1. Ginani egi Jehovha a gu giredego?

GINANI u giridego gasi gu khala mweyo nya Dzifakazi dza Jehovha? Gu pheya adzina u pwide “mahungu nya yadi” ga vavelegi vago, ga sithumi kwanu, dzikolega xikwatunu mwendro tepo Dzifakazi dza Jehovha dzi ngata gaya gwago dzi ta gu tshumayela. (Marko 13:10) Khavbovbo muthu nyo khaguri a dzi ningide tepo a bwe a dzi garadza gasi gu hevbula nago Bhibhiliya. Tepo u nga ba u hevbula Bhibhiliya u hagulede lihaladzo lago khu Jehovha u bwe uti gu khuwe Jehovha a ngu gu haladza. Jehovha a gu ranide uta lisineni nigu olu u gu moyo nya vapizane va Jesu Kristo u na ni gutumba nyo vbanye kala gupindruga. (Joh. 6:44) khu lisine, u ngu mu bonga ngudzu Jehovha kholu a thumisidego muthu nyo khaguri gasi gu gu hevbudza lisine ni olu a gu hakhidego kha nga moyo nya sithumi saye.

2. Ginani hi na bhulago khigyo avba nya ndrima yeyi?

² Olu hi litigo lisine, hi nani lithomo nya gu phase vambe gasi va ta dzi pata ni ethu ndziyani nya womi. Adzina si ngu hi vbevbugeya gu tshumayela khu ndranga ni ndranga, ganiolu si nga gira na si hi garadzeya gu pheya gihevbulo nya Bhibhiliya ni muthu. Ina uwe wa gu dzipwa kharato? Abari kharato, avba nya ndrima yeyi adzina u na mana mawonelo nyo khaguri ma na gu phasago. Hi na bhula khesi si hi kutsago gu gira vapizane. Hi na wona gambe edzi hi nga palago khidzo sigaradzo si hi girago hi thava gu pheya gu gimbidzisa gihevbulo nya Bhibhiliya. Gu pheya, hi na wona gu khethu khu ginani hi yedego gu tshumayela vathu hi bwe hi va hevbudza mahungu nya yadi.

3. Khu ginani hi tshumayelago?

³ Tepo Jesu a nga ba ari mafuni, ningide valandreyi vaye sileletelo sivili. Nyo pheye, uye a di va ruma gu tshumayela mahungu nya yadi nya Mufumo a bwe a va yeyedza edzi va nga girago khidzo  isoso. (Mat. 10:7; Luka 8:1) Khu giyeyedzo, Jesu a embede vapizane vaye esi va yedego gu gira tepo vathu va dzumeyago mahungu nya Mufumo ni tepo va bombago. (Luka 9:2-5) Uye gambe tshamusede vapizane vaye gu khuye va di hadzi tshumayela vathu nya vangi ni ga malanga nya mangi, tepo a nga va embeya gu khuye va di hadzi ningeya “wufakazi ga mayigo yatshavbo.” (Mat. 24:14; Mith. 1:8) Jesu rumide vapizane vaye gu bhuleya vathu maningano ni Mufumo wa Nungungulu ni esi wu na si girago, gani vathu va ngu tsakeya mwendro ne.

4. Guya khu Matewu 28:18-20, ginani gimbe hi yedego gu gira ha gu ba hi tshumayela mahungu nya Mufumo wa Nungungulu?

⁴ Khu gevbini gileletelo nya wuvili egi Jesu a ningidego vapizane vaye? Uye rumide vapizane vaye gu hevbudza vathu gu landrisa satshavbo a va hevbudzidego. Ganiolu, ina gileletelo gegi gi di gu thumeya basi Makristo ya matshigoni ya Jesu? Jesu a yeyedzide gu khuye thumo wowo nya lisima wu di hadzi simama gu girwa kala matshigoni yathu mwendro “kala guhegisani nya litigo.” (Leri Matewu 28:18-20.) So wonega gu khatsi Jesu a ningede gileletelo gegi tepo a nga dziwonegisa ga vapizane vaye nyo vbindre 500. (1 Kor. 15:6) Nigu avbo nya giwoniso a ningidego Johane, Jesu si vegide guagani gu khuye a di gu vbweta gu vapizane vaye vatshavbo va phasa vambe gu hevbula maningano khu Jehovha.— Gutu. 22:17.

5. Gipimaniso muni egi Pawulo a gi thumisidego avba ga 1 Vakorinto 3:6-9, gasi gu yeyedza gu pwanana gu gomogo avba nya gu tshumayele ni gu hevbudza?

⁵ Pawulo fananiside thumo nya gu gire vapizane ni gulima, nigu uye yeyedzide gu khuye kha sa eneya basi gu yala dzimbewu, uye dundrugiside Vakorinto gu khuye: “Eni nyi yade, Apolo thedzede mati . . . gasi enu mu lithembwe la Nungungulu.” (Leri 1 Vakorinto 3:6-9.) Ethu ha gu thuma omu “nya lithembwe la Nungungulu” khu kharato, tepo hi tshumayelago ha gu yala dzimbewu nigu tepo hi hevbudzago ha gu thedzeya mati. (Joh. 4:35) Ganiolu, hi ngu dziti gu khethu Nungungulu khuye a dandrisago dzimbewu, si thulago gu khiso khuye a ranago vathu vata iyu gwaye.

6. Tepo hi hevbudzago vathu, ginani hi yedego gu va phasa gu gira?

⁶ Ethu ha gu vbwetedzeya ava va dzi emisedego “gu hakha guvbanya nya gupindruge.” (Mith. 13:48) Gasi gu phasa vathu vovo gu khala vapizane hi yede gu va phasa (1) gu pwisisa (2) gukhodwa ni (3) gu thumisa esi va hevbulago umo nya Bhibhiliya. (Joh. 17:3; Kol. 2:6, 7; 1 Tes. 2:13) Vatshavbo libandlani va nga phasa sihevbuli nya Bhibhiliya khu gu si yeyedza lihaladzo va bwe va si gira si dzipwa gaya tepo si tago mitshanganoni. (Joh. 13:35) Oyu a gimbidzisago gihevbulo, adzina si nga lomba gu a dzigaradza ni gu dzega tepo nya yingi gasi gu phasa gihevbuli gu vbindrugedza mavbanyelo ni esi gi nga ba gi si khodwa gale. (2 Kor. 10:4, 5) Si nga dzega migima nya yingi gasi gu phasa muthu gu vbindrugedza silo sesi womini waye a bwe a ninganedwa khu gu bhabhatiswa. Ganiolu, guvbindrugedza silo sesi si ngu phasa ngudzu.

7. Khu ginani hi tshumayelago ni gu hevbudza vambe mahungu nya yadi?

⁷ Khu ginani hi tshumayelago vathu ni gu va hevbudza gasi va khala vapizane? Nyo pheye kholu hi ngu haladza Jehovha. Wa gu gira satshavbo si gomogo tshivbani gwago gasi gu engisa gileletelo nya gu tshumayele ni gu gira vapizane, wa gu yeyedza lihaladzo lago khu Nungungulu. (1 Joh. 5:3) Nga dundrugeya khesi: Lihaladzo lago khu Jehovha li gu kutside gu tshumayela khu ndranga ni ndranga. Ina si gu vbevbugede gu landrisa gileletelo nya gu tshumayele vathu? Adzina ne. Litshigu nya pheye u nga hongola thumoni nya gu tshumayele, ina u khade hwanga tepo u nga beya ga ndranga nyo pheye? Kha si kanakanisi gu khiso u di gupwa hwanga! Ganiolu,  u ngu dziti gu khuwe owu i thumo Jesu a vbwetago gu khuye u wu gira nigu u engiside gileletelo gyaye. Nigu, khu gu gimbiya nya tepo si gu vbevbugede gu gira thumo nya gu tshumayele. Ahati gu gimbidzisa gihevbulo nya Bhibhiliya ke, ina u ngu khala hwanga khu gu dundrugeya khiso basi? Adzina. Ganiolu, wa gu gombeya ga Jehovha u mu lomba gasi a gu phasa gu tiya hwambo gasi u gimbidzisa gihevbulo nya Bhibhiliya, uye a na gu phasa gu haguleya gudogoreya nya gu gire vapizane.

8. Guya khu Marko 6:34, ginani gimbe gi na hi kutsago gu hevbudza vambe?

⁸ Nya wuvili, lihadzo lathu khu vathu li ngu hi kutsa gu hi va hevbudza lisine. Khu giyeyedzo, ga tepo nyo khaguri, Jesu ni vapizane vaye va di garade kholu va di tshumayede ngudzu. Avo va di gu vbweta wulanga nyo hefemule, ganiolu gitshungu gi di va landra avba va nga ba va romo. Jesu a di va pweya wusiwana, khu kharato a di pheya gu va hevbudza “silo nya singi.” (Leri Marko 6:34.) Uye a dzi garadzede gu thuma ambari olu a nga ba a garade. Khu ginani? Kholu Jesu a di gu dziti edzi gitshungu gi nga ba gi dzipwa khidzo. Uye a di gu vbweta gu va phasa kholu a di va wona gu khuye avo va gu tshaniseka nigu va gu vbweta gu tumba. Vathu muhuno ambari si wonegago gu khatsi womi wavo wu khadzisegide nigu va tshakide, avo navo va ngu tshangana ni sigaradzo ni gu va ngu vbweta gu tumba. Avo va gu fana ni dzinvuta dzi dzimedego dzi gu mwalo muhavisi. Pawulo ganede gu khuye vathu nya nga ava kha va muti Nungungulu nigu va mwalo gu tumba. (Efes. 2:12) Avo vomo umo nya “mwanya wu yisago gufuviswani”! (Mat. 7:13) Tepo hi dundrugeyago khu vathu va gipandreni gyathu va vbwetago guti Nungungulu, lihaladzo ni pweya-wusiwana sa gu hi kutsa gu va phasa.

9. Guya khu Vafilipi 2:13, Jehovha a nga gu phasa kharini?

⁹ Yimbe tepo hi nga khala hwanga gu pheya gihevbulo nya Bhibhiliya ni muthu, kholu hi ngu dziti gu khethu hi na vbedza tepo nya yingi na hi gu dongiseya ni gu gimbidzisa gihevbulo. Wa gu ba u dzipwa kharato embeya Jehovha. Mu lombe a gu phasa gu haguleya gudogoreya nya gu mane muthu nyo hevbule naye Bhibhiliya. (Leri Vafilipi 2:13.) Mupostoli Johane a hi embede gu khuye Nungungulu o hlamula minombelo yi yelanago ni gu gola Gwaye. (1 Joh. 5:14, 15) Khu kharato, tiyisega gu khuwe Jehovha a na gu phasa gu haguleya gudogoreya nya gu hevbudze vathu.

10-11. Khu ginani adzina hi nga digago gu gimbidzisa gihevbulo nya Bhibhiliya?

¹⁰ Hi ngu dziti gu khethu si nani lisima gu hevbudza, ganiolu kha si vbevbugi gu gira vapizane kholu hi ngu tshangana ni sigaradzo nya singi. Hongoleni hi wona simbe nya sigaradzo soso hi bwe hi wona edzi hi nga si palago khidzo.

¹¹ Giyemo gyathu adzina kha gi hi dzumeleyi gu gira esi hi nga ba hi si vbweta. Khu giyeyedzo, vambe vahuweleyi va dandride khu tanga nigu va na ni si tshetsheya. Ina anuwe u ngu tshangana ni gigaradzo gya gimwegyo? Abari kharato, wona egi hi nga gi hevbula avba nya tungu nya COVID-19. Hi hevbude gu khethu hi nga si kodza gu gimbidzisa sihevbulo nya Bhibhiliya khu gu thumisa dzitelefone mwendro yimbe mitshini. Khu kharato, u nga si kodza gu pheya mwendro gu gimbidzisa gihevbulo na wuri khu gaya gwago. Nigu, gu na ni gimbe gilo gi tsakisago. Vambe va ngu dzina gu hevbula Bhibhiliya, ganiolu ga tepo vandriyathu va gimbiyago va tshumayela, avo va mwalo tepo. Ambari ulolo, avo adzina va na ni tepo vbadzimindrutunu mwendro vbawutshigutunu. Ina u nga si kodza gu hevbula Bhibhiliya ni muthu ga ora yeyi? Jesu hevbudzide Nikodhemo vbawutshigutunu nigu khiyo tepo kamo Nikodhemo a nga yi hatha. — Joh. 3:1, 2.

12. Ginani gi hi girago hi tiyisega gu khethu hi nga khala vahevbudzi nya vadi?

¹² Adzina hi nga pimisa gu khethu kha hi na  si kodza gu gimbidzisa gihevbulo nya Bhibhiliya. Dzimbe dzitepo hi ngu pimisa gu khethu hi yede gu manega ni guti nya gungi hi bwe hi khala vahevbudzi nya vadi na hi si hevbuli ni muthu. Wa gu ba u dzipwa kharato, wona silo siraru si nga gu phasago gu tiyisega gu khuwe u nga si kodza gu hevbula ni muthu. Nyo pheye, Jehovha o gu wona na wuri ni makodzelo nyo hevbudze vambe. (2 Kor. 3:5) Nya wuvili, Jesu ‘a ningidwego wufumu watshavbo ndzadzini ni mafuni’ a gu rumide gu hevbudza vambe. (Mat. 28:18) Nya wuraru, u nga lomba giphaso ga vambe. Jesu a di gu ganeya esi a hevbudzidwego khu Papayi waye, nigu anuwe u nga gira sasimweso. (Joh. 8:28; 12:49) Gu diga isoso, u nga bhula ni muwoneleyi a thangeyago tsawa wago nya thumo nyo tshumayele, piyonero mwendro muhuweleyi a vidzidwego gasi va gu phasa gu pheya ni gu gimbidzisa gihevbulo nya Bhibhiliya. Gasi u si kodza gu khala muhevbudzi nya wadi, dzipate ni vahuweleyi vava tepo va gimbidzisago sihevbulo sawe nya Bhibhiliya.

13. Gasi gu dzi pwananisa ni mahevbudzelo nya maphya, ginani hi yedego gu gira?

¹³ Dzimbe dzitepo si ngu hi garadzeya gu dzi pwananisa ni matshumayelelo nya maphya ni gu thumisa dziferameta nya dziphya. Ndziya hi gimbidzisago khiyo sihevbulo nya Bhibhiliya yi vbindrugedzide. Gasi gu thumisa libhuku li gu khilo Vbanya kala gupindruga! Si na lomba gu hi donga hi bwe hi gimbidzisa gihevbulo khu ndziya nyo hambane ni edzi hi nga ba hi gira khidzo gale. Ha gu leri dzindrimana nya dzidugwana hi bwe hi bhula ngudzu ni gihevbuli. Tepo hi hevbudzago ha gu thumisa dzivhidhiyu nya dzingi ni dziferameta nya nga JW Library^®. Wa gu ba u si si kodzi gu thumisa dziferameta dzedzi, lomba muthu nyo khaguri gasi a gu phasa gu dzi thumisa. Ethu vathu ha gu dzipwa gwadi ha gu gira esi hi nga si oloveya. Kha si hi vbevbugeyi gu gira silo khu yimbe ndziya, ganiolu khu gu phaswa khu Jehovha ni vambe u na si kodza gu dzi pwananisa ni giemo u bwe u tsaka khu gu hevbula Bhibhiliya ni vathu. Piyonero moyo a di khuye: “Mahevbudzelo yaya, ma ngu tsakisa gihevbuli ni muhevbudzi.”

14. 1 Vakorinto 3:6, 7, a nga hi phasa kharini ha gu ba hi tshumayela omu nya gipandre vathu vakona va si tsakeyigo esi hi hevbudzago?

¹⁴ Adzina ha gu vbanya omu nya gipandre si garadzago gu pheya sihevbulo nya Bhibhiliya. Vambe vathu kha va khathali khesi hi hevbudzago nigu va nga hi wugeya. Ginani gi na hi phasago gu simama hi wona vathu va gipandreni gwathu khu ndziya nya yadi? Dundruga gu khuwe giemo gya vathu gi nga vbindrugedza khavba ni avba ndrani nya litigo leli nyo tala khu sigaradzo nigu oyu a gu mba tsakeya adzina a nga tugula gu khuye a ngu vbweta giphaso gya Nungungulu. (Mat. 5:3) Vambe va nga ba va bomba mabhuku yathu, khu gu gimbiya nya tepo va ngu dzumeya gu hevbula Bhibhiliya. Ethu hi ngu dziti gambe gu khethu Jehovha khuye mune nya thumo. (Mat. 9:38) Uye a gu vbweta gu khuye hi yala ni gu thedzeya mati, ganiolu uye khuye a dandrisago. (1 Kor. 3:6, 7) Nigu, si ngu tiyisa gu dundruga gu khethu ambari ha gu mba si kodza gu gimbidzisa gihevbulo nya Bhibhiliya olu, Jehovha a gu hi tshatshazeya khu mizamo hi yi girago gasi gu phasa vathu, nasiri khu tengo nya vathu hi va ningago mabhuku mwendro gu va gimbidziseya gihevbulo nya Bhibhiliya. *

15. Jehovha a gu dzipwa kharini tepo muthu nyo khaguri a dzumeyago gu hevbula Bhibhiliya a bwe a thumisa esi a si hevbulago?

¹⁵ Jehovha a ngu tsaka tepo muthu nyo khaguri a dzumeyago lisine nya Bhibhiliya a bwe a bhuleya vambe esi a si hevbulago. (Mav. 23:15, 16)  Jehovha a ngu tsaka ngudzu tepo a wonago vathu vaye muhuno na va thuma khu sighingi thumoni nyo tshumayele ni gu hevbudza. Khu giyeyedzo, ambari olu gu manegidego tungu khu 2020, gu gimbidzisidwe 7 705 765 sihevbuli nya Bhibhiliya. Isoso si phaside 241 994 vathu gu hendzeledza womi wawe ga Jehovha va bwe va bhabhatiswa. Vapizane vava nya vaphya, va na gimbidzisa sihevbulo nya Bhibhiliya va bwe va gira vapizane nya vangi. (Luka 6:40) Khu lisine, Jehovha a ngu tsaka tepo hi pategago avba nya thumo nyo gire vapizane.

16. Khu yevbini misuwo nya yadi hi nga dzi vegeyago?

¹⁶ Thumo nyo gire vapizane kha wu vbevbugi, ganiolu khu gu phaswa khu Jehovha, hi nga si kodza gu hevbudza muthu nyo khaguri gu haladza Papayi wathu wa ndzadzini. Ina hi nga dzi vegeya misuwo nyo pheye gu hevbula Bhibhiliya ni muthu moyo basi? Hi na samadziswa khesi si na dugeleyago ha gu hatha tepo nya yadi gasi gu bhula ni ava va vbwetago gu hevbula Bhibhiliya. Hi nga tiyisega gu khethu Jehovha a na kategisa mizamo yathu.

17. Hi na dzipwa kharini ha gu si kodza gu gimbidzisa gihevbulo nya Bhibhiliya?

¹⁷ Khu lisine, lithomo gwathu gu tshumayela ni gu hevbudza lisine vambe. Thumo wowu, wu ngu hi gira hi tsaka khu lisine. Mupostoli Pawulo, phaside vathu nya vangi Tesalonika gu khala vapizane. Uye tshamusede edzi a nga ba a dzipwa khidzo tepo a nga khuye: “Khu mani a na khalago gutumba gwathu, ni gutsaka gwathu, ni ndronga yathu nya wudhumo mbeli gwaye, vbavbandze ga enu? Ina, enu khenu kamwe wudhumo wathu ni gutsaka gwathu.” (1 Tes. 2:19, 20; Mith. 17:1-4) Muhuno gambe nya vangi va ngu dzipwa kharato. Ndriyathu moyo nya nyamayi nyo pwane khu Stéphanie, uye ni mwama waye va phasidego vathu nya vangi gu ninganedwa khu gu bhabhatiswa, wari khuye: “Gimwalo gi tsakisago gu vbindra gu phasa muthu gu hendzeledza womi wa ye ga Jehovha.”