Skip to content

Skip to table of contents

MATIMO NYA GUVBANYA

Nyi giride esi nyi nga ba nyi yede gu gira

Nyi giride esi nyi nga ba nyi yede gu gira

Khu 30 myaga ni guvbindra Donald Ridley a diri adhivhoghadhu a nga ba a emeya Dzifakadzi dza Jehovha omu nya dzitribhunali. Uye a diri ni thumo nya lisima ngudzu nyo phase vathu, vadhogodheya ni valamuli gu pwisisa gu khavo vadwali va na ni lithomo nyo dzi hatheye gu khavo va na thedwa novba mwendro ne. Uye phaside hengeledzano gu pala mahungu nya mangi ngudzu ma nga ba ma yiswa tribhunali nya yikhongolo ya Estados Unidos. Dzipari dzaye dzi di gu mu rana khidzo khu Don. Uye a diri ni sighingi, a di gu dzi nogisa nigu a di gu thuma khu gu dzi garadza.

Khu 2019, Don a di modwa madwali nyo mba olovelega ma gu mwalo rendre. Madwali ma di dandra khu guvbiredza, khu kharato, khu 16 nya Agosto nya 2019 a difa. Aya khayo matshango yaye.

Nyi velegidwe St. Paul, Minnesota, Estados Unidos, khu 1954. Vavelegi vangu kha va nga ba va ghanyide ganiolu kha va nga ba vari sisiwana gambe nigu hi diri vakatolika. Eni nyi gyanana nya wuvili avba nya 5 sanana. Na nyi ngari gyanana nyi di gu beya tshetshe nya katolika nigu nyi di gu phasedzeya paderi tepo a vegago dzikhozo. Ambari ulolo, kha nya nga ba nyiti silo nya singi khu Bhibhiliya. Ambari olu nyi nga ba nyi khodwa gu kheni khu Nungungulu a giridego silo satshavbo kha nya nga ba nyi khodwa avba nya tshetshe.

EDZI NYI NGA HEVBULA KHIDZO LISINE

Mwaga nyi nga pheya khuwo gu hevbula xikola gasi gu khala adhivhoghadhu nyi di endredwa khu Dzifakazi dza Jehovha. Va dita nyi mana na nyi handza, khu kharato va ganeya gu khavo va na wuya limbe litshigu. Tepo va nga wuya nyi dita va gira siwudziso sivili: “Khu ginani litigo li gu mba fumedwa khu vathu nya vadi?” nigu “Vathu va nga gu mana kharini gutsaka nya lisine?” Va di nyi ninga libhuku, A Verdade Que Conduz à Vida Eterna ni Tradução do Novo Mundo da Bíblia Sagrada yi nga ba yiri ni kapa nya kori verde nyi di bwe nyi dzumeya gihevbulo nya Bhibhiliya. Isoso si nyi tude maho. Nyi samadzisidwe ngudzu khu guti gu kheni mufumo wa Nungungulu khuwo wu na si kodzago gu vbedza sigaradzo nya vathu mafuni. Nyi di wona gu kheni mafumelo nya vathu kha ma phasi, khu kharato litigo li di gu tade khu gutshaniseka ni guvivba.

Nyi dzi hendzeledzide ga Jehovha gupheyani nya mwaga nya 1982 nyi bwe nyi bhapatiswa khu mwaga wawumowo avba nya tshangano nya mughanga wu nga ba wuri ni hungo nya mahungu wu gu khuwo “A verdade do Reino” wu giredwego St. Paul Civic Center. Ga semana yi nga landreya nyi di bweleya Civic Center gasi guya gira exame nyo khale adhivhoghadhu. Gupheyani nya ngima nya Outubro nyi diti gu kheni nyi paside avba nya exame, khu kharato nyi diri adhivhoghadhu.

Ga tshangano wowo nya mughanga nyi di manana ni Mike Richardson a nga ba a thumeya Bheteli ya Brooklyn. Uye a di nyi tshamuseya gu khuye yi di ngari gu tudwa xikiritori yi nga ba yi khathaleya mahungu nya wulamuli tsindza gwathu. Nyi di dundruga malito ya muEtiyopi wule nya thenwa ma gomogo omu ga Mithumo 8:36, khavbovbo nyi di dzi wudzisa gu kheni ‘Ginani gi nyi himbedzeyago guya phasedzeya omu nya xikiritori yoyo.’ Khu kharato, nyi di tadzisa petisawu gasi guya thumeya Bheteli.

Vavelegi vangu kha va tsaka khu gu ba nyi khade Fakazi ya Jehovha. Papayi wangu a di nyi wudzisa gu khuye gu thumeya Bheteli so gimbileyana kharini ni thumo wangu nya wuadhivhoghadhu. Nyi di mu tshamuseya gu kheni nyo ya gira thumo nyo dziningedze. Nyi di mu embeya gu kheni nyi na hakha 75 dzidholari a gu idzo dzi nga ba dzi ningwa vaBhetelita khu tepo yoyo.

Kha nga olu nyi nga ba nyi dzumede guya thuma tribhunali nyo khaguri kha nya dzegeya gu thuma Bheteli khu tepo yoyo. Khu kharato, nyi phede gu thuma Bheteli ya Brooklyn, Nova York, khu 1984. Nyi diya thumeya omu nya xikiritori nyo khathaleya mahungu nya wulamuli. Thumo nyi wu giridego tribhunali wu nyi dongisede gu gira thumo wu nga ba wu girwa Bheteli.

GUWUSEDZWA NYA TEATRO YA STANLEY

Edzi yi nga ba yi khade khidzo Teatro ya Stanley tepo hi nga yi renga

Teatro yi gomogo dhoropani ga Nova Jérsei yi rengidwe khu Novembro nya 1983. Vandriyathu va di lova malangaliya va lomba gu dzumeledwa guwusedza gipandre nya maghezi ni mati. Tepo va nga manana ni dzipfhumu dza mule, vandriyathu va di va tshamuseya gu khavo va di gu vbweta gu thumisa wulanga wule kha nga Salawu nya mitshangano nya Dzifakazi dza Jehovha. Isoso si di wusa gigaradzo. Milayo ya Jérsei yi di gu khiyo dzinyumba nya wukhozeyi dzi yede gu manega basi omu gu nga ba gu vbanya vathu. Ganiolu, Teatro ya Stanley yi diri khu vbakari nya lidhoropa a gu umo gu nga ba gu giredwa umo dzinogosi. Khu kharato, dzipfhumu kha dza va dzumeleya gu gira esi va nga ba va si vbweta. Vandriyathu va di zama gambe gu lomba ganiolu kha va dzumeledwa.

Ndrani nya semana yangu nyo pheye Bheteli, hengeledzano yi di gu yiside mahungu yaya ga dzitribhunali nya wulamuli dza gipandreni mule gasi gu lomba gu dzumeledwa. Kha nga olu nyi nga ba nyi thumide khu myaga mivili avba nya tribhunali ya St. Paul, Minnesota, nyi di gu yiti gwadi milayo nya dzitribhunali dza mule. Moyo nya vaadhivhoghadhu vathu ganede gu khuye Teatro ya Stanley yi di gu tshuka yi thumiswa gasi gu gira sipfhitsha nya sikhongolo ni mibuzo nya wuembeleyi. Khu kharato, khu ginani si nga hadzi vivba gu yi thumiseya gu gira sipfhitsha nya wukhongeyi? Tribhunali ya gipandreni mule yi di bhula khu mahungu yoyo yi vboheya mahegiso nyo khiyo milayo ya lidhoropa la Jérsei kha ya nga ba yi ninga githawo gutshulega nya wukhozeyi. Tribhunali yi di lomba gu khiyo dzipfhumu nya lidhoropa dzi dzumeleya gilombo gya Dzifakazi dza Jehovha. Khavbovbo nyi di pheya gu wona edzi Jehovha a nga ba a kategisa khidzo hengeledzano yaye gasi gu thumo waye wu simama guya mbeli. Nyi tsakide ngudzu khu gu ba nyi pategide ga mahungu yoyo.

Vandriyathu va di pheya thumo nyo wusedze wulanga wule khu tshivba ni tshivba. Khu kharato, khu 8 nya Setembro nya 1985 si kodzegide gu gira gradhuwasawu nya turma 79 nya xikola ya Gileyadhi wulangani wule. Nyi tsakide ngudzu khu gu patega avba nya tsawa nya wulamuli gasi gu tadzisa makungo ya Jehovha. Gutsaka nyi gupwidego gukhongolo ngudzu guvbindra ogu nyi gu pwidego tepo nyi nga ba nyi thuma tribhunali na nyi si guti Bheteli. Ga tepo yoyo nyi di si gu dziti gu kheni Jehovha a na nyi thumisa gasi gu emeya mahungu nya mangi ngudzu.

GU EMISANA NI GIGARADZO NYA GU MBA THEDWA NOVBA

Khu 1980, si di gu olovelega gu vadhogodheya ni dzixipitali va bomba tepo Dzifakazi dzi lombago gu thumwa nya mba thedwa novba. Isoso si diri gigaradzo nya gikhongolo ngudzungudzu ga vanyamayi nya dzimimba kholu valamuli va di gu pimisa gu khavo nyamayi nya mimba kha nga ba a yede gu bomba gu thedwa novba. Valamuli va di gu ganeya gu khavo o gara mamayi wakone a bomba gu thedwa novba, a nafa, gyanana gi tshala nya mba na mamayi.

Khu 29 nya Dezembro nya 1988, ndriyathu Denise Nicoleau a di dugeleya novba nya wungi ngudzu hwane nyo hefemule. Hemoglobina yaye yi di tshiga kala 5.0. Khu kharato, dhogodheya a di ganeya gu khuye tshukwana a thedwa novba. Ndriyathu Denise a di bomba. Ga dzimindru dzi nga landreya, xipitali yi di theya mahungu ga vaadhivhoghadhu gasi gu lomba gu dzumeledwa gu theya novba ndriyathu Denise. Nya mba pheya khu gu ganeya naye mwendro ni mwama waye, mulamuli a di va dzumeleya gu khuye va mu theya novba.

Khu livbandre, 30 nya Dezembro, xipitali yi di theya novba ndriyathu Denise ambari olu mwama waye ni vambe valongo va nga ba va bomba. Ga wutshigu wowo, valongo vaye nya vangi ni madhota mavili va di khothedwa khu gu pwani va ngu himbedzeya gu pwani a thedwa novba. Ga litshigu li nga landreya, dzijorinali, televhizawu ni dziradhiyu dzi di huweleya gukhothedwa ga vandriyathu vale.

Na nyiri ni Philip Brumley na hi nga gu dzipwa

Khu Muvhulo ni dzimindru, nyi di bhula ni mulamuli nya tribhunali nya yikhongolo, Milton. Nyi di mu tshamuseya esi si giregidego. Nyi di mu embeya kheni womo mulamuli a nga rumisa gu khuye muthu nyo khaguri a thedwa novba nya mba pheya khu gupwa mawonelo yaye. Milton a di khuye nyi yede gu hongola xikiritori yaye ni siyambo gasi gu ya bhula khu mahungu yoyo ni milayo yi pategago. Nyi di hongola ni muwoneleyi wangu Philip Brumley. Mulamuli wule a di rana ni adhivhoghadhu wa xipitali. Hi di manega ni libhulo nyo vbise. Ga tepo nyo khaguri ndriyathu Brumley a di nyi loveya a nyi embeya gu khuye nyi di yede gu “reledza lito.” Wusingalagadzi wowu wu nyi phaside ngudzu kholu nyi di gu gorogide nigu nyi di gu zama gu wugeya esi si nga ba si ganedwa khu adhivhoghadhu wa xipitali.

Khu nyambade kala nyamudye: Richard Moake, Gregory Olds, Paul Polidoro, Philip Brumley, eni ni Mario Moreno, vaadhivhoghadhu vathu litshigu hi nga emeya mahungu ma nga ba ma ganeya khu Watchtower v. Village of Stratton Tribhunali nya yikhongolo ya Estados Unidos. — Khendzugani! nya 8 nya Janeiro nya 2003, khu giPutukezi.

Hwane nya ora mweyo, mulamuli Milton a di khuye hi na ta bhula gambe khiso mindru dzimindrudzile. Tepo hi nga ba hi duga khu xikiritori gwaye, Milton a di khuye adhivhoghadhu wule wa xipitali a na manega ni “thumo nyo lemeye mindru.” Si thulago gu khiso si na mu lemeleya gu emeya esi a giridego. Isoso si di nyi gira nyi tiyisega gu kheni Jehovha a diri ni ethu. Si tsakiside ngudzu gu wona gu kheni Jehovha a di gu nyi thumisa gasi gu tadzisa gugola gwaye.

Wutshigu watshavbo hi di dongiseya edzi hi na dzi emeyago khidzo. Tribhunali yi diri vbafuvbi ni Bheteli ya Brooklyn, khu kharato gutala nya ava hi nga ba hi thuma gumogo avba nya gipandre nya wulamuli va di hongola navo. Hwane nya gu ba 4 valamuli va pwide esi hi nga ganeya, avo va di ganeya gu khavo adhivhoghadhu wule kha nga ba a yede gu dzumeleya xipitali yile gasi gu theya novba ndriyathu Denise. Tribhunali yi di emeya ndriyathu Denise yi bwe yi ganeya gu khiyo gu hunga silo nya mba pheya khu gupwa mawonelo ya ava va pategago gu ndraga milayo yi vegidwego khu wufumu.

Gitepwana hwane nya isoso, tribhunali nya yikhongolo ya Nova York yi di khiyo ndriyathu Denise kha nga ba a yede gu thedwa novba. Aya khayo mahungu nyo pheye nyi pategidego gwawo ma ganeyago khu novba ma yisidwego tribhunali nya yikhongolo. (Wona kwadru “ Dzitepo edzi dzitribhunali nya dzikhongolo dzi emedego Dzifakazi dza Jehovha.”) Nyi phaside vambe vaadhivhoghadhu Bheteli ga mahungu ma nga ba ma ganeya khu sanana, gutshula mutshadho, ni milayo yi ganeyago khu mayigo ni gu vbaha.

MUTSHADHO WANGU NI NDRANGA YANGU

Na nyiri ni mwangadzi wangu Dawn

Tepo nyi nga tivana ni mwangadzi wangu, Dawn, uye a di gu tshude mutshadho ni mwama waye nyo pheye nigu a di gu sayisa enga sanana siraru. A di gu thuma nigu a diri piyonero. Womi waye kha wa nga ba wu mu vbevbugeya nigu a nyi samadziside ngudzu khu gu dziemiseya gwaye nyo thumeye Jehovha. Khu 1992, hi di hongola tshanganoni nya mughanga wu nga ba wuri ni hungo nya mahungu wu gu khuwo “Portadores de Luz,” wu giredwego Nova York. Na hiri iyoyo nyi di mu lomba gu namorari naye. Hi di tshadha mwaga wu nga landreya. Gu manega ni mwangadzi a thangisago Jehovha guvbanyani a bwe a khala na tsakide makategwa nya makhongolo. Dawn a di gu nyi tsakisa tshigu ni tshigu. — Mav. 31:12.

Tepo hi nga tshadha, sanana saye si diri ni 11, 13 ni 16 myaga. Nyi di gu vbweta gu khala papayi nya wadi, khu kharato, nyi di hevbula omu nya mabhuku yathu yatshavbo mahungu ma ganeyago khedzi nyi nga khalago khidzo padrasto nya wadi. Kha sa vbevbuga, ganiolu nyi ngu bonga ngudzu kholu khu gu hegisa sanana sile si nyi olovede kha nga pari yaso ni papayi waso. Tepo yatshavbo hi di gu tsaka khu gu endredwa khu dzipari nya sanana sathu ndrangani nigu hi di gu tsaka ngudzu khu gu khala ni vaphya nya vangi.

Khu 2013, Eni ni Dawn hi di fuluga hi hongola Wisconsin gasi guya sayisa vavelegi vathu kholu va di dandride khu tanga. Egi gi nga nyi tsakisa khu gu kha nya ema gu thuma Bheteli. Nyi di mana lithomo nyo simame gu phasedzeya hengeledzano omu nya thumo nya wulamuli khu tepo nyo khaguri.

GU VBINDRUGEDZA NYA KHAVBA NI AVBA

Khu Setembro nya 2018, nyi di tugula gukheni nyi di gu khoholeya ngudzu. Dhogodheya wangu a di nyi popola ganiolu kha ga manwa madwali. Khu gu gimbiya nya tepo nyi di popodwa khu mumbe dhogodheya, a nga ba ari Neurologista. Khu Janeiro nya 2019, dhogodheya yoyo a di nyi embeya gu khuye khatshi nyi ngu vandramedwa khu madwali ma gu mwalo rendre ma ranwago gu pwani paralisia supranuclear progressiva (PSP).

Hwane nya matshigu mararu, nyi di dzi fanya libogo la nyamudye na nyi gu gira hagano wangu nyi wu golago. Nyi di gu gira hagano wowu gukhugeya na nyi ngari gyanana nigu nyi di gu wu kodza gwadi. Khu kharato, tepo nyi nga dzi fanya nyi di tugula gu kheni kha nya nga ba nyi kodza gambe gu woneleya gwadi givili gyangu nga gale. Madwali ma di dandra khu guvbiredza, khu gitepwana kha nya nga ba nyi kodza gambe gu ganeya gwadi, gu gimbiya ni gu midza guhodza.

Nyi manide lithomo nya likhongolo ngudzu nyo thumise makodzelo yangu kha nga adhivhoghadhu gasi gu andrisa Mufumo wa Nungungulu. Nyi lovide dzindrima dzi ganeyago khu thumo wangu omu nya dzijornali nyi bwe nyi emeya Dzifakazi dza Jehovha omu nya mitshangano nya yikhongolo yi nga ba yi ganeya khu gu thumwa ni gu girwa operasawu nya mba thedwa novba. Ambari ulolo, nyo dzi vega avba nya malito ma gomogo omu ga Luka 17:10, ma gu khayo: ‘Nyi githumi nyamba phasa gilo, nyi di landrisa giguruvedzo gyangu basi.’