1. Ginani gi gu teyago mapimoni tepo u dundrugeyago khu Jehovha?

 U DI NGA dundrugeya edzi Jehovha a gu idzo? Tepo u ganeyago naye khu nombelo, ginani gi gu teyago mapimoni? Kha hi si kodzi gu wona Jehovha, ganiolu Bhibhiliya yi ngu mu tshamuseya khu dzindziya nya dzingi. Jehovha a ngu ranwa gupwani ‘lihani ni muvhikeli’ ni “nilo wu tshungunulago.” (Ndzi. 84:11; Hebh. 12:29) Ezekiyeli a di tshamuseya gu khuye Jehovha a gu fana ni giwindri nya safira, simbi nya gukhedzige ni arco-íris. (Ezek. 1:26-28) Siyeyedzo sesi si thumisidwego gasi gu fananisa Jehovha, si nga hi hlamadzisa mwendro gu hi theya hwanga.

2. Ginani gi himbedzeyago vathu nyo khaguri gu hidzimeya ga Jehovha?

² Khu kotani nya olu hi gu mba wona Jehovha, si nga hi garadzeya gu khodwa gu khethu a ngu hi haladza. Vambe si ngu va garadzeya gu khodwa gu khavo Jehovha a ngu va haladza khu kotani nya olu va nga tshangana ni sigaradzo nya singi gale. Adzina saye, gima kha va manega ni papayi gasi gu va yeyedza lihaladzo. Jehovha a ngu pwisisa edzi hi dzipwago khidzo ni edzi si hi kuhago khidzo. Gasi gu hi phasa, uye a ngu ganeya khu makhalelo yaye nyo mbure omu nya Lito laye.

3. Khu ginani hi yedego gu hevbula gwadi khu lihaladzo la Jehovha?

³ Lito li tshamuseyago gwadi Jehovha, lihaladzo. Bhibhiliya yari khiyo: “Nungungulu lihaladzo.” (1 Joh. 4:8) Satshavbo a girago a gu kutswa khu lihaladzo. Lihaladzo la Nungungulu li na ni tshivba nya gu gireye silo nya sadi ni vale va gu mba mu haladza. (Mat. 5:44, 45) Avba nya ndrima yeyi, hi na hevbula gwadi khu Jehovha ni lihaladzo laye. Tepo hi hevbulago khu Nungungulu, hi na engedzeya gu mu haladza.

JEHOVHA A NGU HI HALADZA NGUDZU

4. Pweya-wusiwana wa Jehovha wu nga gu phasa kharini? (Wona fotu.)

⁴ “Jehovha na ni pweya-wusiwana nya wukhongolo.” (Jak. 5:11)  Omu nya Bhibhiliya, uye a gu dzi fananisa ni mamayi a gu na ni pweya-wusiwana. (Isa. 66:12, 13) Dundrugeya mamayi nyo khaguri a khathaleyago gyanana gyaye khu ndziya nya lihaladzo. Uye a gu gi wugareya a bwe a ganeya nagyo khu ndziya nya yadi. Tepo gi liyago mwendro gupwa guvbisa, a gu zama gu wona gu khuye gi na ni satshavbo gi si vbwetago. Tepo hi garadzegago, hi nga phaswa khu lihaladzo la Jehovha. Muembi nya dzindzimo a di lova gu khuye: “Vbakari nya sigaradzo si tadego monyoni gwangu, uwe, U ngu tangadzisa hefemulo wangu.”— Ndzi. 94:19.

5. Lihaladzo la Jehovha la gu tshamuseya ginani gwago?

⁵ Jehovha tumbegide. (Ndzi. 103:8) Uye kha na nga hi tsukula ha gu gira silo nyo vivbe. Vaisrayeli va di gu khunguvanyiside Jehovha dzitepo nya dzingi. Ganiolu, tepo va nga garadzega khu silo nya mba sadi va nga ba va giride va bwe va ema gu gira silo soso, Jehovha a di va tiyisegisa khu gu va embeya gu khuye: “U ngu golega mahoni gwangu, ni gu zundzega, gambe nyi gu gode.” (Isa. 43:4, 5) Lihaladzo la Jehovha kha la vbindrugedza. Ethu tepo yatshavbo hi nga li tumba. Ambari ho ba hi giride sighoho nya sikhongolo, Jehovha kha na nga hi tsukula. Tepo hi dzi layago hi bwe hi bweleya ga Jehovha, hi na wona gu khethu a ngu hi haladza. Uye a gu hi tumbisa gu hi “divaleya khu gu vbeleya.” (Isa. 55:7, NM) Bhibhiliya ya gu tshamuseya gu khiyo gu divaledwa gogu gu ngu hi ninga ‘dzinangu nya gupepe dzitago khiyo ga Jehovha.’ — Mith. 3:19.

6. Zakariya 2:8 a gu hi hevbudza ginani khu Jehovha?

⁶ Leri Zakariya 2:8. Khu kotani nya olu a hi haladzago, Jehovha a ngu pwisisa edzi hi dzipwago khidzo nigu a gu vireya khu maho nyo fuviye gasi gu hi vhikeya. Uye a ngu vbisega tepo hi vbisegago. Khu kharato, hi nga tiyisega gu khethu uye a na hi hlamula tepo hi gombeyago gu khethu: “Nyi vegise kha nga ndzololo nya liso Iago.” (Ndzi. 17:8) Liso gilo nya wukheta ni lisima avba nya givili gyathu. Khu kharato, tepo Jehovha a hi fananisago ni ndzololo nya liso laye, sa gu fana ni gu ba a ganeya gu khuye, ‘Oyu a gireyago silo nyo vivbe vathu vangu, a gu kuha gilo nya lisima gwangu.’

7. Khu ginani hi yedego gu tiyisa gutumba gwathu avba nya lihaladzo la Jehovha?

⁷ Jehovha o vbweta gu khuye u tiyisega gu khuwe a ngu gu haladza. Ganiolu, uye a ngu dziti gu khuye khu kotani nya sigaradzo u tshanganidego naso gale, u nga dzi wudzisa gu khuwe ina a ngu gu haladza gani? Mwendro adzina saye hi ngu tshangana ni sigaradzo olu,  si lingago gutumba hi gu nago khu lihaladzo la Jehovha. Ginani gi na tiyisago gutumba gwathu? Khu gu hevbula edzi Jehovha a yeyedzidego khidzo lihaladzo Jesu, ava va todzidwego ni ethu hatshavbo.

JEHOVHA A GU YEYEDZA KHARINI LIHALADZO LAYE

8. Khu ginani Jesu a nga ba a tiyisega khu lihaladzo la Papayi waye?

⁸ Jehovha ni Jesu va vbanyide gumogo ndzadzini khu myaga nya yingi ni gu isoso si va giride va manega ni wupari ni lihaladzo nyo tiye. Kha nga hi hevbulago umo ga Matewu 17:5, Jehovha yeyedzide lihaladzo a gu nalo khu Jesu. Jehovha na ganede gu khuye: ‘Oyu khuye nyi mu haladzago.’ Ganiolu, gasi gu yeyedza gu khuye a di gu haladza Jesu a di mu rana gu khuye, ‘Gyanana gyangu nya gu golege.’ Jehovha a di gu dzipwa matshandza khu Jesu ni esi a nga ba a vbweta gu gira, a gu gu ningeya womi waye. (Efes. 1:7) Nigu Jesu kha nga ba kanakaneya lihaladzo la Papayi waye, wulangani nya isoso a di gu tiyisega khilo. Uye a di ganeya khu gu phindra-phindra khuye Papayi waye a ngu mu haladza. — Joh. 3:35; 10:17; 17:24.

9. Khu levbini lito li tshamuseyago lihaladzo la Jehovha khava va todzidwego? Tshamuseya. (Varoma 5:5)

⁹ Jehovha a ngu yeyedza gambe lihaladzo laye ga ava va todzidwego. (Leri Varoma 5:5.) Wona lito li gu khilo “li guhudwe.” Referensiya nyo khaguri ya gu li tshamuseya gu khilo “hi teye nga gitshongwana.” Lito leli la gu yeyedza gwadi lihaladzo eli Jehovha a gu nalo khava va todzidwego. Ava va todzidwego va ngu dziti gu khavo va ngu ‘haladzwa khu Nungungulu.’ (Judha 1) Mupostoli Johane ganede edzi a nga ba a dzipwa khidzo tepo a nga lova gu khuye: “Wonani lihaladzo a hi haladzidego khilo Papayi, nyo bwe hi ranwa pwani hi sanana sa Nungungulu!” (1 Joh. 3:1) Ina lihaladzo la Jehovha la gu hegeya ga ava va todzidwego? Ahihi, Jehovha yeyedzide gu khuye a ngu hi haladza hatshavbo.

10. Gilo muni nya lisima Jehovha a giridego gasi gu yeyedza gu khuye a ngu gu haladza?

¹⁰ Gilo muni nya lisima Jehovha a giridego gasi gu yeyedza gu khuye a ngu hi haladza? Dzegiso. Khu gu thumisa uwo, Jehovha a yeyedzide lihaladzo nya likhongolo guvbindra ni wevbini muthu. (Joh. 3:16; Rom. 5:8) Jehovha a di ningeya Gyanana gyaye nyo gigole, a gi dzumeleya gu gi feya vathu vatshavbo gasi hi divaledwa sighoho sathu hi bwe hi khala dzipari Dzaye. (1 Joh. 4:10) Tepo hi yago hi dundrugeya khu tengo Jehovha ni Jesu va wu livbidego, ha gu engedzeya gu pwisisa edzi va hi haladzago khidzo. (Gal. 2:20) Dzegiso kha wa livbwa basi kholu wu nga ba wu vbwetega, ganiolu wu di livbwa khu gu kutswa khu lihaladzo. Jehovha a yeyedzide gu khuye a ngu hi haladza khu gu ningeya egi gi nga ba giri ni lisima gwaye, a gu Jesu. Jehovha dzumelede Gyanana gyaye gi tshaniseka ni gufa khu kotani yathu.

11. Ginani hi gi hevbulago ga Jeremiya 31:3?

¹¹ Jehovha kha hi yeyedzi basi lihaladzo laye, uye a gu hi embeya gambe edzi a hi haladzago khidzo. (Leri Jeremiya 31:3.) Jehovha a gu hi rana iyo gwaye kholu a hi haladzago. (Fananisa Dhewuteronome 7:7, 8.) Gimwalo gilo ambari muthu a nga hi hambanisago ga lihaladzo leli. (Rom. 8:38, 39) Lihaladzo leli la gu gu gira u dzipwa kharini? Leri Ndzimo 23 ni gu wona edzi Dhavhidhe a dzipwidego khidzo khu lihaladzo la Jehovha ni edzi si hi kuhago khidzo.

LIHALADZO LA JEHOVHA LA GU GU GIRA U DZIPWA KHARINI?

12. U nga tshamuseya kharini Ndzimo 23 khu malito nya madugwana?

¹² Leri Ndzimo 23:1-6. Omu ga Ndzimo 23, Dhavhidhe yeyedzide gu khuye a ngu tumba gu khuye Jehovha a ngu mu haladza ni gu mu khathaleya. Uye tshamusede wupari a nga ba ari nawo ni Jehovha, oyu a nga ba a mu rana gu khuye Muhavise waye. Dhavhidhe dzipwide na vhikelegide ga Jehovha a bwe a mu tumba khu gu vbeleya. Dhavhidhe a di gu dziti gu khuye Jehovha  a di hadzi gu mu yeyedza lihaladzo tshigu ni tshigu guvbanyani gwaye. Ginani gi nga mu gira a tumba Jehovha?

13. Khu ginani Dhavhidhe a nga ba a tiyisega gu khuye Jehovha a di hadzi gu mu khathaleya?

¹³ “Kha nyi na [nga] keneledwa khu gilo.” Dhavhidhe a di gu dzipwa na khathaledwa, kholu Jehovha tepo yatshavbo a di gu mu ninga satshavbo a nga ba a si vbweta. Dhavhidhe a di gu dziti gambe gu khuye Jehovha a diri pari yaye nigu a di gu tsakedwa khuye. Khiso si nga mu gira a tiyisega gu khuye ambari gyo dugeleya ginani mindru watshigu, Jehovha a di hadzi gu mu khathaleya. Khu kotani nya olu Dhavhidhe a nga ba a tumba gu khuye Jehovha a ngu mu haladza nigu a di hadzi gu mu khathaleya, isoso si mu phaside gu mba garadzega, ganiolu a tsaka.— Ndzi. 16:11.

14. Jehovha a nga hi khathaleya kharini khu lihaladzo?

¹⁴ Jehovha a ngu hi haladza, ngudzu-ngudzu tepo hi tshanganago ni sigaradzo womini. Claire, a a thumedego Bheteli khu gipimo nya 20 myaga ni gu vbindra, a di vbeya tshivba tepo ndranga yaye yi nga tshangana ni sigaradzo nya singi. Papayi waye a di vetwa khu trombhozi, moyo nya vandriyaye nya vanyamayi a di duswa libandlani nigu ndranga yaye yi di luza thumo wawe ni nyumba yawe. Jehovha yeyedzide kharini gu khuye a ngu va khathaleya khu lihaladzo? Claire wari, khuye: “Jehovha khathalede ndranga yathu khu gu hi ninga esi hi nga ba hi si vbweta tshigu ni tshigu. Dzimbe dzitepo, Jehovha a di gu hi ninga nya singi guvbindra esi hi nga ba hi si vbweta. Dzitepo nya dzingi, nyi di gu dundrugeya khedzi Jehovha a hi phasidego khidzo, nigu gima kha nyi na nga divaledwa lihaladzo laye. Gu dundrugeya khesi si nyi phaside gu simama gu thumeya Jehovha na nyi tsakide ambari nyo tshangana ni gevbini gigaradzo.”

15. Khu ginani Dhavhidhe a nga dzipwa na tangadzisidwe? (Wona fotu.)

 ¹⁵ ‘Uye a ngu nyi tangadzisa.’ Dzimbe dzitepo, Dhavhidhe a di gu dzipwa na garadzega khu kotani nya sigaradzo a nga ba a tshangana naso. (Ndzi. 18:4-6) Ambari ulolo, lihaladzo la Jehovha li mu tangadziside. Jehovha a di dzega pari yaye a ya yi “hefemudza panini, nya mwasi nya gunyuge” a bwe a yi yisa “matini nya gutenge.” Kha nga handro wakone, Dhavhidhe a di tiyiswa a bwe a simama gu thumeya Jehovha na tsakide.— Ndzi. 18:28-32.

16. Lihaladzo la Jehovha la gu gu tangadzisa kharini?

¹⁶ Khu ndziya nyo fane, muhuno, ‘ethu kha hi mbembiswi khu kotani nya wuhigo wa Pfhumu Nungungulu’ tepo hi tshanganago ni sigaradzo womini gwathu. (Gil. 3:22; Kol. 1:11) Wona giyeyedzo gya Rachel. Uye a pwide wuvi tepo mwama waye a nga mu diga ni gu diga Jehovha ndrani nya tungo nya COVID-19. Jehovha a mu phaside kharini? Uye a di khuye: “Jehovha a nyi giride nyi dzipwa na nyi gu haladzwa. Uye a di nyi ninga dzipari dzi nga ba dzi vbedza tepo ni eni, dzi nyi reseya guhodza, dzi nyi rumeya dzimensaji ni milowo, dzi nyi hegeya ni gu nyi dundrugisa gu kheni Jehovha a ngu nyi khathaleya. Nyi ngu bonga ngudzu Jehovha khu gu ba a nyi ningide ndranga yi nyi haladzago ngudzu.”

17. Khu ginani Dhavhidhe a nga ba a si ‘thavi gilo?’

¹⁷ “Kha nyi na [nga] thava gilo, kholu o womo vbafuvbi gwangu.” Dzitepo nya dzingi, womi wa Dhavhidhe wu di gu romo mhangoni, nigu a diri ni valala nya vangi nya tshivba. Ambari ulolo, lihaladzo la Jehovha li mu giride a dzipwa na vhikelegide. Dhavhidhe a di gu dziti gu khuye Jehovha a diri naye ga siemo satshavbo nigu isoso si mu tangadziside. Khu kharato, uye a di embeleya gu khuye: “[Jehovha] a nyi tshu[de] guthavani gwangu gwatshavbo.” (Ndzi. 34:4) Khu lisine, Dhavhidhe a di gu thava, ganiolu lihaladzo la Jehovha li diri ni tshivba guvbindra hwanga waye.

18. Gu tiyisega khu lihaladzo la Jehovha si na gu tiyisa kharini wa gu ba uri ni hwanga?

¹⁸ Lihaladzo la Jehovha li nga hi tiyisa kharini ho ba hi tshangana ni sigaradzo nya sikhongolo? Piyonera nyo khaguri nyo pwani khu Susi a gu ganeya edzi uye ni mwama waye va nga dzipwa khidzo tepo gyanana gyawe gi nga dzi tshwedza. Uye wari, khuye: “Tepo gi giregago gilo nya mba gyadi womini gwago, isoso si ngu kuha ngudzu nigu u nga thava gu duguledwa khu simbe silo nya mba sadi. Ganiolu, lihaladzo la Jehovha li di hi gira dzipwa gwadi nigu na hi vhikelegide.” Rachel, a khumbugidwego gupheyani wari, khuye: “Ga wutshigu nyo khaguri, monyo wangu wu di vbisa nyi bwe nyi garadzega ngudzu, khavbovbo nyi di gombeya ga Jehovha. Khu kharato, Jehovha a di rudzisa monyo wangu gu fana ni mamayi a degudzeyago gyanana gyaye, nyi bwe nyi mana  ligovbe. Gima kha nyi nga divala tepo yoyo.” Lidhota limwedo nyo pwani khu Tasos li vbedzide 4 myaga pasoni khu gu bomba gu beleya wusotshwa. Lihaladzo la Jehovha li mu phaside kharini? Uye wari, khuye: “Jehovha a di nyi ninga nya singi guvbindra esi nyi nga ba nyi si vbweta. Isoso si tiyiside gukhodwa nyi gu nago khuye. Nigu gambe, khu gu thumisa liphuvbo laye nya guage, Jehovha a di nyi ninga litsako ambari tepo nyi nga ba nyi garadzega. Isoso si nyi phaside gu wona gu kheni tepo nyi engedzeyago gu tumba Jehovha, nyi na engezeya gupwa lihaladzo laye. Khu kharato, nyi di pheya gu thuma kha nga piyoneru nya tepo yatshavbo na nyi romo pasoni.”

HIDZIMEYA GA NUNGUNGULU NYA LIHALADZO

19. a) Guti gu khethu Jehovha a ngu hi haladza si nga kuha kharini esi hi ganeyago omu nya milombelo yathu? b) Malito muni ma tshamuseyago lihaladzo la Jehovha ma gu kuhago ngudzu? (Wona kwadru yi gu khiyo: “ Malito ma hi phasago gupwa lihaladzo la Jehovha.”)

¹⁹ Satshavbo siyeyedzo hi bhudego khiso avba sa gu yeyedza gu khiso Jehovha, “Nungungulu nya lihaladzo,” a na ni ethu. (2 Kor. 13:11) Uye a dzi emisede gu hi phasa. Ethu hi ngu tiyisega gu khethu hi “randredwe khu lihaladzo laye nyo tumbege.” (Ndzi. 32:10) Tepo hi dundrugeyago khedzi Jehovha a hi yeyedzidego khidzo lihaladzo, ilo la gu khala nya lisine hi bwe hi dzipwa vbafuvbi gwaye. Hi nga gombeya gwaye na hi tshulegide hi bwe hi mu embeya edzi hi li vbwetago khidzo lihaladzo laye. Hi nga mu embeya sigaradzo sathu satshavbo na hi gu tiyisega gu khethu a ngu hi pwisisa nigu a dzi emisede gu hi phasa. — Ndzi. 145:18, 19.

20. Lihaladzo la Jehovha la gu hi phasa kharini gu hidzimeya gwaye?

²⁰ Gufana ni edzi hi ndrindredzedwago khidzo khu nilo matshigu nya girame, khu ndziya nyo fane lihaladzo la Jehovha li ngu hi ndrindredzeya. Ambari ulolo, lihaladzo la Jehovha li na ni tshivba nigu li vbelede. Khu kharato, tsaka, kholu Jehovha a ngu gu haladza. Nigu hi ngu kodza gu ganeya na hi tsakide gu khethu: “Nyi ngu mu haladza [Jehovha]”! — Ndzi. 116:1.