OMU nya Bhibhiliya hi ngu hevbula khu muthu a nga ba ari “kha nga ethu” (Jak 5:17) Khu giyeyedzo, hi nga pwisisa khu gu vbevbuga malito ya Pawulo ma gomogo omu ga Varoma 7:21-24, tepo a nga khuye: “Nya guvbweta gu gira nya sadi, nya gu gira guvivba. . . . Libango langu likhongolo!” Si ngu tiyisa hwambo gu dziti gu khethu Pawulo a nga ba ari muthu nyo tumbege dzipwide nuye khu dziya yeyi.

Pawulo ganede gambe khu simbe silo a nga ba a sipwa. Avba ga Vagalatiya 2:20 phede khu gu ganeya khu gu tumba a gu nago nyo khuye, Jesu a mu ‘haladzide kala gu ningela guvbanya gwaye khu kota yaye.’ Anuwe u ngu dzipwa kharato? Adzina khandri tepo yatshavbo.

Ha gu ba hi khaleya gu garadzega khu sighoho hi giridego gale yoyo, adzina si nga hi gira hi si khodwi gu khethu Jehovha a ngu hi haladza, a hi divalede nigu isoso si nga hi gira hi si woni lisima nya muphaso wa Jesu. Ina Jesu o vbweta gu khuye hi wona muphaso kha nga giningwa? Abari kharato, ginani gi na hi phasago gu gira isoso? Hongoleni hi wonani siwudziso sivili.

Ina, Jesu o vbweta gu khuye hi wona muphaso kha nga giningwa nya lisima gwathu. Hi nga tiyisega kharini khu isoso? Nga dundrugeya khesi si gomogo omu ga Luka 23:39-43. Mwama a khokhothedwego vbasimbotunu nya tshanisa vbafuvbi ni Jesu, dzumede gu khuye a diri gighohi. Gighoho a nga ba a giride gi diri gikhongolo ngudzu nyo kala a ninganedwa khu tsayiso wule nya litsoro. Uye a di garadzega ngudzu khesi a nga ba a giride, a embeya Jesu, khuye: “Nyi dundruge gikhati u na gu belago mufumoni wago.”

Jesu a di khuye ginani? Nga dundrugeya khu gu vbisa a gupwidego tepo a nga thedregedza hungo a khedza gighohi gile. Ambari olu a nga ba apwa gu vbisa, Jesu a di hegeya gighohi gile ni gu gi tiyisa, khuye: “Nyi ngu gu embeya muhuno olu gu kheni, u na bani uri ni eni Paradhesini, NM.” Adzina Jesu na dundrugiside basi mwama wule gu khuye ‘Mwamana wa Muthu tede . . . gu ta ningela womi waye gasi gu dzegisa va nya gutala.’ (Mat. 20:28) Ganiolu, ina u si wonide gu khuwe Jesu tshingiside edzi mwama wule a nga hadzi phasega khidzo khu muphaso waye? Uye ganede khu ndziya nya wupari a bwe a thumisa malito ‘uwe’ ni “eni.” Nigu Jesu yeyedzide gu khuye moyo ni moyo a nga phasega khu muphaso nya gudzegiswe khu gu tumbisa mwama wule gu khuye a di hadzi vbanya paradhesini mafuni.

Kha hi kanakani gu khethu, Jesu a di gu vbweta gu khuye mwama wule a pwisisa gu khuye muphaso waye nya mba hweya wu di hadzi mu phasa nuye. Abari gu Jesu dzipwide khu ndziya yoyo khu mwama wule nya gighevenga a nga ne manega ni lithomo nyo thumeye Nungungulu, khu lisine a na dzipwa khu ndziya nyo fane khu muKristo a bhapatisidwego a thumeyago Nungungulu. Ginani gi na hi phasago gu haguleya gutumba nya gu khethu muphaso wa Kristo wu na ni lisima ga moyo ni moyo wathu?

Kha nga olu Jesu a ningidego Pawulo thumo nyo tshumayele, Pawulo a di gu si pwisisa gu khuye  Jesu mu fede. Khu ndziya muni? A gu tshumuseya esi: “Nyi ngu bonga Kristo Jesu, Pfhumu yathu, a nyi ningidego tshivba, a nyi tumbidego a nyi vega thumoni gwaye. A nyi girede esi, ambari nyi nga bani nyiri muvali, mutshanisi ni muhembululi. Ambari ulo, nyi mane wuhindzi kholu, nyi di gira khu wuhangi, gikhati nyi nga bani nyi si gu hakhi gukhodwa.” (1 Thim. 1:12-14) Thumo a nga ba a ningidwe Pawulo wu di gu yeyedza wuhindzi wa Jesu, lihaladzo laye, ni gu tumbwa khuye. Khu gu fana, Jesu hi ningide thumo nyo tshumayele mahungu nya yadi. (Mat. 28:19, 20) Ina thumo wowo wu ngu hi phasa gu pwisisa gu khethu anethu hi fedwe khuye?

Albert oyu a ngarigo gu wuyisedwa libandlani hwane nyo vbedze tinga nya 34 myaga na dusidwe, a gu tshamuseya esi: “Sighoho sangu somo mbeli gwangu tepo yatshavbo. Ganiolu tepo nyi gomogo thumoni nya gutshumayele, nyi ngu dzipwa kha nga mupostoli Pawulo, nga khatshi nyi di ningwa thumo khu Jesu abune. Isoso si ngu nyi ninga gutsaka, nyi bwe nyi si pimisi silo nyo vivbe khu womi wangu ni wumindru wangu.” — Ndzi. 51:3.

Allan, a nga ba ari ni maghilivindri ni gu gira silo nyo vivbe na nga si hevbuli lisine, wari khuye: “Nyi di gu khaleya gu dundrugeya khu wuvi nya wukhongolo nyi vangedego vathu. Dzimbe ditepo isoso si di gu nyi vbedza tshivba. Ganiolu nyo bonga Jehovha khu ba a dzumelede gighohi nya nga eni gi tshumayela mahungu nya yadi ga vambe. Tepo nyi wonago edzi vathu va hakhago khidzo gwadi mahungu nya yadi, sa gu nyi dundrugisa wuwadi ni lihaladzo la Jehovha. Nyo dzipwa nga khatshi Jehovha o nyi thumisa gasi gu vbweta ava navo va girago silo nyo vivbe.”

Tepo hi hongolago thumoni nyo tshumayele hi ngu si kodza gu vega gupima avba nya silo nya sadi ni gu pimisa esi nya sadi. Isoso so yeyedza wuhindzi ni lihaladzo la Jesu khethu ni gu hi tumba gwaye.

Na gu ngasi fuviswi litigo leli nyo vivbe la Sathane, livhalo lathu li nga no simama gu hi garadza khu sighoho hi si giridego gale yoyo. Ginani gi na hi phasago gu dwana ni gudzipwa gogo?

Jean oyu a dwanago ni gudzipwa dandru khu kotani nya sighoho a giridego na ngari gyanana, wari khuye: “Nyi ngu tsaka kholu ‘Nungungulu khongolo guvbindra myonyo yathu’”. (1 Joh. 3:19, 20) Kha nga Jean si ngu hi tiyisa hwambo gu dziti gu khethu Jehovha ni Jesu va ngu pwisisa gu khavo hi sighohi. Dundruga gu khuwe khu lihaladzo uye giride malulamiselo nya gudzegiswa, nasiri khu vathu nyo vbeleye ganiolu khu sighohi. — 1 Thim. 1:15.

Ha gu tiyisega gu khethu gudzegiswa gu na ni lisima ga moyo ni moyo wathu tepo hi gombeyago ni gu dundrugeya khu ndziya eyi Jesu a pharidego khiyo vathu nya mba vbeleya ni tepo hi dzi garadzeyago gu gira thumo a hi ningidego, a gu thumo nyo tshumayele. Khu gu gira isoso, kha nga Pawulo, anuwe u nga khuwe: Jesu a nyi ‘haladzide kala gu ningela guvbanya gwaye khu kota yangu.’