TEPO Jesu a nga hevbudza vapizane vaye gu tshumayela mahungu nya yadi, va gengedzide gu khuye khandri tepo yatshavbo vathu va na va engiseyago. (Luka 10:3, 5, 6) Khidzo saye ni ethu. Vambe vathu hi va manago adzina va na ni gigaha ambari maghilivindra. Tepo va yeyedzago makhalelo yoyo, si nga hi garadzeya gu va pweya wusiwana ni gu va tshumayela.

Muthu a pweyago wusiwana a ngu wona esi si vbwetegago ga vambe ni sigaradzo sawe, a va pweya a bwe a vbweta gu va phasa. Ganiolu ginani gi na dugeleyago ha gu vbeledwa khu pweya-wusiwana khu vathu hi va manago thumoni gwathu nyo tshumayele? Hi na vbeledwa khu sighingi sathu, iso si gu khiso, kha hi na nga dogoreya gu va tshumayela nigu hi na ba hiri mwalo ndziya nyo va phase. Hi nga fananisa sighingi sathu ni nilo. Gasi gu nilo wu khondra gwadi, gu vbwetega dzikhuni nya dzingi. Khu ndziya nyo fane, gasi gu sighingi sathu si tiya, gu vbwetega hi manega ni pweya-wusiwana! — 1 Vatesalonika 5:19.

Hi nga gira kharini gasi gu hi engedzeya gu pweya wusiwana vambe, ambari sa gu ba si garadza? Hi na ganeya khu siyeyedzo siraru hi nga si pimedzeyago: Jehovha, Jesu, ni Pawulo.

Vathu va ngu ganeya malipha maningano ni Jehovha khu myaga nya yingi. Ganiolu kala muhuno uye “khwadi ambari ga vale va si gu vadi, va si mu bongigo.” (Luka 6:35) A gu wu yeyedza kharini wuwadi waye? A gu laphiseya monyo vathu vatshavbo. Jehovha o vbweta gu khuye “vathu vatshavbo” va vbanyiswa. (1 Thimoti 2:3, 4) Ambari olu Nungungulu a nyenyago guvivba, vathu va na ni lisima gwaye nigu kha vbweti ni moyo afa. — 2 Pedro 3:9.

Jehovha a ngu dziti gu khuye Sathane khu gu gira vathu va khodwa malipha basi, khongolo. (2 Vakorinto 4:3, 4) Vambe va gu hevbudzwa malipha maningano ni Nungungulu gukhugeya wananani wawe. Khu kharato mapimiselo yawe ni edzi va dzi pwago khidzo si nga va garadzeya gu dzumeya lisine. Ganiolu Jehovha a ngu dzina gu va phasa. Ha gu dziti kharini?

Khu giyeyedzo, nga dundrugeya khedzi Jehovha a dzi pwidego khidzo khu vathu va dhoropani ga Ninivha? Ambari olu va nga ba vari ni maghilivindra, Jehovha a di embeya Jona khuye: “Ina kha nyi yeli gu pwela gisiro lidhoropa nya likhongolo la Ninivha, eli li gu na ni guvbindra lizana ni magumavili mazana vathu, va si kodzigo gu hambanisa gyandza gya nyamudye nigyo gya nyambade?” (Jona 4:11) Jehovha pwede wusiwana vathu vovo va nga ba va siti lisine khuye. Khu kharato a di rumeya Jona gasi gu ya va gengedza.

Anethu ha gu dzipwa khu ndziya yamweyo a dzi pwago khiyo Jehovha khu vathu. Va na ni lisima. Kha nga Jehovha, hi dongide gu va phasa gu muti ambari so wonega khatshi kha va na nga dzumeya lisine.

 Vathu va gu mba tsakeya mahungu yathu, gu vbwetega gu hi zama gu pwisisa gighelo gyakona. Adzina va na ni mawonelo nyo vivbe khu Bhibhiliya mwendro khu maKristo khu kotani nya olu va wonago vambe va dzi embeyago gu khavo maKristo na va gu gira silo nyo vivbe. Vambe adzina va pwide malipha maningano ni esi hi si khodwago. Vambe gambe adzina vo thava gu hegwa khu valongo vawe mwendro vathu va gipandreni gwawe va gu bhula ni ethu.

Vambe vathu hi mananago navo adzina va tshanganide ni sigaradzo si va khuhidego ngudzu. Misiyonariyo nyo pwani khu Kim wari khuye vathu nya vangi va gipandreni gwaye va emisanide ni nyimbi va bwe va luza silo sawe. Va diri mwalo gutumba khu wumindru. Va vbisegide nigu kha va tumbi muthu. Vathu va gipandreni gwaye va ngu oloveya gu himbedzeya Dzifakazi gu tshumayela. Litshigu limwedo Kim a di wugedwa na romo gutshumayelani.

Kim a gu simama kharini gu pweya wusiwana ambari tepo vathu va mu tshanisago? Tepo yatshavbo a gu zama gu dundruga Mavingu 19:11 a gu khuye: “Muthu nya mapimo kha vbiredzeli gu goroga.” Gu dundrugeya khesi si dugeledego vathu va gipandreni gwaye, sa gu mu gira a va pweya wusiwana. Nigu khandri vatshavbo a tshanganago navo va gu mba tsakeya. Omu nya gipandre gyogyo, a ngu mana maendro nyo bweleleye nya yadi.

Hi nga dzi wudzisa kharati: ‘Nari khatshi nyi di si liti lisine, nyi di hadzi rini nya guta tshumayedwa khu Dzifakazi dza Jehovha?’ Khu giyeyedzo, ahati nari khatshi hi di gu pwide malipha nya mangi khu Dzifakazi? Anethu adzina hi di hadzi hlamula khu ndziya nyo vivbe gu vbwetega gu hi pwedwa wusiwana. Jesu a di khuye gu vbwetega hi phara vambe khu ndziya hi vbwetago gu pharwa khiyo nethu. Khu kharato gu vbwetega gu hi pwisisa edzi vambe va dzi pwago khidzo hi va laphiseya monyo, ambari sa gu ba si garadza. — Matewu 7:12.

Mupostoli Pawulo yeyedzide gupweya-wusiwana ambari ga vathu va nga ba va si mu hakhi gwadi gutshumayelani. Khu ginani? Kholu a di gu dundruga gigale gwaye. A di khuye: “[Nyi diri] muvali, mutshanisi ni muhembululi. Ambari ulo, nyi mane wuhindzi kholu, nyi di gira khu wuhangi, gikhati nyi nga bani nyi si gu hakhi gukhodwa.” (1 Thimoti 1:13) Pawulo a di gu dziti gu khuye Jehovha ni Jesu va di mu girede wuhindzi nya wukhongolo. Khu kharato va pwisiside vathu va nga ba va vbweta gu mu himbedzeya gu tshumayela kholu a di gu tshukide a dzipwa nga avo.

Dzimbe tepo, Pawulo a di gu manana ni vathu va nga ba va bangelede avba nya sihevbudzo nya malipha. Isoso si mu giride a dzipwa kharini? Omu ga Mithumo 17:16, ha gu leri gu pwani tepo a nga ba a  romo Atena, a di “garadzega khu gu wona lidhoropa lile na li tade khu sihuru nya miphaso.” Ambari ulolo, Pawulo thumiside silo soso si nga ba si mu gorosa kha nga ndziya gasi gu hevbudza vathu. (Mithumo 17:22, 23) A di vbindrugedza matshumayelelo yaye a bwe thumisa dzindziya nyo hambanehambane gasi gu ganeya ni vathu nya mitumbunugo nyo hambanehambane gasi gu a “mana guvbanyisa vambe ni vambe.” — 1 Vakorinto 9:20-23.

Tepo hi tshumayelago vathu va gu mba dzumeya mwendro va gu na ni gukhodwa gu hosegidego, hi nga gira nga Pawulo. Hi nga thumisa esi hi si tigo khavo gasi gu va phasa gu hevbula “mahungu nya yadi nya silo . . . nya gutsakise.” (Isaya 52:7) Moyo nya ndriyathu nya nyamayi nya pwani khu Dorothy wari khuye: “Gipandreni gwathu, vathu nya vangi va gu hevbudzwa gu pwani Nungungulu vivbedwe khu monyo nigu a ngu tutumeya gu lamula. Nya gu zundza vathu vovo khu gukhodwa gwawe nyo tiye ga Nungungulu nyi vbedza nyi va yisa omu nya esi Bhibhiliya yi si ganeyago khu makhalelo nya lihaladzo ya Jehovha ni situmbiso saye khu wumindru.”

Gu vbwetega gu hi zama gu tiyisa vandriyathu tepo hi tshumayelago navo. Jessica wari khuye tepo a gomogo gutshumayelani ni vambe, moyo wawe a gu gimbiya a si tshangana, a gu zama gu mba ganeya khiso. Wulangani nya isoso, a gu ganeya khu silo nya sadi, nya nga mihandro nya yadi nya thumo wathu ambari olu vambe va si dzumeyigo.

Jehovha a ngu dziti gu khuye dzimbe dzitepo gu tshumayela dzi ngu wuya. Ganiolu a ngu tsaka ngudzu tepo hi pimedzeyago wuhindzi waye! (Luka 6:36) Khu lisine, Jehovha kha na nga pweya wusiwana ni gu laphiseya monyo vathu kala gupindruga. Hi nga tiyisega gu khethu uye a ngu liti gwadi litshigu nya gu rese mahegiso. Na hi ngo vireya isoso, thumo wathu khwa givbiredza. (2 Thimoti 4:2) Khu kharato hongoleni hi simame gu tshumayela khu sighingi ni gu pweya wusiwana “vathu vatshavbo.”