1. Khu ginani hi yedego gu dzi dongiseya gu tshaniswa?

GA Wutshigu waye nyo hegise na si gufi, Pfumu yathu Jesu a di khuye vatshavbo va hathago gu khala vapizane vaye va na nyenywa. (Joh. 17:14) Ambari muhuno, maKristo nyo tumbege ma ngu tshaniswa khava va wugeyago wukhozeyi nya lisine. (2 Thim. 3:12) Kha nga olu guhegisa nya litigo leli gu gomogo vbafuvbi, hi ngu vireya gu engedzeya gu wugedwa khu valala vathu. — Mat. 24:9.

2-3. a) Ginani hi yedego gu giti maningano ni hwanga? b) Hi na bhula khu ginani avba nya ndrima yeyi?

² Hi nga dzi dongiseya kharini olu gasi gu emisana ni gu tshaniswa? Kha si lombi gu hi khaleya gu dundrugeya khesi si na hi dugeleyago mindru ga tshigu. Kholu ho gira isoso, gu thava ni gu garadzega si nga hi vbedza tshivba. Ha gu khaleya gu dundrugeya khu silo nyo vivbe si nga hi dugeleyago mindru ga tshigu, hi na tala khu hwanga nyo bwe adzina hi diga gu thumeya Jehovha na hi nga si emisani ni sigaradzo. (Mav. 12:25; 17:22) Hwanga i naphwi nya wukhongolo wu thumiswago khu ‘nala wathu Sathane’ gasi gu zama gu hi wugeya. (1 Ped. 5:8, 9) Ina ka, ginani hi yedego gu gira olu gasi hi dzi dongiseya gu emisana ni gu tshaniswa?

³ Avba nya ndrima yeyi, hi na bhula khedzi hi nga tiyisago khidzo wupari wathu ni Jehovha, hi bwe hi wona gu khethu khu ginani si gu na ni lisima gu gira isoso olu. Hi na bhula gambe khesi hi nga girago gasi gu engedzeya gu tiya-hwambo gwathu. Nigu, khu gu hegisa hi na wona esi hi yedego gu si gira ha gu ba hi nyenywa khu vathu.

4. Khu guya khu Vahebheru 13:5, 6, hi yede gu tiyisega khu ginani nigu khu gighelo muni?

⁴ Tiyisega gu khuwe Jehovha a ngu gu haladza nigu gima kha na  nga gu diga. (Leri Vahebheru 13:5, 6.) Myaga yi vbindridego, Mukhedziseyi nyo khaguri ganede esi: “Muthu a mu tigo gwadi Nungungulu, a gu mu tumba ngudzungudzu tepo a tshanganago ni silingo.” Isoso lisine kamo! Gasi gu timiseya sigaradzo, hi yede gu haladza Jehovha ni gu mu tumba khu guvbeleya hi bwe hi si tshuki hi kanakaneya lihaladzo laye khethu. — Mat. 22:36-38; Jak. 5:11.

5. Ginani gi na gu gu phasago gu wona edzi Jehovha a gu haladzago khidzo?

⁵ Leri Bhibhiliya tshigu ni tshigu ni makungu nyo tiyise wupari wago ni Jehovha. (Jak. 4:8) Tepo u lerigo, vega gupima avba nya makhalelo nya yadi ya Jehovha. Zama gu pwisisa edzi Jehovha a gu haladzago khidzo tepo u hevbulago khesi a si ganeyago ni esi a girago. (Ekiso. 34:6) Vambe si ngu va garadzeya gu khodwa gu khavo Nungungulu a ngu va haladza kholu gima va si gu yeyedzwi lihaladzo khu muthu. Wa gu ba u dzipwa kharato, tshigu ni tshigu zama gu gira sasamedzo nya dzindziya edzi Jehovha a gu yeyedzago khidzo wuhindzi ni wuwadi. (Ndzi. 78:38, 39; Rom. 8:32) Tepo u dundrugeyago khu womi wago ni gu dundrugeya khesi u si hevbulago omu nya Lito la Nungungulu, u na tugula silo nya singi esi Jehovha a gu giredego. Tepo u bongago khesi Jehovha a gu gireyago, wupari wago naye wu na engedzeya gu tiya. — Ndzi. 116:1, 2.

6. Khu guya khu Ndzimo 94:17-19, gu gombeya khu monyo watshavbo si nga gu phasa kharini?

⁶ Gombeya tepo yatshavbo. Nga dundrugeya khu gyanana nyo khaguri gi gumbaredwego khu papayi wagyo. Igyo gyo dzipwa na gi tshulegide gu mu embeya ni gyevbini gi tshanganidego nagyo litshigu lolo kamo, gani silo nya sadi gani silo nyo vivbe. Anuwe u nga manega ni wupari nyo fane wa gu gombeya khu monyo wago watshavbo ga Jehovha tshigu ni tshigu. (Leri Ndzimo 94:17-19.) Tepo u gombeyago ga Jehovha “tula monyo wago u wu ningela watshavbo” u bwe u mu embeya satshavbo si gu theyago hwanga ni gu gu vangeya gugaradzega. (Gil. 2:19) Mihandro muni u na yi manago? U napwa “gurula ga Nungungulu gu dzi kodzago gu vboha ni omu hi si gu alakanyigo.” (Filp. 4:6, 7) Wa gu gombeya khu ndziya yoyo, u na tiyisa wupari wago ni Jehovha. — Rom. 8:38, 39.

7. Khu ginani u tiyisegago gu khuwe situmbiso sa Nungungulu maningano ni Mufumo waye si na tadzisega khu lisine?

⁷ Tiyisega gu khuwe gitumbiso nya mufumo wa Nungungulu gi na tadzisega khu lisine. (Mite. 23:19) Wa gu ba u si khodwi gu khuwe situmbiso sa Nungungulu si na tadzisega khu lisine, si nga vbevbugeya Sathane ni vathu vaye gu gu thurugiseya. (Mav. 24:10; Hebh. 2:15) U nga tiyisa kharini gutumba gwago avba nya Mufumo wa Nungungulu olu? Dzi ninge tepo nyo hevbule u bwe u gevisisa gwadi khu mufumo wa Nungungulu ni egi gi gu girago u tiyisega gu khuwe uwo wu nata khu lisine. Isoso si na gu phasa kharini? Nga wona giyeyedzo gya Stanley Jones, oyu a khothedwego gipimo nya 7 myaga khu kotani nyo emeye gukhodwa gwaye. * Ginani gi mu phasidego gu timiseya khu gutumba? Wari khuye: “Gukhodwa gwangu gu di tiyide kholu nyi nga ba nyiti gilogyo khu mufumo wa Nungungulu, ni esi wu tumbisago gu si gira, nigu gima kha nya  kanakana khisoso. Khu kharato, mwalo ni muthu a nga si kodzago gu nyi hambanisa ni Jehovha.” Wa gu ba u ri ni gukhodwa nyo tiye avba nya situmbiso sa Nungungulu, u na hidzimeya gwaye nigu khu na nga dzumeleya hwanga wu gu digisa gu thumeya Jehovha. — Mav. 3:25, 26.

8. Ndziya hi yi wonago khiyo mitshangano yi na yeyedza ginani? Tshamuseya.

⁸ Tepo yatshavbo manega mitshanganoni nya wuKristo. Mitshangano yi ngu hi phasa gu hidzimeya ga Jehovha. Gu manega mwendro gu kala mitshanganoni, khiso si na yeyedzago edzi hi na timiseyago khidzo gutshaniswa mindru ga tshigu. (Hebh. 10:24, 25) Khu ginani? Ho dzumeleya sigaradzo nya sidugwana si hi tandregisa gu hongola mitshanganoni olu, hi na gira kharini mindru ga tshigu tepo si na lombago gu vega womi wathu mhangoni gasi gu ya tshangana ni vandriyathu? Gimbe gambe khu gu, ha gu simama gu dzi emiseya gu manega mitshanganoni olu, kha hi na nga ema gu hongola mitshanganoni tepo valala va na zamago gu hi digisa gu tshangana ni vandriyathu. Olu khiyo tepo nya gu hi engedzeya lihaladzo lathu khu mitshangano. Ha gu ba hi gola gu manega mitshanganoni, ambari ho wugedwa kharini mwendro ho himbedzedwa khu wufumu gu gira mitshangano yathu, ethu hi na simama gu engisa Nungungulu guvbindra vathu. — Mith. 5:29.

9. Khu ginani gu vegisa milowo hungoni gu gu ndziya nya yadi nyo dzi dongiseye gu tshaniswa?

⁹ Vegisa hungoni milowo u yi golago. (Mat. 13:52) Wongo wathu kha wa vbeleya, ganiolu Jehovha a na hi phasa khu gu thumisa tshivba yaye, liphuvbo nya gu guage gasi hi dundruga milowo hi yi vegisidego. (Joh. 14:26) Nga wona esi si ganedwego khu ndriyathu moyo a nga ba a khothedwe Khuga dambo ga Alemanhã a bwe a vegwa wulangani nyo hambane gasi a khala enga, wari khuye: “Nyi di tsaka ngudzu kholu nyi nga ba nyi vegiside milowo nya yingi hungoni. Ambari olu nyi nga ba nyiri nyonga, nyi di gu khaleya gu dundrugeya khu mahungu nya mangi ya omu nya Bhibhiliya.” Milowo yoyo yi phaside ndriyathu gu dzipwa vbafuvbi ni Jehovha ni gu timiseya khu gutumba.

10. Khu ginani u yedego gu vegisa hungoni dzindzimo?

¹⁰ Vegisa ni gu emba dzindzimo dzi rungudzago Jehovha. Tepo Pawulo ni Silasi va nga khothedwa Filipi, va di emba dzindzimo va nga ba va dziti khu hungo gasi gu rungudza Jehovha. (Mith. 16:25) Khu ndziya nyo fane, tepo vandriyathu va União Soviética wa gale va nga yiswa wugumbini, ginani va giridego gasi va dzi tiyisa? Ndriyathu Mariya Fedun wari khuye: “Hi di gu emba dzatshavo dzindzimo hi nga ba hi dziti khu  hungo, dza omu nya libhuku lathu nya dzindzimo.” A di khuye dzindzimo dzodzo dzi tiyiside vatshavbo nigu dzi va phaside gu dzipwa vbafuvbi ni Jehovha. Ina anuwe u ngu tiyiswa khu gu embeleya ndzimo nya Mufumo u yi golago ngudzu? Khu kharato, dzegeya gu vegisa hungoni dzindzimo dzodzo, olu. — Wona kwadru yi gu khiyo “ Nyi tiyise hwambo.”

11-12. a) Khu guya khu 1 Samuweli 17:37, 45-47, khu ginani Dhavhidhe a nga tiya hwambo? b) Gihevbudzo muni nya lisima hi gi manago avba nya giyeyedzo gya Dhavhidhe?

¹¹ Gasi gu emisana ni sigaradzo hi yede gu tiya hwambo. Ahati wa gu dzipwa na wuri mwalo nawo makhalelo yaya, u nga gira ginani? Dundruga gu khuwe gutiya hwambo nya lisine kha guyi khu tanga yago, tshivba mwendro makodzelo u gu nawo. Nga wona giyeyedzo gya Dhavhidhe tepo a nga emisana ni Gholiya. Ho mu fananisa ni gingondzomo gile, Dhavhidhe a diri dugwana ngudzu, a diri mwalo tshivba, nigu a diri mwalo matshari yatshavbo ma nga ba ma vbwetega gasi gu dwana. Dhavhidhe a diri mwalo ne ni litshari limwedo. Ambari ulolo, uye tiyide hwambo. Khu gu tiya, Dhavhidhe hongode aya dwana ni gingondzomo gile nyo dzi embeye.

¹² Khu ginani Dhavhidhe a tiyidego hwambo kharato? Khu gu, a di gu khodwa gu khuye Jehovha na ni uye. (Leri 1 Samuweli 17:37, 45-47.) Dhavhidhe kha nga vega gupima avba nya wukhongolo wa Gholiya o dzi fananisa naye. Vbavbandze nya isoso, a di vega gupima avba nya edzi Gholiya a nga ba a ri dugwana khidzo mbeli ga Jehovha. Ginani hi gi hevbulago avba nya matimo yaya? Hi na tiya hwambo ha guti gu khethu Jehovha na ni ethu ni gu khodwa gu khethu valala vathu wuguhudzi mbeli ga Nungungulu nya dzitshivha dzatshavbo. (2 Dzik. 20:15; Ndzi. 16:8) Hi nga engedzeya kharini gutiya hwambo gwathu olu na hi nga si pheyi gu tshaniswa?

13. Hi nga engedzeya kharini gu tiya hwambo? Tshamuseya.

¹³ Hi nga engedzeya gutiya hwambo gwathu olu khu gu hi tshumayela mahungu nya yadi nya Mufumo wa Nungungulu. Khu ginani? Kholu, tepo hi tshumayelago ha gu hevbula gu tumba Jehovha hi bwe hi si thavi vathu. Kha nga givili gi tiyago tepo hi girago mihagano nyo tiyise khiyo mili, gutiya hwambo gwathu nugo ga gu tiya tepo hi tshumayelago khu ndranga ni ndranga, malangani gu tadego vathu, khu githugedza ni madhoropani. Ha gu engedzeya gu tiya hwambo gasi gu tshumayela olu, hi na khala na hi dongide gu simama gu gutshumeyela ambari tepo thumo wathu wu na himbedzedwago khu mifumo nya mafu. — 1 Tes. 2:1, 2.

14-15. Ginani hi gi hevbulago avba nya giyeyedzo gya Nancy Yuen ni Valentina Garnovskaya?

 ¹⁴ Hi nga hevbula silo nya singi avba nya giyeyedzo gya vandriyathu vavili nya vanyamayi va yeyedzidego gutiya-hwambo nyo samadzise. Nancy Yuen a diri ni tinga nya metro mweyo ni metadu khu gulapha, ganiolu a di si thaviswi khu gilo. * Uye bombide gu emiswa gu tshumayela mahungu nya yadi nya Mufumo wa Nungungulu. Khu kotani nya isoso, uye khothedwe gipimo nya 20 myaga tigoni ga China. Valamuli va mu giridego siwudziso va di khavo uye a diri “muthu nya dzitema” guvbindra vatshavbo tigoni mule.

¹⁵ Khu gu fana, Valentina Garnovskaya khothedwe dzitepo dziraru nyo hambane, yo patwa yatshavbo myaga a vbedzidego pasoni tigoni ga União Soviética ya gu gira 21 myaga. * Khu ginani? A di dzi emisede gu simama gu tshumayela nyo bwe dzipolisiya dzi mu rana kha nga “gighevenga nya gikhongolo ngudzu.” Ginani gi phasidego vandriyathu vava va vavili gu tiya hwambo? Avo va di gu tumba gu khavo Jehovha a na ni avo.

16. Ginani hi yedego gu gira gasi gu manega ni gu tiya hwambo nya lisine?

¹⁶ Kha nga hi ganedego, gasi gu engedzeya gu tiya hwambo kha si lombi gu hi vega gupima avba nya tshivba yathu ni makodzelo yathu. Vbavbandze nya isoso, gu vbwetega hi khodwa gu khethu Jehovha na ni ethu nigu khuye a na hi dwaneyago. (Dhet. 1:29, 30; Zak. 4:6) Uwowo khuwo sihalo nya gutiya hwambo.

17-18. Khu guya khu Johane 15:18-21, gigengedzo muni Jesu a hi ningidego? Tshamuseya.

¹⁷ Hi ngu tsaka ngudzu tepo hi ningwago githavo khu vathu, ganiolu vathu gu mba hi ninga githawo kha hi yeli gu dzi woneya vbavbatshi. Jesu a di khuye: “Mu kategide mwa gu vengwa khu vathu, va mi tutumisa, vbakari gwawe va mi vala ni gu nyenya lina lanu khwatshi li di nyenyeza, khu kotani ya Mwamana wa Muthu.” (Luka 6:22) A di gu vbweta gu khuye ginani Jesu?

¹⁸ Jesu kha nga ba a vbweta gu khuye maKristo ma ngu gola gu nyenywa. Wulangani nya isoso, a di gu hi gengedza khesi si nga hadzi hi dugeleya.  Ethu kha hi giri gipandre nya litigo leli. Ho vbanya khu guya khesi Jesu a hevbudzidego hi bwe hi tshumayela mahungu a ma tshumayedego nuye. Handro wakone, litigo la gu hi nyenya. (Leri Johane 15:18-21.) Ethu ho vbweta gu tsakisa Jehovha. Vathu va gu hi nyenya khu kotani nya lihaladzo lathu khu Jehovha, khyawe isoso.

19. Hi nga pimedzeya kharini giyeyedzo gya vapostoli?

¹⁹ Gima hi nga dzumeleyi siganegane mwendro mithumo nya vathu si hi gira hi khala dzitshoni khu gu ba hiri Dzikakazi dza Jehovha. (Mik. 4:5) Hi nga hevbula gu pala guthava vathu, khu gu dundrugeya khesi si giridwego khu vapostoli Jerusalema hwane nya gufe ga Jesu. Avo va di gu dziti gu khavo va di gu nyenywa ngudzu khu vathangeyi nya wukhongeyi nya giJudha. (Mith. 5:17, 18, 27, 28) Ambari ulolo, tshigu ni tshigu va di gu simama gu hongola tempeleni va bwe va tshumayela va dzi yeyedza gu khavo va diri vapizane va Jesu. (Mith. 5:42) Kha va dzumeya gu padwa khu hwanga. Anethu hi nga pala hwanga hi gu nawo khu vathu ha gu dzi tivegisa ga vathu kha nga Dzifakazi dza Jehovha, gani thumotunu, gani xikwatunu, ambari gipandreni hi vbanyago umo. — Mith. 4:29; Rom. 1:16.

20. Khu ginani vapostoli va simamidego na va tsakide ambari olu va nga ba va nyenywa?

²⁰ Khu ginani vapostoli va nga ba va tsakide? Kholu va di gu giti egi gi nga ba gi va gira va nyenywa nigu va di gu si wona kha nga lithomo gu tshaniswa khu kotani nyo gire gugola ga Jehovha. (Luka 6:23; Mith. 5:41) Khu hwane nya tepo, mupostoli Pedro lovide, khuye: “Mu na bani mu kategide mwa gu mana sisaniso khu kotani nya gugire iso nya sadi.” (1 Ped. 2:19-21; 3:14) Tepo hi pwisisago gu khethu ha gu nyenywa kholu hi girago gugola ga Nungungulu, gima kha hi na nga ema gu thumeya Jehovha khu gu ba hi nyenywa khu vathu.

21-22. a) Ginani u hungidego gu gira gasi gu dzi dongiseya gu tshaniswa? b) Hi na bhula khu ginani omu nya ndrima yi landreyago?

²¹ Kha hi dziti edzi gu tshaniswa mwendro gu himbedzedwa nya thumo wathu si na khuhago khidzo wukhozeyi wathu ga Jehovha. Ganiolu, hi ngu dziti gu khethu hi nga dzi dongiseya olu khu gu hi tiyisa wupari wathu ni Jehovha, hi engedzeya gutiya hwambo gwathu, ni gu hevbula gu emisana ni gu nyenywa khu vathu. Ha gu dzi dongiseya olu, si na hi phasa gu simama gu thumeya Jehovha mindru ga tshigu.

²² Ganiolu ahati ha gu tshuka hi himbedzedwa khu wufumu gu khozeya Jehovha ke? Omu nya ndrima yi landreyago, hi na bhula khu matshina nya milayo ma na hi phasago gu simama gu thumeya Jehovha ambari ha gu ba hi himbedzedwa.