Jehovha o vbweta gu khuye ava va tshadhago va tsaka ni gu va bwe va manega ni wupari nya gupindruge. (Mat. 19:4-6) A bari gu wa gu suva gu tshadha, u nga mu mana kharini muthu nyo tshade naye? Jehovha kha nga Muvangi wathu, a ngu siti esi hi si vbwetago gasi hi manega ni namoro ni mutshadho nyo tsakise. Wa gu landrisa yatshavbo matshina nya milayo a hi ningago, u na tsaka khu lisine. Hongole hi wona matshina nya milayo nyo khaguri.

Gupheya gu vbwetega hi pwisisa esi maningano khu ethu: “Gimwalo gi kanganyisago guvbindra monyo, madwali yaye kha ma thumwi.” (Jer. 17:9) Tepo vathu vavili va vbwetago gu tshadha va tivanago va bwe va pheya gu namorari, esi mumbe a sipwago khu mumbe si nga dandra khu gu vbiredza nigu tepo si giregago isoso, si ngu va garadzeya gu hunga silo khu wugengeyi. Muthu a hungago gu tshadha khu kotani nya esi a sipwago khu mumbe ga tepo yile, khu gu gimbiya nya tepo a na dzi laya. (Mav. 28:26) Khu kharato, khandri wugengeyi gu vathu vavili va gu mba tivana gwadi va pheya gu bhuleyana khedzi mumbe a dzipwago khidzo khu mumbe, ni gu gwadi gu dundrugeya khu gu tshadha hwane nya gu ba mu tivanide gwadi.

Mavingu 22:3 wari khuye: “Muthu a gengedego a gu wona mhango yi ngari hwindzo a sihala; gasi sipumbu sa gu vboha vbafuvbi, khu hwane si dzi laya.” Khu dzevbini dzimhango nya gu thumise dziaplikativhu mwendro dzisayiti gasi gu mana muthu nyo tshade naye? Vambe va mananide ni mhango nya gu sengwe khu muthu va mutidego khumo nya interneti. Vathu nya mba tumbega va ngu dzi gira vambe vathu khu gu vbweta gu senga ni gu beya dzitsapawu vathu nya gu divale. Nigu, dzimbe dzitepo vathu vovo va ngu lipha khavo Dzifakazi dza Jehovha.

Wona yimbe mhango. Ga dzimbe dzisayiti edzi vathu va tivanago gasi gu dzegana, va ngu thumisa dzikalkulu nya matemàtica, gasi gu wona gu ina vathu vovo va ngu yelana gasi gu namorari mwendro ne. Ganiolu, gimwalo gi yeyedzago gu khigyo ndziya yeyi yi ngu thuma. Dundruga gu khuwe mutshadho gilo nya lisima ngudzu. Tepo u vbwetago muthu nya gu tshade naye, ina gwadi gu tumba milongoloko nya dzikomputadhori dzi giridwego khu vathu? Ina milongoloko yeyi yi ngu fananiswa ni matshina nya milayo nya Bhibhiliya? — Mav. 1:7; 3:5-7.

 Umo ga Mavingu 14:15, gu na ni litshina nya nayo li gu khilo: “Muthu nyambana mapimo a gu dzumeledzela satshavbo, gasi muthu nya mapimo a gu khedza umo a gandrago.” Gasi guti gu khuwe muthu nyo khaguri a na khala mwama nya wadi mwendro mwangadzi nya wadi, u yede gu pheya khu gu muti gwadi. Si ngu garadza gu gira isoso khu gu thumisa interneti. Ambari a bari gu u nguti mahungu nyo khaguri khu muthu yoyo, ni gu u ngu bhula naye khu tepo nyo laphe omu nya interneti, ina u nga ganeya gu khuwe u ngu muti gwadi muthu yoyo? Vambe va nga ba va pimisa gu khavo va mu manide muthu nya gu tshade naye, va thurugide tepo va nga wonana khu khovbe ni khovbe.

Muembi moyo nya dzindzimo lovide gu khuye: “Kha nyi khali dangamwedo ni sidambane, kha nyi gimbili ndziya mweyo ni vakanganyisi.” (Ndzi. 26:4) Nya vangi, khu gu vbweta gu ndridra gupima nya vathu, va ngu lipha umo nya dziaplikativhu mwendro dzisayiti nya gu mane muthu nya gu tshade naye, maningano ni edzi va gu idzo. Tepo va bhulago ni vambe khu dzimensaji, avo va gu zama gu siha makhalelo yawe nya mba yadi. Si na ni lisima gu dundrugeya khu siwudziso sesi: Ambari muthu a gu ganeya khuye i Fakazi ya Jehovha, ina uye a bhabhatisidwe? A vidzidwe khu liphuvboni? Na ni wupari nyo tiye ni Jehovha? Muthu a ningwago githawo libandlani mwendro ‘gidinga nya mba gyadi’? (1 Kor. 15:33; 2 Thim. 2:20, 21) Ina a dzi emisede gu tshadha na gu dzi seketeya avba nya matshina nya milayo nya Bhibhiliya? Gasi gu mana mihlamulo nya siwudziso sesi, adzina si na lomba gu u bhula ni Fakazi mweyo ya Jehovha yi mutigo gwadi muthu wule u vbwetago gu tshadha naye. (Mav. 15:22) Gimwalo githumi ni gimwegyo nyo tumbege gya Jehovha gi nga hadzi tshadha ni muthu nya mba khodwa. — 2 Kor. 6:14; 1 Kor. 7:39.

Kha nga hi si wonidego, si na ni mhango ngudzu gu thumisa dzisayiti mwendro dziaplikativhu gasi guti muthu nyo tshadhe naye. Ganiolu, gu na ni dzindziya nya dzadi hi nga dzi thumisago gasi guti muthu nyo tshadhe naye. U nga mu mana hayi muthu nya wadi nyo tshadhe naye? Sa gu ba si kodzega gu tshangana ni vambe, hi nga tivana ni vambe omu nya mitshangano nya libandla, mitshangano nya gipandre ni dzikongresu.

Sa gu ba si si kodzegi gu tshangana ni vandriyathu, khu giyeyedzo ndrani nya tungu nya COVID-19, ethu ha gu tshangana khu gu thumisa interneti. Avba nya mitshangano yeyi, vandriyathu nya sikwendra va na ni lithomo nya gu tivane. Avo va nga wona edzi moyo ni moyo a girago khidzo sipandre, edzi a vegago khidzo dziganelo ni edzi a yeyedzago khidzo gukhodwa gwaye tepo a hlamulago. (1 Thim. 6:11, 12) Gu diga isoso, si ngu kodzega gu bhula ni vandriyathu khomu nya dzisala simultânea hwane nya mitshangano. Tepo u tshanganago ni vambe vandriyathu khomu nya interneti, u nga si kodza gu wona edzi oyu u mu dogoreyago a pharago khidzo vambe ni gu isoso si nga gu phasa gu muti gwadi. (1 Ped. 3:4) Khu gu gimbiya nya tepo, tepo mu yago mu tivana gwadi, u na tugula gu khuwe ina mu na ni misuwo nyo fane ni gu mu ngu yelana gani?

Sikwendra sa gu thumisa matshina nya milayo nya Bhibhiliya gasi guti oyu si na tshadhago naye, iso si na manega ni mutshadho nyo tsakise. Khiso esi Mavingu a ganeyago: “Uye a manago nyamayi [mwendro mwama] a manide litsako, a manide makategwa ya PFHUMU Nungungulu.” — Mav. 18:22.