LITO li nga vbindrugedzedwa pwani “kareta” umo nya Wuvbindrugedzeyi nya Mafu nya Maphya li nga thula ni yevbini movha. (Mith. 8:28, 29, 38) Ambari ulolo, sa gu wonegisa gu khatshi Muetiyopi kha nga ba a gimbiya khu kareta nya yidugwana nya nga idzo dzi nga ba dzi thumiswa umo nya dzinyimbi, ganiolu a di gu gimbiya khu kareta nya yikhongolo. Wona sighelo nyo khaguri si hi girago hi tiyisega khu isoso.

Muetiyopi a diri githumi nya lisima gi nga ba gi gimbiya mipfhuka nya yikhongolo. Uye a diri “muphasedzeyi wa Kandasi, pfhumu nya nyamayi ya Etiyopiya. [Nigu] khuye a nga ba a thangeya thomba yaye yatshavbo.” (Mith. 8:27) Etiyopi wa gale wu di gu pata Sudão wa matshigoni yathu ni gipandre nyo khaguri gya Egipto. Ambari olu nya gu mwama yoyu adzina saye kha thumisa kareta mweyo gasi gu endra, uye a diri ni silo nya singi a nga ba a si vbweta gasi gu gira liendro laye. Dzimbe dzikareta dzi nga ba dzi thumiswa ga lizana myaga nya gupheye matshigoni yathu gasi gu vbageya vathu, dzi di gu pfhuledwe khu matendra. Wumbe tshamuselo nya libhuku la Mithumo wa gu ganeya gu khuwo: “Dzikareta dzedzi dzi di gu vbageya silo nya singi, dzi di gu khadzisegide gwadi nigu dzi di gu gira gu liendro li gimbiya gwadi.”

Muetiyopi a di gu leri tepo khiyo Filipi a nga mu hidzimeleya. Matimo ma gu ganeya gu khayo: “Filipi a di tutuma a hongola bambe nya kareta, khavbovbo apwa thenwa wule na gu leri malito ya muprofeti Isaya khu lito nyo khugege.” (Mith. 8:30) Dzikareta nya gu endre khidzo kha dza girwa ni makodzelo nya gu vhule ngudzu. Khu gu ba kareta yi gimbiya vbadugwana-vbadugwana, kha ya gira basi gu thenwa wule a si kodza gu leri, ganiolu yi giride gu Filipi a kodza gu yi vboheya na gu gimbiya khu mawundro.

Muetiyopi “a di lomba gu khuye Filipi a lita a khala naye.” (Mith. 8:31) Dzikareta dzi nga ba dzi thumiswa gasi gu tutuma khidzo, vagimbidzisi vakone va di gu gimbidzisa na va emide. Ganiolu, umo nya dzikareta nya gu endre khidzo wu di hadzi manega wulanga nya wadi gasi thenwa ni Filipi va khala.

Guya khesi libhuku la Mithumo gipimo 8 li ganeyago ni mambe matimo, mabhuku yathu matshigwanaya ma gu yeyedza dzifotu nya Muetiyopi na khade umo nya kareta nya yikhongolo nasiri umo nya kareta nya yidugwana nya nyimbi mwendro nyo tutumi khiyo.