1. Khu ginani dzimbe dzitepo hi thavago?

 DZIMBE dzitepo hatshavbo hi ngu thava. Lisine gu gihevbulo gyathu nya Bhibhiliya gi hi tshude avba nya gu thave vafi, madhemoni ni gu thava esi si na giregago mindru watshigu. Ganiolu, hi ngo gu vbanya ga tepo gu giregago silo “nya guthise” nya nga dzinyimbi, wughevenga ni madwali. (Luka 21:11) Ethu gambe hi nga thava vathu, gu pata mifumo ni valongo vathu va wugeyago wukhozeyi nya lisine. Vambe va gu thava gu mba si kodza gu timiseya gigaradzo va tshanganago nagyo mwendro va na tshanganago nagyo mindru watshigu.

2. Tshamuseya esi Dhavhidhe a tshanganidego naso dhoropani ga Gati.

² Dzimbe dzitepo Dhavhidhe a di gu thava. Khu giyeyedzo, tepo Pfhumu Sawule a nga vbweta gu mu songa, Dhavhidhe a di tutumeya dhoropani ga Gati. Akisi, Pfhumu ya Gati, yi di tugula gu khiyo Dhavhidhe a diri lisotshwa nya tshivba li nga kulungedwa gupwani li songide “likhumi magumi mazana” (10 000) nya Vafilistiya. Dhavhidhe a di “thava” ngudzu. (1 Sam. 21:10-12) Uye a di gu garadzega khesi Akisi a nga hadzi gu mu gira. Dhavhidhe a si kodzide kharini gu pala hwanga waye?

3. Guya khu Ndzimo 56:1-3, 11, ginani Dhavhidhe a giridego gasi gu pala hwanga waye?

³ Ga Ndzimo 56, Dhavhidhe a gu tshamuseya edzi a dzipwidego khidzo tepo a nga ba a romo dhoropani ga Gati. Avba nya ndzimo yeyi, Dhavhidhe a gu tshamuseya gu khuye khu ginani a nga thava ni egi gi mu phasidego gu pala hwanga. Tepo a nga ba a thava, Dhavhidhe a di tumba Jehovha. (Leri Ndzimo 56:1-3, 11.) Dhavhidhe a diri ni sighelo nya sadi nyo tumbe Jehovha. Khu gu phaswa khu Jehovha, Dhavhidhe a di luga manu nya gu  dzi gire muthu nyo handruge. Akisi a di goroga a bwe a mu tutumisa, khu kharato Dhavhidhe a di vbuluga. — 1 Sam. 21:13–22:1.

4. Hi nga tiyisa kharini gutumba gwathu ga Jehovha? Ninga giyeyedzo.

⁴ Anethu hi nga pala hwanga ha gu tumba Jehovha. Ganiolu, hi nga tiyisa kharini gutumba gwathu ga Jehovha, ngudzu-ngudzu ha gu ba hiri ni hwanga? Wona giyeyedzo nyo khaguri. Wa gu tugula gu khuwe u na ni madwali nyo khaguri, gupheyani adzina saye u nga thava. Ambari ulolo, u nga pala hwanga wa gu tumba dhogodheya wago. Uye adzina saye a hawulugiside vathu nya vangi va nga ba vari ni madwali ya mamowo. Uye a nga gu engiseya gwadi tepo u mu tshamuseyago egi u gi thavago u bwe u dzipwa na gu khathaleya. Nigu a nga gu embeya silo nyo khaguri si nga phasa vambe gu hawuluga madwali yawe. Khu ndziya nyo fane, hi ngu tiyisa gutumba gwathu ga Jehovha tepo hi hevbulago esi a giridego, a girago olu ni esi a na hi gireyago mindru watshigu. Khiso Dhavhidhe a giridego. Tepo hi hevbulago khesi a ganedego omu ga Ndzimo 56, dundrugeya khedzi u nga tiyisago khidzo gutumba gwago ga Jehovha ni gu pala hwanga.

ESI JEHOVHA A GIRIDEGO

5. Tepo Dhavhidhe a nga ba a thava a dundrugede khu ginani? (Ndzimo 56:12, 13)

⁵ Ambari olu Dhavhidhe a nga ba a romo ga giemo nyo garadze, uye simamide gu dundrugeya khu silo nya sadi Jehovha a giridego gale. (Leri Ndzimo 56:12, 13.) Egi gilo Dhavhidhe a giredego womini waye watshavbo. Khu giyeyedzo, dzimbe dzitepo a di gu dundrugeya khesi Jehovha a si vangidego. Isoso si mu dundrugiside gu khuye Jehovha a na ni tshivba nya yikhongolo, nigu a ngu haladza ngudzu vathu. (Ndzi. 65:6-9) Dhavhidhe gambe a di gu dundrugeya khesi Jehovha a giredego vambe. (Ndzi. 31:19; 37:25, 26) Nigu ngudzu-ngudzu a di gu dundrugeya khesi Jehovha a mu giredego. Jehovha a phaside ni gu vhikeya Dhavhidhe gukhugeya wananani waye. (Ndzi. 22:9, 10) Khu lisine, gu dundrugeya khu silo sesi si phaside Dhavhidhe gu tiyisa gutumba gwaye ga Jehovha.

6. Ginani gi na hi phasago gu tumba Jehovha ha gu ba hipwa hwanga?

⁶ Wa gupwa hwanga dzi wudzise gu khuwe: ‘Ginani Jehovha a giridego?’ Dundrugeya khesi a si vangidego. Khu giyeyedzo, tepo hi ‘khedziseyago gwadi’ edzi Jehovha a  khathaleyago khidzo sirengo ni sifilori, a gu sivangwa si nga mba girwa khu mufananiso wa Jehovha nigu si gu mba mu khozeya, isoso si nga tiyisa gu tumba gwathu nya gu khethu Jehovha a na hi khathaleya. (Mat. 6:25-32) Dundrugeya gambe khesi Jehovha a giredego vakhozeyi vaye. U nga hevbula khu giyeyedzo nya Bhibhiliya gi yeyedzidego gukhodwa mwendro gu hevbula matimo nya githumi gya Jehovha gya matshigoni yathu. a Gu diga isoso, dundrugeya khedzi Jehovha a gu khathaledego khidzo. Uye a gu phaside kharini gu muti? (Joh. 6:44) Uye hlamude kharini milombelo yago? (1 Joh. 5:14) Wa gu wuyedwa kharini khu dzegiso wa Gyanana gyaye nyo golege? — Efes. 1:7; Hebh. 4:14-16.

7. Giyeyedzo gya Muprofeti Dhaniyeli gi phaside kharini Vanessa gu pala hwanga waye?

⁷ Ndriyathu moyo wa Haiti nyo pwani khu Vanessa b emisanide ni giemo nyo garadze. Uye a di gu khaleya gu ligaredwa ni gu rumeledwa dzimensaji khu mwama moyo wa zonani gwaye a nga ba a mu gurumedza gu haladzana naye. Vanessa a di mu embeya gu khuye ne khu bandrwa kha si na nga girega! Mwama wule a di goroga a pheya gu mu thurugiseya. Uye wari, khuye: “Nyi di thava ngudzu.” Vanessa pade kharini hwanga waye? Uye a di hunga makungo nyo khaguri gasi gu dzi vhikeya. Ndriyathu a dandridego khu tanga a di mu phasa khu gu ligareya dzipfhumu. Ganiolu, uye a di vega gambe gupima avba nya edzi Jehovha a vhikedego khidzo sithumi saye gale. Vanessa wari, khuye: “Muthu nyo pheye nyi nga dundrugeya khuye khu muprofeti Dhaniyeli. Uye dzudzugidwe phalani nya dzingala nari mwalo nandru. Ambari ulolo, Jehovha a mu vhikede. Nyi di diga satshavbo mandzani ga Jehovha. Hwane nya isoso, kha nya thava gambe.” — Dhan. 6:12-22.

DUNDRUGEYA KHESI JEHOVHA A GIRAGO OLU

8. Ginani egi Dhavhidhe a nga ba a tiyisega khigyo? (Ndzimo 56:8)

⁸ Ambari olu womi wa Dhavhidhe wu nga ba wu romo mhangoni Gati, kha dzumeleya gilo gi mu thavisa. Wulangani nya isoso, uye a di vega gupima avba nya esi Jehovha a nga ba a mu gireya ga tepo yile. Dhavhidhe a di gu wona edzi Jehovha a nga ba a mu hethedza khidzo, gu mu vhikeya ni gu pwisisa edzi a nga ba a dzipwa khidzo. (Leri Ndzimo 56:8.) Dhavhidhe gambe a diri ni dzipari dzi nga ba dzi mu tiyisa ni gu mu phasa, nya nga Jonatane ni Muphasi nya khongolo nya mhamba Ayimeleki. (1 Sam. 20:41, 42; 21:6, 8, 9) Ambari olu Pfhumu Sawule a nga vbweta gu mu songa, Dhavhidhe a di vbuluga. Uye a di gu tiyiseya gu khuye Jehovha a di gu siti gwadi esi si nga ba si mu giregeya ni edzi a nga ba a dzipwa khidzo.

9. Ginani egi Jehovha a gi wonago ga moyo ni moyo wathu?

⁹ Wa gu tshangana ni gilingo gi gu girago u thava, dundruga gu khuwe Jehovha a ngu wona gilingo gyogyo ni edzi u dzipwago khidzo. Khu giyeyedzo, Jehovha kha wona basi edzi Vaisrayeli va nga ba va pharwa khidzo Egipito, ganiolu a wonide gambe “gutshaniseka” gwawe. (Ekiso. 3:7) Dhavhidhe a di embeleya gu khuye Jehovha a di gu wona “gu garadzega” ni “gutshaniseka gwaye.” (Ndzi. 31:7, NM) Nigu tepo Vathu va Nungungulu va nga ba va tshaniseka, ambari khu kotani nya makungo yawe nya mba yadi, “uye a di tshaniseka gumogo navo.” (Isa. 63:9) Wa gu ba u thava, Jehovha a ngu pwisisa edzi u dzipwago khidzo, nigu a dzi emisede gu gu phasa gu pala hwanga wago.

10. Silo muni si na gu phasago gu wona gu khuwe Jehovha a ngu khathala khuwe, nigu a na gu phasa gu emisana ni gevbini gilingo?

 ¹⁰ Wa gu ba u tshangana ni gilingo, adzina si nga gu garadzeya gu wona edzi Jehovha a gu phasago khidzo. Ginani u nga girago? Lomba Jehovha a gu phasa gu wona edzi a gu phasago khidzo. (2 Dzipf. 6:15-17) Dzi wudzise gu khuwe: Ina yomo ganelo mwendro hlamulo wu ningedwego mitshanganoni nya libandla wu gu tiyisidego? Lomo libhuku, vhidhiyu mwendro muzika yi gu tiyisidego? Womo ndriyathu a nga gu bhuleya lowo nyo khaguri wu tiyisago? Adzina hi nga divaledwa khu lihaladzo hi yeyedzidwego khu vandriyathu ni gu tiyiswa hi gu manidego umo nya milowo. Ambari ulolo, esi siningwa nya lisima hi ningwago khu Jehovha. (Isa. 65:13; Marko 10:29, 30) Isoso sa gu yeyedza gu khiso a ngu khathala ngudzu khuwe. (Isa. 49:14-16) Ni gu yeyedza gu khiso a ngu ninganedwa khu gu u mu tumba.

11. Ginani gi phasidego Aida gu pala hwanga waye?

¹¹ Aida a vbanyago Senegal, vegide gupima avba nya edzi Jehovha a mu phasidego khidzo tepo a nga ba a tshangana ni gilingo. Kha nga olu a nga ba ari gyanana nya koma, vavelegi vaye va di gu vireya gu khavo a mana dzitsapawu nya dzingi gasi a kodza gu dzi sayisa ni gu va sayisa navo. Ganiolu, hwane nya gu ba a vbevbugiside womi waye gasi gu khala piyonera, Aida a di tshangana ni gigaradzo nya gu hamuge dzitsapawu. Ndranga yaye yi di mu zangareya yi bwe yi mu wugeya. Uye wari, khuye: “Nyi di gu thava gu mba si kodza gu phasa vavelegi vangu ni gu nyenywa khu vatshavbo. Nyi di bwe nyi singedza Jehovha khu satshavbo si nga ba si nyi dugeleya.” Khu gu landreya, a di engiseya ganelo nyo khaguri mitshanganoni. A di khuye: “Muvegi nya ganelo a di hi dundrugisa gu khuye Jehovha a ngu siti esi si hi girago hi garadzega ni gu thava. Vbadugwana-vbadugwana, khu gu phaswa khu madhota ni vandriyathu, nyi di rudziswa khu lihaladzo la Jehovha. Nyi di pheya gu gombeya na nyi gu tiyisega gu kheni Jehovha a na nyi phasa, nigu nyi pwide gurula nya gukhongolo tepo nyi nga ba nyi wona mihlamulo nya milombelo yangu.” Khu gu gimbiya nya tepo, Aida a di mana thumo wu nga mu ninga dzitsapawu nyo eneye gasi gu a simama gu thuma kha nga piyonera ni gu phasa vavelegi vaye ni vambe vathu. Uye a gu hegisa khu gu ganeya gu khuye: “Nyi hevbulede gu tumba Jehovha  khu gu vbeleya. Olu, hwane nya gu ba nyi gombede, hwanga wangu wa gu phalalega.”

ESI JEHOVHA A NA GIRAGO MINDRU WATSHIGU

12. Guya khu Ndzimo 56:9, ginani egi Dhavhidhe a nga ba a tiyisega khigyo?

¹² Leri Ndzimo 56:9. Livhesi leli la gu ganeya khu gilo gi phasidego Dhavhidhe gu pala hwanga waye. Ambari olu womi waye wu nga ba wu romo mhangoni, uye dundrugede khesi Jehovha a nga hadzi gu mu gireya. Dhavhidhe a di gu dziti gu khuye Jehovha a di hadzi gu mu vbulugisa khu tepo yakone. Kholu Jehovha a di gu ganede gu khuye Dhavhidhe a na khala Pfhumu yi nga hadzi gu landreya Israyeli. (1 Sam. 16:1, 13) Ga Dhavhidhe, satshavbo esi Jehovha a si tumbisidego si di hadzi gu tadzisega.

13. Ginani egi Jehovha a hi tumbisidego gu hi gireya?

¹³ Ginani Jehovha a tumbisidego gu gu gireya? Ethu kha hi vireyi gu khethu a hi vhikeya ga satshavbo sigaradzo sathu. c Ganiolu, dundruga gu khuwe satshavbo sigaradzo u tshanganago naso mafuni momu nyo vivbe, Jehovha a na si fuvisa mafuni nya maphya. (Isa. 25:7-9) Muvangi wathu a na ni tshivba nya gu wuse ava va fudego, gu hawulugisa madwali yathu ni gu fuvisa vawugeyi. — 1 Joh. 4:4.

14. Hi nga dundrugeya khu ginani?

¹⁴ Wa gu thava, dundrugeya khesi Jehovha a na girago mindru watshigu. Dundruga edzi u na dzipwago khidzo tepo Sathane a na fuviswago, vathu nyo vivbe va na fuviswago va bwe va tshikedzwa khu vathu nyo lulame ni tepo gu mba vbeleya gu na fuvago vbadugwana-vbadugwana. Giyeyedzo gi giridwego avba nya kongresu nya 2014 gi yeyedzide edzi hi nga dundrugeyago khidzo khu gutumba gwathu. Papayi nyo khaguri a di bhula ni ndranga yaye khu libhuku la 2 Thimoti 3:1-5 khuye silo si khumbugwago omu nya libhuku leli kha si na nga manega mafuni nya maphya kholu “womi wu na tsakisa, vathu va na gola vambe, va na gola silo nya liphuvbo, va na ba va ri vathu nya gu dzi vbevbugise, va na dzi nogisa, vathu nya gu dhumise Nungungulu, nya gu engise vavelegi, va nya gu bonga, va nya gu tumbege, va nya gu gola vambe vathu, va nya gu gole gurula, va nya gu ganeye gwadi khu vambe, va nya gu dzi phare, va nya mba na gihafane, va nya gu gola silo nya sadi, va tumbegago ga vambe, va nya mba banga mihungo, va nya gu gola gu tsakisa Nungungulu guvbindra gu dzi tsakisa, va na ba vari vathu va khozeyago Nungungulu na vari ni mavbanyelo nya yadi. Gimbileya vbafuvbi gwawe.” Ina u ngu bhula ni ndranga yago mwendro vandriyago khedzi womi wu na ba wuri idzo mafuni nya maphya?

15. Ginani gi nga phasa Tanja gu simama gutumbega ambari olu a nga ba ari ni hwanga?

¹⁵ Wona giyeyedzo gya ndriyathu nyo khaguri a khalago Norte ga Macedónia nyo pwani khu Tanja. Vavelegi vaye va mu wugede kholu a nga ba a hevbula Bhibhiliya. Ambari ulolo, gu dundrugeya khesi Jehovha a na girago mindru watshigu si mu phaside gu simama na tumbegide tepo a nga ba ari ni hwanga. Uye wari, khuye: “Iso nyi nga ba nyi si thava gu kheni si na girega, si giregide. Tepo yatshavbo nyi nga ba nyi hongola mitshanganoni mamayi wangu a di gu wuya a ta nyi veta. Vavelegi vangu va di gu nyi thurugiseya gu khavo nya gu khala Fakazi ya Jehovha va na nyi songa.” Khu gu hegisa, Tanja a di tutumiswa khu ndrangani. Ginani a nga gira? Wari, khuye: “Nyi di vega gupima avbo nya litsako nyi na li manago womini wangu watshavbo nya gu simama na nyi tumbegide. Nyi di dundrugeya gambe khu tshatshazelo owu Jehovha a na nyi ningago mafuni nya maphya, ambari nya gu luza ni gevbini gilo mafuni momu. Nigu satshavbo silo nyo vivbe si na divadwa.” Tanja a di simama na tumbegide. Nigu khu gu phaswa khu Jehovha, manide wulanga nyo khale. Muhuno, Tanja tshadhide ni ndriyathu nyo tumbege  nigu vavavili vomo thumoni nya tepo yatshavbo.

TIYISA GUTUMBA GWAGO GA JEHOVHA

16. Ginani gi na hi phasago gu simama gutiya-hwambo tepo hi wonago giprofeto gi gomogo ga Luka 21:26-28 na gi gu tadzisega?

¹⁶ Ndrani nya tshanisa nya yikhongolo vathu vatshavbo va na “dzima khu hwanga.” Ganiolu, vathu va Nungungulu va na simama na va tumbegide ni gutiya-hwambo. (Leri Luka 21:26-28.) Khu ginani hi na tiyago-hwambo? Kholu hi na ba hi hevbulede gu tumba Jehovha. Tanja a khumbugidwego gupheyani a gu ganeya gu khuye, esi si mu dugeledego si mu phaside gu timiseya simbe siemo nyo garadze. Uye wari, khuye: “Nyi hevbude gu kheni Jehovha a na nyi phasa gu timiseya ni gevbini gigaradzo a bwe a nyi kategisa. Dzimbe dzitepo si nga gira gu khatshi vambe vathu khavo va thangeyago, ganiolu Jehovha khuye a gu na ni tshivba nya yikhongolo nya gu pale vatshavbo. Nigu ambari ha gu tshangana ni gevbini gigaradzo, Uye a na gi fuvisa.”

17. Lowo nya mwaga nya 2024 wu na hi phasa kharini? (Wona fotu nya kapa.)

¹⁷ Muhuno, gu na ni silo nya singi si nga hi girago hi thava. Gufana ni Dhavhidhe, kha hi yeli gu dzumeya gu padwa khu hwanga. Lowo nya mwaga nya 2024, nombelo wa Dhavhidhe a giridego ga Jehovha wu gu khuwo: “Nya gupwa hwanga, nya gu tumba uwe basi.” (Ndzi. 56:3) Gihevbuli gimwegyo nya Bhibhiliya gya gu ganeya esi khu livhesi leli: “Dhavhidhe kha nga ba a khaleya gu dundrugeya khu silo si nga ba si mu gira a thava mwendro gu vega gupima avba nya sigaradzo saye, ganiolu a di gu tumba Mutshudzisi waye.” Dundrugeya khu lowo nya mwaga wowu tepo khiyo u tshanganago ni sigaradzo. Dzi tshiyele tepo gasi gu dundrugeya khesi Jehovha a giridego gale, a girago olu ni esi a na girago mindru watshigu. Khu kharato, gu fana ni Dhavhidhe u nga ganeya gu khuwe: “Nyi ngu tumba Nungungulu, kha nyi thavi gilo.” — Ndzi. 56:4.