NDRIMA NYA GIHEVBULO 30
NDZIMO 36 Sayisa monyo wago
Silo nya lisima hi si hevbulago khu dzipfhumu dza Israyeli
“Khavbo mu na wonago nyaluphye guhambana gu guromo ga vathu nya gululame ni vale nya guvivbedwe khu monyo, ga vathu va khozelago Nungungulu ni avo va gumba mu khozela.” — MAL. 3:18.
MAKUNGO NYA GIHEVBULO GEGI
Hi na hevbula edzi Jehovha a wonidego khidzo dzipfhumu dza Israyeli ni gu pwisisa esi a si vireyago gwathu muhuno.
1-2. Bhibhiliya ya gu ganeya ginani khu dzipfhumu nyo khaguri dza Israyeli?
BHIBHILIYA, yi ngu khumbuga guvbindra 40 vama va nga khala dzipfhumu Israyeli. a Nigu yi ngu hi embeya esi dzipfhumu nyo khaguri dzi giridego. Khu giyeyedzo, ambari dzipfhumu nya dzadi dzi giride silo nyo vivbe. Wona giyeyedzo gya pfhumu Dhavhidhe. Jehovha a di khuye: “Githumi gyangu Dhavhidhe . . . [a landriside dzindziya] dzangu khu monyo waye watshavbo, a gira basi silo nya gululame mahoni gwangu.” (1 Dzipf. 14:8) Ambari ulolo, dundruga gu khuwe Dhavhidhe a giride wubhayi ni nyamayi nyo khaguri a nga ba a tshadhide, nigu a lugide mano nya gu songe mwama wakone ndrani nya nyimbi. — 2 Sam. 11:4, 14, 15.
2 Ganiolu, dzipfhumu nya dzingi nya mba tumbega dzi giride silo nyo khaguri nya sadi. Wona giyeyedzo gya Robhowamo. Mahoni ga Jehovha uye “a di gira guvbivba.” (2 Dzik. 12:14) Ambari ulolo, uye engiside Jehovha tepo a nga mu embeya gasi a si dwani ni 10 mahundzo ya Israyeli ni gu va diga va hatha yimbe pfhumu. Uye gambe a giride satshavbo a nga si kodza gasi gu sayisa madhoropa ni gu phasa vathu va Nungungulu gu dzi vhikeya ga valala vawe.— 1 Dzipf. 12:21-24; 2 Dzik. 11:5-12.
3. Giwudziso muni nya lisima hi nga dzi girago, nigu ginani hi na bhulago khigyo avba nya ndrima yeyi?
3 Tepo hi hevbulago khu matimo nya dzipfhumu dza Israyeli, hi nga dzi wudzisa gu khethu abari gu dzipfhumu dza Israyeli dzi giride silo nya sadi ni silo nyo vivbe, Jehovha a di gu dziti kharini gu khuye pfhumu nyo khaguri yi di gu tumbegide mahoni gwaye? Hlamulo nya giwudziso gegi wu na hi phasa gu pwisisa esi Jehovha a vbwetago gu khuye hi gira gasi gu mu tsakisa. Hi na hevbula khu silo siraru esi adzina Jehovha si nga mu phasa gasi gu hunga khuye pfhumu nyo khaguri yi diri yadi mwendro ne. Nya gu pheye, Jehovha a di gu wona gu khuye pfhumu yoyo yi ngu mu haladza khu monyo wayo watshavbo. Nya wuvili, Jehovha a di gu wona gu khuye pfhumu yoyo yi di gu dzi layide khu lisine khu gighoho yi giridego. Nigu nya wuraru, Jehovha a di gu wona gu khuye pfhumu yoyo yi ngu simama gu mu khozeya khu ndziya nya yadi gani.
KHOZEYA JEHOVHA KHU MONYO WAGO WATSHAVBO
4. Khu gwevbini gu hambana gu gomogo avba nya dzipfhumu nyo tumbege ni edzi nya mba tumbega?
4 Dzipfhumu dzi nga ba dzi tsakisa Jehovha, dzi di gu mu khozeya khu monyo wadzo watshavbo. b Pfhumu nya yadi Josafati ‘yi di vbwetedzeya Jehovha khu monyo wayo watshavbo.’ (2 Dzik. 22:9) Bhibhiliya ya gu ganeya maningano khu Josiya khiyo “mwalo a godzanego naye khu guvbindrugedza a wuya ga Pfhumu Nungungulu, khu monyo waye watshavbo.” (2 Dzipf. 23:25) Ahati pfhumu Somoloni a nga gira wuvivbi matshigoni nya gu hegise nya womi waye? Bhibhiliya yari khiyo: “Monyo waye gambe kha wa nga tumbega.” (1 Dzipf. 11:4) Maningano ni pfhumu nya mba tumbega Abhiya, Bhibhiliya yari khiyo: “Monyo waye kha [wa] nga tumbega ga Pfhumu Nungungulu waye.” — 1 Dzipf. 15:3.
5. Tshamuseya gu khuwe sa gu thula ginani gu khozeya Jehovha khu monyo watshavbo?
5 So thula ginani gu thumeya Jehovha khu monyo wathu watshavbo? Muthu a khozeyago Nungungulu khu monyo waye watshavbo, kha gire basi isoso kholu a dzitigo gu khuye a yede gu gira isoso. Wulangani nya isoso, a gu mu khozeya kholu a mu haladzago ni gu mu ninga githawo. Nigu a gu simama gu mu haladza ni gu mu yeyedza githawo womini waye watshavbo.
6. Hi nga khozeya Jehovha khu monyo wathu watshavbo khu ndziya muni? (Mavingu 4:23; Matewu 5:29, 30)
6 Hi nga pimedzeya kharini dzipfhumu nyo tumbege dzi haladzidego Jehovha khu monyo wadzo watshavbo? Khu gu potsa mikutsedzelo nya mba yadi. Khu giyeyedzo, hi yede gu dzi woneya ni esi hi sixitirigo ni esi hi girago. Hi yede gambe gu dzi woneya tepo hi hathago dzipari kholu dzi nga hi gira hi pheya gu pimisa gu khethu dzitsapawu gilo nya lisima womini. Ha gu tugula gu khethu gyomo gilo nyo khaguri gi girago gu lihaladzo lathu khu Jehovha li vbola, hi yede gu dzi garadza gasi hi vbindrugedza mapimiselo yathu ni esi hi girago, gasi silo soso si si hi giri hi luza lihaladzo hi gu nalo khu Jehovha. — Leri Mavingu 4:23; Matewu 5:29, 30.
7. Khu ginani si gu na ni lisima gu potsa mikutsedzelo nya mba yadi?
7 Kha hi yeli gu dzumeleya gu khethu monyo wathu wu kabanega. Ha gu mba dzi woneya, hi nga pimisa gu khethu khu gu ba hi pharegide khu gu thumeya Jehovha, kha hi na nga kuhwa khu mikutsedzelo nya mba yadi. Khu giyeyedzo, nga dzi dundrugeya na wu romo vbavbandzi ga litshigu gu girago girame ni phuvbo. Wa gu vboha gaya wa gu dzegeya gu beya nyumbani uya khala ga wulanga gu furumeyago. Ginani gi nga hadzi girega wa gu tula lidimba? Nya mba hweya gi di hadzi beya girame nyumbani, gupheya gu dzidziya. Ginani hi gi hevbulago? Hi yede gu gira silo si na hi girago hi manega ni wupari ni Jehovha. Kha nga olu hi gu mba vbweta gu khethu girame gi beya nyumbani gwathu, hi yede gu gira satshavbo gasi gu potsa ni gevbini gi tago khu mafuni momu. — Efes. 2:2.
HI YEDE GU DZI LAYA KHU SIGHOHO HI GIRAGO
8-9. Pfhumu Dhavhidhe ni Pfhumu Ezekhiya, ginani va giridego tepo va nga kawukwa? (Wona fotu nya .)
8 Kha nga yi ganedego paragarafu nyo pheye, pfhumu Dhavhidhe giride sighoho nya sikhongolo, ganiolu tepo Muprofeti Natane a nga ganeya naye khedzi Jehovha a nga ba a dzipwa khidzo khu gighoho a giridego, Dhavhidhe khu gu dzi nogisa a di dzi laya. (2 Sam. 12:13) Malito ya Dhavhidhe ma lovidwego umo ga Ndzimo 51 ma gu yeyedza gu khayo uye a di gu dzi layide khu lisine. Dhavhidhe kha pfhadzedzeya a dzi gira khatshi a dzi layide gasi Natane a si mu kawuki khesi a giridego, uye a di dzi layide khu lisine. — Ndzi. 51:3, 4, 17.
9 Pfhumu Ezekhiya nuye ghohede Jehovha. Bhibhiliya yari khiyo: “Khavbo avbo, gu dita likhulo nya likhongolo avbo gwaye, ga Judha ni vathu va Jerusalema.” (2 Dzik. 32:25) Khu ginani Ezekhiya a nga dzi khusedza? Adzina saye kholu Jehovha a nga mu ninga dzithomba, a nga mu phasa gu pala Vaasiriya ni gu mu hawulugisa ga madwali yaye. Khu kotani nya olu a nga ba a dzi khusedza, adzina saye khiso si nga mu gira a yeyedza dzithomba dzaye dzatshavbo Vabhabhiloni, nigu muprofeti Isaya a mu embede gu khuye Jehovha a di mu zangarede. (2 Dzipf. 20:12-18) Ganiolu, gufana ni Dhavhidhe, Ezekhiya khu gu dzi nogisa, a dzi layide. (2 Dzik. 32:26) Khu gu hegisa, Jehovha a di mu wona nga pfhumu nyo tumbege yi girago “mithumo nya gululame.”— 2 Dzipf. 18:3.
Pfhumu Dhavhidhe ni Pfhumu Ezekhiya khu gu dzi nogisa, va dzi layide tepo muprofeti wa Jehovha a nga va embeya edzi Jehovha a nga ba a dzipwa khidzo khu sighoho va giridego (Wona dziparagrafu 8-9)
10. Ginani egi Pfhumu Amaziya a giridego tepo a nga kawukwa?
10 Gu hambana ni Dhavhidhe ni Ezekhiya, pfhumu Amaziya yi giride silo nya sadi “aholu kha nga dzi ningela khu monyo waye watshavbo.” (2 Dzik. 25:2) Ginani a nga gira? Hwane nya gu ba Jehovha a mu phaside gu pala va na Edhomi, Amaziya a di pheya gu khozeya vanungungulu vawe. c Tepo Muprofeti wa Jehovha a nga ganeya naye maningano khu isoso, Amaziya kha vbweta gu mu engiseya nigu a di mu tutumisa. — 2 Dzik. 25:14-16.
11. Guya khu 2 Vakorinto 7:9, 11, ginani hi yedego gu gira gasi Jehovha a hi divaleya? (Wona dzifotu.)
11 Ginani hi gi hevbulago khu siyeyedzo sesi. Hi yede gu dzi laya khu sighoho sathu hi bwe hi gira satshavbo gasi hi potsa gu gira sighoho sasimweso. Ginani hi na girago ha gu ningwa wusingalagadzi khu madhota ya libandlani gwathu ambari nari hi di gira gihoso nya gidugwana? Kha hi yeli gu pimisa gu khethu Jehovha kha hi haladzi ambari gu pimisa gu khethu madhota ma ngu hi nyenya. Ambari dzipfhumu nya dzadi dza Israyeli dzi di yede gu ningwa wusingalagadzi dzi bwe dzi kawukwa. (Hebh. 12:6) Ha gu kawukwa, hi yede 1) gu dzi nogisa, 2) gu gira guvbindrugedza gu vbwetegago ni 3) gu khozeya Jehovha khu monyo wathu watshavbo. Ha gu dzi laya khu sighoho hi giridego, Jehovha a na hi divaleya.— Leri 2 Vakorinto 7:9, 11.
Ha gu kawukwa, hi yede 1) gu di nogisa, 2) gu gira guvbindrugedza gu vbwetegago ni 3) gu khozeya Jehovha khu monyo wathu watshavbo (Wona paragrafu 11) f
KHOZEYA JEHOVHA KHU NDZIYA NYA YADI
12. Gilo muni nya lisima gi giridwego khu dzipfhumu nya dzadi gi nga mba girwa khu dzipfhumu nya mba tumbega?
12 Dzipfhumu edzi Jehovha a nga dzi wona na dzi tumbegide, dzi di gu mu khozeya khu ndziya a nga ba a vbweta gu khuye dzi mu khozeya khiyo, nigu dzi kutside vathu va Jehovha gu gira sasimweso. Nya mba kanakana, idzo dzi giride sihoso kha nga hi hevbudego, ganiolu dzi khozede Jehovha khu gutumbega dzi bwe dzi dzi garadza gasi gu fuvisa wukhozeyi nya malipha tigoni gwadzo. d
13. Khu ginani Jehovha a nga wona Akabi nga pfhumu nya mba tumbega?
13 Khu ginani Jehovha a nga wona dzimbe dzipfhumu na dza sa tumbega? Lisine gu satshavbo va nga ba va gira kha sa nga ba si vivbide. Khu giyeyedzo, hwane nya gu ba pfhumu nya guvivbe Akabi yi pwide gu khiyo Nabhoti a di songwa khu kotani yaye, uye a di dzi nogisa a bwe a garadzega. (1 Dzipf. 21:27-29) Uye gambe a vbahide madhoropa a bwe a dwana ni valala va Israyeli. (1 Dzipf. 20:21, 29; 22:39) Ganiolu, a di gira gilo nya guvbivbe ngudzu. A di kutsedzedwa khu mwangadzi waye gasi gu andrisa wukhozeyi nya vanungungulu nya malipha, nigu gima kha dzi laya. — 1 Dzipf. 21:25, 26.
14. a) Khu ginani Jehovha a nga wona Robhowamo nga pfhumu nya mba tumbega? b) Gilo muni nyo vivbe gi giridwego khu dzipfhumu nya dzingi dzi nga mba tumbega?
14 Wona gimbe giyeyedzo nya pfhumu nya gu vivbe nya gu pwani khu Robhowamo. Kha nga si nga khumbugwa ga paragarafu 2, uye a giride silo nya singi nya sadi ndrani nya mufumo waye. Ganiolu, hwane nya gu ba a khade pfhumu nya tshivba, uye a di ema gu khala pari ya Jehovha a pheya gu khozeya vanungungulu nya malipha. (2 Dzik. 12:1) Hwane nya isoso, dzimbe dzitepo a di gu khozeya Jehovha dzimbe dzitepo a khozeya vanungungulu nya malipha. (1 Dzipf. 14:21-24) Robhowamo ni Akabi, khandridzo basi dzipfhumu dzi nga ema gu khozeya Jehovha khu ndziya nya yadi. Khu lisine, dzipfhumu nya dzingi nya mba tumbega dzi khozede vanungungulu nya malipha. Idzo dzi kutside vambe gu gira sasimweso. Mahoni ga Jehovha, gu phareleya wukhozeyi nya lisine, yi diri ndziya nya gu tugule gu khuye pfhumu nyo khaguri yi di gu tumbegide mwendro ne.
15. Khu ginani mahungu ma ganeyago khu wukhozeyi ma gu na ni lisima ga Jehovha?
15 Khu ginani mahungu ma ganeyago khu wukhozeyi ma gu na ni lisima ga Jehovha? Gighelo nyo pheye, khu gu pfhumu yi diri ni thumo nya gu phase vathu va Jehovha gu mu khozeya khu ndziya nya yadi. Khu kharato, tepo vathu va nga ba va khozeya vanungungulu nya malipha, si di gu va gira va ghoha ni gu phara vathu khu ndziya nya mba yadi. (Hos. 4:1, 2) Nigu gambe dzipfhumu dza Israyeli ni vatshavbo Vaisrayeli va di gu hendzeledzidwe ga Jehovha. Khu kharato, Bhibhiliya ya gu fananisa wukhozeyi nya malipha ni gu gira wubhayi. (Jer. 3:8, 9) Tepo muthu a girago wubhayi a gu khunguvanyisa pari yaye nya wugadzi. Khu ndziya nyo fane, tepo githumi gi dzi hendzeledzago ga Jehovha, khavbovbo gi khozeya vanungungulu nya malipha gya gu wugeya Jehovha gi bwe gi mu khunguvanyisa ngudzu. e — Dhet. 4:23, 24.
16. Mahoni ga Jehovha, ginani gi hambanisago muthu nya wadi ni oyu nya mba wadi?
16 Ginani hi nga gi hevbulago? Khu lisine, hi yede gu dzi emiseya gu potsa ni gevbini gi gimbileyanago ni wukhozeyi nya malipha. Ganiolu, hi yede gu simama gu khozeya Jehovha khu ndziya a yi vbwetago hi bwe hi khala na hi pharegide thumoni gwaye. Muprofeti Malakiya, a tshamusede gu khuye mahoni ga Jehovha ginani gi hambanisago muthu nya wadi ni oyu nya mba wadi. Uye a di lova gu khuye: “Khavbo mu na wonago nyaluphye guhambana gu guromo ga vathu nya gululame ni vale nya guvivbedwe khu monyo, ga vathu va khozelago Nungungulu ni avo va gumba mu khozela.” (Mal. 3:18) Ha gu vbweta gu wonwa khu Jehovha kha nga vathu nya gululame, nigu kha hi vbweti gu khethu sihoso sathu, gu mba vbeleya gwathu mwendro ni gevbini gilo gi hi gira hi ema gu thumeya Jehovha. Kholu gu ema gu thumeya Jehovha, gighoho nya gikhongolo.
17. Khu ginani hi yedego gu dzi woneya tepo hi vbwetago gu hatha pari nyo tshadhe nayo?
17 Wa gu ba u si tshadhi, ganiolu na wu gu dogoreya gu tshadha, malito ya Malakiya ma nga gu phasa gu hatha pari nya yadi gasi gu tshadha nayo. Muthu nyo khaguri a gu na ni makhalelo nya yadi, ganiolu a gu mba thumeya Nungungulu nya lisine, ina Jehovha a na mu wona nga muthu nya gululame? (2 Kor. 6:14) Wa gu tshadha ni muthu yoyo, ina a na gu phasa gu simama na wu tumbegide ga Jehovha? Dundrugeya khesi: Vagadzi va Pfhumu Solomoni adzina saye va diri ni makhalelo nyo khaguri nya yadi, ganiolu khu kotani va nga ba va si khozeyi Jehovha, vbadugwana-vbadugwana va di kutsedzeya Solomoni gu khozeya vanungungulu nya malipha. — 1 Dzipf. 11:1, 4.
18. Ginani egi vavelegi va yedego gu hevbudza sanana sawe?
18 Mu nga thumisa siyeyedzo nya dzipfhumu dzi khumbugwago umo nya Bhibhiliya, gasi gu phasa sanana sano gu haguleya gudogoreya nya gu thumeye Jehovha. Si phase gu wona gu khiso dzipfhumu dzi nga tsakedwa khu Jehovha khu dzile dzi nga ba dzi mu khozeya ni gu kutsa vambe gu gira sasimweso. Sanana sago si na hevbula khesi u ganeyago ni esi u girago gasi u si kodza gu simama gu manega ni wupari nyo tiye ni Jehovha. Khu giyeyedzo, nya nga gu hevbula Bhibhiliya, gu hongola mitshanganoni ni gu tshumayela; gasi si wona gu khiso isoso silo nya lisima womini. (Mat. 6:33) Nigu gambe gyanana gyago gi yede gu khala Fakazi ya Jehovha kholu gi gu na ni wupari nyo tiye ni Jehovha ni gu vbweta gu mu thumeya nasiri kholu vavelegi vagyo va gu Dzifakazi dza Jehovha. Kholu gya gu mba dziti gu khigyo gu khozeya Jehovha gilo nya lisima, gi nga ema gu mu thumeya.
19. Gutumba muni gu gu na ni vathu va emidego gu thumeya Jehovha? (Wona kwadru yi gu khiyo: “ U nga wuya ga Jehovha!”)
19 A gu tshuka muthu nyo khaguri a ema gu thumeya Jehovha, ina so thula gu khiso a mwalo gambe rendre? Ahihi, kholu si ngu kodzega gu a dzi laya a bwe a bweleya ga Jehovha. Gasi gu gira isoso, a yede gu dzi nogisa a bwe a dzumeya giphaso gya madhota. (Jak. 5:14) Ganiolu, gasi gu tsakedwa gambe khu Jehovha a yede gu dzi garadza nigu isoso silo nya sadi guvbindra satshavbo!
20. Ha gu pimedzeya dzipfhumu nyo tumbege, Jehovha a na hi wona khu ndziya muni?
20 Ginani hi gi hevbudego khu dzipfhumu dza Israyeli? Hi nga fana ni dzipfhumu nya gutumbege, ha gu simama gu thumeya Nungungulu khu monyo wathu watshavbo. Hongoleni hi hevbulani khu sihoso sathu, hi dzi laya hi bwe hi gira guvbindrugedza gu vbwetegago. Hi yede gu dundruga lisima nya gu phareleye wukhozeyi nya lisine ni gu khozeya basi Nungungulu moyo nya lisine. Wa gu simama na wu tumbegide ga Jehovha, uye a na gu wona nga muthu a girago silo nya sadi mahoni gwaye.
NDZIMO 45 Esi nyi si pimisago monyoni gwangu
a Avba nya ndrima yeyi, lito “dzipfhumu dza Israyeli” la gu thula dzatshavbo dzipfhumu dzi nga fumeya vathu va Jehovha, omu nya mufumo nya mahundzo mavili ya Judha ni omu nya mufumo nya 10 mahundzo ya Israyeli mwendro omu nya yatshavbo mahundzo.
b MITSHAMUSELO NYA MALITO NYO KHAGURI: Bhibhiliya, dzitepo nya dzingi ya gu thumisa lito “monyo” gasi gu tshamuseya edzi muthu a gu idzo khu ndrani, si patago gudogoreya gwaye, mapimo, edzi a girago khidzo silo, egi gi mu kutsago gu gira gilo nyo khaguri ni makungo yaye.
c Ga tepo yoyo, dzipfhumu dzi nga ba dzi siri dza Israyeli, ga dzitepo nya dzingi dzi di gu khozeya vanungungulu nya mayigo va nga ba va wandra.
d Pfhumu Asa a giride sighoho nya sikhongolo. (2 Dzik. 16:7, 10) Ganiolu, Bhibhiliya ya gu ganeya gu khiyo Asa a giride silo nya sadi mahoni ga Jehovha. Tepo muprofeti wa Jehovha a nga mu kawuka, Asa gupheyani kha mu engisa, ganiolu khu gu gimbiya nya tepo a dzi layide. Jehovha a di wona silo nya sadi gwaye guvbindra esi nyo vivbe. Egi gi tsakisago, khu gu Asa a di khozeya basi Jehovha a bwe a zama gu fuvisa wukhongeyi nya malipha ndrani nya mufumo waye. — 1 Dzipf. 15:11-13; 2 Dzik. 14:2-5.
e Ha gu pwisisa gu khethu wukhozeyi nya lisine, gilo nya lisima ga Jehovha kholu omu nya Nayo wa Mosi gu di gu himbedzedwa gu khozeya ni wevbini muthu mwendro gilo nasiri Jehovha.— Ekiso. 20:1-6.
f MITSHAMUSELO NYA DZIFOTU: Lidhota nya muphya la gu bhula ni mumbe ndriyathu khu kotani nya edzi a seyago khidzo wadwa. Ndriyathu khu gu dzi nogisa, a gu dzumeya wusingalagadzi, a gira guvbindrugedza gu vbwetegago a bwe a simama gu thumeya Jehovha khu gu tumbega.
