HO VBANYA tigoni gu tadego khu sigaradzo, khu kharato si nga garadza gu mana gurula. Ambari ho ba hiri ni gurula, si nga vbevbuga gu vbeledwa khugo. Ginani gi ganedwago khu Bhibhiliya gi nga hi phasago gu mana gurula nya lisine, gu gu mba vbeya? Hi nga phasa kharini vambe gu gira isoso?

Gasi gu mana gurula nya lisine, gu vbwetega gu hi dzipwa na hi sayisegide ni gu vhikedwa. Gu vbwetega hi manega ni dzipari nya dzadi, nigu nya lisima ga satshavbo gu vbwetega gu hi manega ni wupari ni Nungungulu. Hi nga si gira kharini isoso?

Milayo ni matshina nya milayo ya Jehovha khyadi tepo yatshavbo. Ho yi engisa, ho yeyedza gu khethu hi ngu mu tumba Jehovha nigu ho vbweta gu manega ni gupwanana nyo rule ni naye. (Jeremiya 17:7, 8; Jakobe 2:22, 23) Khavbovbo Jehovha a na hidzimeya vbafuvbi gwathu a bwe a hi ninga gurula mapimoni. Isaya 32:17 wari khuye: “Thumo nya wululami wu na bani wuri gurula, ni handro nya wululami, wu na bani na wuri gukhadzisega ni gutumbega kala gupindruga.” Hi nga mana gurula nya lisine ha gu engisa Jehovha khu gudzina gwathu. — Isaya 48:18, 19.

Jehovha a di bwe a hi ninga giningwa nya lisima ngudzu gasi gu hi phasa gu andrisa gurula nya mba vbeya. Giningwa gyogyo, liphuvbo laye nya guage. — Mithumo 9:31.

Mupostoli Pawulo a di khuye gurula gipandre nya “mithumo ya Liphuvbo la Nungungulu.” (Vagalatiya 5:22, 23) Kha nga olu liphuvbo la Nungungulu li resago gurula, ho ba hi vbweta gurula gu vbwetega gu hi dzumeya gu thangedwa khu liphuvbo nya guage. Hi nga si gira kharini isoso?

Nyo pheye, gu vbwetega gu hi leri Lito la Nungungulu tepo yatshavbo. (Ndzimo 1:2, 3) Tepo hi  dundrugeyago gwadi khesi hi si lerigo, liphuvbo nya guage la gu hi phasa gu pwisisa esi Jehovha a pimisago ga sipandre nyo hambanehambane. Khu giyeyedzo, ha gu hevhula edzi a sayisago khidzo gurula gwaye ni edzi gurula gu gu na ni lisima khidzo gwaye. Ho thumisa esi hi si hevbulago omu nya Bhibhiliya, hi na engedzeya gu mana gurula guvbanyani gwathu. — Mavingu 3:1, 2.

Nya wuvili, hi yede gu gombeya gasi gu hi mana liphuvbo nya guage la Nungungulu. (Luka 11:13) Jehovha a ngu tumbisa ava va lombago giphaso gyaye khuye: “Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo khu ga Kristo Jesu.” (Vafilipi 4:6, 7) Ha gu gira wupari ni Jehovha hi bwe hi tumba liphuvbo laye, a na hi ninga gurula nya lisine. — Varoma 15:13.

Bhibhiliya yi phaside vathu nya vangi gu vbindrugedza mavbanyelo yawe, nigu olu va ngu dzi buza khu gurula ni Jehovha, gurula mapimoni, ni gurula ni vambe. Va si kodzide kharini gu vbindrugedza silo soso?

Na va si gu hevbuli lisine, vambe nya vandriyathu va diri ni gihefane ni maghilivindra. Ganiolu va dzi garadzede gu vbindrugedza, nigu olu vathu nya vadi, va laphisago monyo va bwe vari ni gurula ni vambe. * (Wona tshamuselo wa vbavbatshi.) (Mavingu 29:22) Wona edzi ndriyathu nya pwani khu David ni Rachel va vbindrugedzidego khidzo mavbanyelo yawe.

Na si gu hevbuli lisine, David a di gu oloveya gu solasola vathu nigu a di si kodzi gu ganeya khu gurula ni va ndrangani gwaye. Ganiolu wonide gu khuye a di yede gu vbindrugedza. A gu mane kharini gurula? David wari khuye: “Nyi di pheya gu thumisa matshina nya milayo nya Bhibhiliya guvbanyani gwangu, kha nga handro wakone, gu manegide githawo gwaye ni va ndrangani gwaye.”

Rachel a di gu kutsedzedwa khu mavbanyelo ya omu a nga dandreya umo. Wari khuye: “Ambari olu,  nyi nga gu dwana ni gihefane kholu nyi dandrede ndrangani nya mayunga.” Ginani gi phasidego Rachel gu mana gurula? Wari khuye: “Nombelo ni gutumba Jehovha khu guvbeleya.”

David ni Rachel siyeyedzo sivili basi nya vathu ava olu va gu na ni gurula khu gu ba va thumiside matshina nya milayo nya Bhibhiliya va bwe va tumba liphuvbo nya guage. Ambari olu hi vbanyago tigoni nya maghilivindra, hi nga mana gurula mapimoni. Isoso si na vbevbugisa gupwanana gwathu ni sivbango nya ndranga yathu ni vandriyathu libandlani. Ganiolu Jehovha wari khuye hi na vbanye khu “gurula ni vathu vatshavbo.” (Varoma 12:18) Ina isoso si ngu kodzega kamo? Nigu khu ginani hi yedego gu zama gu manega ni gurula ni vambe?

Thumoni gwathu nya gutshumayele, ha gu tshumayela mahungu nya gurula ma ganeyago khu Mufumo wa Nungungulu. (Isaya 9:6, 7; Matewu 24:14) Nya vangi va ngu ma gola ni gu ma dzumeya mahungu yoyo. Kha nga handro wakone, kha va ngo dzipwa gambe na va si phasi gilo mwendro gu goroga khu kotani nya esi si dugeleyago mafuni. Olu va na ni gutumba nya lisine khu wumindru, nigu isoso so va gira va “vbweta gurula.” — Ndzimo 34:14.

Ambari ulolo, khandri vatshavbo va dzegeyago gu hakha mahungu yathu khu tepo nyo pheye. (Johane 3:19) Ambari vathu va gu hi hakha kharini, Nungungulu a ngu hi ninga liphuvbo laye. Ilo li ngu hi phasa gu simama na hi rude ni githawo tepo hi tshumayelago. Khu ndziya yoyo ho landreya wusingalagadzi wa Jesu wu gu khuwo: “Ndrangani mu na gu belago, va loseni. Ndranga yoyo ya gu bani yiri ni fanelo, gurula gwanu gu na khale avbo; aholu ya gu bani yiri mwalo fanelo, gu na bwelele gwanu.” (Matewu 10:11-13) Ha gu manega ni mapimo yoyo, hi nga simama ni gurula ambari va gu hi gireya mwendro gu hi embeya ni gevbini. Nigu hi ngu dundruga gu khethu hi ngari ni lithomo nya gu phase vathu vovo mindru wa tshigu.

Hi ngu andrisa gurula gambe khu gu manega ni githawo tepo hi ganeyago ni vathangeyi nya mufumo, ambari vo ba va wugeya thumo wathu. Khu giyeyedzo, ga litigo nyo khaguri la Afrika, mufumo wu di gu himbedzeya guvbahwa nya dziSalawu nya Mufumo. Vandriyathu va di gu dziti gu khavo va di yede gu lulamisa gigaradzo gyogyo khu gurula. Avo va di rumeya ndriyathu a nga ba a thumide kha nga misiyonariyo ga litigo lile gasi guya wonana ni embaxadhori tigoni ga Londres, Inglaterra, a mu bhuleya khu thumo nya gurula wu girwago khu Dzifakazi dza Jehovha.

Ndriyathu a di khuye: “Tepo nyi nga vboha vbamwanya, nyi di dzegeya gu wona khu maambalelo ya oyu a hakhago vapfhumba gu kheni a diri wa lihundzu nyi hevbudego lidimi lakone. Khu kharato nyi di mu losa khu lidimi laye. Na gu samala, a di nyi wudzisa gu khuye: ‘Ginani gi gu tisago avba?’ Khu ndziya nya yadi nyi di mu hakha kheni nyi di gu dogoreya gu ganeya ni embaxadhori. Uye a di mu ligareya, embaxadhori a di duga a ta wonana ni eni a bwe a nyi losa khu lidimi la gipandreni mule. Khavbovbo a di nyi engiseya gwadi tepo nyi nga ba nyi mu tshamuseya thumo nya gurula wu girwago khu Dzifakazi.”

Hwane nyo ba embaxadhori a engisede esi si ganedwego khu ndriyathu, a di wu pwisisa gwadi thumo wathu a bwe a si wu vengi gambe nga gale. Gitepwana hwane nya isoso, mufumo wowo wu di vbindrugedza esi wu nga ba wu si hungide wu bwe wu dzumeleya Dzifakazi dza Jehovha gu vbaha dziSalawu nya Mufumo. Vandriyathu va di tsaka ngudzu! Somo guagani gu khiso ha gu phara vambe vathu khu githawo, ha gu andrisa gurula.

Muhuno, vathu va Jehovha va ngu dzi buza khu paradhesi nya liphuvbo tepo va mu khozeyago gurulani. Moyo ni moyo wathu a nga engedzeya gurula gogo khu gu dzi garadzeya gu andrisa gurula guvbanyani. Khavbovbo hi nga tiyisega gu khethu Jehovha a ngu tsaka khethu. Nigu mafuni yaye nya maphya, a na hi ninga gurula nya mba vbeya. — 2 Pedro 3:13, 14.