Nicolas ni Céline va tshanganide ni gigaradzo nyo hambane. Avo va vbindrugedzide libandla tepo va nga dzumeya thumo nya wuphya nyo hongole bheteli ga França. Avo va gu ganeya gu khavo: “Gupheyani si hi garadzede ngudzu kholu hi di gu suva dzipari dzathu. Ethu hi di nga si giri wupari nyo tiye ni vandriyathu va libandlani gwathu nya liphya.” a Wa gu ba u tshangana ni sigaradzo, u nga tsaka kharini ni gu dugeleya tepo u hongolago umo nya libandla nya liphya? Vambe va nga gira gira ginani gasi gu gu phasa? Makategwa muni ya liphuvboni u nga ma hakhago ni gu ningeya vambe omu nya libandla lago nya liphya?

4 MATSHINA MA NA GU PHASAGO GU DZI PWANANISA NI LIBANDLA LAGO NYA LIPHYA

1. Tumba Jehovha. (Ndzi. 37:5) Kazumi wa Japão a diri ni 20 myaga na romo omu nya libandla laye, tepo mwama waye a nga hakha thumo nya wuphya wu nga lomba gu a vbindrugedza libandla. A vegide kharini ‘guvbanya gwaye mandzani ga Jehovha’? Uye wari, khuye: “Tepo yatshavbo nyi di embeya Jehovha maningano khesi si nga ba si nyi gira nyi thava, nyi dzipwa nyonga ni gu garadzega. Tepo yatshavbo nyi nga ba nyi gira isoso, uye a di gu nyi ninga tshivba nyi nga ba nyi yi vbweta.”

U nga engedzeya kharini gu tumba Jehovha? Gu fana ni simbo wu vbwetago gu thedwa mati ni exitrumi gasi wu dandra, gukhodwa gwathu nugo gu yede gu girwa sasimweso gasi gu dandra. Nicolas a khumbugidwego gupheyani, dundrugede khu giyeyedzo gya Abrahama, Jesu, Pawulo ni vambe vathu va nga dzi hiya silo gasi gu gira gugola ga Nungungulu, nigu isoso si mu tiyiside gu khuye Jehovha a di hadzi gu mu phasa. Wa gu hevbula  Bhibhiliya tshigu ni tshigu, si na gu phasa gu pala ni gevbini gigaradzo nigu u na hevbula silo u nga si thumisago gasi gu tiyisa vambe libandlani nya liphya.

2. Potsa gu fananisa libandla lago la gale ni eli nya liphya. (Muh. 7:10) Jules, a di yede gu dzi pwananisa ni mavbanyelo nya limbe litigo tepo a nga hongola Benim Estados Unidos. Uye wari, khuye: “Nyi di gu pimisa gu kheni nyi di hadzi gu bhuleya matimo yangu nya guvbanye ga moyo ni moyo nyi nga hadzi gu manana naye.” Khu kotani nya olu isoso si nga mba kodzega, a di pheya gu potsa-potsa vandriyathu. Hwane nya gu ba a tivanide ni vandriyathu a di vbindrugedza mawonelo yaye. Uye o engedza gu khuye: “Nyi ngu khodwa gu kheni vathu vatshavbo va gomogo mafuni va ngu fana. Avo basi va gu ganeya ni gu gira silo khu ndziya nyo hambane. Si na ni lisima gu dzumeya edzi vambe vathu va gu idzo.” Khu kharato, potsa gu fananisa libandla lago la gale ni eli nya liphya. Ndriyathu moyo nya nyamayi a gu piyonera nyo pwani khu Anne-Lise wari, khuye: “Kha nya vbindrugedza libandla khu gu vbwetedzeya silo nyi si digidego hwane. Eni nyi di vbindrugedza gasi gu hevbula silo nya siphya.”

Madhota ma yede gu potsa gu fananisa libandla ma gomogo ga ilo olu ni eli la gale. Khu gu ba vandriyathu va gira silo nyo hambane ga libandla lago nya liphya, tepo yatshavbo kha si thuli gu khiso va gu gira silo khu ndziya nya mba yadi. Si na ba siri wugengeyi gu wona giemo nya libandla lolo na wu nga si ningeyi mawonelo. (Muh. 3:1, 7b) Si na ba siri wugengeyi gu hevbudza vandriyathu khu giyeyedzo gyago nya gyadi gu vbindra gu va gurumeza gu landrisa mawonelo yago. — 2 Kor. 1:24.

3. Khala nu pharegide libandlani nya liphya. (Filp. 1:27) Ambari olu si dzegago tepo nyo laphe gasi gu fuluga, si na ni lisima gu pheya gu hongola mitshanganoni ga libandla lago nya liphya, sa gu kodzega nya mba hweya. Vandriyathu va libandlani gwago nya liphya va gu vbweta gu gu wona tepo yatshavbo gasi va si kodza gu gu hidzimeleya va bwe va gu phasa. Lucinda, a nga fuluga gumogo ni sanana saye sa sivili a hongola omu nya lidhoropa nya likhongolo la África do Sul wari, khuye: “Nyi di kutswa khu dzipari dzangu gu vega gupima avbo nya gu gire dzimbe dzipari libandlani gwangu nya liphya, nyi duga navo thumoni nyo tshumayele ni gu patega mitshanganoni. Nyi di bwe nyi ningeya ndranga yangu gasi gu gira mitshangano nya thumo nyo tshumayele.”

Gu gira mithumo ya liphuvboni gumogo ni vandriyathu libandlani si na gu tiyisa gumogo ni gu tiyisa vambe. Anne-Lise a khumbugidwego gupheyani, a tiyisidwe khu madhota gu tshumayela ni vatshavbo libandlani gwaye nya liphya. Khu wevbini handro wakone? Uye wari, khuye: “Eyi yi diri ndziya gasi nyi dzipwa na nyi gu gira gipandre nya libandla.” Nigu gambe, tepo u dzi ningedzeyago gasi gu agisa Salawu nya Mufumo ni gu yi khathaleya, wa gu yeyedza vandriyathu gu khuwe u ngu dzipwa na wu gu gira gipandre nya libandla.

4. Gira dzipari nya dziphya. (2 Kor. 6:11-13) Vathu va gu dziti gu khavo u ngu khathala khavo,  si na va vbevbugeya gu khala dzipari dzago. Khu kharato, vboha khu tepo mitshanganoni u bwe u hweyanyana gu duga hwane nya mitshangano gasi gu bhula ni vambe u bwe u vati gwadi. Dzi garadze gasi gu dundruga malina yawe. Wa gu dundruga malina yawe ni gu yeyedza wuwadi, si na kutsa vambe gasi va gira wupari nago nigu nya mba kanakana u na manega ni dzipari nya dziphya nya lisima.

Wulangani nyo dzi gire mumbe muthu gasi gu tsakedwa khu vambe, dzumeleya gu dzipari dzago dzi guti edzi u gu idzo. Gira esi Lucinda a giridego uye wari, khuye: “Hi na ni wupari nyo tiye olu, kholu hi di dzegeya gu pheya gu ranana magaya gwathu.”

“HAKHANANI KHU GYANU”

Gu beya umo nya Salawu nya Mufumo gu gomogo vathu nya gu mba olovelega si nga garadzeya vambe. Khu kharato, u nga gira kharini gasi gu vbevbugiseya giemo vambe? Pawulo a di khuye: “Hakhanani khu gyanu kha nga Kristo a mi hakhidego.” (Rom. 15:7) Khu gu pimedzeya giyeyedzo gya Kristo, madhota ma ngu phasa moyo ni moyo gasi a dzipwa na gu hoyozedwa. (Wona kwadru yi gu khiyo: “ Ginani gi na gu phasago wa gu tshuka u fuluga?”) Khu kharato, vatshavbo libandlani gu pata ni sanana va nga phasa moyo ni moyo gu dzipwa nari gaya.

Gu hoyozeya vambe sa gu pata gu hakha gwadi vapfhumba, ganiolu si ngu pata gambe gu va phasa. Khu giyeyedzo, ndriyathu moyo nya nyamayi a di dzi ninga tepo gasi gu yeyedza ndriyathu a gu muphya libandlani gwaye edzi a nga manago khidzo dzixapa ni gu mu yeyedza lidhoropa. Esi ndriyathu nya nyamayi a giridego si phaside ndriyathu yoyo nya muphya libandlani gu dzipwananisa.

LITHOMO GASI GU DANDRA GA LIBANDLA NYA LIPHYA

Tepo khiyo khaba wu dandrago, wa gu tshula lidowo laye dzitepo nya dzingi gasi wu si kodza gu vbuvba. Khu ndziya nyo fane, wa gu vbindrugedza  libandla, u yede gu dzi tshula ni ga gevbini gigaradzo gi gu himbedzeyago gu thumeya Jehovha. Nicolas ni Céline vari khavo: “Gu vbindrugedza libandla trenamentu nya yadi. Gu dzi olovedza ni vathu nya vaphya ni wulanga nyo hambane si hi phaside gu haguleya makhalelo nya maphya.” Jean-Charles a khumbugidwego gupheyani, a gu ganeya khedzi ndranga yaye yi wuyedwego khidzo, wari khuye: “Gu vbindrugedza gu phaside sanana sathu gu dandra khu liphuvboni libandlani nya liphya. Hwane nya migima nyo khaguri, gyanana gyathu nya gyagadzyana gi di dzumeya gu gira sipandre avba nya mitshangano ya vbakari nya semana nigu gyanana gyathu nya gikhwatana gi di khala muhuweleyi nya mba bhabhatiswa.”

Ginani u nga girago abari gu giemo gyago kha gi gu dzumeleyi gu fuluga, khu giyeyedzo u hongola omu gu vbwetegago giphaso? U nga gira gu libandla lago li gira gu khatshi liphya khu gu landrisa mawonelo ma gomogo omu nya ndrima yeyi. Tepo u tumbago Jehovha, pharega khu gu gira mithumo ya libandlani gwago, khu gu duga thumo nyo tshumayele ni vambe vandriyathu, gu gira dzipari nya dziphya ni gu khala pari nya yadi ga vale u vatigo gukhugeya gale. Adzina u nga phasa vale va gu vaphya libandlani gwago ni gu phasa vale va vbwetago giphaso. Kha nga olu lihaladzo li tivegisago Makristo nya lisine, gu phasa vambe si na gu phasa gu hidzimeya ga Jehovha. (Joh. 13:35) U nga tiyisega gu khuwe “Nungungulu a ngu tsakiswa khu miphaso yoyo.” — Hebh. 13:16.

Ambari olu ma nga tshangana ni sigaradzo, Makristo nya mangi ma si kodzide gu vbindrugedza libandla nigu anuwe u nga si kodza! Anne-Lise wari, khuye: “Gu vbindrugedza libandla si nyi phaside gu dandra.” Kazumi, olu a ngu tiyisega gu khuye “gu vbindrugedza libandla si nga gu phasa gu wona giphaso gya Jehovha khu ndziya nya gu gima u di nga si yi woni.” Nigu Jules a dzipwide kharini? Uye wari, khuye: “Dzipari nyi nga gira dzi ngu nyi phasa gu mba dzipwa nyonga. Olu nyi ngu dzipwa na nyi gu gira gipandre nya libandla langu nya liphya nigu khu lisine si na nyi garadzeya gu li diga.”