1-2. a) Khu guya khu gileletelo gya Jesu gi gomogo omu ga Matewu 28:18-20, khu wevbi thumo nya lisima wu yedwego gu girwa khu mabandla nya wuKristo? b) Siwudziso muni hi na bhulago khiso avba nya ndrima yeyi?

VAPOSTOLI va di tsakide ngudzu tepo va nga tshangana gigomoni. Hwane nya guwuswe gwaye, Jesu a di lomba vapostoli vaye gu ya tshangana navo wulangani wowo. (Mat. 28:16) Si nga gira nari wulangani wowo avba Jesu a nga “dzi wonegisa gambe ga gikwata nya vathu nya tengo nya guvbindre livbandre mazana (500).” (1 Kor. 15:6) Khu ginani Jesu a nga lomba gu tshangana ni vapizane vaye? Gasi gu va ninga thumo nya lisima: “Indrani mu gimbila mu hevbudza mayigo yatshavbo.” — Leri Matewu 28:18-20.

² Vapizane va pwidego malito ya Jesu va giride gipandre nya libandla nyo pheye nya wuKristo. Gu gira vapizane nya vangi va Kristo wu diri uwo thumo nya lisima nya libandla. * Muhuno gu na ni dzimiliyoni nya maKristo nya lisine mafuni gwatshavbo, nigu thumo nya lisima nya mabandla nya wuKristo ya muhuno wu ngari uwo wawumowo. Avba nya ndrima yeyi, hi na bhula khu siwudziso sesi nya sina: Khu ginani thumo nyo gire vapizane wu gu na ni lisima ngudzu? Ginani gi pategago avba nyo gire vapizane? Ina maKristo yatshavbo ma na ni gipandre gu girani nya vapizane? Nigu, khu ginani si vbwetago khu laphisa monyo gasi gu gira thumo wowu?

3. Khu guya khu Johane 14:6 ni 17:3, khu ginani thumo nyo gire vapizane wu gu na ni lisima?

³ Khu ginani thumo nyo gire vapizane wu gu na ni lisima? Khu gu, vapizane va Kristo khavo basi va si kodzago gu khala dzipari  dza Nungungulu. Gimbe gambe khu gu, ava va landreyago Kristo va ngu tshukwadzisa womi wawe olu nigu va na ni gutumba nyo vbanye kala gupindruga mindru ga tshigu. (Leri Johane 14:6; 17:3.) Khu lisine, Jesu hi ningide thumo nya lisima ngudzu ganiolu kha hi na nga si kodza gu wu gira honga. Pawulo lovide esi na gu thula uye gumogo ni dzipari dzaye nya maKristo, khuye: “Ethu hi sithumi [si] thumago gumogo ni Nungungulu.” (1 Kor. 3:9) Nga wona lithomo leli Jehovha ni Kristo va ningidego ethu vathu nya mba vbeleya!

4. Ginani hi nga gi hevbulago ga giyeyedzo gya Ivan ni Matilde?

⁴ Thumo nyo gire vapizane wu nga hi ninga gutsaka nya gukhongolo. Nga wona giyeyedzo gya Ivan ni mwangadzi waye Matilde va tigoni ga Kolombiya. Avo va di tshumayela lidzaha nyo khaguri nyo pwani khilo Davier, ilo li nga va embeya gu khilo: “Nyi di gu dogoreya gu vbindrugedza mavbanyelo yangu ganiolu kha nyi dziti ni gu kheni nyi na pheya khu hayi.” Davier a diri mudwani nya box nigu a di gu thumisa sidahadaha nyo pepugise mapimo, a seya ngudzu a bwe a vbanya ni Erika a nga ba haladzana naye. Ivan wari khuye: “Hi di pheya gu hevbula naye Bhibhiliya. Gaya gwaye gu diri hwindzo, khu kharato hi di yede gu gimbiya dziora nya dzingi khu dzibhisikaleta omu nya ruwa nya maraga. Hwane nyo wone gu khuye Davier a di gu tshukwadzisa makhalelo ni mavbanyelo yaye, Erika a di dzumeya nuye gu hevbula Bhibhiliya.” Khu gu gimbiya nya tepo Davier a di diga sidahadaha nyo pepugise mapimo, gu leva, ni gu dwana box, a bwe a tshadha ni Erika. Matilde wari khuye: “Tepo Davier ni Erika va nga bhapatiswa khu 2016, hi di dundruga esi Davier a nga ba a tala gu ganeya, khuye, ‘Nyi ngu dzina guvbindrugedza ganiolu kha nyi dziti ni gu kheni nyi na si pheya khu hayi.’ Hi di thesa ni marongo khu gu tsaka.” Kha hi kanakani gu khethu hi ngu tsaka ngudzu tepo hi phasago vathu gu khala vapizane va Kristo.

5. Khu gevbini gilo nyo pheye hi yedego gu gira thumoni gwathu nyo gire vapizane?

⁵ Gilo nyo pheye hi yedego gu gira thumoni gwathu nyo gire vapizane, gu khedza ava va dzi emisedego gu hevbula khu Jehovha. (Mat. 10:11) Tepo hi tshumayelago vathu vatshavbo hi va manago, ha gu yeyedza gu khethu hi Dzifakazi dza Jehovha. Nigu, tepo hi engisago gileletelo gya Kristo nyo tshumayele, ha gu yeyedza gu khethu hi maKristo nya lisine.

6. Ginani gi na hi phasago gu dugeleya thumoni nyo tshumayele?

⁶ Vambe vathu va ngu dzina gu hevbula lisine nya Bhibhiliya, ganiolu nya vangi hi mananago navo gupheyani va gu wonega nga khatshi kha va tsakeyi mahungu yathu. Gu vbwetega hi haguleya gu tsakeya gwawe. Gasi hi dugeleya gutshumayelani, hi yede gu dzi dongiseya gwadi. Hatha mahungu u ma wonago gu khuwe ma na tsakisa ava u na va manago. Khavbovbo dongiseya edzi u na pheyago khidzo mabhulo khu gu thumisa mahungu u ma hathidego.

7. U nga pheya kharini mabhulo ni muthu nyo khaguri, nigu khu ginani si gu na ni lisima gu mu engiseya ni gu mu ninga githawo?

⁷ Khu giyeyedzo, adzina u nga embeya mune ndranga gu khuwe: “Nyi di gu tsakeya gupwa mawonelo yago avba nya silo nyo khaguri. Sigaradzo nya singi hi tshanganago naso muhuno si ngu khuha vathu mafuni gwatshavbo. Wa gu si wona kharini, ina gu ngu vbwetega mufumo wu na si kodzago gu vbedza sigaradzo nya litigo?” Khavbovbo u nga bhula naye khu gu thumisa Dhaniyeli 2:44. Mwendro gu khuwe nyi di gu tsakeya guti mawonelo yago avba nya giwudziso gegi: “Khu wevbini sihalo nyo hevbudze sanana gasi si manega ni mapimo nya yadi?” Khavbovbo u bhula naye khu gu thumisa Dhewuteronome 6:6, 7. Ni yavbini mahungu u ma hathago gu bhula khayo, dundrugeya khu vathu va na gu  engiseyago. Dundrugeya khu giphaso va na gi manago khu gu hevbula lisine nya Bhibhiliya. Tepo u bhulago navo, khya lisima gu va engiseya gwadi ni gu ninga githawo mawonelo yawe. Khu ndziya yoyo u na va pwisisa gwadi nigu anavo va na engedzeya gu dzi emiseya gu gu engiseya gwadi.

8. Khu ginani gu gira maendro nyo bweleleye si vbwetago gu laphisa monyo?

⁸ Muthu na nga si hungi gu khuye a na hevbula Bhibhiliya mwendro ne, adzina si na lomba gu u thumisa tepo yago ni gudzigaradza gasi gu mu gireya maendro nyo bweleleye. Khu ginani? Khu gu, si nga gira gu tepo hi va bweleleyago hiya va hamuga mwendro adzina na va sa dziemiseya gu bhula nathu. Nigu adzina si na lomba gu u mu bweleleya dzitepo nya dzingi gasi a gu oloveya a bwe a dzipwa na tshulegide gu dzumeya gihevbulo nya Bhibhiliya. Dundruga gu khuwe, simbo wa gu dandra gwadi wa gu regarwi tshigu ni tshigu. Khu ndziya nyo fane, lihaladzo la muthu yoyo khu Jehovha ni Jesu li na dandra ha gu bhula naye tshigu ni tshigu khu gu thumisa Lito la Nungungulu.

9-10. Khu ginani hi nga ganeyago gu khethu maKristo yatshavbo ma ngu patega avba nyo vbwete vathu nya myonyo nya yadi?

⁹ Muhuweleyi watshavbo nya muKristo a ngu patega avba nya thumo nyo vbwetedzeye vathu nya myonyo nya yadi. Hi nga fananisa thumo wowu ni thumo wu girwago khu vathu va vbwetago gyanana gi nga dzimeya. Khu ndziya muni? Nga wona esi si dugeledego gyanana nya 3 myaga gi nga ba gi dzimede. Gupategide tanga nya 500 vathu guvbwetani nya gyanana gegi. Hwane nya gu ba gu vbindride 20 dziora na gi dzimede gyanana gile, muthu nyo khaguri a nga ba a dzi ningedzide gu phasedzeya gu gi vbweta a diya gi mana thembweni nyo khaguri. Ambari ulolo, mwama yoyo nyo dzi ningedze a di bomba  gu ningwa wuzundzo khu gu ba a gi manide. A di khuye: “Gu lombegide mazanazana nya vathu gasi gu gi mana.”

¹⁰ Vathu nya vangi va ngu fana ni gyanana gile. Avo va gu dzipwa na va dzimede. Va mwalo gutumba, ambari ulolo va ngu vbweta giphaso. (Efes. 2:12) Gu na ni 8 dzimiliyoni ni guvbindra nya vathu va pategago avba nyo zame gu mana vathu nya myonyo nya yadi. Adzina u nga si mani muthu a dzumedego gu hevbula nago Bhibhiliya. Ambari ulolo, vambe vahuweleyi va thumago gipandreni gya gimwegyo nathu va nga mana muthu a vbwetago gu hevbula lisine nya Lito la Nungungulu. Tepo vandriyathu va hevbudzago muthu a khala mupizane wa Kristo, ni wevbini a pategago avba nya thumo wowo a na ni sighelo nyo pwale nyo tsake nuye.

11. Wa gu ba u si gimbidzisi gihevbulo nya Bhibhiliya, u nga phasa khu dzindziya muni thumoni nyo gire vapizane?

¹¹ Ambari wa gu ba uri mwalo gihevbulo nya Bhibhiliya u gi gimbidzisago olu, u nga phasa gugirani nya vapizane khu dzimbe dzindziya. Khu giyeyedzo, u nga hoyozeya vathu nya vaphya va dzudego salawuni nya Mufumo u bwe u zama gu gira wupari navo. Wa gu va yeyedza lihaladzo khu ndziya yeyi, u nga va phasa gu wona gu khavo hi maKristo nya lisine. (Joh. 13:34, 35) Mihlamulo u yi ningeyago mitshanganoni nya libandla, ngudzungudzu nyo role yi nga hevbudza vathu nya vaphya gu yeyedza gukhodwa gwawe khu ndziya nya githawo yi khugeyago monyoni. U nga hongola gutshumayelani ni muhuweleyi nya muphya u bwe u mu phasa gu thumisa gwadi Milowo gasi gu bhula ni vathu. Wa gu gira isoso, u na mu phasa gu pimedzeya Jesu. — Luka 10:25-28.

12. Ina sa gu lomba gu hiri ni makodzelo nyo samadzise gasi hi gira vapizane? Tshamuseya.

¹² Mwalo ni moyo wathu a yedego gu pimisa gu khuye gasi gu hevbudza vambe va khala vapizane va Jesu a yede gu manega ni makodzelo mwendro makhalelo nya samadzise. Khu ginani? Nga wona giyeyedzo gya Faustina, wa Bolivia. Uye kha nga ba a kodza gu leri tepo a nga pheya gu dzi tshanganisa ni Dzifakazi dza Jehovha. Khavbovbo, a di pheya gu hevbuleya gu leri vbadugwanavbadugwana. Olu a bhapatisidwe, nigu a ngu si gola ngudzu gu hevbudza vambe. Gu tala nya dzitepo, uye a gu gimbidzisa 5 sihevbulo nya Bhibhiliya semana ni semana. Ambari olu Faustina a nga ba a si kodzi gu leri gwadi kha nga sihevbulo saye nya Bhibhiliya, uye phaside 6 vathu gu ninganedwa gubhapatiswa. — Luka 10:21.

13. Ambari ha gu ba hi pharegide kharini, makategwa muni hi na ma manago khu gu gira vapizane?

¹³ Makristo nya mangi ma pharegide khu silo sawe nya singi. Ambari ulolo, va ngu dzi tshiyela tepo nyo gimbidzise sihevbulo sawe nya Bhibhiliya, va bwe va tsakiswa ngudzu khu isoso. Nga wona giyeyedzo gya Melanie. Uye o vbanya enga ni gyanana gyaye nya 8 myaga tigoni ga Alaska. A na ni thumo nyo dzivbanyise  nigu yede gu khathaleya papayi waye a gu na ni madwali nya cancro. Melanie a diri uye enga Fakazi ya Jehovha dhoropani mule. A di gu gombeya ngudzu gasi gu mana tshivba nyo simame gutshumayela ambari olu tigoni mule gu dzidziyago ngudzu, giride satshavbo soso khu gu a di gu vbweta gu mana muthu a nga hadzi dzi emiseya gu hevbula naye Bhibhiliya. Khu guhegisa a di mana Sara, oyu a tsakidego ngudzu khu gu hevbula lina la Nungungulu. Hwane nya tepo nyo khaguri, Sara a di dzumeya gu hevbula Bhibhiliya. Melanie wari khuye: “Dzatshavbo dzisexta-feira li di gu pfola na nyi garade, ambari ulolo eni ni gyanana gyangu hi di gu simama gu hongola hiya hevbula ni Sara, nigu isoso si di gu hi phasa ngudzu. Hi ngu si gola ngudzu gu gira wugevisisi gasi guya hlamula siwudziso sa Sara, nigu kha nyi ngo ganeya khu gutsaka hi gupwago kholu a khalago pari ya Jehovha.” Khu gu tiya hwambo, Sara a di timiseya gutshaniswa, a diga tshetshe yaye, a bwe a bhapatiswa.

14. a) Khu ginani thumo nyo gire vapizane wu fananiswago ni gugoga? b) Malito ya Pawulo ma gomogo omu ga 2 Thimoti 4:1, 2, mo gu khuha kharini?

¹⁴ Ambari wo wona khuwe thumo wago nyo tshumayele kha wu velegi mihandro, simama gu khedza vathu va dzi emisedego gu khala vapizane. Dundruga gu khuwe Jesu fananiside thumo nyo vbwete vapizane ni gugoga dzindzandzi. Mugogi nya dzindzandzi a nga thuma dziora nya dzingi ni ndzadzi myeyo a si yi mani. Gutala nya dzitepo a ngu thuma ni wutshigu mwendro dzimindrudzile, adzina dzimbe dzitepo gu vbwetega a gimbiya mipfhuka nyo laphe. (Luka 5:5) Khu ndziya nyo fane, vambe vagiri nya vapizane va ngu vbedza dziora nya dzingi na va gu “tshumayela khu gu laphisa monyo” malangani nyo hambanehambane khu dzitepo nyo hambane gambe. Khu ginani? Gasi va kodza gu mana vathu nya vangi. Vale va dzi garadzago ngudzu gutala  nya dzitepo va ngu kategiswa khu gu mana vathu va tsakeyago mahungu yathu. Ina u nga zama gu tshumayela tepo u manago vathu nya vangi ndrani nya litshigu mwendro malanga u dzitigo gu khuwe gu ngu tala gu manega vathu nya vangi? — Leri 2 Thimoti 4:1, 2.

15. Khu ginani ava va gimbidzisago sihevbulo nya Bhibhiliya va yedego gu laphisa monyo?

¹⁵ Khu ginani gu gimbidzisa sihevbulo nya Bhibhiliya si vbwetago gu laphisa-monyo? Gimwegyo nya sighelo khu gu hi yede gu phasa sihevbulo sathu gu hevbula ni gu haladza esi Bhibhiliya yi si hevbudzago. Gu vbwetega hi phasa gihevbulo gyathu guti ni gu haladza Mutumbunusi nya Bhibhiliya, Jehovha. Nigu vbavbandze basi nyo hevbudze sihevbulo sathu esi Jesu a si vbwetago ga vapizane vaye, hi yede gu si phasa guti edzi si nga vbanyago khidzo kha nga maKristo nya lisine. Hi yede gu si laphiseya monyo tepo si dzi garadzeyago gu vbanya khu guya khu matshina nya milayo nya Bhibhiliya. Simbe si ngu dzegeya gu vbindrugedza mapimo ni mavbanyelo khu migimana yinganiyana basi ganiolu, simbe si ngu dzega tepo nyo laphe.

16. Ginani u gi hevbulago avba nya giyeyedzo gya Raúl?

¹⁶ Misiyonariyo moyo wa Peru vbanyide silo si mu phasidego gu wona lisima nyo laphise monyo. Wari khuye: “Nyi di hevbude mabhuku yatshavbo ya mavili ni gihevbulo gyangu nyo pwani khu Raúl. Ganiolu a di ngo simama gu emisana ni sigaradzo nya sikhongolo guvbanyani gwaye. Khu kotani nya olu a nga ba a gola gu ganeya dzitshamba, ni gu havisa mwangadzi waye, sanana saye kha sa nga ba si mu ninga githawo. Ambari ulolo, a di gu simama guta mitshanganoni tepo yatshavbo, khu kharato nyi di simama gu mu endreya gasi guya phasa uye ni ndranga yaye. Hwane nyo vbindre 3 myaga na hi tivanide, a di ninganedwa gu bhapatiswa.”

17. Ginani hi na bhulago khigyo avba nya ndrima yi landreyago?

¹⁷ Jesu a di hi ruma gu “gimbila [hi gira vapizane vathu nya] mayigo yatshavbo.” Gutala nya dzitepo hi ngu ganeya ni vathu va gu na ni gukhodwa nyo hambane ni ogu gwathu. Vambe kha va khongeyi mwendro adzina kha va khodwi ga Nungungulu. Ndrima yi landreyago yi na ganeya khedzi hi nga tshumayelago khidzo mahungu nya yadi ga vathu nya nga vovo.