So wonegisa gu khatshi Jesu khade Muphasi nya Khongolo nya Mhamba tepo a nga bhapatiswa khu 29 E.C. Ho dziti kharini? Tepo a nga bhapatiswa, a di yeyedza gu khuye a di dzi emisede gu ningeya womi waye kha nga mhamba vbagiluvelotunu gasi gu gira “gu haladza” ga Nungungulu. (Gal. 1:4; Hebh. 10:5-10) Kha nga olu giluvelo gi gu gipandre nya lisima ngudzu nya tempele so thula gu khiso tempele ya liphuvboni yi phede niyo gu manega tepo Jesu a nga bhapatiswa. Tempele nya yikhongolo ya Jehovha yo thula satshavbo si pategago avba nya gu khozeye Jehovha khu ndziya nya lisine na hi gu phasedzedwa khu dzegiso wa Jesu Kristo. — Mat. 3:16, 17; Hebh. 5:4-6.

Khu kotani nya olu gu nga manega tempele nya yikhongolo ya liphuvboni gu di gu vbwetega gambe muphasi nya khongolo nya mhamba. Khu kharato, Jesu a di todzwa “khu tshivba nya Liphuvbo nya Guage” gasi gu gira thumo wowo. (Mith. 10:37, 38; Marko 1:9-11) Ambari ulolo, ha gu dziti kharini gu khethu Jesu a todzidwe kha nga Muphasi nya Khongolo nya Mhamba na si gufi a bwe a wuswa? Giyeyedzo gya Aroni, a nga ba ari muphasi nya khongolo nya mhamba Jesu na si guti mafuni gi na hi phasa gu hlamula giwudziso gegi.

Nayo wu di gu khuwo oyu a nga ba a yede gu beya Wulangani nya Guage Ngudzu omu nya tabherinakeli gu diri muphasi nya khongolo nya mhamba. Wulanga wowu nyo Age Ngudzu wu di hambanisidwe ni aya mambe malanga khu kortina. Muphasi nya khongolo nya mhamba a di gu beya wulanga wowo khu litshigu nya Tsetselelo nya sighoho. (Hebh. 9:1-3, 6, 7) Kha nga olu Aroni ni vambe vaphasi nya mhamba va todzidwego na va si gu beyi omu nya kortina nya tabherinakeli, si nga gira Jesu nuye na todzidwe kha nga Muphasi nya Khongolo nya Mhamba nya tempele nya liphuvbo ya Jehovha na si gufi. Khu kharato, bede ndrani nya kortina si thulago givili gyaye tepo a ngafa a hongola ndzadzini. (Hebh. 10:20) Khu gighelo gegi, mupostoli Pawulo ganede gu khuye Jesu a nata kha nga “Muphasi nya Khongolo nya mhamba” nigu “kha bela . . . Wulangani nya Guage ngudzu nya gugirwe khu mandza nya vathu.” Uye a di bela, “ndzadzini gwabune.” — Hebh. 9:11, 24.

Gumwalo gu hambana avba nya litshigu Nungungulu a nga dzumeya gidzumeledzwano nya giphya ni litshigu gi nga pheya gu thuma. Khu ginani? Khu gu tepo Jesu a nga gweya ndzadzini aya ningeya womi waye nyo vbeleye gasi gu hi dzegisa a di gu gira gipandre nyo pheye avba nya sipandre siraru si pategago avba nya gidzumeledzwano nya giphya. Sipandre soso nya siraru khiso si giridego gu gidzumeledzwano gi pheya gu thuma. Khu sevbini sipandre sakone?

Nyo pheye, Jesu a di hongola mbeli ga Jehovha; nya wuvili, Jesu a di ningeya muphaso waye nya lisima ga Jehovha; nya wuraru, Jehovha a di hakha muphaso wa Jesu. Na si si gu giregi silo sesi sa siraru, gidzumeledzwano nya giphya gi di si gu pheyi gu thuma.

Bhibhiliya kha yi ganeyi gwadi gwadi gu khiyo lini Jehovha a hakhidego muphaso wa Jesu. Khu kharato, anethu hi mwalo makodzelo nyo ganeye gu khethu lini gi phedego gu thuma gidzumeledzwano nya giphya. Ganiolu hi ngu dziti gu khethu Jesu gwede ndzadzini na gu keneleya 10 matshigu gasi gu vboha pentekosta. (Mith. 1:3) Khu ndziya nyo khaguri, Jesu ningede muphaso waye ga Jehovha khu gitepwana gyogyo nigu Jehovha a wu hakhide. (Hebh. 9:12) Ho ganeya isoso khu kotani nya esi si giregidego khu pentekosta nya 33 E.C. (Mith. 2:1-4, 32, 33) Khavbovbo, gidzumeledzwano nya giphya gi di pheya gu thuma.

Khu kharato, gidzumeledzwano nya giphya gi hakhidwe khu Jehovha gi bwe gi pheya gu thuma tepo Jehovha a nga dzumeya muphaso nya novba wa Jesu. Isoso so thula gu khiso gidzumeledzwano gegi gi phede gu thuma Jesu nari Muphasi nya Khongolo nya Mhamba. — Hebh. 7:25; 8:1-3, 6; 9:13-15.