1. Ha gu dzipwa kharini khu gu dziti gu khethu Jehovha a gu hi dzumeleya gu gombeya gwaye?

 MUVANGI nya mafu ni ndzadzi a hi dingide giningwa nya gu hathege a gu giningwa nya gu gombeye gwaye. Nga dundrugeya khesi: Hi nga tuleya monyo wathu Jehovha ni ga yevbini tepo ni levbini lidimi nya mba pheya khu gu mu lomba. Ethu hi nga gombeya na hiri ospitali vba kamani mwendro pasoni, na hi gu tumba gu khethu Papayi wathu nya lihaladzo a na hi engiseya. Ethu hi ngu tsaka ngudzu khu giningwa gegi.

2. Pfhumu Dhavhidhe yeyedzide kharide gu khuye a di gu ninga lisima lithomo nya nombelo?

² Pfhumu Dhavhidhe a di gu ninga lisima lithomo nya nombelo. Uye a embelede ga Jehovha gu khuye: “Nombelo wangu wu na gwele kha nga libani li vbiswago mbeli gwago.” (Ndzi. 141:1, 2) Dziteponi dza Dhavhidhe libani nya guage li di gu thumiswa avba nya wukhozeyi nya lisine khu Vaprista nigu li di gu dongisedwa gwadi. (Ekiso. 30:34, 35) Gufana ni vale va nga ba va dongiseya gwadi libani, Dhavhidhe a di gu dundrugeya gwadi khesi a nga ba a vbweta gu ganeya tepo a nga ba a gombeya ga Jehovha. Isoso khiso hi si vbwetago anethu. Ethu ha gu vbweta gu khethu Milombelo yathu yi tsakisa Jehovha.

3. Ginani hi yedego gu gira tepo hi gombeyago ga Jehovha nigu khu ginani?

 ³ Tepo hi gombeyago ga Jehovha, ethu hi yede gu gira isoso khu githawo. Dundruga khu siwoniso nyo hlamadzise si hakhidwego khu Isaya, Ezekiyeli, Dhaniyeli ni Johane. Siwoniso sesi iso si hambanide, ganiolu si ngu fana khu ndziya nyo khaguri. Satshavbo siwoniso sesi sa gu tshamuseya Jehovha kha nga Pfhumu yi khugegidego. Isaya ‘a di wona Jehovha na khade vbagikhalotunu nya gikhongolo nya wufumu nya gukhugege.’ (Isa. 6:1-3) Ezekiyeli a di wona Jehovha na khade avba nya movha yaye ya ndzadzini na randredwe khu “gungangamela . . .  nga khwatshi wulaho wa nyazimu.” (Ezek. 1:26-28) Dhaniyeli a di wona Jehovha a gu ‘lidhota la gale’ na ambade sombo nya guage nigu malavbelavbe nya nilo ma di gu duga khu gikhalotuno gwaye. (Dhan. 7:9, 10) Nigu Jonahe a di wona Jehovha na khade gikhalotuno na randredwe khu gilo gi fanago ni wulaho nya gukhedzige kha nga giwindri nya esmeralidha. (Gutu. 4:2-4) Tepo hi dundrugeyago khu wudhumo wa Jehovha, ethu ha gu dundrugiswa khu lithomo nya gu gombeye gwaye ni lisima nya gu wu gire khu githawo. Ganiolu, hi nga gombeya khu ginani?

4. Ginani hi gi hevbulago khu malito nyo tule avbo nya nombelo nya giyeyedzo ma gomogo omu ga Matewu 6:9, 10?

⁴ Leri Matewu 6:9, 10. Ga ganelo yaye ya gigomoni, Jesu hevbudzide vapizane vaye ndziya va nga gombeyago khiyo gasi gu tsakisa Nungungulu. Hwane nyo ba a ganede gu khuye: “Khu kharato, gombeyani kharati” Jesu khumbugide silo nya lisima avba nya nombelo waye. Uye gombede khu gu agiswa nya lina la Jehovha, guta nya Mufumo wu na fuvisago vatshavbo vawugeyi va Nungungulu ni silo nya sadi esi Jehovha a na gireyago mafu ni vathu mindru wa tshigu. Khu gu pata silo sesi avba nya milombelo yathu ha gu yeyedza gu khethu hi ngu ninga lisima gugola ga Nungungulu.

5. Ina Jehovha a ngu hi engiseya tepo hi mu lombago silo hi si vbwetago?

⁵ Avbo nya gipandre nyo landreye nya nombelo, Jesu yeyedzide gu khuye gwadi gu gombeya khu silo hi si vbwetago. Hi nga lomba Jehovha gasi a hi ninga guhodza ga tshigu  ni tshigu, a hi divaleya sighoho sathu, a hi vhikeya ga silingo a bwe a hi vbulugisa ga valala. (Mat. 6:11-13) Tepo hi lombago silo sesi Jehovha, ethu ha gu mu yeyedza gu khethu ethu hi ngu vbweta giphaso gyaye nigu ha gu vbweta gu mu tsakisa.

6. Ina hi yede gu gombeya basi khu silo si khumbugidwego avba nya nombelo nya giyeyedzo? Tshamuseya.

⁶ Jesu kha vireyi gu khuye valandreyi vaye va pimedzeya malito ma gomogo avba nya nombelo nya giyeyedzo. Khu giyeyedzo, avba nya yimbe milombelo yi giridwego khu Jesu, uye khumbugide silo nyo hambane si nga ba siri ni lisima gwaye ga tepo yile. (Mat. 26:39, 42; Joh. 17:1-26) Khu ndziya nyo fane hi nga gombeya khu silo si hi garadzago. Tepo hi hungago gu gira gilo nyo khaguri hi nga gombeya hi lomba guti ni wugengeyi. (Ndzi. 119:33, 34) Tepo hi vbwetago gu pheya gu gira thumo nyo khaguri nyo garadze, hi nga gombeya hi lomba giphaso gasi hi pwisisa edzi hi nga wu girago khidzo. (Mav. 2:6) Vavelegi va nga gombeleya sanana sawe, aniso sanana si nga gombeleya vavelegi vaso nigu hatshavbo hi yede gu gombeleya sihevbuli sathu nya Bhibhiliya ni vale hi va tshumayelago. Ganiolu, tepo hi gombeyago kha hi yeli basi gu lomba giphaso Jehovha.

7. Khu ginani hi yedego gu dhumisa Jehovha khu nombelo?

⁷ Ethu hi yede gu dundruga gu dhumisa Jehovha omu nya milombelo yathu. Mwalo a yedwago khu gu dhumiswa guvbindra Nungungulu wathu. Uye ‘khwadi nigu a ngu tsetseleya.’ Uye gambe “tade khu wuhindzi ni pweya wusiwana, a ngu hweya gu goroga nigu a tade khu lihaladzo nyo tumbege ni lisine.” (Ndzi. 86:5, 15, NM) Ethu hi na ni gighelo nya gyadi nyo dhumise Jehovha khu makhalelo yaye ni esi a giridego.

8. Khu sevbini silo nyo khaguri hi nga bongago khiso Jehovha? (Ndzimo 104:12-15, 24)

⁸ Gu rungudza Jehovha omu nya milombelo yathu sa gu hi kutsa gu mu bonga khu silo nya sadi a hi ningago. Khu giyeyedzo, hi nga mu bonga khu dzikori nyo mbure hi dzi wonago omu nya sifilori, guhambana-hambana nya guhodza nyo tshambe ni gu tsaka hi gu pwago khu gu manega ni dzipari. Papayi wathu nya lihaladzo hi ningide silo sesi ni simbe silo nya  singi gasi gu hi gira hi tsaka. (Leri Ndzimo 104:12-15, 24.) Nigu nya lisima, hi ngu bonga Jehovha khu sihevbudzo a hi ningago gasi hi tiyisa gukhodwa gwathu ni gutumba nyo tsakise hi gu nago khu mindru wa tshigu.

9. Ginani gi nga hi phasago gu dundruga gu bonga Jehovha? (1 Vatesalonika 5:17, 18)

⁹ Si ngu vbevbuga gu divala gu bonga Jehovha khu satshavbo a hi giredego. Ginani gi nga hi phasago gu dundruga isoso? U nga gira sasamedzo nya silo nyo kongome u mu lombidego nigu khu hwane u khedza esi u lovidego gasi u wona edzi Jehovha a hlamudego khidzo milombelo yago. Khavbovbo, gombeya gasi u bonga giphaso u ningidwego khu Jehovha. (Leri 1 Vatesalonika 5:17, 18.) Nga dundrugeya khesi: Ethu hi ngu dzipwa na hi tsakide tepo vambe va hi bongago. Khu ndziya nyo fane, tepo hi dundrugago gu bonga Jehovha khu gu ba a hlamude milombelo yathu si ngu mu tsakisa. (Kol. 3:15) Khu gevbini gimbe gighelo nya lisima gi hi girago hi bonga Nungungulu?

10. Guya khu 1 Pedro 2:21, khu ginani hi gu na ni sighelo nyo bonge Jehovha khu gu ba a rumede Jesu a ta mafuni?

¹⁰ Leri 1 Pedro 2:21. Hi yede gu bonga Jehovha khu gu ba a rumede gyanana gyaye nyo golege gasi gu ta hi hevbudza. Tepo hi hevbulago khu Jesu, ethu ha gu hevbula silo nya singi maningano ni Jehovha ni edzi hi nga mu tsakisago khidzo. Ha gu yeyedza gu khethu hi ngu khodwa ga dzegiso wa Kristo hi nga khala dzipari dza Jehovha Nungungulu nigu hi na vbanya khu gurula naye. — Rom. 5:1.

11. Khu ginani hi gombeyago khu lina la Jesu?

¹¹ Ha gu bonga Jehovha khu gu gombeya gwaye khu gu thumisa gyanana gyaye. Jehovha a gu thumisa Jesu gasi gu hi ninga esi hi mu lombago. Jehovha a ngupwa ni gu hlamula milombelo yi girwago khu lina la Jesu. Jesu a di khuye: “Ni gevbini mu na lombago khu lina langu, nyi na mi girelani, gasi Babe afela gu dhumiswa khu Mwanaye.” — Johane 14:13, 14.

12. Khu gevbini gimbe gighelo gi hi girago hi bonga Jehovha khu gyanana gyaye?

¹² Jehovha a gu divaleya sighoho sathu khu gu thumisa muphaso wa Jesu. Milowo yo yeyedza gu khiyo Jesu “muphasi [wathu] nya khongolo a khadego ndzadzini khu nyamudye nya gikhalo nya wufumu wa Nungungulu nya Tshivba Yatshavbo.” (Hebh. 8:1) Jesu “muemeyi [wathu] mbeli ga Babe.” (1 Joh. 2:1) Hi ngu bonga ngudzu Jehovha khu gu ba a hi ningide muprista nya khongolo oyu a pwisisago gu mba vbeleya gwathu ni oyu ‘a lombeleyago khethu.’ (Rom. 8:34; Hebh. 4:15) Ethu hi vathu nya mba vbeleya, khu kharato nya mba muphaso wa Jesu hi di hadzi gu mba si kodza gu hidzimeya ga Jehovha khu nombelo. Khu lisine, ethu kha hi si kodzi gu bonga Jehovha khu guvbeleya khu niningwa nya lisima egi a hi ningidego, a gu Gyanana gyaye nyo golege.

13. Ga wutshigu waye nyo hegise na si gufi, Jesu yeyedzide kharini gu khuye a di gu haladza vapizane vaye?

¹³ Ga wutshigu waye nyo hegise na si gufi, Jesu gombelede vapizane vaye khu tepo nyo laphe a ganeya ni Papayi waye gasi a va ‘vbulugisa guvivbani.’ (Joh. 17:15) Isoso si yeyedzide edzi Jesu a nga ba a va haladza khidzo. Ambari olu a nga ba a dziti gu khuye nya mba hweya a di hadzi tshaniswa ngudzu, uye a di garadzega khu vapizane vaye.

14. Hi nga yeyedza kharini gu khethu hi ngu haladza vandriyathu?

¹⁴ Khu gu pimedzeya Jesu, ethu kha hi vegi  basi gupima avba nya esi hi si vbwetago, wulangani nya isoso ha gu gombeleya vandriyathu tepo yatshavbo. Tepo hi girago isoso, ha gu engisa gileletelo gya Jesu nya gu haladzane hi bwe hi yeyedza Jehovha gu khethu hi ngu haladza vandriyathu. (Joh. 13:34) Ha gu gombeleya vandriyathu hi na va phasa. Lito la Nungungulu lari khilo “nombelo wa muthu a lulamidego wu na ni tshivba.” — Jak. 5:16.

15. Khu ginani vandriyathu va vbwetago gu khavo hi va gombeleya?

¹⁵ Vandriyathu va ngu vbweta gu khavo hi va gombeleya khu gu avo va ngu emisana ni sigaradzo. Hi nga lomba gu khethu Jehovha a va phasa gu timiseya madwali, dzimhango nya tumbunugo, dzinyimbi, guwugedwa mwendro simbe sigaradzo. Hi nga gombeleya gambe vandriyathu va thumago khu gu dzigaradza gasi gu phasa ava vbwetago giphaso. Uwe adzina u nguti vathu nyo khaguri va emisanago ni sigaradzo nyo fane. Khu ginani u gu mba va khumbuga khu malina omu nya milombelo yago? Ethu ha gu yeyedza lihaladzo nya wundruye khu gu lomba gu khethu Jehovha a va phasa gu timiseya sigaradzo va tshanganago naso.

16. Khu ginani hi gombeleyago vale va hi thangeyago?

¹⁶ Vale va thangeyago va ngu bonga ngudzu kholu hi va patago omu nya milombelo yathu nigu milombelo yoyo yi ngu va phasa. Mupostoli Pawulo a di gu dziti gu khuye a di gu vbweta gu gombeledwa khu vambe. Uye a di lova gu khuye: “Nyi lombeleleni neni, gasi Nungungulu a nyi ninge magana nya guenele gikhati nyi tivisago Mahungu nya Yadi.” (Efes. 6:19) Muhuno gambe hi na ni vandriyathu va thumago khu gu dzigaradza, va hi thangeyago. Khu kharato, ethu ha gu yeyedza gu khethu hi ngu va haladza khu gu lomba gu khethu Jehovha a kategisa thumo wawe.

17-18. Khu ga sevbini siemo adzina hi nga lombwago gu gombeleya vambe nigu ginani hi yedego gu gi dundruga?

¹⁷ Dzimbe dzitepo, hi nga ranwa gasi gu ta gombeleya vambe. Khu giyeyedzo, ndriyathu nya nyamayi a gimbidzisago gihevbulo nya Bhibhiliya adzina a nga lomba mumbe ndriyathu nya nyamayi a gu naye gasi gu gira nombelo. Ndriyathu wule a gu naye si nga gira na si giti gwadi gihevbuli, khu kharato a nga hunga gu gira nombelo guvbeyani nya gihevbulo.  Khu ndziya yoyo, si na mu vbevbugeya guti silo nyo ganeye omu nya nombelo maningano ni gihevbuli.

¹⁸ Ndriyathu nya mwama adzina a nga lombwa gasi gu gombeya avba nya tshangano nya thumo nyo tshumayele mwendro tshangano nya libandla. Ndriyathu a ningidwego lithomo lolo yede gu dundruga gighelo nya tshangano wowo. Nombelo kha wu yeli gu thumiswa gasi gu ninga wusingalagadzi libandla mwendro gu gira sitiviso. Avba nya mitshangano nya libandla, 5 dzimeneti dzo thumiswa gasi gu emba ndzimo ni gu gira nombelo. Khu kharato, ndriyathu a girago nombelo kha yeli gu ganeya “malito nya mangi,” ngudzungudzu gupheyani nya tshangano.— Mat. 6:7.

19. Ginani gi na hi phasago gu khala na hi dongide tepo litshigu nya gulamule la Jehovha li na vbohago?

¹⁹ Ethu hi yede gu wona nombelo nga gilo nya lisima womini gwathu kholu litshigu nya gulamule la Jehovha lomo vbafuvbi. Khu gu ganeya khu isoso, Jesu a di khuye: “Khu kharato, khalani na mu dongide, na mu gu lombelela gikhati gyatshavbo, gasi mu mane tshivba nya guvbuluge ga satshavbo si na gu dugelelago.” (Luka 21:36) Ha gu gombeya tepo yatshavbo, gukhodwa gwathu gu na tiya nigu hi na ba hi dongide tepo litshigu nya gulamule la Nungungulu li na vbohago.

20. Milombelo yathu yi yede gu fana ni gunungeya nya libani khu ndziya muni?

²⁰ Ginani hi bhudego khigyo? Ethu hi ngu ninga ngudzu lisima lithomo hi gu nalo nyo gombeye. Ethu hi yede gu gombeya khu silo si gimbileyanago ni makungo ya Jehovha. Hi ngu bonga khu Gyanana gya Nungungulu ni Mufumo wagyo ni gu hi gombeleya vandriyathu. Jehovha a gu vbweta gu khuye hi gombeya khesi hi si vbwetago tshigu ni tshigu hi bwe hi gombeleya hi lomba gu khethu a hi phasa gu tiyisa gukhodwa gwathu. Tepo hi dundrugeyago khesi hi vbwetago gu ganeya omu nya milombelo yathu, ha gu yeyedza gu khethu hi ngu ninga lisima lithomo leli nyo samadzise. Malito yathu ma yede gu fana ni gunungeya nya libani li ningedwago Jehovha “a gu nombelo wu mu tsakisago.” — Mav. 15:8.