1. Khu ginani hi nga ganeyago gu khethu Jehovha khuye mune nya silo satshavbo? (Wona foto vbatshani.)

SILO satshavbo sa gu lumba Jehovha! A nguti “dzindzadzini gwatshavbo, ni mafuni ni satshavbo si guromo umo.” (Dhewuteronome 10:14; Gutuledwa 4:11) Kha nga olu Jehovha a vangidego vathu, hatshavbo hi thomba yaye. (Ndzimo 100:3) Ambari ulolo, ndrani nya matimo nya vathu, Nungungulu a ngu hatha vathu nyo khaguri khu ndziya nyo hathege gasi gu lumba uye.

2. Khu guya khu Bhibhiliya, khu vamani va lumbago Jehovha khu ndziya nyo hathege?

² Khu giyeyedzo, Ndzimo 135 ya gu tshamuseya vakhozeyi nyo tumbege va Jehovha va Israyeli wa gale kha nga “thomba yaye.” (Ndzimo 135:4) Nigu, Hoseya profetide gu khuye vathu nyo khaguri va nga ba va siri vaIsrayeli va di hadzi khala vathu va Jehovha. (Hoseya 2:23) Giprofeto gyogyo gi tadzisegide tepo Jehovha a nga pheya gu hatha vathu va nga ba va siri vaIsrayeli gasi gu fuma ndzadzini ni Kristo. (Mithumo 10:45; Varoma 9: 23-26) Vathu vovo nyo todzwe khu liphuvbo nya guage va gu ranwa pwani “lihundzu li agisedwego.” Avo ‘vathu va lumbago’ Jehovha. (1 Pedro 2:9, 10) Ganiolu ahati maKristo yatshavbo nyo tumbege ya muhuno ma vireyago gu vbanya mafuni kala gupindruga? Jehovha a gu va rana khuye “vathu vangu” ni “sihathwa sangu.” — Isaya 65:22.

3. a) Khu vamani va gu na ni wupari nyo hathege ni Jehovha muhuno? b) Ginani hi na ganeyago khigyo omu nya ndrima yeyi?

³ Muhuno, “tshambi dugwana,” wu gu na ni gutumba nyo vbanye ndzandzini kala gupindruga gumogo ni “dzimbe dzinvuta,” dzi gu na ni gutumba nyo vbanye mafuni kala gupindruga, vo khozeya Jehovha gumogo kha nga “liphandro limwedo mwendro tshambi moyo.” (Luka 12:32; Johane 10:16) Gu vbwetega gu hi yeyedza Jehovha gu khethu hi ngu bonga ngudzu kholu hi gu ni wupari nyo hathege naye. Omu nya ndrima yeyi, hi na ganeya khedzi hi nga yeyedzago khidzo gubonga ga Jehovha khu lithomo lolo nyo hathege.

4. Hi nga mu bonga kharini Jehovha kholu a hi dzumeleyago gu manega ni wupari naye, nigu Jesu giride kharini sasimweso?

⁴ Ha gu yeyedza gubonga gwathu ga Jehovha tepo hi dzi hendzeladzo gwaye hi bwe hi bhapatiswa. Khu kharato vatshavbo va ngu si wona gu khavo ethu a gu lumba Jehovha nigu hi dzi emisede gu mu engisa. (Vahebheru 12:9) Jesu giride sasimweso tepo a nga bhapatiswa. Ambari olu a nga ba a gira gipandre nya vathu va nga ba va dzi hendzeledzide ga Jehovha, uye a di dzi ningeya ga Jehovha. Khidzo saye ni gu ba a khuye: “Nyi ngu tsaka khu gu gira guhaladza gwago, Nungungulu wangu.” — Ndzimo 40:7, 8.

5, 6. a) Ginani a nga ganeya Jehovha tepo Jesu a nga bhapatiswa? b) Giyeyedzo muni gi nga hi phasago gu pwisisa edzi Jehovha a dzi pwago khidzo khu gudzihendzeledza gwathu?

⁵ Jehovha dzi pwide kharini tepo Jesu a nga bhapatiswa? Bhibhiliya yari khiyo: “Jesu na bhapatisidwe, a di duga khu matini. Avbovbo Ndzadzini gu di tulega, a wona Liphuvbo la Nungungulu na li gu relela kha nga lituva, li ta mbaka vbatshani gwaye. Khavbo lito nya gute khu Ndzadzini li di, khilo: ‘Oyu khu Mwamana wangu nya guhaladzege ngudzu, a nengedzisago monyo wangu.’” (Matewu 3:16, 17) Jesu a di gu lumba Nungungulu khu gale. Ganiolu Jehovha tsakide ngudzu tepo a nga wona gu khuye Jesu a di dzi emisede gu thumisa womi gasi gu thumeya Uye basi. Jehovha gambe a ngu tsaka tepo hi hendzeledzago womi wathu gwaye nigu a na hi kategisa. — Ndzimo 149:4.

⁶ Ganiolu Jehovha khuye mune nya silo satshavbo! Ginani hi nga mu ningago? Nga dundrugeya khu mwama nyo khaguri a gu na ni senge nyo mbure thembweni gwaye. Litshigu limwedo gyanana gyaye nya gidugwana nya gyadzyana gi hava gimwegyo nya senge soso gi ta mu ninga. Ambari olu senge si gu saye, papayi nya lihaladzo a ngu tsaka khu giningwa gyogyo. Gyo yeyedza gu khigyo gyanana gyaye gi ngu mu haladza. Genge gyogyo nyo ningwe khu gyanana gyaye gi hathegide ngudzu guvbindra esi simbe sa thembweni gwaye. Khu ndziya nyo fane, Jehovha a ngu tsaka tepo hi hendzeledzago womi wathu gwaye khu gudzina gwathu. — Ekisodha 34:14.

7. Malaki a gu hi phasa kharini gu pwisisa edzi Jehovha a dzi pwago khidzo khava va mu thumeyago khu gu dzina?

 ⁷ Leri Malaki 3:16. Khu ginani si gu sa lisima ngudzu gu hendzeledza womi wago ga Jehovha u bwe u bhapatiswa? Lisine gu nu ngari ndrani ga mamayi, uwe dza u di gu lumba Muvangi wago, Jehovha. Ganiolu, nga dundrugeya basi khedzi Jehovha a na tsakago khidzo wa gu mu dzumeya kha nga Pfhumu yago u bwe u dzi hendzeledza gwaye! (Mavingu 23:15) Jehovha a ngu vati ava va mu thumeyago khu gudzina a bwe a lova malina yawe omu nya “libhuku nya sialakanyiso.”

8, 9. Ginani egi Jehovha a gi lombago ga ava malina yawe ma lovidwego omu nya “libhuku nya sialakanyiso”?

⁸ Ho ba hi vbweta gu khethu malina yathu ma lowa khu Jehovha omu nya “libhuku nya sialakanyiso,” gyomo hi yedego gu gira. Malaki a di khuye hi yede gu thava Jehovha hi bwe hi tumba lina laye. Ha gu khozeya mumbe mwendro gimbe gilo, malina yathu ma na futwa libhukuni la Jehovha! — Ekisodha 32:33; Ndzimo 69:28.

⁹ Khu kharato kha si eneyi basi gu tumbisa gu gira gugola ga Jehovha ni gu bhapatiswa. Isoso silo hi girago gumogo basi, ganiolu gu khozeya Jehovha go yeyedzwa khu mavbanyelo yathu. Tshigu ni tshigu, hi yede gu yeyedza khu mithumo yathu gu khethu hi ngu engisa Jehovha. — 1 Pedro 4:1, 2.

10. Guhambana muni gu yedego gu wonega gwadi ga ava va thumeyago Jehovha ni ava va si mu thumeyigo?

¹⁰ Ga dzindrima dzi vbindridego, hi hevbude gu khethu Kayimi, ni Solomoni, ni vaIsrayeli va di gu dzi embeya gu khavo va di gu khozeya Nungungulu ganiolu va di si tumbegi gwaye. Siyeyedzo soso si hi hevbudzide gu khiso kha si eneyi gu ganeya basi gu khethu ha gu khozeya Jehovha. Gu vbwetega gu hi venga esi nya guvivbe hi gola esi nya sadi. (Varoma 12:9) Jehovha wari khuye gu na wonega gwadi guhambana “gu guromo ga vathu nya gululame ni vale nya guvivbedwe khu monyo, ga vathu va khozelago Nungungulu ni avo va gumba mu khozela.” — Malaki 3:18.

11. Khu ginani si yedego gu vbevbugeya vatshavbo gu wona gu khavo ethu ha gu khozeya Jehovha basi?

¹¹ Hi ngu mu bonga ngudzu Jehovha kholu a hi hathidego gu khala vathu vaye! Vathu nya vangi si ngu va vbevbugeya gu wona gu khavo hi ngu mu gola Jehovha. (Matewu 5:16; 1 Thimoti 4:15) Dzi wudzise gu khuwe: ‘Ina gutumbega gwangu ga Jehovha gu ngu wonega ga vambe? Ina nyi ngu tiya gu embeya vathu gu kheni nyi moyo nya Dzifakazi dza Jehovha?’ Nga dundrugeya khedzi Jehovha a nga hadzi goroga khidzo ha gu ba hi khala dzitshoni gu ganeya gu khethu ha gu lumba uye. — Ndzimo 119:46; leri Marko 8:38.

12, 13. Vambe va gu lemedziseya kharini vambe gu tugula gu khavo avo Dzifakazi dza Jehovha?

¹² Egi gi si tsakisigo khu gu dzimbe Dzifakazi dza gu pimedzeya “liphuvbo la mafuni momu.” Kha nga handro wakone, kha dzi hambani ngudzu ni ava va si khozeyigo Jehovha. (1 Vakorinto 2:12) “Liphuvbo la mafuni  momu” la gu gira vathu va dzi garadzeya gu tsakisa gudogoreya gwawe basi. (Vaefeso 2:3) Khu giyeyedzo, ambari olu hi ningwago wusingalagadzi nya wungi, vambe va ngo ambala khu ndziya nya mba na githawo. Va gu ambala sombo nyo rame ni gu wonegeya, gudzega ni mitshanganoni nya wuKristo. Mwendro va mburiseya mindzudzu yawe khu ndziya nyo vbindrise. (1 Thimoti 2:9, 10) Kha nga handro wakona, si nga garadzeya vambe guti gu khavo vathu vovo Dzifakazi dza Jehovha mwendro ne. — Jakobe 4:4.

¹³ Gu na ni simbe siemo esi Dzifakazi nyo khaguri dzi si yeyedzigo gwadi guhambana ni litigo. Khu giyeyedzo, omu nya sipfhitsha, vambe va ngu hana mwendro gu gira silo si gu mba dzumelega ga maKristo. Vambe va ngu thedzeya dzifoto dzawe ni gu loveteya silo si yeyedzago mapimo yawe nya litigo omu nya dzisayiti nya mabhulo. Si nga gira va si kawukwi libandlani nya wuKristo khu sighoho nya sikhongolo, ganiolu kha vari giyeyedzo nya gyadi ga vandriyawe va dzi garadzeyago gu dzi hambanisa ni litigo. — Leri 1 Pedro 2:11, 12.

14. Ginani hi yedego gu gira gasi gu vhikeya wupari wathu nyo hathege ni Jehovha?

¹⁴ Silo satshavbo mafuni si giredwe gu hi gira hi vega gupima avba nya “gudogorela nya givili, ni gudogorela nya maho, ni gu dzi gugumugisa khu kotani nya silo nya mafu.” (1 Johane 2:16) Ethu ha gu lumba Jehovha, khu kharato hi hambanide. Ha gu nyenya “mavbanyelo nyamba khodwa, ni gu navela silo nya mafu yaya,” hi “vbanya tigoni momu khu gu dzi phara, ni gululama, ni gutumbega ga Nungungulu.” (Tito 2:12) Mavbanyelo yathu yatshavbo, gupata ni maganelelo yathu, mahodzelo, maselelo, maambalelo, ni thumo gu vbwetega gu si wonega gwadi ga  vatshavbo gu khiso ha gu lumba Jehovha.— Leri 1 Vakorinto 10:31, 32.

15. Khu ginani hi yedego gu phara gwadi ni gu haladza maKristo makhwathu?

¹⁵ Edzi hi pharago khidzo vandriyathu si ngu yeyedza edzi hi wu ningago khidzo lisima wupari wathu ni Jehovha. Avo va gu lumba Jehovha nga ethu. Ha gu dundruga isoso, tepo yatshavbo hi na va phara gwadi ni gu va haladza. (1 Vatesalonika 5:15) Khu ginani isoso si gu sa lisima? Jesu embede valandreyi vaye gu khuye: “Khavbo vathu va na dzitigo nya gukhavo mu vapizane vangu, mwa gu golanani khu gyanu.” — Johane 13:35.

16. Ginani hi gi hevbulago avba nya Nayo wa Mosi maningano ni lihaladzo la Jehovha khu vathu vaye?

¹⁶ Giyeyedzo nyo khaguri gya omu nya Nayo wa Mosi gi nga hi phasa gu wona edzi hi yedego gu phara khidzo vambe libandlani. Omu nya tempele ya Jehovha, gu diri ni silo si nga ba si thumiswa basi omu nya wukhozeyi. Nayo wu di gu tshamuseya gwadi edzi vaLevhi va nga ba va yede gu khathaleya khidzo silo soso, nigu ni wevbini a nga ba a si landreyi sileletelo soso a di hadzi songwa. (Mitengo 1:50, 51) Jehovha a gu ba a khathade ngudzu khedzi vathu va nga ba va yede gu phara khidzo silo si nga ba si thumiswa omu nya wukhozeyi waye, kha hi ngo ganeya khedzi a khathalago khidzo khedzi vathu va pharago khidzo vakhozeyi vaye nyo tumbege! Uye a gu hi yeyedza edzi hi gu va lisima khidzo gwaye tepo a gu khuye: “Wule a mu kuhago a gu kuha ndzololwane nya liso laye.” — Zakariya 2:8.

17. Ginani egi Jehovha a gi ‘riyelago ndzeve ni gu gi engiseya’?

¹⁷ Malaki a di khuye Jehovha a ngu “riya ndzeve a yingisa” gasi gu wona edzi vathu va  pharago khidzo vambe. (Malaki 3:16) Jehovha a “ngu va ti avo va gu vaye.” (2 Thimoti 2:19) A nguti satshavbo hi girago ni gu ganeya. (Vahebheru 4:13) Ha gu mba phara gwadi vandriyathu, Jehovha a ngu si wona. Ganiolu hi nga tiyisega gambe gu khethu Jehovha a ngu hi wona tepo hi hakhago gwadi vapfhumba, hi yeyedzago wuhindzi, hi divaleyago, ni gu yeyedza wuwadi. — Vahebheru 13:16; 1 Pedro 4:8, 9.

18. Hi nga mu bonga kharini Jehovha kholu a hi hathidego gu khala vathu vaye?

¹⁸ Gu vbwetega gu hi yeyedza Jehovha edzi hi bongago khidzo kholu hi lumbago uye kha nga vathu vaye. Hi ngu dziti gu khethu gu hendzeledza womi wathu gwaye, gilo nya lisima ga satshavbo hi nga hungago gu gira. Ambari olu hi vbanyago “vbakari nya vathu nya guwegele nya guvivbedwe khu monyo,” hi nga simama na hi “agide nyambana gihoso” hi bwe hi wenengedza “kha nga myenge ya mafuni.” (Vafilipi 2:15) Khu kharato hi dzi emisede gu potsa ni gevbini gi nyenywago khu Jehovha. (Jakobe 4:7) Nigu hi ngu haladza ni gu ninga githawo vandriyathu kholu anavo va gu lumba Jehovha. — Varoma 12:10.

19. Jehovha a gu va tshatshazeya kharini ava va mu lumbago?

¹⁹ Bhibhiliya yi ngu tumbisa gu khiyo: “PFHUMU Nungungulu kha na diga vathu vaye.” (Ndzimo 94:14) Igyogyo gitumbiso nyo tiye. Ambari go dugeleya ginani, Jehovha a na ba ari ni ethu. Ambari ha gufa, kha na nga hi divala. (Varoma 8:38, 39) “Ha gu vbanya ha gu vbanyela Pfhumu, ha gufa gambe ha gufela Pfhumu. Kholu gani hi ngu vbanya, gani hi ngufa, ha gu lumba Pfhumu.” (Varoma 14:8) Hi virede khu maho nyo fuviye tepo eyi Jehovha a na wusago dzipari dzaye dzatshavbo nyo tumbege dzi fudego. (Matewu 22:32) Nigu ambari muhuno hi ngu dzi buza khu siningwa nya singi nyo tsakise sa Babe wathu. Kha nga yi ganeyago Bhibhiliya, “li kategide litigo lile Nungungulu a gu uye [Jehovha, NM], ni vathu a va hathidego gu khala thomba yaye.” — Ndzimo 33:12.