1. Guvbindrugedza muni gu giregidego matshigwanaya mayigoni nyo khaguri?

DZIMILIYONI nya myaga yi vbindridego, si di gu wonegisa gu khatshi vathu nya vangi mafuni va diri ni gukhodwa nyo khaguri nya wukhongeyi. Ganiolu matshigwanaya, gu manegide gu vbindrugedza nyo samadzise. Vathu nya vangi kha va khongeyi. Gasi gu ganeya lisine, omu nya mambe mayigo vathu nya vangi vari khavo va mwalo wukhongeyi. * — Mat. 24:12.

2. Sighelo muni si girago vathu nya vangi va diga gu khongeya?

² Khu ginani tengo nya vathu va ganeyago gu khavo va mwalo wukhongeyi wu engedzeyago? * Adzina khu gu vambe va gu vega gupima avba nya silo si va tsakisago mwendro avba nya sigaradzo sawe. (Luka 8:14) Vambe kha va khodwi gambe ga Nungungulu. Vambe va ngu khodwa ga Nungungulu, ganiolu vo wona wukhongeyi kha nga gilo nyo vbindredwe, nya mba phasa gilo, ni gu khavo uwo kha wu pwanani ni siyensiya mwendro ni esi si wonegago kha nga silo nyo lulame ga vathu. Adzina va ngu tala gupwa dzipari dzawe, vahevbudzi vawe, mwendro vathu va umo nya milongoloko nya televizawu ni interneti na va gu ganeya gu khavo womi wu phede khavba nya envolusawu, ganiolu si ngu va kaleya gupwa sighelo nyo pwale nyo khodwe ga Nungungulu. Vambe va ngu pembwa khu vathangeyi nya dzitshetshe, avo va dzi garadzeyago basi gu vbweta dzitsapawu ni ndruma. Omu nya mambe malanga wufumu wu ngu ninga milayo yi himbedzeyago silo nya wukhongeyi.

3. Khu yavbini makungo nya ndrima yeyi?

³ Jesu o vireya gu khuye hi “gimbila [hi] hevbudza mayigo yatshavbo.” (Mat. 28:19) Hi nga phasa kharini vathu va sirigo makhodwa gu hevbula gu haladza Nungungulu ni gu khala vapizane va Kristo?  Gu vbwetega hiti gu khethu edzi muthu ni muthu a hakhago khidzo mahungu yathu sa guya khomu a dandrisidwego omu. Khu giyeyedzo, adzina vathu va dandredego mayigoni ya Europa kha va na nga ma hakha khu ndziya nyo fane nga vathu va dandredego mayigoni ya Asiya. Khu ginani? Europa, vathu nya vangi va nguti gilogyo khu Bhibhiliya nigu va ngu khodwa vbadugwana gu khavo silo satshavbo si giridwe khu Nungungulu. Ganiolu Asia, vathu nya vangi va guti sidugwana mwendro gu mbati gilo kamo khu Bhibhiliya, nigu adzina avo kha va khodwi gu khavo silo si ni Muvangi. Makungo nya ndrima yeyi khu gu hi phasa gu khuha myonyo nya vathu vatshavbo vale hi va manago thumoni nyo tshumayele, ambari va gu ba vata khu hayini.

4. Khu ginani hi yedego gu khedza esi nya sadi ga vathu?

⁴ Khedza silo nya sadi ga vathu. Gu na ni vathu va nga ba va si khodwi ga Nungungulu va khalago Dzifakadzi dza Jehovha mwaga ni mwaga. Nya vangi va di gu yiti milayo nyo khugege nya mavbanyelo nigu va di gu goroswa khu wupfhadzedzeyi wu girwago khu wukhongeyi. Ganiolu vambe kha va nga ba va yiti milayo yoyo, khu kharato nya vangi vbakari gwawe si vbwetegide gu va diga mavbanyelo nyo vivbe va nga ba vari nawo. Khu gu phaswa khu Jehovha, hi nga tiyisega gu khethu hi na va mana ava va dzi ‘emisedego gu hakha guvbanya nya gupindruge.’ — Mith. 13:48; 1 Thim. 2:3, 4.

5. Gutala nya dzitepo, khu ginani vathu va hakhago gwadi mahungu yathu?

⁵ Yeyedza wuwadi ni ndruda. Gutala nya dzitepo, vathu va ngu hakha gwadi mahungu yathu nasiri khesi hi va bhuleyago ganiolu khu ndziya hi si ganeyago khiyo. Avo va ngu tsakiswa ngudzu khu wuwadi wathu, ndruda ni olu hi khathalago khavo. Ethu kha hi va gurumedzi gu engiseya mahungu yathu. Wulangani nya isoso, ha gu zama gu pwisisa mawonelo yawe khu wukhongeyi. Khu giyeyedzo, hi ngu hevbula gu khethu vambe kha va si tsakeyi gu bhula khu silo nya wukhongeyi ni vathu va gu mba vati. Vambe vari khavo gu wudziseya muthu esi a si pimisago khu Nungungulu sa gu girwa khu vathu nya mba na githawo. Nigu vambe va ngupwa dzitshoni gu leri Bhibhiliya na va gu wonwa khu vathu, ngudzungudzu ni Dzifakadzi dza Jehovha. Ambari olu vathu va hambanago ngudzu kharato, ethu ha gu zama gu pwisisa edzi va dzipwago khidzo. — 2 Thim. 2:24.

6. Mupostoli Pawulo yeyedzide kharini gu khuye a di gu dzi pwananisa ni vathu, nigu hi nga mu pimedzeya kharini?

⁶ Ina ka, hi na rini a gu tshuka muthu nyo khaguri a khala dzitshoni khu gu ba hi bhula naye khu “Bhibhiliya,” “sivangwa,” “Nungungulu,” mwendro “wukhongeyi”? Hi nga pimedzeya mupostoli Pawulo hi bwe hi dzi pwananisa naye. Tepo a nga ba a ganeya ni vaJudha, Pawulo a di gu thumisa Milowo. Ganiolu, tepo a nga ba a ganeya ni vafilozofo nya vaGreki gigomoni gya Areyopagu, uye kha khumbuga Bhibhiliya khu gu kongoma. (Mith. 17:2, 3, 22-31) Hi nga gi landreya kharini giyeyedzo gya Pawulo? Ha gu manana ni muthu a si khodwigo avbo nya Bhibhiliya, gwadi ngudzu gu hi si yi khumbugi khu gukongoma tepo hi bhulago naye. Wa gu wona gu khuwe muthu kha goli gu wonwa khu vambe na gu leri Bhibhiliya, zama gu mu yeyedza lowo khu dzimbe dzindziya, nya nga gu mu yeyedza khomu nya mutshini wago wa mandzani.

7. Kha nga si ganedwego omu ga 1 Vakorinto 9:20-23, ginani hi nga girago gasi gu pimedzeya Pawulo?

⁷ Engiseya gwadi ni gu mu pwisisa. Gu vbwetega hi pwisisa sighelo si girago vathu hi va manago gutshumayelani va pimisa silo khu ndziya va si pimisago khiyo. (Mav. 20:5) Nga wona gambe giyeyedzo gya Pawulo. Uye dandrede vbakari nya vaJudha. Ganiolu a di yede gu vbindrugedza matshumayelelo yaye ga vanyamayigo, kholu avo va di guti sidugwana ambari gu mbati gilo kamo khu Jehovha ni Milowo. Adzina si na lombega gu hi gira wugevisisi nyo khaguri mwendro gu wudzisa vandriyathu va gu va gale libandlani gasi hi si kodza gu pwisisa gwadi edzi vathu va gipandreni gwathu va pimisago khidzo ni edzi va dzipwago khidzo. — Leri 1 Vakorinto 9:20-23.

8. Khu yevbini mweyo nya dzindziya hi nga pheyago khiyo mabhulo nya Bhibhiliya ni muthu?

 ⁸ Makungo yathu khu gu mana vathu va “gu ni fanelo” nyo hakhe womi nya pindrugedwa. (Mat. 10:11) Gasi gu gira isoso, hi yede gu wudzisa edzi vathu va dzipwago khidzo hi bwe hi va engiseya gwadi. Ndriyathu nyo khaguri wa England, a di wudzisa mawonelo nya vathu nyo khaguri khedzi hi nga manegago khidzo ni dzindranga dzi tsakidego, edzi hi nga dandrisago khidzo sanana, mwendro edzi hi nga timiseyago khidzo ambari ho ba hi giredwa guvivba. Hwane nyo engiseye mawonelo yawe, wari khuye, “Ahati wusingalagadzi wowu ke, wu lovidwego tinga nya 2 000 myaga hwane?” Khavbovbo nya mba khumbuga libhuku nya “Bhibhiliya,” o va yeyedza khomu nya telefone yaye lowo nyo khaguri a wu hathidego gwadi.

9. Hi nga va phasa kharini vale va si goligo gu bhula khu Nungungulu?

⁹ Hi nga si kodza gu khuha myonyo nya vathu va si goligo gu bhula khu Nungungulu khu gu bhula navo khu silo nyo khaguri si va khuhago. Khu giyeyedzo, nya vangi va ngu samadziswa khu tumbunugo. Khu kharato, adzina hi nga khethu: “Si nga gira na wu dziti gu khuwe tepo vasiyentista va girago silo nyo khaguri nya siphya, gutala nya dzitepo va gu pimedzeya esi si gomogo omu nya tumbunugo. Khu giyeyedzo, gasi gu gira microfone va di pheya khu gu hevbula dzindzeve, nigu gasi gu gira dzi camera va di pheya khu gu hevbula maho. Ginani gi tago mapimoni gwago tepo u dundrugeyago khu tumbunugo? Ina wu di tumbunuga wabune, mwendro wu di girwa khu muthu nyo khaguri mwendro gimbe gilo?” Hwane nyo ba u mu engisede gwadi, adzina u nga engedza khuwe: “Tepo vathu va nga hevbula dzindzeve ni maho, adzina hi nga dzi wudzisa gu khethu khu mani a nga va hevbudza isoso? Nyi samadzisidwe ngudzu khesi si lovidwego khu powetiko moyo. A di khuye: ‘Ina oyu a nga gira dzindzeve, a na sindrwa gupwa, gani? Oyu a nga girago maho a na padwa gu wona, gani? . . . Oyu a kavedzelago vathu guti ni gugengela, kha na nga siti, gani?’ Vambe vasiyentista va ngu dzumeleyana ni malito yaya va bwe va khodwa gu khavo silo si di vangwa.” (Ndzi. 94:9, 10) Khu gulandreya adzina hi nga mu yeyedza mweyo nya dzivhidhiyu dzi gomogo omu nya jw.org^® avba gipandre “Entrevistas e Casos Reais” avba va nga pwani “A Origem da Vida: Teorias e Fatos.” (Beya omu nya MABHUKU > DZIVHIDHIYU.) Mwendro adzina hi nga mu ninga mweyo nya dzibroxura dzedzi A Vida — Teve um Criador? ni A origem da vida — Cinco perguntas que merecem resposta.

10. Hi nga pheya kharini mabhulo ni muthu a si goligo gu bhula khu Nungungulu?

¹⁰ Vathu nya vangi va gu vireya gu khavo silo si tshukwata mindru ga tshigu. Ambari ulolo, vambe nya vangi va ngu thava gu khavo mafu ma na fuviswa mwendro gu tshungunudwa. Muwoneleyi moyo nya gipandre wa tigoni ga Norway wari khuye, vathu nya vangi va si goligo gu bhula khu Nungungulu  gutala nya dzitepo va ngu si tsakeya gu bhula khu siemo nya mafu. A gu manana ni muthu nyo khaguri, uye wari khuye: “Ginani u gi pimisago maningano ni wumindru nya wadi hi wu vireyago? Ina gitumbiso gyogyo gyo thula gu ta vbanya ni vathu nya politika, vasiyentista, ni vambe nyo fane ni vovo?” Hwane nyo mu engiseye gwadi, uye a gu leri mwendro gu khumbuga lowo nyo khaguri wu yeyedzago wumindru nyo tsakise. Vathu nyo khaguri va ngu samadziswa khu gitumbiso gya Nungungulu nyo khigyo hi na vbanya kala gupindruga mafuni nigu vathu nya vadi va na vbanya kala gupindruga. — Ndzi. 37:29; Muh. 1:4.

11. Khu ginani hi yedego gu vbindrugedza dzindziya hi pheyago khidzo mabhulo ni vathu, nigu khu guya khu Varoma 1:14-16, hi nga pimedzeya kharini giyeyedzo gya Pawulo?

¹¹ Gwadi gu hi thumisa dzindziya nyo hambanehambane ho ba hi bhula ni vathu hi va manago thumoni nyo tshumayele. Khu ginani? Kholu vathu va hambanide. Egi gi tsakisago mumbe gi nga gorosa mumbe. Vambe va dzi emisede gu bhula nathu khu Nungungulu mwendro Bhibhiliya ganiolu vambe va gu tsakiswa khu gu hi pheya mabhulo khu simbe silo. Ni ga gevbini giemo, gu vbwetega hi vbwetedzeya dzindziya nyo bhule ni vathu vatshavbo. (Leri Varoma 1:14-16.) Khu lisine, ethu ha gu simama gu dundruga gu khethu khu Jehovha a dandrisago lisine myonyoni ya vale va golago esi nya sadi. — 1 Kor. 3:6, 7.

12. Ginani hi nga girago gasi gu khuha myonyo nya vathu va tago khu mayigoni ya Asia, omu gu gu mba tidwa gilo khu muvangi?

¹² Mafuni gwatshavbo, vahuweleyi nya vangi va ngu manana ni vathu va tago khu mayigoni ya Asia, gupata ni ava va tago khu mayigoni omu wufumu wu himbedzeyago silo nya wukhongeyi. Mayigoni nya mangi ya Asia, vathu nya vangi kha va khathali khu mahungu nyo pwani sivangwa si manegide ni Muvangi. Vambe khu gu vbweta guti lisine maningano ni isoso va ngu dzumeya gihevbulo nya Bhibhiliya, ganiolu vambe gupheyani va ngu bomba guti silo nya siphya. Ina ka, hi na gira kharini gasi gu va hevbudza lisine? Vahuweleyi nyo khaguri va gu na ni myaga nya yingi na va gu manana ni vathu vovo, va ngu dugeleya ngudzu khu gu pheya khu mabhulo nya wupari ni vathu vovo, va yeyedza gukhathala khavo, khavbovbo yo vboha tepo nya yadi va pheya gu va tshamuseya edzi matshina nya milayo nya Bhibhiliya ma tshukwadzisidego khidzo womi wawe.

13. Ginani gi nga phasago vathu gu tsakeya Bhibhiliya? (Wona foto yi gomogo avba nya kapa.)

¹³ Vathu nya vangi gupheya va gu ndrindrwa gupima khu guti gu gomogo omu nya Bhibhiliya. (Muh. 7:12) Dhoropani ga Novha Yorki, ndriyathu moyo nya nyamayi a nga endreya vathu va ganeyago giMandarin, wari khuye: “Nyi di zama gu yeyedza gukhathala khu vathu nyi bwe nyi va engiseya gwadi. Nyo wona gu kheni avo vo guta khu limbe litigo, nyi ngu ba nyi va wudzisa esi: ‘Mu si kodzide kharini gu dzipwananisa ni guvbindrugedza mu gu giridego? Ina mu manide gibambo nyo khaguri? Ahati vathu va gipandreni momo ke, va ngu mu phara gwadi?’” Dzimbe dzitepo isoso si ngu mu tuleya dzindziya nyo ganeye khu Bhibhiliya. Sa gu ningana, ndriyathu a nga engedzeya esi: “Mo si wona kharini, khu gevbini gilo nya lisima hi yedego gu gira gasi gu pwana gwadi ni vathu? Ina nyi nga mi yeyedza livingu nyo khaguri nya Bhibhiliya? Ilo lari khilo: ‘Guphela nya guganedzisane gukhwatshi guphusuga nya mati nya tsongo wa guphela gutala; khu guralo, khuga u hongole na mu si gu pheli mayunga.’ Mo si wona kharini, ina wusingalagadzi wowu wu nga hi phasa gu pwana gwadi ni vathu?” (Mav. 17:14) Mabhulo yaya ma nga hi phasa gu tugula vathu va dzi emisidego gu hevbula nya singi.

14. Ndriyathu moyo wa Extremo Oriente, a gu phasa kharini vathu va dzi embeyago gu khavo kha va khodwi ga Nungungulu?

¹⁴ Ahati vale va ganeyago gu khavo kha va khodwi ga Nungungulu, ke? Ndriyathu moyo a tshumayedego ngudzu vathu va sirigo makhodwa tigoni ga Extremo Oriente, a gu tshumuseya esi: “Khu giolovedzo tepo muthu wa omu a ganeyago gu khuye ‘Kha nyi khodwi ga Nungungulu,’ o vbweta  gu khuye kha khodwi ga vanungungulu va khozedwago khu vathu nya vangi gipandreni momu. Khu kharato, nyi ngu oloveya gu dzumeya gu kheni vanungungulu nya vangi va giridwe khu vathu nigu khandri vanungungulu nya lisine. Nyi ngu tala gu leri Jeremiya 16:20: ‘Ina muthu a nga dzi kodza gu dzi girela vanungungulu, gani? Kholu avo khandri vanungungulu nya lisine!’ Khavbovbo nyi va wudzisa esi: ‘Hi nga si kodza gu tugula kharini gu khethu nungungulu nyo khaguri khuye nya lisine mwendro a di girwa khu vathu?’ Nyi vbedza nyi engiseya gwadi hlamulo wawe, khu gulandreya nyi leri Isaya 41:23: ‘Hi embeleni ginani gi na gu giregago mindru ga litshigu, gasi hi kodze gu dziti gukhethu khenu vanungungulu.’ Khavbovbo nyi mu yeyedza gimwegyo nya silo esi Jehovha a si profetago khu mindru wa tshigu.”

15. Ginani hi nga gi hevbulago avba nya giyeyedzo gya ndriyathu moyo wa Ásia Oriental?

¹⁵ Ndriyathu nyo khaguri wa Ásia Oriental, a gu thumisa wusingalagadzi wu landreyago a gu ba a gira maendro nyo bweleleye. Wari khuye: “Nyo va yeyedza siyeyedzo nya guti gwa Nungungulu, siprofeto nya Bhibhiliya si tadzisegidego, ni milayo yi woneleyago tumbunugo. Khavbovbo nyi va yeyedza edzi satshavbo sesi si yeyedzadzo khidzo gu khiso womo Muvangi nya guti a vbanyago. Tepo muthu a pheyago gu dzumeya gu khuye Nungungulu womo, nya gu mu yeyedza esi Bhibhiliya yi si ganeyago khu Jehovha.”

16. Khu guya khu Vahebheru 11:6, khu ginani sihevbuli nya Bhibhiliya si yedego gu manega ni gu khodwa ga Nungungulu ni Bhibhiliya nigu hi nga si phasa kharini gu haguleya gu khodwa gogo?

¹⁶ Tepo hi gimbidziseyago gihevbulo nya Bhibhiliya vathu va sirigo makhodwa, gu vbwetega hi simama gu va phasa gu haguleya gu khodwa gu khavo Nungungulu womo. (Leri Vahebheru 11:6.) Hi yede gu va phasa gambe gu khodwa avba nya Bhibhiliya. Gasi gu gira isoso, adzina si na lomba gu hi va bhuleya gunganigungani khu sihevbudzo nyo khaguri. Tepo ni tepo hi hevbulago navo, adzina si na vbwetega gu hi bhula navo khu silo nyo khaguri si yeyedzago gu khiso Bhibhiliya Lito la Nungungulu. Isoso si nga pata mabhulo nyo role maningano ni edzi siprofeto nya Bhibhiliya si tadzisegago khidzo, lisine nya Bhibhiliya tepo yi ganeyago khu matimo ni siyensiya, ni edzi Bhibhiliya yi hi phasago khidzo guvbanyani gwathu ga tshigu ni tshigu.

17. Lihaladzo lathu la gu khuha kharini vathu?

¹⁷ Tepo hi yeyedzago lihaladzo vathu ha gu va phasa gu khala vapizane va Kristo, gani va ngu khongeya, gani kha va khongeyi. (1 Kor. 13:1) Tepo hi va hevbudzago, makungo yathu khu gu va yeyedza gu khethu Nungungulu a ngu hi haladza nigu a gu vbweta gu khuye hi mu haladza nethu. Myaga yatshavbo dzimiliyoni nya vathu va nga ba va khathala vbadugwana mwendro va nga ba va si khathali khu wukhongeyi va ngu bhapatiswa, kholu va hevbude gu haladza Nungungulu. Khu kharato khedza silo nya sadi ga vathu, u bwe u yeyedza lihaladzo ni gu khathala khu vatshavbo. Va engiseye gwadi. Zama gu va pwisisa. Va hevbudze gu khala vapizane va Kristo khu mavbanyelo ni makhelelo yago.