1. Gigengedzo muni egi Pawulo a ningidego maKristo nyo todzwe?

PAWULO gengedzide khuye “mu nga landriselini.” Ginani? “Mu nga landriselini mikhuwo nya mavbanyelo nya litigo leli.” (Rom. 12:2) Pawulo lovede malito yaya maKristo ya lizana myaga nyo pheye. Khu ginani Pawulo a ningidego gigengedzo gegi ga vama ni vanyamayi va nga ba va dzi hendzeledzide ga Jehovha ni gu todzwa khu liphuvbo nya guage? — Rom. 1:7.

2-3. Sathane a gu zama kharini gu hi hambanisa ni Jehovha, nigu hi nga khungumula kharini silo nyo vivbe si dandramedego mapimoni gwathu?

² Pawulo a di gu garadzega kholu mambe maKristo ma di gu kutsedzedwa khu mapimo nyo vivbe ni dzifilosofiya dzi andriswago khu litigo la Sathane. (Efes. 4:17-19) Isoso si nga dugeleya ga moyo ni moyo wathu. Sathane khuye a fumeyago litigo leli, nigu a nga thumisa dzindziya nyo hambanehambane gasi gu hi senga. Khu giyeyedzo, ha gu ba hi vbweta gu ningwa githawo khu vathu mwendro ndruma, uye a nga thumisa isoso gasi gu zama gu hi hambanisa ni Jehovha. A nga zama gu thumisa silo hi si hevbudego gaya, xikwatunu ambari vathu va hi randredego gasi gu hi gira hi pimisa khu ndziya a yi vbwetago.

³ Ina si ngu kodzega gu khungumula silo si dandramedego mapimoni gwathu? (2 Kor. 10:4) Nga wona hlamulo wa Pawulo: “Hi na khungumule matshandza yatshavbo ma wugelago guti gwa Nungungulu, hi wuyisela mapimo yatshavbo nya wuthu, ma ta yingisa Kristo.” (2 Kor. 10:5) Ina, khu gu phaswa khu Jehovha hi nga si kodza gu vbindrugedza mavbanyelo nyo vivbe. Gu fana ni mirendre nyo khaguri yi kodzago gu vbedza  tshivba vheneno, Lito la Nungungulu li nga hi phasa gu vbedza tshivba vheneno hi yi manago tigoni momu ga Sathane.

4. Guvbindrugedza muni gu tala nya ethu hi gu giridego tepo hi nga dzumeya lisine?

⁴ Nga dundrugeya khu guvbindrugedza u gu giridego tepo u nga dzumeya lisine nya Lito la Nungungulu u bwe u hunga gu thumeya Jehovha. Gu tala nya ethu si lombegide gu hi diga mavbanyelo nyo vivbe gasi gu thumeya Jehovha. (1 Kor. 6:9-11, NM) Hi ngu mu bonga ngudzu Jehovha kholu a hi phasidego gu diga mavbanyelo yoyo nyo vivbe!

5. Khu sevbini silo sivili esi Varoma 12:2, a hi kutsago gu gira?

⁵ Ambari ulolo, gu vbwetega hi simama gu vbindrugedza silo nyo khaguri. Ambari olu hi emidego gu gira sighoho nya sikhongolo na hi si bapatiswi, hi yede gu dzigaradza gasi gu potsa ni gyevbini gi na hi lingago gu ghoha gambe. Hi nga si gira kharini? Pawulo a gu hlamula, khuye: “Mu nga landriselini mikhuwo nya mavbanyelo nya litigo leli, aholu vbindrugedzani mapimo yanu ni mavbanyelo yanu yatshavbo.” (Rom. 12:2) Khu kharato gu vbwetega hi gira silo sivili. Nyo pheye, gu vbwetega hi ema gu landriseya mikhuwo mwendro mikutsedzelo nya litigo leli. Nya wuvili, gu vbwetega hi ‘vbindrugedza’ mapimo yathu mwendro mavbanyelo yathu.

6. Ginani hi gi hevbulago avba nya mongo nya malito ya Jesu ma gomogo omu ga Matewu 12:43-45?

⁶ Pawulo a di gu thula nya singi nyo vbindre guvbindrugedza edzi hi wonegago khidzo mahoni nya vambe vathu. Uye a di gu thula guvbindrugedza gu khuhago sipandre satshavbo nya guvbanya gwathu. (Wona kwadru “Gu vbindrugedza khu guvbeleya mwendro gu pfhadza”) Hi yede gu vbindrugedza khu guvbeleya mavbanyelo yathu ma etidego, edzi hi dzipwago khidzo, ni guwegeleya gwathu. Khu kharato, hatshavbo gu vbwetega hi dzi wudzisa esi: ‘Guvbindrugedza nyi gu giridego  gasi nyi khala Fakazi go khuha basi edzi nyi wonegago khidzo mahoni ga vambe vathu mwendro nyi di khala muKristo monyoni ni mapimoni?’ Omu ga Matewu 12:43-45, Jesu yeyedzide esi si yedego gu girwa. (Leri.) Malito yaya ma gu hi hevbudza lisine limwedo nya lisima: Kha si eneyi basi gu hi potsa mapimo nyo vivbe; gu vbwetega hi ma tshikedza khu mapimo ma tsakisago Nungungulu.

7. Hi nga vbindrugedza kharini edzi hi gu idzo khu ndrani?

⁷ Ina si ngu kodzega gu vbindrugedza guwegeleya hi gu nago mwendro edzi hi gu idzo khu ndrani? Lito la Nungungulu la gu hlamula esi: “Dzi garadzeni khu gu vbindrugedza mavbanyelo mu khala vathu vaphya myonyoni ni mapimoni gwanu. Ambalani mavbanyelo nya muthu muphya a giridwego a fanana ni Nungungulu khu gululama ni ndruda lisineni.” (Vaefeso 4:23, 24) Ina, si ngu kodzega gu vbindrugedza edzi hi idzo khu ndrani, ganiolu kha si vbevbugi. Hi yede gu gira nya singi nyo vbindre gu potsa gu dogoreya nyo vivbe ni gu ema gu gira silo nyo vivbe. Gu vbwetega hi vbindrugedza ‘mavbanyelo hi khala vathu vaphya mapimoni.’ Isoso so pata gu vbindrugedza gu dogoreya gwathu, makhalelo ni esi si hi kutsago gu gira silo. Isoso si na vbweta gu hi simama gu dzi garadza, hi si khali khu mawogo.

8-9. Matshango ya ndriyathu nyo khaguri ma gu yeyedza kharini lisima nya gu hi vbindrugedza edzi hi gu idzo khu ndrani?

⁸ Hongoleni hi wona giyeyedzo gya ndriyathu moyo a nga ba ari muthu nya maghilivindri gale yoyo. A diri maleveni nigu a di gu dwaniseya vathu, ganiolu tepo a nga ema gu gira isoso a di ninganedwa gu bhapatiswa. Isoso si ningede wufakazi nya wadi gipandreni mule a nga ba a vbanya umo. Ganiolu, ga wutshigu nyo khaguri gitepwana hwane nyo bhapatiswe, a di tshangana ni giligo a nga ba sa gi vireya. Maleveni moyo a di hongola gaya gwaye aya mu khutedzeya gasi gu dwana naye. Gupheyani ndriyathu yoyo kodzide gu dzi phara a potsa gu dwana ni mwama wule. Ganiolu tepo mwama wule a nga pheya gu ganeya gu vivba khu lina la Jehovha ndriyathu a di kukuteya a sindrwa gu dziphara. A khuga a mu khinyeya nyago. Khu ginani a giridego isoso? Ambari olu gihevbulo gyaye nya Bhibhiliya gi mu phaside gu potsa maghilindri a nga ba ari nawo, uye a di nga si vbindrugedzi mavbanyelo yaye a khala muthu muphya mapimoni. Khu mambe maganelelo, uye a di si vbindrugedzi edzi a gu idzo khu ndrani.

⁹ Ganiolu uye kha tsukula. (Mav. 24:16) Khu gu phaswa khu madhota uye simamide gu dandra khu liphuvboni. Khu gu hegisa a di emiswa kha nga lidhota. Ga wutshigu nyo khaguri nari vbavbandze nya salawu nya Mufumo, a di emisana ni gilingo nyo fane ni gile nyo pheye. Mwama moyo nya maleveni a di gu vbweta gu veta lidhota-kwawe. Ginani ndriyathu a giridego? Khu gu rula ni gu dzinogisa a di bhula ni maleveni wule, a mu phasa gurula mapimo, a bwe a mu phasa gambe gu hongola gaya. Khu ginani ndriyathu a nga dzi phara khu ndziya nyo hambane ga tepo yeyi? Khu gu ndriyathu a di gu vbindrugedzide mavbanyelo yaye a khala muthu muphya mapimoni. Uye a diri muthu nya gurule ni gu dzi nogisa khu lisine. Nigu isoso si ningide wuzundzo Jehovha!

10. Ginani hi yedego gu gira gasi hi vbindrugedza edzi hi gu idzo khu ndrani?

¹⁰ Guvbindrugedza gogu kha gu giregi gabune mwendro khavba ni avba. Adzina si na  lomba gu hi dzi garadza ngudzu khu myaga nya yingi. (2 Ped. 1:5) Kha gu na nga girega khu gu ba hi thumede Jehovha khu tepo nyo laphe. Hi yede gu gira satshavbo hi si kodzago gasi gu vbindrugedza guwegeleya gwathu ga ndrani. Gu na ni silo nyo khaguri nya lisima hi nga girago gasi hi kodza gu vbindrugedza. Hongoleni hi si wona silo soso.

11. Nombelo wu nga hi phasa kharini gu vbindrugedza mavbanyelo hi khala vathu vaphya mapimoni?

¹¹ Gu gombeya khigyo gilo nyo pheye nya lisima hi yedego gu gira. Gu vbwetega hi gombeya kha nga muembeleyi nya dzindzimo, a nga khuye: “Nungungulu, vega monyo nya wadi ndrani gwangu u wusedza liphuvbo nya gutiye monyoni gwangu.” (Ndzi. 51:10) Gasi hi si kodza gu vbindrugedza mavbanyelo hi khala vathu vaphya mapimoni, gu vbwetega hi lomba giphaso ga Jehovha. Ina ka, hi nga tiyisega kharini gu khethu Jehovha a na hi phasa gu vbindrugedza? Hi nga tiyiswa khesi Jehovha a tumbisidego gu gireya vaIsrayeli nyo bange mihungo, va dziteponi dza Ezekiyeli, a di khuye: “Nyi na thela gwawe monyo moyo basi, nyi va thela liphuvbo nya liphya . . . nyi [va] thela monyo nya nyama,” si thulago monyo wu dzumeyago gu thangedwa khu Nungungulu. (Ezek. 11:19) Jehovha a di dzi emiside gu phasa vaIsrayeli vovo gu vbindrugedza, nigu a dzi emisede gu hi phasa nethu muhuno.

12-13. a) Khu guya khu Ndzimo 119:59, hi yede gu dundrugeya khu ginani? b) Siwudziso muni u yedego gu dzi gira?

¹² Gu dundrugeya khigyo gilo nya wuvili nya lisima hi yedego gu gira. Tepo hi lerigo lito la Nungungulu tshigu ni tshigu, hi yede gu dzi ninga tepo nyo dundrugeye mwendro nyo pimise khesi hi hevbulago, gasi hi tugula esi hi yedego gu vbindrugedza. (Leri Ndzimo 119:59; Hebh. 4:12; Jak. 1:25) Gu vbwetega hi tugula guwegeleya adzina hi gu nago gu kutsedzedwego khu dzifilosofiya nya vathu. Hi yede gu dzumeya gu khethu hi ngu hosisa hi bwe hi dzi garadzeya gu pala sihoswahoswana sathu.

¹³ Khu giyeyedzo, dzi wudzise khuwe: ‘Ina nyi na ni wufu mwedro lidiwo monyoni gwangu?’ (1 Ped. 2:1) ‘Ina nyi ngu dzi khusedza khu kotani nya omu nyi vbanyago umo, sihevbulo sangu, mwendro dzitsapawu nyi gu nadzo?’ (Mav. 16:5) ‘Ina nya gu woneya vbavbatshi ava va gu mwalo silo nya nga esi nyi gu naso ni vathu va gu va lifumbo nyo hambane ni langu?’ (Jak. 2:2-4) ‘Ina nyi ngu gola esi hi nigwago khu litigo la Sathane?’ (1 Joh. 2:15-17) ‘Ina nyi ngu sixitiri sivbungadzo si yeyedzago silo nya malawu ni wughevenga?’ (Ndzi. 97:10; 101:3; Amosi 5:15) Mihlamulo nya siwudziso sesi yi na yeyedza omu u yedego gu dzi garadzeya gu tsukwadzisa. Ha gu si kodza gu vbindrugedza mapimo mwendro gudzipwa gu dandramedego monyoni gwathu, hi na tsakisa Papayi wathu wa ndzadzini. — Ndzi. 19:14.

14. Khu ginani si gu sa lisima gu hatha dzipari nya dzadi?

¹⁴ Gu hatha dzipari nya dzadi  khigyo gilo nya wuraru nya lisima hi yedego gu gira. Gani hi ngu si tugula gani kha hi si tuguli, ava hi dzi tshanganisago navo va ngu kutsedzeya ngudzu mavbanyelo yathu. (Mav. 13:20) Thumotunu mwendro xikwatunu, hi randredwe khu vathu nya gu gima kha va na nga hi phasa gu pimisa khu ndziya yi tsakedwago khu Nungungulu. Ambari ulolo, hi nga mana dzipari nya dzadi mitshanganoni yathu nya wuKristo. Iyoyo khiyo hi na ya kutswago gu gira “mithumo yatshavbo nya yadi.” — Hebh. 10:24, 25.

15-16. Sathane a gu zama kharini gu vbindrugedza mapimo yathu?

¹⁵ Dundruga gu khuwe Sathane dzi emisede gu vbindrugedza mapimo yathu. Uye a gu thumisa yatshavbo mafumbo nya sihevbudzo gasi gu khungumula guti nya lito la Nungungulu gu gomogo mapimoni gwathu.

¹⁶ Sathane a ngo simama gu gira giwudziso nya nga egi a giridego Evha thembweni ga Edheni: “Ina lisine nya gupwani Nungungulu . . . ?” (Gen. 3:1) Ga litigo leli li fumedwago khu Sathane, hi na tshuka hipwa siwudziso si na hi girago hi kanakaneya gukhodwa gwathu, nya nga esi: ‘Ina lisine kamo gu pwani Nungungulu kha dzumeleyi mutshadho nya vathu vavili nya sivbango nya wuvelegi nyo fane? Ina lisine kamo gu pwani Nungungulu kha vbweti gu khuye u hodza dzifesta ni gu tsakeya matshigu nya guvelegwe? Ina lisine kamo gu pwani Nungungulu o vbweta gu khuye u bomba gu thedwa novba? Ina lisine kamo gu pwani Nungungulu o vbweta khuye u piya wupari ni valongo va dusidwego libandlani?’

17. Ginani hi yedego gu gira tepo hi emisanago ni siwudziso si lingago gukhodwa gwathu, nigu khu wevbini handro hi na wu manago khu guya khu Vakolosi 2:6, 7?

¹⁷ Hi yede gu tiya ga esi hi si khodwago. Ha gu mba mana mihlamulo nya siwudziso nya lisima hi gu naso maningano ni esi hi si khodwago, isoso si nga hi vangeya gukanakana nya gukhongolo. Gu kanakana gogo khu gu hegisa gu nga khungumula mapimo yathu ni gu khodwa gwathu. Ganiolu ginani hi yedego gu gira? Lito la Nungungulu lari khilo hi yede gu vbindrugedza mapimo yathu, avba nya gu hi si kodza khu habune “gu pima esi nya sadi, nya gutsakise, si vbeledego mahoni gwa Nungungulu.” (Rom. 12:2) Khu gu hevbula tshigu ni tshigu, hi nga linga khu habune esi hi si hevbulago omu nya Bhibhiliya. Hi nga tiyisega gu khethu milayo ya Jehovha yi lulamide. Kha nga simbo wu gu ni mikhamba yi tiyidego, anethu hi na ‘tiya gukhodwani.’ — Leri Vakolosi 2:6, 7.

18. Ginani gi na hi phasago gu potsa vheneno yi swayedwago khu litigo la Sathane?

¹⁸ Mwalo a na tiyisago gukhodwa gwago vbavbandze gwago, khu kharato simama gu vbindrugedza mavbanyelo u khala muthu muphya mapimoni. Gombeya tepo yatshavbo; lomba gu phaswa khu liphuvbo nya guage la Jehovha. Dundrugeya khesi u si hevbulago; simama gu gevisisa mapimo yago ni esi si gu kutsago gu gira silo. Vbweta dzipari nya dzadi; hatha dzipari nya dzadi dzi na gu phasago gu pimisa khu ndziya nya yadi. Wo gira isoso, u na dzi vhikeya ga vheneno yi swayedwago khu litigo leli la Sathane nigu u na khungumula “[‘mahingigedzo,’ NM] yatshavbo ma wugelago guti gwa Nungungulu.”— 2 Kor. 10:5.