gu gira mwendro gu mba manega ni gudogoreya nya gu gire silo hi nga ba hi si gola. Gufana ni Eliya si nga hi garadzeya gu khuga hi ema hi vbweta gu lala basi. (1 Dzipf. 19:5-7) Jehovha o tumbisa gu gira ginani tepo hi dzipwago na hi vbede tshivba?

11. Khu yevbini yimbe ndziya eyi Jehovha a hi phasago khiyo? (Ndzimo 94:18)

¹¹ Jehovha a gu hi phasa kharini? Uye a gu hi tumbisa gu hi seketeya. (Leri Ndzimo 94:18.) Gufana ni mututumi a dzi bayisidego a  vbwetago gu phasedzedwa khu makasiya gasi gu gimbiya, anethu hi ngu vbweta giphaso gasi gu simama na hi tiyide thumoni wa Jehovha. Ga siemo sesi Jehovha wari, khuye: “Eni, [Jehovha] Nungungulu wago, nyi ngu gu phara khu libogo lago la nyamudye, nyi gu embela, kheni, ‘U nga thavi, eni nyi ngu gu phasa.’” (Isa. 41:13) Pfhumu Dhavhidhe a gi wonide giphaso gegi. Tepo a nga ba a tshangana ni sigaradzo ni gu wugedwa khu valala, uye a di embeya Jehovha gu khuye: “Libogo Iago la nyamudye li ngu nyi tiyisa.” (Ndzi. 18:35) Ganiolu, Jehovha a na gu seketeya khu ndziya muni?

12. Jehovha o thumisa vamani gasi gu hi phasa tepo hi vbeyago tshivba?

¹² Dzitepo nya dzingi, Jehovha a ngu hi seketeya khu gu kutsa vambe gasi gu hi phasa. Khu giyeyedzo, tepo Dhavhidhe a nga dzipwa na vbede tshivba, pari yaye Jonatane yi di mu wuseya gasi gu mu tiyisa. (1 Sam. 23:16, 17) Khu ndziya nyo fane, Jehovha hathide Elizewu gasi gu phasa Eliya. (1 Dzipf. 19:16, 21; 2 Dzipf. 2:2) Muhuno, Jehovha a nga thumisa valongo, dzipari mwendro madhota gasi gu hi seketeya. Ganiolu, tepo hi garadzegago hi nga vbweta gu dzi hambanisa ni vambe, hi vbweta gu khala honga. Si olovelegide gu dzipwa kharato. Ginani hi yedego gu gira gasi gu seketedwa khu Jehovha?

13. Ginani hi yedego gu gira gasi gu wuyedwa khu giphaso gya Jehovha? (Wona fotu.)

¹³ Ginani hi yedego gu gira? Gira satshavbo u si kodzago gasi u si khali wenga. Tepo hi dzi hambanisago ni vambe hi nga pheya gu pimisa khethu basi ni ga sigaradzo hi tshanganago naso. Khu kharato, si na hi garadzeya gu hunga makungo nya yadi. (Mav. 18:1) Khu lisine, hatshavbo hi ngu dzina gu khala honga khu tepo nyo khaguri, ngudzu-ngudzu ho ba hi tshangana ni siemo nyo garadze. Ambari ulolo, ha gu dzi hambanisa ni vambe khu tepo nyo laphe hi na ba hi bomba gu phaswa khu vathu ava Jehovha a va hathidego gasi gu hi seketeya. Khu kharato, ambari so ba si garadza, dzumeya giphaso gya valongo vago, dzipari ni madhota. Va wone nga vathu ava Jehovha a va hathidego gasi gu gu phasa. — Mav. 17:17; Isa. 32:1, 2.

JEHOVHA A NA GU THAVELEYA

14. Siemo muni si nga hi girago hi thava?

¹⁴ Gigaradzo. Hi nga tshangana ni siemo si nga hi girago hi thava. Umo nya Bhibhiliya, sithumi nyo tumbege sa Nungungulu, si ngu ganeya khu dzitepo si nga garadzega khu gu thava valala vaso ni simbe silo. (Ndzi. 18:4; 55:1, 5) Khu ndziya nyo fane, hi ngu wugedwa xikwatuno, thumotuno, khu valongo vathu mwendro mufumo. Ethu adzina hi ngu thava gufa  khu kotani nya madwali nyo khaguri. Ga siemo sesi, hi nga dzipwa na hi thava ngudzu gufana ni gyanana nya gidugwana. Jehovha a gu hi phasa kharini ga siemo nya nga esi?

15. Guya khu Ndzimo 94:19, ginani egi Jehovha a na hi gireyago?

¹⁵ Jehovha a gu hi phasa kharini? Uye a ngu hi thaveleya ni gu hi tangadzisa. (Leri Ndzimo 94:19.) Ndzimo yeyi, yi nga hi gira hi dundrugeya khu gyanana nyo khaguri gi tandregago gu lala khu kotani nya gu thave gingulo. Nga dundrugeya papayi wagyo na gu hongola aya gi wugareya kala gi lala. Ambari gingulo gya gu engedzeya gu tshinga, igyo gi na dzipwa na gi vhikelegide ni gu thaveledwa. Tepo hi tshanganago ni giemo gi hi girago hi thava, hi nga vbweta gu wugaredwa khu ndziya nyo fananise khu Papayi wathu wa ndzadzini kala hi dzipwa na hi gu rude. Hi nga gira kharini gasi gu thaveledwa khu Jehovha?

16. Ginani hi yedego gu gira gasi hi wuyedwa khu gu thaveledwa ga Jehovha? (Wona fotu.)

¹⁶ Ginani hi yedego gu gira? Vbedza tepo nya yingi ni Jehovha khu gu gombeya gwaye ni gu leri Bhibhiliya. (Ndzi. 77:1, 12-14) Wa gu dzi olovedza gu gira isoso, si na gu vbevbugeya gu lomba giphaso gya Jehovha wa gu ba u garadzegide. Embeya Jehovha esi si gu girago u thava ni gu garadzega. Khu gu landreya, mu engiseye khu gu leri Lito laye Bhibhiliya u bwe u wona edzi li gu thaveleyago khidzo. (Ndzi. 119:28) Gu leri Bhibhiliya si na gu thaveleya, ngundzu-ngudzu wa gu ba u thava. Khu giyeyedzo, u nga mana gu thaveledwa ga libhuku la Joba, Ndzimo ni Mavingu, ni ga malito ya Jesu hi ma manago umo ga Matewu gipimo 6. Tepo u gombeyago ga Jehovha ni gu leri Lito laye, u na dzipwa na wu thaveledwa khuye.

17. Gutumba muni hi yedego gu manega nago?

¹⁷ Hi nga tumba gu khethu Jehovha a na hi phasa tepo yatshavbo hi tshanganago ni sigaradzo womini gwathu. Gima hi mwalo honga. (Ndzi. 23:4; 94:14) Jehovha o tumbisa gu hi vhikeya, gu hi ninga gukhadzisega, gu hi seketeya ni gu hi thaveleya. Na gu ganeya khu Jehovha, Isaya 26:3 wari, khuye: “Uwe Pfhumu Nungungulu, u ngu ninga gurula vathu mapimo yawe ma khedziselago Uwe, kholu va ngu tumba Uwe.” Khu kharato, tumba Jehovha ni gu gira satshavbo u si kodzago gasi u wuyedwa khu giphaso gyaye. Wa gu gira isoso, u na wusedza tshivba yago tepo u tshanganago ni sigaradzo.