1. Ginani egi Jehovha a giridego hwanenyana nyo ba Adhamu ni Evha va ghohide? (Genesi 3:15)

 HWANENYANA nya gu ba Adhamu ni Evha va ghohide, Jehovha ningide gutumba situgulwana sawe khu gu thumisa giprofeto nya lisima. Esi uye a ganedego somo omu ga Genesi 3:15.— Leri.

2. Khu ginani malito nya giprofeto gegi ma gu na ni lisima?

² Giprofeto gegi gya gu manega umo nya libhuku nya gu pheye nya Bhibhiliya. Ganiolu, yatshavbo mabhuku ya omu nya Bhibhiliya ma ngu pwanana ni giprofeto gegi khu ndziya nyo khaguri. Kha nga givbumbo gi rwalago sivbiya satshavbo, malito ma gomogo omu ga Genesi 3:15 ma rwade mahungu nya mabhuku yatshavbo nya Bhibhiliya nya gu Nungungulu, a na rumeya muvbulugisi a nga hadzi fuvisa Dhiyabhulosi ni valandreyi vaye nya mba vadi. * Isoso si na ba siri silo nya sadi ga vale va haladzago Jehovha.

3. Ginani hi na bhulago khigyo avba nya ndrima yeyi?

³ Avba nya ndrima yeyi, hi na mana mihlamulo nya siwudziso si landreyago maningano ni giprofeto gi gomogo omu Genesi 3:15: Khu va mani va khumbugwago umo nya giprofeto gegi? Giprofeto gegi gya gu tadzisega kharini? Ethu ha gu wuyedwa kharini khu giprofeto gegi?

4. Khu mani “nyoga,” nigu ha gu dziti kharini?

⁴ Ava va khumbugwago omu nya matimu ma gomogo omu ga Genesi 3:14, 15 va gu pata “nyoga”, “gitugulwana” nya nyoga, “nyamayi” ni “gitugulwana” gya nyamayi. Bhibhiliya yi ngu hi  phasa gu tugula moyo ni moyo wawe. * Hongoleni hi pheya gu ganeya khu nyoga. Nyoga nya lisine wu mwalo makodzelo nya gu pwisisi esi Jehovha a ganedego thembweni ga Edheni. Khu kharato, Jehovha wonide gu khuye oyu a nga gira isoso gu diri givangwa nya guti ngudzu. Gu diri mani? Gutuledwa 12:9, a gu tshamuseya gu khuye khu mani nyoga. ‘Nyoga nya gu hegule’ wa gu tidwa kha nga Sathane Dhiyabhulosi. Ganiolu, khu mani gitugulwana nya nyoga?

5. Gitugulwana nya nyoga gwa gu thudwa va mani?

⁵ Dzimbe dzitepo, Bhibhiliya yi ngu thumisa lito “gitugulwana” gasi gu thula muthu a pimedzeyago muthu nyo khaguri. Nigu avo va nga ranwa pwani sanana sa muthu yoyo. Khu kharato, gitugulwana nya nyoga gya gu wumbwa khu sivangwa nya liphuvbo ni vathu ava gufana ni Sathane va wugeyago Jehovha Nungungulu ni vathu Vaye. Gitugulwana gyogyo gya gupata dzingilozi dzi digidego thumo wadzo ndzadzini matshigoni ya Nowa ni vathu nya gu vivbe va pimedzeyago papayi wawe Dhiyabhulosi. — Gen. 6:1, 2; Joh. 8:44; 1 Joh. 5:19; Judha 6.

6. Khu ginani hi ganeyago gu khethu “nyamayi” kha gu thudwi Evha?

⁶ Olu, hongoleni hi tugula gu khethu khu mani nyamayi. Nyamayi yoyo kha thudwi Evha. Khu gighelo gimwegyo. Giprofeto gyo ganeya gu khigyo gitugulwana gya nyamayi gi di hadzi gu “pfhara” hungo nya nyoga. Kha nga hi si wonidego, nyoga, ngilozi nya gu vivbe a gu Sathane, nigu mwalo muthu nya mba vbeleya a nga hadzi gu mu pfhara hungo. Sathane a di hadzi fuviswa kharini?

7. Kha nga li yeyedzago libhuku la Gutuledwa 12:1, 2, 5, 10, khu mani nyamayi a khumbugwago omu ga Genesi 3:15?

⁷ Nyamayi a khumbugwago omu ga Genesi  3:15, a ngu tshamusedwa omu nya libhuku nya gu hegise nya Bhibhiliya. (Leri Gutuledwa 12:1, 2, 5, 10.) Nyamayi yoyo khandri wa omu mafuni! Ngima wu di romo vbavbatshi nya migondro ya nyamayi, nigu hungoni gwaye gu diri ni 12 dzinyeledzi. Uye a velegide gyanana nya mba olovelega a gu Mufumu wa Nungungulu. Mufumo wowu khwa ndzadzini, khu kharato nyamayi nuye khwa ndzadzini. Uye a gu emeya gipandre nya hengeledzano ya Jehovha ya ndzadzini yi wumbwago khu dzingilozi nya gu tumbege. — Gal. 4:26.

8. Khu mani gipandre nya lisima nya gitugulwana gya nyamayi, nigu khade lini? (Genesi 22:15-18)

⁸ Lito la Nungungulu li ngu hi phasa gambe gu tugula oyu a gu na ni lisima ngudzu avba nya gitugulwana gya nyamayi. Gitugulwana gegi gi di yede gu khala gitugulwana gya Abrahama. (Leri Genesi 22:15-18.) Kha nga gi ganedego giprofeto, Jesu gitugulwana nya lisine gya mwama yoyu nyo tumbege. (Luka 3:23, 34) Ganiolu, gitugulwana gi di hadzi manega ni tshivba nya yikhongolo guvbindra muthu, kholu igyo gi di hadzi fuvisa Sathane Dhiyabhulosi. Tepo Jesu a nga ba a ri ni 30 myaga, uye a di todzwa khu liphuvbo nya guage kha nga gyanana gya Nungungulu. Tepo Jesu a nga todzwa uye khade gipandre nya lisima nya gitugulwana gya nyamayi. (Gal. 3:16) Hwane nya gu ba Jesu a fude a bwe a wuswa, Nungungulu ‘a mu khusedzide a mu tadza khu gidhumu ni rungudzu’ a bwe a mu ninga “tshivba yatshavbo nya gu fume mafuni ni ndzadzini” gupata ni tshivba nya gu ‘pfhungunule mithumu ya Sathane.’ — Hebh. 2:7; Mat. 28:18; 1 Joh. 3:8.

9-10. a) Khu va mani gambe va girago gipandre nya gitugulwana gya nyamayi ni gu va khade lini? b) Ginani hi na gi wonago khu gu landreya?

⁹ Ganiolu, gu na ni gipandre nya wuvili nya gitugulwana. Mupostoli Pawulo ganede khu gipandre gegi nya gitugulwana tepo a nga ganeya khu Makristo nya gu todzwe nya Vajudha ni ava va gu siri Vajudha, uye a di khuye: “Na mu gu lumba Kristo, mu sanana sa Abrahama, mu na hakhani thomba yi tumbisidwego.” (Gal. 3:28, 29) Tepo Jehovha a nga todza makristo khu liphuvbo nya guage, ayo ma di khala gipandre nya gitugulwana gya nyamayi. Khu kharato, gitugulwana gya gu wumbwa khu Jesu ni ava nya 144 000 va na fumago naye. (Gutu. 14:1) Vatshavbo vava va gu pimisa ni gu gira silo gu fana ni Papayi wawe Jehovha Nungungulu.

¹⁰ Olu hi dzitigo gu khethu khu va mani va khumbugwago omu ga Genesi 3:15, hi na hevbula gu khethu ginani egi Jehovha a giridego gasi gu tadzisa giprofeto gegi ni gu igyo gya gu hi phasa kharini muhuno.

11. Giprofeto gi di gu vbweta gu ganeya ginani tepo gi nga khigyo gitugulwana gya nyamayi gi di hadzi hodzwa gitshinandro?

¹¹ Guya khu giprofeto gi gomogo ga Genesi 3:15, nyoga wu di hadzi gu hodza “gitshinandro” nya gitugulwana gya nyamayi. Sathane giride isoso tepo a nga thumisa Vajudha ni Varoma gasi gu songa gyanana gya Nungungulu. (Luka 23:13, 20-24) Kha nga gilondra nya lisine avbo nya gitshinandro gi girago muthu a si si kodzi gu gimbiya khu tepo nyo khaguri, gufa ga Jesu gu mu giride a si gire gilo ndrani nya matshigu yale ya mararu a nga ba a fude.— Mat. 16:21.

12. Lini wu na pfharwago hungo nya nyoga, nigu khu ndziya muni?

¹² Giprofeto gi gomogo omu ga Genesi 3:15 gya gu yeyedza gu khigyo Jesu kha nga hadzi simama thowoni. Khu ginani? Kholu guya khu giprofeto gegi gitugulwana gi di hadzi gu  pfhara hungo nya nyoga. Isoso sa gu tshamuseya gu khiso Jesu a di hadzi gu wuswa khu gufani. Nigu isoso si giregide. Hwane nya matshigu mararu na fude, Jesu a wusidwe kha nga givangwa nya liphuvbo nya mbafa gambe. Khu tepo eyi Nungungulu a yi vegisidego, Jesu a na fuvisa Sathane. (Hebh. 2:14) Vale va na fumago ni Kristo va na fuvisa valala va Nungungulu a gu gitugulwana nya nyoga. — Gutu. 17:14; 20:4, 10. *

13. Ha gu phasega kharini khu gu tadzisega nya giprofeto gegi?

¹³ Abari gu u githumi gya Nungungulu, u na phasega khu gu tadzisega nya giprofeto gegi. Jesu a dzude mafuni kha nga muthu nya nyama. Uye a pimedzede makhalelo ya Papayi waye. (Joh. 14:9) Khu gu hevbula khu Jesu, ethu hi tide Jehovha Nungungulu ni gu mu haladza. Hi nga phasega gambe khu sihevbudzo sa Jesu ni edzi a thangeyago khidzo libandla nya Wukristo muhuno. Uye a hi hevbudzide gu vbanya khu ndziya eyi yi tsakisago Jehovha. Hatshavbo hi nga phasega kholu Jesu a hodzidwego gitshinandro mwendro gufa. Khu ginani? Hwane nya gu ba Jesu a wusidwe, Jehovha a dzumede muphaso wa gyanana gyaye nya guvbeleye gasi gu “handza sighoho sathu satshavbo.” — 1 Joh. 1:7.

14. Ha gu dziti kharini gu khethu malito aya Jehovha a ganedego thembweni ga Edheni kha ma tadzisega ga tepo yile? Tshamuseya.

¹⁴ Malito aya Jehovha a ganedego thembweni ga Edheni ma gu yeyedza gu khayo ayo ma di hadzi gu mba tadzisega ga tepo yile. Si di hadzi dzega tepo nyo laphe gasi gitugulwana gi tumbisidwego gi tumbunuga khavba ga nyamayi gasi gu Sathane a tshanganisa valandreyi vaye, nigu livengo li manega avba nya mitsawa yeyi ya mivili. Ethu hi ngu phasega khu gu pwisisa giprofeto gegi. Kholu gya gu hi gira hi wona gu khethu litigo leli li fumedwago khu Sathane li di hadzi venga vakhozeyi va Jehovha. Khu gu gimbiya nya tepo Jesu ningede gigengedzo nyo fane vapizane vaye. (Marko 13:13; Joh. 17:14) Ethu hi ngu wona gu khethu gipandre nya giprofeto gegi gi ngu tadzisega ngudzungudzu ndrani nya 100 myaga yi vbindridego. Khu ginani?

15. Khu ginani litigo li wugeyago ngudzu gitugulwana gya nyamayi gu vbindra gale, ganiolu khu ginani hi gu mwalo gighelo nya gu thave?

¹⁵ Hwanenyana nya gu Jesu a khade Pfhumu nya Wumesiya khu 1914, Sathane a di tutumiswa khu ndzadzini. Uye a di rinywa mafuni, a vireya litshigu laye nya gu fuviswe. (Gutu. 12:9, 12) Ganiolu, uye kha khale khu mawogo. Sathane gorogide nigu a gu wugeya vathu va Nungungulu. Khu gighelo gyogyo, litigo la gu wugeya vathu va Nungungulu khu tshivba. Ganiolu, hi mwalo gighelo nyo thave Sathane ni vathu vaye, wulangani nya isoso hi nga tiyisega nga Pawulo a nga lova gu khuye: “Nungungulu a gu ema ni ethu, khu mani a na hi wugelago?” (Rom. 8:31) Hi nga tumba Jehovha khu gu vbeleya kholu hi ngu wona gu khethu gipandre nya giprofeto gi gomogo omu ga Genesi 3:15 gi tadzisegide.

16-18. Curtis, Ursula ni Jessica va phasegide kharini khu gu pwisisa giprofeto gi gomogo omu ga Genesi 3:15?

¹⁶ Gitumbiso gya Jehovha gi gomogo ga Genesi 3:15 gi nga hi phasa gu emisana ni gevbini gigaradzo womini wathu. Curtis oyu a thumago nga Misiyonariyo tigoni ga Guam wari khuye: “Silo si giregidego womini gwangu si nyi giride si nyi garadzeya gu simama gu tumbega ga Jehovha, ganiolu gu dundrugeya khu giprofeto gi gomogo omu ga Genesi 3:15  si ngu nyi phasa gu simama na nyi tumbegide ga Papayi wangu wa ndzadzini.” Curtis o vireya khu maho nyo fuviye litshigu eli Jehovha a na vbedzago sigaradzo sathu satshavbo.

¹⁷ Ndriyathu moyo wa Bavaria nyo pwani khu Ursula wari khuye: “Gu pwisisa giprofeto gya omu ga Genesi 3:15 si mu phaside gu tiyisega gu khuye Bhibhiliya ya guta khiyo ga Nungungulu. Uye wonide edzi siprofeto satshavbo si pwanango khidzo ni giprofeto gegi nigu isoso si mu hlamadziside ngudzu, uye gambe ganede khuye: “Tepo nyi nga hevbula gu kheni Jehovha a di dzegeya gu gira gilogyo gasi gu hi ninga gu tumba, isoso si nyi giride nyi engedzeya gu mu haladza.”

¹⁸ Jessica a vbanyago Micronésia wari khuye: “Nyi ngo dundruga edzi nyi dzipwidego khidzo tepo nyi nga tugula gu kheni nyi di li manide lisine! Giprofeto gi gomogo omu ga Genesi 3:15 gi di gu tadzisega. Isoso si nyi phaside gu dundruga gu kheni silo hi tshanganago naso muhuno khandriso esi Jehovha a nga ba a hi suveya. Giprofeto gegi gambe gi tiyiside gutumba gwangu nya gu kheni gu thumeya Jehovha si ngu hi phasa gu manega ni womi nya wadi olu ni mindru wa tshigu.”

19. Khu ginani hi nga tiyisegago gu khethu gipandre nyo hegise nya giprofeto gegi gi na tadzisega?

¹⁹ Kha nga hi si wonidego, giprofeto gi gomogo omu ga Genesi 3:15 olu gya gu tadzisega. Olu hi tugude gu khethu khu mani gitugulwana gya nyamayi ni gitugulwana nya nyoga. Jesu gipandre nya gu pheye nya gitugulwana gya nyamayi, gilondra gyaye avbo nya gitshinandro gi vbode, nigu olu uye Pfhumu nya tshivba nya mbafa. Olu Jehovha hathide gipandre nya gikhongolo nya ava va na fumago ni Gyanana gyaye ndzadzini. Khu kotani nya olu gipandre nyo pheye nya giprofeto gi nga tadzisega, ethu hi na ni gighelo nya gu tumbe gu khethu gipandre nyo hegise a gu gu pfharwa hungo nya nyoga anigyo gi na tadzisega. Sithumi sa Nungungulu si na tsaka ngudzu tepo Sathane a na fuviswago. Kala iyoyo, u nga vbeyi tshivba. Nungungulu wathu tumbegide. Khu gu thumisa gitugulwana gya nyamayi, uye a na gira silo nya singi nya sadi ga “Mayigo yatshavbo ya mafuni.” — Gen. 22:18.