1. Hi nga tiyisega khu ginani, nigu khu ginani?

 INA SI ngu gu garadzeya gukhodwa gu khuwe silo si na tshukwata tepo u wonago sigaradzo satshavbo si gomogo tigoni momu? Sivbango nya dzindranga kha si pwanani, vathu va gu engedzeya gu khala sighevenga ni vamagundrele. Vathu nya vangi si ngu va garadzeya gu tumba vale va thangeyago. Ganiolu, u nga tiyisega gu khuwe silo si na tshukwata. Khu ginani? Kholu vathu va gu gira esi Bhibhiliya yi ganedego umo nya siprofeto maningano ni “matshigu nya guhegise.” (2 Thim. 3:1-5) A mwalo muthu nya wadi a nga bombago gu tadzisega nya giprofeto gegi. Nigu gu tadzisega nya giprofeto gegi gya gu yeyedza gu khigyo Jesu Kristo a khade Pfhumu nya Mufumo wa Nungungulu. Ganiolu, egi gimwegyo nya siprofeto nya singi si ganeyago khu Mufumo. Si na hi tiyisa ngudzu ha gu wusedza simbe siprofeto si nga tadzisega ga myaga yi nga gu vbindrago.

2. Ginani hi na bhulago khigyo avba nya ndrima yeyi, nigu khu ginani? (Tshamusela fotu avba nya kapa.)

² Avba nya ndrima yeyi, hi na wona 1) giprofeto gi hi phasago gu pwisisa gu khethu lini Mufumo wa Nungungulu wu nga emiswa, 2) siprofeto si hi phasago gu pwisisa gu khethu Jesu khade Pfhumu nya Mufumo wa Nungungulu ndzadzini ni 3) siprofeto si yeyedzago edzi valala nya Mufumo wa Nungungulu va na fuviswago khidzo. Hi na wona gu khethu siprofeto sesi si ngu pwana gufana ni sipandre nya jogu nya quebra-cabeça, gasi gu hi phasa guti avbo hi gomogo ndrani nya tepo eyi Jehovha a yi vegisidego gu silo soso si girega.

3. Gitiyisegiso muni hi gi manago umo nya giprofeto hi gi manago umo ga Dhaniyeli 7:13, 14 maningano ni Pfhumu nya Mufumo wa Nungungulu?

³ Giprofeto hi gi manango umo ga Dhaniyeli 7:13, 14 gya gu hi tiyisegisa gu khigyo Jesu Kristo a na bari Pfhumu nya yadi nya Mufumo wa Nungungulu. Vathu va mayigo yatshavbo va na tsakiswa khu gu “mu thumeya,” nigu kha gu na nga manega gambe Mufumeli hwane nya uwo. Gimbe giprofeto hi gi manago umo ga libhuku la Dhaniyeli gi ganede gu khigyo Jesu a di hadzi gu hakha Mufumo waye guvbeyani nya 7 dzitepo. Ina si ngu kodzega guti tepo eyi Jesu a nga khala Pfhumu?

4. Dhaniyeli 4:10-17 a gu hi phasa kharini gu tugula mwaga owu Jesu a nga hadzi gu khala Pfhumu? (Wona gambe tshamuselo wa vbavbatshi.)

⁴ Leri Dhaniyeli 4:10-17. ‘7 dzitepo’ dza gu emeya 2 520 myaga. Tepo yoyo, yi phede khu 607 na ma si gu vbohi matshigu yathu tepo khiyo Vabhabhiloni va nga dusa pfhumu nya gu hegise khu gikhalutuno gya Jehovha, Jerusalema. Iyo yi vbede khu 1914 matshigoni yathu, tepo khiyo Jehovha a nga emisa Jesu ‘oyu khu lisine a lumbwago’ khu gu khala Pfhumu nya Mufumo wa Nungungulu. *— Ezek. 21:25-27.

5. Ha gu phasega kharini khu giprofeto gi ganeyago khu ‘7 dzitepo’?

⁵ Hi nga phasega kharini khu giprofeto gegi? Ha gu pwisisa giprofeto gi ganeyago khu ‘7 dzitepo’ isoso si na hi tiyisegisa gu khiso Jehovha a na tadzisa situmbiso saye khu tepo yakone. Jehovha hungide gu khuye uye a di hadzi gu emisa Jesu kha ga Pfhumu khu tepo yakone. Nigu tepo yi nga vboha tepo yoyo, Jehovha a di gira isoso kamo. Khu kharato, ethu hi ngu dziti gu khethu Uye gambe a na tadzisa satshavbo siprofeto khu tepo a yi hungidego. Khu lisine, litshigu la Jehovha ‘kha li na nga hweya!’— Habh. 2:3.

6. a) Ginani gi giregago mafuni gi yeyedzago gu khigyo Kristo a gu fuma ndzadzini? b) Sigiro sesi sa gu tshingiswa kharini umo nya libhuku la Gutuledwa 6:2-8?

⁶ Nari vbafuvbi ni gu vbedza thumo waye omu mafuni, Jesu ganede khu sigiro nyo khaguri mafuni si nga hadzi gu phasa valandreyi vaye guti gu khavo uye phede gu fuma ndzadzini. Sigiro soso a si khumbugidego gu diri dzinyimbi, dzindzala ni dzimhango nya tumbunugo. Uye profetide gambe gu khuye yi di hadzi manega mitungu mwendro madwali “malangani nya guhambanehambane” nigu giyeyedzo nya isoso khu tungu nya COVID-19. Sigiro sesi, gipandre nya esi Bhibhiliya yi ganedego gu khiyo “siwonegiso” nya gute ga Kristo. (Mat. 24:3, 7; Luka 21:7, 10, 11) 60 myaga hwane nya gu ba a fude a bwe a bweleya ndzadzini, Jesu ningide Mupostoli Johane gimbe giyeyedzo nya gu khigyo sigiro sesi si di hadzi gu girega. (Leri Gutuledwa 6:2-8.) Satshavbo sigiro sesi si ngu girega gukhegeya tepo Jesu a nga emiswa kha nga Pfhumu khu 1914.

7. Khu ginani si giregago silo nya singi nyo vivbe omu mafuni gukhugeya tepo Jesu a nga khala Pfhumu?

⁷ Khu ginani siemo nya litigo leli si nga engedzeya guvivba tepo Jesu a nga khala Pfhumu? Gutuledwa 6:2 a ngu ganeya khu gilo nya lisima. Gilo nyo pheye egi Jesu a giridego hwane nyo ba a khade Pfhumu nya Mufumo wa Nungungulu uye a di dwana nyimbi. A di dwana ni mani? A di dwana ni Dhiyabhulosi ni madhemoni yaye. Guya khu Gutuledwa gipimo 12, Sathane a di padwa avbo nya nyimbi nigu uye ni madhemoni yaye va di rinywa omu mafuni.  Kha nga handro wakone “libango gwanu enu mafu” kholu sathane a tade khu likhulo nigu a gu wugeya vathu. — Gutu. 12:7-12.

8. Kha nga olu siprofeto si ganeyago khu Mufumo wa Nungungulu si tadzisegago, ethu hi nga phasega kharini?

⁸ Hi nga phasega kharini khu siprofeto sesi? Sigiro sa mafuni gwatshavbo ni guvbindrugedza nya mavbanyelo nya vathu sa gu hi phasa gu pwisisa gu khethu Jesu a khade Pfhumu. Khu kharato, wulangani nya gu hi goroga khu gu wona vathu na va gu khala va magundrele ni gu khala sighevenga, ethu hi yede gu dundruga gu khethu sigiro soso sa gu tadzisa siprofeto nya Bhibhiliya. Khu lisine, Mufumo wa Nungungulu olu wu emisidwe! (Ndzi. 37:1) Nigu hi na wona gu garadzega tigoni momu na gu gu engedzeya tepo nyimbi nya Harmagedhoni yi hidzimeyago. (Marko 13:8; 2 Thim. 3:13) Ethu hi ngu bonga ngudzu Papayi wathu nya lihaladzo wa ndzadzini khu hi phasa gu pwisisa gu khethu khu ginani si gomogo sigaradzo nya singi tigoni momu.

9. Kha nga li yeyedzago libhuku la Dhaniyeli 2:28, 31-35, khu wevbini mufumo nya tshivba wu nga hadzi gu fuma hwane nyo ba Jesu a phede gu fuma kha nga Pfhumu ndzadzini?

⁹ Leri Dhaniyeli 2:28, 31-35. Ethu hi ngu wona giprofeto gegi na gi gu tadzisega muhuno. Loro wa Nebhukodhonozari wu yeyedzide esi si nga hadzi girega “matshigoni nya guhegise,” hwane nyo ba Kristo a phede gu fuma. Valala va Jesu va mafuni va di hadzi gu wumbwa khu Mufumo nya tshivba wu profetidwego omu nya Bhibhiliya, owu wu emedwago khu ‘migondro nya simbe ni libumba.’ Mufumo wowu nya tshivba wa gu fuma. Uwo wu phede gu fuma ndrani nya Nyimbi nya gu pheye nya mafu yatshavbo tepo Britânia ni Estados Unidos va nga pheya gu thuma gumogo, a  gu pwanano nya Anglo-Americana. Gifananiso nya loro wa Nebhukodhonozari, uwo gambe wu ganede khu silo sivili maningano ni Mufumo nya tshivba si nga hadzi gu yeyedza gu hambana nya Mufumo wowo ni mifumo yi vbindridego.

10. a) Ginani hi gi wonago avba nya Mufumo nya tshivba wa Anglo-América gi profetidwego omu ga Dhaniyeli? b) Ginani hi yedego gu dzi woneya gu gira? (Wona kwadru yi gu khiyo “ Dzi woneye ni libumba!”)

¹⁰ Gupheya, gu hambana ni mifumo nya tshivba yi khumbugidwego avba nya giwoniso, pwanano nya Anglo-América wa gu fanekisela nasiri khu silo nya nga ndralama mwendro parata, ganiolu khu gu patedzedwa nya simbi ni libumba. Libumba la gu emeya ‘gitugulwana nya vathu’ mwendro vathu kamo. (Dhan. 2:43, NM) Muhuno, hi ngu wona gwadi gu khethu gu patega nya vathu avba nya gu vhote, avba nya dzikampanya, sitereka ni gu pwanana nya sithumi, sa gu gira gu vathangeyi nya Mufumo wowu nya tshivba si va garadzeya gu tadzisa esi avo va si vbwetago.

11. Mufumo nya tshivba Anglo-América wa gu tiyisa kharini gutumba gwathu nya gu khethu ha gu vbanya matshigoni nya gu hegise?

¹¹ Nya wuvili, Anglo-América oyu wu emedwago khu migondro nya githombe nya gikhongolo, khuwo mufumo nya tshivba wu profetidwego umo nya Bhibhiliya. Kha wu na nga manega gambe wumbe mufumo nya muthu hwane nya uwo. Wulangani nya isoso, uwo wu na fuviswa khu Mufumo wa Nungungulu avba nya nyimbi nya Harmagedhoni gumogo ni yimbe mufumo nya vathu. * — Gutu. 16:13, 14, 16; 19:19, 20.

12. Ginani gambe giprofeto gya Dhaniyeli gi yeyedzago, gi hi ningago gutumba ni gu hi thaveleya?

¹² Hi nga phasega kharini khu giprofeto gegi? Giprofeto gya Dhaniyeli gi ngu ninga simbe siyeyedzo nya gu khethu ha gu vbanya matshigoni nya gu hegise. 2 500 myaga hwane, Dhaniyeli ganede gu khuye hwane nya mufumo wa Bhabhiloni yi di hadzi gu dugeleya 4 mifumo nya tshivba yi nga hadzi gu wugeya vathu va Nungungulu. Ambari ulolo, ganede gambe gu khuye Anglo-América Mufumo nya tshivba ya mafuni gwatshavbo wu di hadzi khala owu nya gu hegise. Si ngu hi thaveleya ni gu hi ninga gutumba nya gu khethu Mufumo wa Nungungulu nugunugu wu na fuvisa mifumo yatshavbo nya vathu nigu uwo wu na fuma mafuni gwatshavbo. — Dhan. 2:44.

13. Kha nga si khumbugidwego umo ga Gutuledwa 17:9-12, “pfhumu nya wu 8” ni “10 dzipfhumu” va gu emeya ginani, nigu giprofeto gegi gya gu tadzisega kharini?

¹³ Leri Gutuledwa 17:9-12. Khu kotani nya olu nyimbi nyo pheye nya mafu yatshavbo yi nga ghoheteya silo nya singi, gi giregide gilo nyo khaguri gi tadzisedego gimbe giprofeto gya omu nya Bhibhiliya maningano ni matshigu nyo hegise. Vathangeyi nya mafu va di gu vbweta gu andrisa gurula tigoni. Khu kharato, khu Janeiro nya 1920 avo va di emisa Liga das Nações owu wu nga tshikedzwa khu Nações Unidas khu Outubro nya 1945. Hengeledzano yeyi ya gu ranwa kha nga “pfhumu nya wu 8.” Ganiolu, uwo khandri mufumo nya tshivba. Uwo wa gu ningwa basi tshivba kholu wu phasedzedwago khu mifumo. Bhibhiliya ya gu rana vafumeli vava kha nga “10 dzipfhumu.”

14-15. a) Ginani egi Gutuledwa 17:3-5 a tshamuseyago maningano ni “Bhabhiloni nya khongolo”? b) Ginani gi giregago ni vaphasedzeyi nya wukhozeyi nya malipha?

¹⁴ Leri Gutuledwa 17:3-5. Na gu thumiswa khu Nungungulu, mupostoli Johane a di wona gibhayi “Bhabhiloni nya khongolo,” gi emeyago tshindza nya wukhongeyi nya malipha. Giwoniso gegi gya gu tadzisega kharini? Hengeledzano nya wukhongeyi nya malipha ya gu  thuma gumogo ni mifumo nya tshivba nya politika nigu ya gu yi seketeya. Nya mba hweya Nungungulu a na theya monyoni nya dzipfhumu nya politika “gudogoreya nyo gire gugola gwaye.” Isoso si na resa handro muni? Dzipfhumu dzodzo nya politika, “10 dzipfhumu,” dzi na wugeya hengeledzano nya wukhongeyi nya malipha dzi bwe dzi yi fuvisa. — Gutu. 17:1, 2, 16, 17.

¹⁵ Ha gu dziti kharini gu khethu gu hegisa nya Bhabhiloni nya khongolo gomo vbafuvbi? Gasi hi mana hlamulo nya giwudziso gegi gwadi hi dundruga gu khethu lidhoropa la gale la Bhabhiloni li di gu vhikedwe khu mati nya tsongo wa Ewufrate. Libhuku la Gutuledwa la gu fananisa dzimiliyoni nya vaphasedzeyi va Bhabhiloni nya khongolo ni “mati” nya givhikelo. (Gutu. 17:15) Ganiolu, libhuku la Gutuledwa lo ganeya gambe gu khilo mati ma di hadzi gu “banga,” iso si yeyedzago gu khiso tshindza nya wukhongeyi nya malipha wu di hadzi gu luza vaphasedzeyi nya vangi. (Gutu. 16:12) Muhuno, giprofeto gegi gya gu tadzisega kholu vathu nya vangi kha vari vakhozeyi nigu avo va gu vbwetedzeya mambe malanga gasi gu lulamisa sigaradzo va gu naso.

16. Ha gu phasega kharini khu gu pwisisa siprofeto maningano ni gu wumbwa nya Nações Unidas ni gu fuviswa ga Bhabhiloni nya khongolo?

 ¹⁶ Hi nga phasega kharini khu siprofeto sesi? Gu wumbwa nya Nações Unidas ni olu vathu va gu mba seketeya gambe wukhongeyi nya malipha sa gu yeyedza gu khiso ha gu vbanya matshigoni nya gu hegise. Ambari olu vathu nya vangi va gu mba seketeya gambe Bhabhiloni nya khongolo isoso khandri iso si na fuvisago hengeledzano nya wukhongeyi nya malipha. Kha nga si khumbugidwego gupheyani, Jehovha a na theya monyoni nya “10 dzipfhumu” a gu dzipfhumu nya politika dzi seketeyago Nações Unidas “gudogoreya nyo gire gugola gwaye.” Nações Unidas nya mba hweya a na fuvisa Bhabhiloni nya khongolo nigu isoso si na hlamadzisa litigo. * (Gutu. 18:8-10) Gu fuviswa nya Bhabhiloni nya khongolo si na kuha ngudzu litigo latshavbo nigu adzina si na vanga gutshaniseka, ganiolu vathu va Nungungulu va na manega ni sighelo sivili nya gu tsake. Wukhongeyi nya malipha owu wu nga ba wu wugeya Jehovha Nungungulu khu tepo nyo laphe kha wu na nga manega gambe nigu nya mba hweya wu na fuviswa khu tigoni momu nyo vivbe.— Luka 21:28.

17-18. a) Hi nga simama kharini gu tiyisa gukhodwa gwathu? b) Ginani hi na bhulago khigyo avba nya ndrima yi landreyago?

¹⁷ Dhaniyeli profetide gu khuye ‘guti nya lisine’ gu di hadzi ‘gu khala nya guete.’ Nigu isoso khiso si giregago kamo! Ethu olu hi ngu pwisisa siprofeto si ganeyago khu matshigu yathu. (Dhan. 12:4, 9, 10) Gu tadzisega nya siprofeto sesi sa gu hi gira hi ninga githawo Jehovha ni Lito laye. (Isa. 46:10; 55:11) Khu kharato, simama gu tiyisa gukhodwa gwago khu gu u hevbula Milowo u bwe u phasa vambe gu haguleya wupari ni Jehovha. Uye a na vhikeya watshavbo oyu a mu tumbago khu gu vbeleya a bwe a va ninga “gurula.” — Isa. 26:3.

¹⁸ Ga ndrima yi landreyago, hi na bhula khu siprofeto si ganeyago khu libandla nya Wukristo matshigoni yaya nya gu hegise. Kha nga hi na si hevbulago, siprofeto sesi sa gu yeyedza gambe gu khiso ha gu vbanya matshigoni nya gu hegise. Hi na wona gu khethu Jesu oyu a gu Pfhumu yathu olu, a gu thangeya valandreyi vaye nya gu tumbege.