1, 2. a) Ginani egi Jesu a gi lombidego avba nya nombelo waye nyo hegise ni vapostoli vaye? b) Khu ginani Jesu a garadzegidego khu gupwanana?

GA LITSHIGU nya guhegise a nga hodza ni vapostoli vaye, Jesu a di gu garadzega khu gupwanana. Tepo a nga ba a gombeya navo, a di khuye a gu vbweta gu khuye vapizane vaye va khala moyo, mwendro va pwanana kha nga olu uye ni Babe va pwananago. (Leri Johane 17:20, 21.) Khu gu vapizane va Jesu va pwanana, isoso si di hadzi yeyedza vambe gu khiso Jehovha khuye a rumedego Jesu mafuni. Vathu va di hadzi guti vapizane nya lisine va Jesu khu lihaladzo lawe khu moyo ni moyo, nigu lihaladzo lolo li di hadzi va gira va engedzeya gupwanana. — Johane 13:34, 35.

² Hi ngu gi pwisisa gighelo gi giridego Jesu a ganeya ngudzu khu gupwanana ga wutshigu wule. Wonide gu khuye vapostoli vaye kha va nga ba va pwana khu guvbeleya. Khu giyeyedzo, vapostoli va ganedzisanide khu gu vbweta guti gu “khu mani a gu khongolo vbakari gwawe,” kha nga esi va nga nga gira. (Luka 22:24-27; Marko 9:33, 34) Ga yimbe tepo, Jakobe ni Johane va lombide gu khavo Jesu a va ninga sikhalo nya lisima ngudzu Mufumoni wa Nungungulu, gasi va khala khu mudzibambe gwaye. — Marko 10:35-40.

3. Ginani egi adzina gi tandregisidego vapizane va Kristo gu pwanana, nigu siwudziso muni hi na bhulago khiso?

 ³ Gu vbweta gikhalo mwendro malungelo nya makhongolo khandriso basi si nga hadzi tandregisa vapizane va Kristo gu pwanana. Vathu va matshiguni ya Jesu va di si pwani khu kotani nya livengo ni gihatheya. Vapizane va Jesu va di yede gu pala gudzipwa gogo nyo vivbe. Avba nya ndrima yeyi, hi na ganeya khu siwudziso sesi: Ginani egi Jesu giridego khu gihatheya? Phaside kharini valandreyi vaye gu phara vambe nya mba na gihatheya, va bwe va pwanana? Nigu giyeyedzo gya Jesu ni esi a si hevbudzidego si nga hi phasa kharini gu simama hi pwanana?

4. Ninga giyeyedzo nya gihatheya a emisanidego nagyo Jesu.

⁴ Ambari Jesu emisanide ni gihatheya. Tepo Filipi a nga embeya Natanayeli gu khuye manide Mesiya, Natanayeli a di khuye: “Ina gu ngu dzi kodza gu duga gilo nya gyadi khu Nazareta?” (Johane 1:46) Adzina Natanayeli a di gu dziti gu khuye Mesiya a di hadzi velegedwa Bhetlehema, kha nga si profetidwego omu ga Mikeya 5:2. Si nga gira na pimiside gu khuye Nazareta gu diri mwalo ngudzu lisima nyo kala li khala lidhorapa nya mavelego la Mesiya. Nigu, gu diri ni vaJudha nya guthavisege va nga ba va woneya vbavbatshi Jesu kholu a nga ba a dugeya Galileya. (Johane 7:52) Vajudha nya vangi va di gu pimisa gu khavo vathu va Galileya va diri va vbavbatshi. Vambe vaJudha va zamide gu vala Jesu khu gu mu rana khavo muSamariya. (Johane 8:48) Vasamariya va di gu dugeya mayigoni nyo hambanehambane, nigu wukhongeyi wawe wu di gu hambana ni owu nya vaJudha. Vajudha ni vaGalileya va di gu woneya vbavbatshi vaSamariya nigu va di si patani navo. — Johane 4:9.

5. Gihatheya muni egi vapizane va Jesu va emisanidego nagyo?

⁵ Vathangeyi nya wukhongeyi nya giJudha navo va di si ningi githawo valandreyi va Jesu. Vafarisi va di gu rana vapizane va Jesu khavo vathu nyo “vadwe khu Nungungulu.” (Johane 7:47-49) Vafarisi va di gu wona vatshavbo va nga ba va si hevbuli omu nya dzixikola nya wukhongeyi nya giJudha ni gu mba landreya sihena sawe kha nga vathu nya mba phasa gilo ni gu mba olovelega. (Mithumo 4:13) Jesu ni vapizane vaye va emisanide ni gihatheya kholu vathu va dziteponi dzodzo va di gu dzi khusedza khu wukhongeyi wawe, gikhalo gyawe gipandreni, ni lifumbo lawe. Gihatheya gyogyo gi thapede vapizane ni edzi va nga ba va va wona khidzo vambe. Gasi gu va simama gupwanana, va di yede gu vbindrugedza mapimiselo yawe.

6. Thumisa siyeyedzo gasi gu yeyedza edzi gihatheya gi nga hi khuhago khidzo.

⁶ Muhuno, litigo leli li hi randredego li tade khu gihatheya. Si nga gira gu vathu va hi nyenya mwendro gu ethu hi va nyenya khu kotani nya lifumbo lawe. Ndryathu nya nyamayi wa Awustraliya oyu olu a gu piyonero wari khuye: “Livengo langu khu vatsungu li engedzede tepo nyi nga ba nyi vega gupima avba nya guvivba gu nga ba gu giredwa sisumbudwa nyo pheye sa Awustraliya — esi sa gale ni esi sa olu.” Livengo laye li engedzede gambe khu kotani nya edzi vambe va mu tshanisidego khidzo. Moyo nya ndriyathu wa Kanadha a gu ganeya edzi a nga ba a dzipwa khidzo: “Nyi di gu pimisa gu kheni vathu va ganeyago giFransa va diri va vbatshani.” Khu kharato wari khuye a di gu nyenya ava va nga ba va ganeya giNgiza.

7. Ginani egi Jesu a giridego khu gihatheya?

 ⁷ Gufana ni matshiguni ya Jesu, muhuno nugo gihatheya gi tsitside mikhamba nigu si ngu garadza gu vbindrugedza gudzipwa gogo. Ginani egi Jesu a giridego khu gudzipwa gogo? Nyo pheye, uye gima kha manega ni gihatheya. Tepo yatshavbo a di si khedzi khu khovbe. A di gu tshumayela sighanyi ni sisiwana, vaFarisi ni vaSamariya, gupata ni vahengisi nya mikhupo ni sighohi. Nya wuvili, Jesu a hevbudzide vapizane vaye a bwe a va yeyedza khu giyeyedzo gyaye gu khuye kha va yeli gu kanakaneya mambe mafumbo mwendro gu ma nyenya.

8. Khu levbi litshina li gu giseketelo nya gupwanana gwathu? Tshamuseya.

⁸ Jesu hevbudzide litshina nyo khaguri nya nayo li gu giseketelo nya gupwanana gwathu. A di embeya vapizane vaye vatshavbo khuye: “Enu mwatshavbo mu vandruye” (Leri Matewu 23:8,  9.) Khu ndziya nyo khaguri, hatshavbo hi vandruye kholu hatshavbo hi sanana sa Adhamu. (Mithumo 17:26) Jesu tshamusede gambe gu khuye vapizane vaye va diri vana ndruye ni ndruye kholu vatshavbo va di gu dzumeya Jehovha kha nga Babe wawe wa ndzadzini. (Matewu 12:50) Nigu vatshavbo va khade gipandre nya ndranga ya Nungungulu nigu va di gu tshanganiswa khu lihaladzo ni gukhodwa. Khigyo gi giridego gu vapostoli va rana mambe maKristo khavo vandriyawe omu nya malangaliya va nga ba va loveya mabandla. — Varoma 1:13; 1 Pedro 2:17; 1 Johane 3:13. * — Wona tshamuselo wa vbavbatshi.

9, 10. a) Khu ginani vaJudha va nga ba vari mwalo gighelo nya gu dzikhusedze khu lifumbo lawe? b) Jesu hevbudzide kharini gu khuye si vivbide gu woneya vbavbatshi vathu nya mambe mafumbo? (Wona foto gupheyani nya ndrima.)

⁹ Hwane nyo ba Jesu a embede vapizane vaye gu khuye va di yede gu wonana kha nga vandruye, uye a di tshingisa gu khuye avo va di yede gu dzi nogisa. (Leri Matewu 23:11, 12.) Kha nga hi hevbudego, ga dzitepo nyo khaguri gudzikhusedza gu hambaniside vapostoli. Nigu matshiguni ya Jesu, vathu va di gu dzi khusedza khu mafumbo yawe. Vajudha nya vangi va di gu khodwa gu khavo avo va diri nya tshukwana guvbindra vambe kholu va diri sanana sa Abrahama. Ganiolu Johane Mubhapatisi a di va embeya gu khuye: “Nungungulu a ngu dzi kodza gu vbindrugedza siwindri sesi si khala sanana sa Abrahama.” — Luka 3:8.

¹⁰ Jesu hevbudzide gu khuye si vivbide gu vathu va dzi khusedza khu mafumbo yawe. Uye vegige isoso guagani tepo a nga wudziswa khu muhevbudzi nyo khaguri nya nayo khuye: “Gasi khu mani muthu khwathu?” Gasi gu hlamula giwudziso gyogyo, Jesu a di tshamuseya matimo nyo khaguri. Mujudha nyo khaguri a di khinyedwa khu dzimbafa dzi vbedza dzi mu diga ndziyani. Ambari olu vaJudha nyo khaguri va nga vbindra khu vbale, kha va mu phasa. Ganiolu muSamariya nyo khaguri a di pweya gisiro muJudha wule a mu khathaleya. Guhegisani nya matimo yaye, Jesu a di embeya muhevbudzi wule nya nayo khuye a di yede gu fana ni muSamariya wule. (Luka 10:25-37) Jesu yeyedzide gu khuye muSamariya a nga hevbudza vaJudha gu khuye so thula ginani gu haladza muthu-kwanu.

11. Khu ginani gu nga ba gu vbwetega gu vapizane va Jesu va si manegi ni gihatheya, nigu uye va phaside kharini gu pwisisa isoso?

¹¹ Na si gu hongoli ndzadzini, Jesu rumide  vapizane gu tshumayela “Judheya gwatshavbo, ni Samariya, kala mahegiso nya mafu.” (Mithumo 1:8) Gasi gu gira thumo wowo, vapizane va Jesu va di yede gu diga gudzikhusedza ni gihatheya gyawe. Jesu a di gu oloveya gu ganeya khu makhalelo nya yadi nya vathu va vambe mayigo, isoso si dongisede vapizane vaye gasi gu tshumayela mayigo yatshavbo. Khu giyeyedzo, zundzide muthangeyi nyo khaguri nya masotshwa wa limbe litigo a nga ba ari ni gukhodwa nyo samadzise. (Matewu 8:5-10) Dhoropani gwaye nya mavelego, Nazareta, Jesu tshamusede edzi Jehovha a phasidego khidzo vathu nya mambe mayigo, nya nga noni ya Sarepita ni Nahamani wa Siriya a nga ba a dwala khu sokono. (Luka 4:25-27) Jesu gambe tshumayede nyamayi nya muSamariya a bwe a khala matshigu mavili dhoropani ga Samariya kholu vathu va di gu tsakeya mahungu yaye. — Johane 4:21-24, 40.

12, 13. a) Vapostoli va si wone kharini tepo Jesu nga ganeya ni nyamayi wule nya muSamariya? (Wona foto gupheyani nya ndrima.) b) Ginani gi nga yeyedza gu khigyo Jakobe ni Johane kha va nga ba va si pwisiside gwadi esi Jesu a nga ba a zama gu va hevbudza?

¹² Kha sa nga ba si va vbevbugeya vapostoli gu pala gihatheya gyawe. Va samade khu gu wona Jesu na gu tshumayela nyamayi nya muSamariya. (Johane 4:9, 27) Khu ginani? Adzina khu gu vathangeyi nya wukhongeli nya giJudha na va sa ganeya ni nyamayi guagani, ngudzungudzu nyamayi nya muSamariya a nga ba ari ni ndruma nya mba yadi. Vapostoli va di rana Jesu gasi guya hodza, ganiolu Jesu a di gu tsakide ngudzu khu gu bhula ni nyamayi wule avba nya gu guhodza gu diri mwalo lisima gwaye. Nungungulu a di gu vbweta gu khuye a tshumayela, nigu gu gira esi a rumidwego khu Babe waye, gupata ni gu tshumayela nyamayi nya muSamariya, gwaye si di gu fana ni guhodza. — Johane 4:31-34.

¹³ Jakobe ni Johane kha va gi pwisisa gihevbudzo gegi nya lisima. Tepo vapizane va nga ba va endra ni Jesu, va di vbweta wulanga nyo lale, gidhoropanani gya Samariya. Ganiolu vaSamariya kha va va dzumeleya gu lala mule. Jakobe ni Johane va di goroga ngudzu nyo bwe va lomba gu khavo Jesu a va dzumeleya gu resa nilo khu ndzadzini gasi guta mbembisa gidhoropana gile gyatshavbo. Jesu a di va kawuka nya dzadi. (Luka 9:51-56) Nari khatshi sile si di girega dhoropani gwawe Galileya, adzina Jakobe ni Johane na va sa goroga ngudzu kharatede. Si nga gira na va gorogide kholu va nga ba va nyenywa gipandreni mule. Khu hwane nya isoso, tepo Johane a nga ba a tshumayela vaSamariya va bwe nya vangi vakona va mu engiseya, adzina khade dzitshoni khesi a nga ba a giride gupheyani. — Mithumo 8:14, 25.

14. Gi lulamisidwe kharini gigaradzo nya gihatheya?

¹⁴ Gitepwana hwane nya Pentekosta nya mwaga nya 33, gu manegide gigaradzo nya gihatheya libandlani. Tepo vandriyathu va nga ba va phakeya guhodza dzinoni, va di gu divala dzinoni dzi nga ba dzi ganeya giGreki. (Mithumo 6:1) Isoso adzina si giregide khu kotani nya gihatheya nya malimi. Vapostoli va di dzegeya gu lulamisa gigaradzo gyogyo khu guvbiredza. Va di hatha livbandre na vavili vama va ninganedwago gasi gu kabaniseya guhodza khu ndziya nya yadi. Vatshavbo vandriyathu vovo va diri ni malina nya giGreki, iso adzina si vbodzisidego myonyo ya dzinoni dzile.

15. Pedro hevbude kharini gu mba manega ni gihatheya? (Wona foto gupheyani nya ndrima.)

 ¹⁵ Khu mwaga nya 36, vapizane va Jesu va di pheya gu tshumayela vathu nya mayigo yatshavbo. Na si si gu giregi isoso, mupostoli Pedro a di gu oloveya gu vbungadza ni vaJudha. Khavbovbo Nungungulu a di si vega guagani gu khuye maKristo kha ma yeli gu manega ni gihatheya, nigu Pedro tshumayede Korineliyo, musotshwa nya muRoma. (Leri Mithumo 10:28, 34, 35.) Hwane nya isoso, Pedro vbungadzide a bwe a hodza gumogo ni maKristo ma nga ba ma siri vaJudha. Hwane nya myaga nyo khaguri, dhoropani ga Antiyokiya, a di diga gu hodza ni maKristo ma nga ba ma siri vaJudha. (Vagalatiya 2:11-14) Pawulo a di kawuka Pedro, nigu Pedro a di dzumeya gukawukwa. Ha gu dziti kharini? Tepo Pedro a nga loveya lidangaliya laye nyo pheye maKristo nya vaJudha ni aya ma nga ba ma siri vaJudha ya Aziya Menor, lovide khu lisima nya gu haladze vandriyathu vatshavbo. — 1 Pedro 1:1; 2:17.

16. Makristo nya gupheye ma di gu tidwa khu ginani?

¹⁶ Somo guagani gu khiso khu kotani nya giyeyedzo gya Jesu, vapostoli va hevbude gu haladza “vathu vatshavbo.” (Johane 12:32; 1 Thimoti 4:10.) Ambari olu si dzegidego tepo, avo va vbindrugedzide mawonelo va nga ba vari nawo khu vathu. Khu lisine, maKristo nyo pheye ma di gu tidwa khu lihaladzo ma nga ba mari nalo khu moyo ni moyo wawe. Omu nya mwaga nya 200, mulovi Tertuliano lovide esi vambe vathu va ganedego khu maKristo: “Ayo ma ngu haladzana,” nigu “Ma dzi emisede ambari ni gufa khu vakwawe.” Khu kotani nya olu maKristo yoyo ma ambadego “muthu muphya,” ayo ma hevbude gu wona vathu vatshavbo khu ndziya mweyo, a gu ndziya eyi Nungungulu a va wonago khiyo. — Vakolosi 3:10, 11.

17. Hi nga kula kharini gyatshavbo gihatheya myonyoni gwathu? Ninga siyeyedzo.

¹⁷ Muhuno nugo, si nga dzega tepo gasi gu hi kula gihatheya myonyoni gwathu. Moyo nya ndriyathu nya nyamayi wa Fransa a ngu  tshamuseya edzi si mu garadzedego khidzo isoso. Wari khuye: “Jehovha a ngu nyi hevbudza gu khuye ginani lihaladzo, ginani gu phasana, ni gu khuye ginani guhaladza vathu nya mafumbo yatshavbo. Ganiolu nyi nga gu hevbula gu pala gihatheya, nigu isoso khandri dzitepo dzatshavbo si vbevbugago. Khigyo gi nyi girago nyi simama gu si gombeleya.” Moyo nya ndriyathu nya nyamayi wa Espanya a gu tshamuseya gu khuye dzimbe dzitepo a ngo dwana ni gudzipwa nyo vivbe khu vathu nya lifumbo nyo khaguri. Wari khuye: “Ga dzitepo nya dzingi nyi ngu dugeleya. Ganiolu nyi ngu dziti gu kheni nyi yede gu simama gu dwana. Nyo bonga Jehovha, kholu nyi ngu tsaka khu gu gira gipandre nya ndranga yeyi nyo pwanane.” Hatshavbo gu vbwetega gu hi dundrugeya gwadi khedzi hi dzipwago khidzo. Ina anethu gu vbwetega gu hi kula gudzipwa nyo khaguri nya gihatheya myonyoni gwathu?

18, 19. a) Khu sevbi sighelo hi gu naso gasi gu hakha vathu vatshavbo khu mandza mavili? b) Hi nga si gira kharini isoso?

¹⁸ Gwadi gu dundruga gu khethu hatshavbo hi diri hwindzo ni Nungungulu. (Vaefeso 2:12) Ganiolu Jehovha hi ranide khu lihaladzo. (Hoseya 11:4; Johane 6:44) Nigu Kristo a hi hakhide khu mandza mavili. Uye giride gu si kodzega gu hi gira gipandre nya ndranga ya Nungungulu. (Leri Varoma 15:7.) Ambari olu hi nga mba vbeleya, Jesu a ngu hi hakha khu mandza mavili, khu kharato gima kha hi yeli gu manega ambari ni mapimo nya gu venge vambe!

¹⁹ Kha nga olu hi hidzimeyago vbafuvbi ni mahegiso nya mafu yaya nyo vivbe, vathu va na engedzeya guhambana, gihatheya, ni guvengana. (Vagalatiya 5:19-21; 2 Thimoti 3:13) Ganiolu kha nga vathu va Jehovha, hi yede gu vbweta “guti gutago khu ga Nungungulu,” ogu gu na hi phasago gu mba na gihatheya nigu bwe hi andrisa gurula. (Jakobe 3:17, 18) Hi ngu tsaka khu gu gira wupari ni vathu nya mambe mayigo, hi dzumeya magirelo yawe nya silo, adzina hi bwe hi hevbula lidimi lawe. Tepo hi girago isoso, ha gu manega ni gurula gu gogago “kha nga tsongo” ni gululama “gu fanana[go] ni mavimbi nya linene.” — Isaya 48:17, 18.

20. Ginani gi giregago tepo lihaladzo li vbindrugedzago mapimiselo yathu ni gudzipwa gwathu?

²⁰ Tepo ndriyathu wule wa Awustraliya a nga hevbula Bhibhiliya, livengo laye latshavbo ni gihatheya gyaye nya gikhongolo si di vbeya vbadugwana-vbadugwana. Lihaladzo li vbindrugedzide mapimiselo yaye ni gudzipwa gwaye. Ndriyathu wule wa Kanadha a ganeyago giFransa wari khuye olu tugude gu khuye vathu nya vangi va gu venga vathu khu gu mba vati basi. Uye wonide gu khuye “makhalelo nya vathu kha mayi khomu va velegedwego umo.” A di bwe a tshadha ni muthu a ganeyago giNgiza! Siyeyedzo sesi so yeyedza gu khiso lihaladzo li ngu pala gihatheya. Lihaladzo la gu hi tshanganisa khu gupwanana nya gu gima kha gu na nga tshungunudwa. — Vakolosi 3:14.