1. Ginani egi Jehovha a gi vbwetago muhuno?

 MUHUNO, Jehovha o vbweta gu khuye mahungu nya yadi nya Mufumo ma tshumayedwa mafuni gwatshavbo. (Marko 13:10; 1 Thim. 2:3, 4) Thumo wowu khwa Jehovha, nigu khya lisima khu gu ba a hathide Gyanana gyaye nyo golege gasi gu thangeya thumo wowu. Hi nga tiyisega gu khethu khu kotani nya olu hi thangedwago khu Jesu, thumo nyo tshumayele wu na girega kha nga edzi Jehovha a si vbwetago khidzo mahegiso na ma nga si vbohi. — Mat. 24:14.

2. Ginani hi na bhulago khigyo avba nya ndrima yeyi?

² Avba nya ndrima yeyi, hi wona edzi Jesu a thumisago khidzo “githumi nya gutumbege ni nya gugengeye” gasi gu ninga guhodza ga liphuvboni ni gu thangeya vathu vaye gasi gu patega avba nya lidima nya likhongolo nya thumo nyo tshumayele. (Mat. 24:45) Hi na wona gambe esi moyo ni moyo wathu a nga girago gasi gu seketeya Jesu ni githumi nya gutumbege.

3. Wufumu muni Jesu a ningidwego?

³ Jesu khuye a thangeyago thumo nyo tshumayele. Hi nga tiyisega kharini khu isoso? Na gu tshade vbadugwana gasi a bweleya ndzadzini, Jesu tshanganide ni valandreyi vaye nyo tumbege gigomoni gya Galileya. Uye a di va embeya gu khuye: “Nyi ningidwe wufumu watshavbo ndzadzini ni mafuni.” Wona esi a va embedego khu gu landreya: “Gimbiyani mu ya gira vapizane vathu nya mayigo yatshavbo.” (Mat. 28:18, 19) Gu diga satshavbo a ningidwego, Jesu ningidwe wufumu nya gu thangeye thumo nyo tshumayele.

4. Khu ginani hi nga tiyisegago gu khethu Jesu a gu woneleya thumo nyo tshumayele?

⁴ Jesu ganede gu khuye thumo nyo tshumayele ni gu gira vapizani  wu di hadzi gu girwa ga “vathu vatshavbo” nigu khuye a na ba a ri ni valandreyi vaye “matshigu yatshavbo kala guhegisani nya litigo.” (Mat. 28:20) Mahungu yaya khu lisine ma gu yeyedza gu khayo thumo nyo tshumayele wu di hadzi gu simama gu woneledwa khu Jesu kala masthigoni yathu.

5. Ha gu phasedzeya kharini avbo nya gu tadzisege nya malito ma gomogo umo ga Ndzimo 110:3?

⁵ Jesu kha nga ba a garadzega khu gu khuye gu na ba gu ri ni vatshumayeli nya vadugwana ndrani nya matshigu nyo hegise. Uye a di gu dziti gu khuye malito ya Mulovi nya ndzidzimo ma di hadzi gu tadzisega, ma gu khayo: “Vathu vago va nata dzi ningela gwago, litshigu u na somago matshari yago nya gudwane.” (Ndzi. 110:3) Abari gu wa gu tshumayela mahungu nya yadi, uwe wa gu seketeya Jesu ni githumi nya gutumbege, nigu wa gu phasedzeya avba nya gu tadzise giprofeto gegi. Thumo wu ngu girega, ganiolu gu na ni sigaradzo.

6. Khu gevbini gimwegyo nya gigaradzo vatshumayele nya Mufumo va emisanago nagyo muhuno?

⁶ Gimwegyo nya gigaradzo egi vatshumayeli nya Mufumo va emisanago nagyo gu wugedwa. Vawugeyi, vathangeyi nya wukhongeyi ni ava nya politika va ganede malipha nya mangi khu thumo wathu. Abari gu valongo vathu, vambe vathu hi vatigo ni sithumi kwathu va khodwe malipha yoyo, ethu adzina hi nga garadzega nyo bwe hi ema gu thumeya Jehovha ni gu ema gu gira thumo nyo tshumayele. Ga mayigo nyo khaguri, valala vathu va gu thurugiseya, va wugeya va bwe va khotheya vandriyathu pasoni. Silo sesi kha si hi hlamadzise. Jesu ganede gu khuye: “Mu na nyenywa khu mayigo yatshavbo khu kotani nya lina langu.” (Mat. 24:9) Khu gu ba hi tshangana ni sigaradzo sesi so yeyedza gu khiso hi ngu tsakedwa khu Jehovha. (Mat. 5:11, 12) Dhiyabhulosi khuye a thangeyago guwugeya gogu. Ganiolu, Jesu a na ni tshivba nya yikhongolo guvbindra Sathane. Khu gu phasedzedwa khu Jesu mahungu nya yadi ma ngu vboha ga vathu nya mayigo yatshavbo. Wona siyeyedzo nyo khaguri.

7. Ginani u gi wonago gi yeyedzago gu khigyo Gutuledwa 14:6, 7 a ngu tadzisega?

⁷ Gimbe gigaradzo hi emisanago nagyo tepo hi tshumayelago khu gu vathu nya vangi va gu ganeya malimi nyo hambanehambane. Avba nya Gutuledwa gu ningidwego mupostoli Johane, Jesu profetide gu khuye matshigoni yathu mahungu nya yadi ma di hadzi gu manega ni gigaradzo gegi. (Leri Gutuledwa 14:6, 7.) Khu ndziya muni? Ethu ha gu ninga lithomo vathu nya vangi nya gu dzumeye mahungu nya Mufumo. Muhuno, vathu mafuni gwatshavbo va ngu si kodza gu leri mabhuku ma seketedwago umo nya Bhibhiliya, umo nya sayiti yathu jw.org, kholu ayo ma na ni mahungu khu 1000 malimi ni gu vbindra. Huwo nya guthangeye yi dzumelede gu khiyo li vbindrugedzedwa libhuku Vbanya nu tsakide kala gupindruga! gasi gu gira vapizane khu 700 malimi ni gu vbindra. Guhodza nya liphuvbo gu ngu manega gambe khu dzivhidhiyu ga ava va gu sivbwiri ni mabhuku khu gibrayili ga ava va gu sikhumu. Hi ngu wona gu khethu siprofeto nya Bhibhiliya si ngu tadzisega. Vathu nya “mafumbu yatshavbo nya malimi” va ngu hevbuleya gu ganeya ‘lidimi nya guage’ nya lisine nya Bhibhiliya. (Zak. 8:23; Sof. 3:9) Satshavbo sesi sa gu kodzega khu kotani nya olu Jesu Kristo a thangeyago.

8. Khu yevbini mihandro nya thumo wathu nyo tshumayele kala olu?

⁸ Muhuno, 8 000 000 nya vathu ni gu vbindra umo nya 240 mayigo va gu gira gipandre nya hengeledzano ya Jehovha, nigu mwaga ni mwaga mazanazana nya vathu va ngu bhabhatiswa. Ambari ulolo, gilo nya lisima  ngudzu guvbindra tengo nya vathu makhalelo nya Wukristo a gu gu ambala “muthu muphya” ma haguledwago khu vapizane vovo nya vaphya. (Kol. 3:8-10) Vathu nya vangi va emide gu manega ni mavbanyelo nyo vivbe, wughevenga, gihatheya ni gu seketeya mufumo nya litigo. Giprofeto gi gomogo umo ga Isaya 2:4 gya gu tadzisega kholu avo ‘kha va hevbuleyi gu dwana nyimbi.’ Kha nga olu hi thumago khu sighingi gasi gu ambala muthu muphya, ethu ha gu phasa vathu gu gira gipandre nya hengeledzano ya Nungungulu nigu ethu ha gu yeyedza gu khethu hi ngu landreya muthangeyi wathu Jesu Kristo. (Joh. 13:35; 1 Ped. 2:12) Khu ginani si giregago silo soso? Kholu Jesu a gu hi ninga esi hi si vbwetago.

9. Guya khu Matewu 24:45-47, ginani egi Jesu a ganedego gu khuye gi di hadzi girega matshigoni nyo hegise?

⁹ Leri Matewu 24:45-47. Jesu ganede gu khuye ndrani nya matshigu nyo hegise uye a di hadzi gu emisa “githumi nya gutumbege ni nya gugengeye” gasi gu ninga guhodza ga liphuvboni. Khu kharato, ethu hi di hadzi gu vireya gu khethu githumi nyo tumbege gi thuma khu gu dzigaradza matshigoni yathu. Isoso khiso si giregago. Jesu a gu thumisa tsawa nya wudugwana nya vama va todzidwego gasi gu ninga vathu va Nungungulu ni ava va tsakeyago ‘guhodza ga liphuvboni khu tepo yakone.’ Vama vava kha va dzi wone na va gu fumela gukhodwa ga vambe. (2 Kor. 1:24) Wulangani nya isoso, avo va ngu dziti gu khavo Jesu Kristo khuye “muthangeli ni mwamangulu” nya vathu vaye. — Isa. 55:4.

10. Avba nya mabhuku ma yeyedzwago avba nya fotu, khu levbini libhuku li nga gu phasa gu pheya gu thumeya Jehovha?

¹⁰ Gukhugeya khu 1919, githumi nyo tumbege gi ngu dusa mabhuku nyo hambanehambane aya ma ningago lithomo ava va tsakeyago nya gu hevbule lisine li gomogo umo nya Bhibhiliya. Khu 1921, githumi nyo tumbege gi dongisede  libhuku A Harpa de Deus gasi gu phasa ava va tsakeyago gu hevbula sihevbulo nya litshina nya Bhibhiliya. Kha nga olu dzitepo dzi vbindrugedzidego, gu giridwe mambe mabhuku. Khu levbini libhuku li gu phasidego guti ni gu haladza Papayi wathu wa ndzadzini? Ina i “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Zini Lezi A Biblia Gi Gonzisako Hakunene? Ginani hi hevbudzwago khu Bhibhiliya? Mwendro Vbanya nu tsakide kala gupindruga! a gu libhuku lathu nya liphya? Yatshavbo mabhuku yaya ma giridwe gasi gu hi phasa gu gira vapizane nigu tepo ma nga duswa ma diri ni esi hi nga ba hi si vbweta.

11. Khu ginani si gu na ni lisima gu vatshavbo va hevbula maningano ni Jehovha ni Bhibhiliya?

¹¹ Vathu va tsakeyago lisine khandri avo basi va vbwetago guti maningano ni Jehovha ni Bhibhiliya. Hatshavbo hi ngu vbweta guti isoso. Mupostoli Pawulo lovide gu khuye: “Guhodza nya vathu vakhongolo khogu nya gutiye.” Pawulo ganede gambe gu khuye gu thumisa esi hi si hevbulago umo nya Bhibhiliya si na hi phasa “gu hambanisa esi nya sadi ni esi nya guvivbe.” (Hebh. 5:14) Si nga hi garadzeya gu engisa Milayo ya Jehovha olu kholu vathu nya vangi va na ni mavbanyelo nyo vivbe. Ganiolu, Jesu a gu tiyisega gu khuye ethu hi hevbude esi hi si vbwetago gasi gu hi tiyisa gukhodwa gwathu. Ethu ha gu hakha sileletelo khumo nya Lito la Nungungulu, a gu Bhibhiliya. Githumi nyo tumbege ni nya gegengeye khigyo gi dongiseyago ni gu kabaniseya guhodza khu gu thangedwa khu Jesu.

12. Gu fana ni Jesu ethu ha gu ninga kharini wuzundzu lina la Nungungulu?

¹² Gufana ni Jesu ethu ha gu ninga wuzundzu lina la Nungungulu. (Joh. 17:6, 26) Khu giyeyedzo, khu 1931 ethu hi phede gu thumisa lina Dzifakazi dza Jehovha gasi hi ranwa  khilo. Nigu khu gu gira isoso, ethu ha gu yeyedza edzi lina la Nungungulu li gu na ni lisima gwathu ni gu khethu ethu ho vbweta gu ranwa khu lina la Papayi wathu wa ndzadzini. (Isa. 43:10-12) Nigu gukhugeya khu Outubro nya mwaga wowo, lina la Nungungulu li ngu manega avba nya kapa ni kapa nya revhista yeyi. Gu diga isoso, Tradução do Novo Mundo da Bíblia Sagrada li wusedzide lina la Nungungulu ga malanga li nga ba li vbwetega umo. Isoso si ngu hambana ni esi si girwago khu dzitshetshi dzi dzi ranago khidzo makristo, kholu idzo dzi duside lina la Nungungulu umo nya Dzibhibhiliya dzawe.

13. Ginani gi hi tiyisegisago gu khethu Jesu a gu thumisa “githumi nya gutumbege ni nya gugengeye” muhuno? (Joh. 6:68)

¹³ Khu gu thumisa “githumi nya gutumbege ni nya gugengeye,” Jesu emiside hengeledzano nya gu wonege omu mafuni gasi gu andrisa wukhozeyi nya guage. Wa gu dzipwa kharini khu hengeledzano yeyi? Adzina uwe u nga dzipwa nga mupostoli Pedro a nga embeya Jesu gu khuye: “Hi naya ga mani . . . ? Olu a gu uwe u gu ni magana nya guvbanye nya gupindruge!” (Joh. 6:68) Moyo ni moyo wathu na romo hayini muhuno nari khatsi kha gira gipandre nya hengeledzano ya Jehovha? Khu gu thumisa hengeledzano yoyo, Jesu a gu tiyisega gu khuye hi na ni satshavbo hi si vbwetago gasi gu simama gu tumbega ga Nungungulu. Uye gambe a gu hi hevbudza gu gira gwadi thumo nyo tshumayele. Wulangani nya isoso, a gu hi phasa gu ambala “muthu muphya” gasi hi tsakisa Jehovha. — Efes. 4:24.

14. U phasegide kharini khu gu gira gipandre nya hengeledzano ya Jehovha ndrani nya tungu nya COVID-19?

¹⁴ Jesu a ngu ninga sileletelo nya wugengeyi dziteponi nya sigaradzo. Hi phasegide khu sileletelo sesi tepo tungu nya COVID-19 wu nga  pheya. Tepo vathu nya vangi tigoni va nga ba va si giti ni gilo nyo gire, Jesu tiyisegide gu khuye hi hakhide sileletelo gasi hi simama gu dzi vhikeya. Ethu hi kutsidwe gu ambala dzimaxikara ho ba hi romo umo va gomogo vathu ni gu gira distanciamento físico. Madhota ma dundrugisidwe gu khathaleya libandla khu nyamani ni liphuvboni gasi li simama gu khala vbafuvbi ni Jehovha. (Isa. 32:1, 2) Ethu gambe hi hakhide sileletelo ni gu tiyiswa khu mibiku nya Huwo nya Guthangeye.

15. Khu sevbini sileletelo hi si hakhidego gasi hi beya mitshangano ni gu gira thumo nyo tshumayele ndrani nya tungu, nigu mihandro muni yi manegidego?

¹⁵ Ndrani nya tungu ethu gambe hi hakhide sileletelo maningano ni edzi hi nga beyago khidzo mitshangano ni edzi hi na girago khidzo thumo wathu nyo tshumayele. Ethu hi di dzegeya gu pheya gu beya mitshangano nya libandla, dziasembleya ni dzikongresu khu gu thumisa vídeocoferência. Ethu gambe hi di pheya gu ninga wufakazi khu gu thumisa malangaliya ni telefoni. Jehovha kategiside gudzigaradza gwathu. Dzibheteli nya dzingi dzi ningede mibiku yi ganeyago khu gu engedzeya nya tengo nya vahuweleyi. Khu lisine, nya vangi va manegide ni matshango nya gu tiyise ndrani nya tungu. — Wona kwadru yi gu khiyo: “ Jehovha a ngu kategisa thumo wathu nyo tshumayele.”

16. Hi nga tiyisega khu ginani?

¹⁶ Adzina vathu nyo khaguri va dzipwide khatsi hengeledzano ya gu vbindrisa pimo avba nya gu ninge sileletelo maningano ni tungu. Ganiolu, khu gu gimbiya nya tepo si yeyedzide gu khiso sileletelo hi nga ba hi hakha khya wugengeyi. (Mat. 11:19) Nigu gu dundrugeya khedzi Jesu a thangeyago khidzo vathu vaye khu lihaladzo, isoso sa gu hi tiyisegisa gu khiso ambari gyo dugeleya gilo mindru watshigu Jehovha ni gyanana gyaye nyo golege va na ba vari ni ethu. — Leri Vahebheru 13:5, 6.

17. Wa gu dzipwa kharini khu gu thangedwa khu Jesu?

¹⁷ Ethu hi ngu tsaka ngudzu khu gu thangedwa khu Jesu. Ethu ha gu lumba hengeledzano mweyo eyi yi pwananago ambari olu hi hambanidego khu mayigo, malimi ni mavbanyelo. Ethu hi ngu hakha sileletelo nya singi khavbo nya Lito la Nungungulu nigu hatshavbo hi ngu hevbudzwa gu gira thumo nyo tshumayele. Moyo ni moyo wathu a ngu hevbudzwa edzi a nga ambalago khidzo muthu muphya ni gu hevbudzwa gu haladza vambe. Ethu hi na ni sighelo nya singi nyo tsake kholu Jesu muthangeyi wathu.