Jesu hevbudzide vathu gu andrisa gurula ni vambe. Ganiolu, uye a embede vapostoli vaye gu khuye: “Mu nga pimisi gu khenu nyi di resa gurula mafuni, kha nya resa gurula, ganiolu nyi di resa xipadha. Kholu nyi tede gu ta hambanisa lidzaha ni papayi walo, gyagadzyana ni mamayi wagyo ni ngadzamwane ni nasale waye.” (Mat. 10:34, 35) Jesu a di gu vbweta gu khuye ginani khu malito yaya?

Jesu kha nga ba a vbweta gu hambanisa sivbango nya ndranga, ganiolu uye a di gu dziti gu khuye sihevbudzo saye si di hadzi gu hambanisa dzindranga nyo khaguri. Khu kharato, vale va nga ba va ri ni gudogoreya nya gu khale vapizane va Kristo va bwe va bhabhatiswa, va di yede gu pwisisa gu khavo dzimbe dzitepo sivbango nya ndranga yawe si di hadzi gu mba tsaka khu esi va hungidego gu gira. Dzimbe dzitepo, dzipari dzawe nya wugadzi mwendro simbe sivbango nya ndranga yawe si di hadzi gu va wugeya, nigu isoso si di hadzi gu va garadzeya gu simama na va tumbegide avba nya sihevbudzo sa Kristo.

Bhibhiliya ya gu kutsa Makristo gasi gu zama “guvbanya khu gurula ni vathu vatshavbo.” (Rom. 12:18) Ganiolu, sihevbudzo sa Jesu si nga fana ni “xipadha” ga dzindranga nyo khaguri. Isoso so girega tepo givbango gimwegyo nya ndranga gi dzumeyago sihevbudzo sa Jesu, nari gu vambe ndrangani va gu wugeya sihevbudzo sa Jesu. Sa gu girega isoso, sivbango soso nya ndranga sa gu khala “valala” va oyu a hevbulago lisine. — Mat. 10:36.

Vapizane va Kristo va vbanyago ni valongo va lumbago wumbe wukhongeyi, dzimbe dzitepo si na lomba gu va hunga gu va na gira esi si tsakisago Jehovha ni Jesu mwendro va na tsakisa valongo vawe. Khu giyeyedzo, valongo va gu siri Dzifakazi adzina va nga va gurumedza gu patega avba nya mibuzo nya wukhongeyi. Va gu lingwa, avo va na hunga gu hatha oyu va bwetago gu mu tsakisa. Jesu a di khuye: “Oyu a golago ngudzu papayi waye mwendro mamayi waye gu vbindra eni, kha nyi faneyi.” (Mat. 10:37) Khu lisine, Jesu kha nga ba a vbweta gu ganeya gu khuye gasi gu khala mupizane waye ava va hevbulago lisine kha va yeli gu haladza ngudzu valongo vawe. Ganiolu, uye a di gu hevbudza vapizane vaye edzi va nga hungago khidzo silo nya lisima womini gwawe. Sivbango nya ndranga sa gu mba tsaka khu gu dzi garadza hi gu girago gasi gu khozeya Jehovha ethu a gu simama gu si haladza, ganiolu ethu hi ngu dziti gu khethu lihaladzo lathu khu Nungungulu khilo li gu na ni lisima ngudzu.

Khu lisine, tepo sivbango nya ndranga si hi wugeyago si ngu hi vbisa ngudzu. Ganiolu, vapizane va Jesu va yede gu dundruga malito yaye, ma gu khayo: “Ni wevbi a si dzumeyigo gu rwala simbo waye nya tshanisa a nyi landreya, kha nyi faneyi.” (Mat. 10:38) Khu mambe maganelelo, Makristo ma gu wona gu wugedwa khu valongo kha nga gipandre nya dzitshanisa edzi vapizane va Kristo va yedego gu dzi timiseya. Khu tepo yamweyo, avo va gu tumba gu khavo mavbanyelo yawe nya yadi ma na kutsa sivbango nya dzindranga si gu siri Dzifakazi gu vbindrugedza mapimiselo yawe si bwe si vbweta gu hevbula lisine. — 1 Ped. 3:1, 2.