1. Khu ginani hi yedego gu engisa gigengedzo gya Jesu?

Ga giprofeto gyaye maningano ni matshigu nyo hegise, Jesu a di khuye: “Dzi woneleni, mu nga pfhali khu limidzo ni gu leva, gambe mu nga pfhadzwi khu sigaradzo nya guvbanye si thulago gu garadzega khu gu vbweta ndziya nyo dzi vbanyise khiyo; ni gu garadzega khu kotani nya sigaradzo nya guvbanya nya tshigu ni tshigu.” (Luka 21:34) Gu vbwetega hi engisa gigengedzo gegi. Khu ginani? Khu gu olu ha gu emisana ni gu garadzega gwatshavbo ogu ni wevbini muthu a emisanago nago.

2. Sigaradzo muni nya sikhongolo esi vandriyathu va tshanganago naso?

² Dzimbe dzitepo hi na tshangana ni sigaradzo nya singi khu tepo yayimweyo. Hongoleni hi wona siyeyedzo si landreyago. Fakazi mweyo nyo pwani khu John, yi nga ba yi tshaniswa khu madwali nya Esclerose mùltipla a dipwa wuvi nya wukhongolo ngudzu tepo a nga bhangudwa khu mwangadzi waye hwane nya 19 myaga vatshavbo. Khavbovbo sagadzyana sawe sasivili si di ema gu thumeya Jehovha. Bob ni Linda va di tshangana ni gigaradzo nyo hambane. Vatshavbo va vavili va di vbeledwa khu thumo, khu gu mba na makodzelo, va di diga ndranga yawe va fuluga vaya vbanya omu nya ginyumbana. Guvbindra isoso, dhogodheya a di embeya Linda gu khuye a diri ni madwali nya monyo ma nga hadzi mu songa nya mba hweya, gu bwe gu dugeleya mambe madwali ma nga ba ma songa (sistema imunológico) a gu dziselula dzi hi vhikeyago ga madwali.

3. Ginani egi Vafilipi 4:6, 7, a hi embeyago khu Jehovha?

³ Hongoleni hi tiyisegani gu khethu Muvangi wathu, Papayi wathu nya lihaladzo Jehovha, a ngu pwisisa edzi hi dzipwago khidzo tepo hi tshanganago ni sigaradzo. Nigu o vbweta gu hi  phasa gu emisana ni sigaradzo hi tshanganago naso. (Leri Vafilipi 4:6, 7.) Lito la Nungungulu li na ni matimo ma yeyedzago sigaradzo si timisedwego khu sithumi sa Jehovha. Li ngu hi tshamuseya gambe edzi Jehovha a va phasidego khidzo gu emisana ni sigaradzo sawe. Hongoleni hi wona siyeyedzo nyo khaguri.

4. Sigaradzo muni esi Eliya a tshanganidego naso, nigu a di gu dzipwa kharini khu Jehovha?

⁴ Eliya thumede Jehovha dziteponi nyo garadze nigu tshanganide ni sigaradzo nya sikhongolo. Pfhumu Akabi, moyo nya dzipfhumu nyo vivbe dza Israyeli, a di tshadha ni Jezabheli, a nga ba ari moyo nya vakhozeyi nyo vivbe va Bhahali. Khavbovbo vatshavbo va vavili va di andrisa wukhozeyi wa Bhahali vbakari nya litigo, va bwe va songa vaprofeti nya vangi va Jehovha. Eliya a di vbuluga a tutuma. A bwe a timiseya ndzala nya yikhongolo khu gu tumba Jehovha. (1 Dzipf. 17:2-4, 14-16) Gimbe gambe khu gu, Eliya a di tumba Jehovha tepo a nga vhikisana ni vaprofeti ni vakhozeyi va Bhahali. A di kutsa vaIsrayeli gu thumeya Jehovha. (1 Dzipf. 18:21-24, 36-38) Eliya wonide edzi Jehovha a mu vhikedego khidzo ni gu mu phasa dziteponi dzile nyo garadze.

5-6. Khu guya khu 1 Dzipfhumu 19:1-4, Eliya a di gu dzipwa kharini, nigu Jehovha yeyedzide kharini lihaladzo laye khu Eliya?

⁵ Leri 1 Dzipfhumu 19:1-4. Eliya a di thava tepo Jezabheli a nga luga mano nyo mu songe. Khu kharato a di tutumeya gipandreni gya Bherisebha. A di garadzega ngudzu nyo bwe a “lomba gufa.” Khu ginani a dzipwidego  khu ndziya yoyo? Khu gu Eliya a diri muthu nya mba vbeleya, “a diri muthu kha nga ethu.” (Jak. 5:17) Adzina vbede tshivba khu gu ba a garadzegide ngudzu ni gupwa migaralo nya yikhongolo. Si nga gira na pimiside gu khuye gudzigaradza gwaye gasi gu andrisa wukhozeyi nya lisine si diri gu thumeya giburwana, mwalo ni muIsrayeli moyo a nga ba tshunguhedza, nigu khuye enga a nga ba a ngo thumeya Jehovha. (1 Dzipf. 18:3, 4, 13; 19:10, 14) Adzina hi nga samadziswa khedzi muprofeti yoyo nyo tumbege a dzi pharidego khidzo. Ganiolu Jehovha pwisiside edzi Eliya a nga ba a dzipwa khidzo.

⁶ Jehovha kha kawuka Eliya khu kotani nya gudzipwa gwaye. Wulangani nya isoso, a di mu phasa gu tiya. (1 Dzipf. 19:5-7) Khu hwane nya tepo, khu wuwadi Jehovha phaside Eliya gu vbindrugedza edzi a nga ba dzipwa khidzo khu gu thumisa tshivba Yaye nya yikhongolo. A di mu embeya gu khuye gu di ngo tshade 7 000 vaIsrayeli va bombidego gu khozeya Bhahali. (1 Dzipf. 19:11-18) Khu ndziya yeyi, Jehovha mu yeyedzide edzi a nga ba a mu haladza khidzo.

7. Hi nga tiyisega khu ginani khu ndziya eyi Jehovha a phasidego khiyo Eliya?

⁷ Ina u ngu emisana ni sigaradzo si gu vbedzago tshivba? Ina kha hi thaveledwi khu guti edzi Jehovha a pwisisidego khidzo gudzipwa ga Eliya? Isoso so hi tiyisegisa gambe gu khiso Jehovha a ngu pwisisa guvbisa hi gupwago tepo hi emisanago ni sigaradzo. A nguti guhegedwa gwathu, ambari ni esi hi si pimisago ni edzi hi dzipwago khidzo. (Ndzi. 103:14; 139:3, 4) Ha gu pimedzeya Eliya khu gu tumba Jehovha, Uye a na hi phasa gu emisana ni sigaradzo si hi vbedzago tshivba. — Ndzi. 55:22.

8. Jehovha a na gu phasa kharini gu emisana ni gu garadzega?

⁸ Gugaradzega gu nga gu gira u pimisa gu khuwe giemo gyago gima kha gi na nga vbindrugedza, khu kharato u vbeya tshivba. Wo dugeledwa khu isoso, dundruga gu khuye Jehovha a na gu phasa gu emisana ni gu garadzega. Ina ka, a na si gira kharini isoso? Uye o gu kutsa gu mu embeya sigaradzo sago ni edzi u dzipwago khidzo. Nigu a na hlamula guliya gwago khu gu vbweta giphaso. (Ndzi. 5:3; 1 Ped. 5:7) Khu kharato gombeya gunganigungani ga Jehovha khu sigaradzo sago. Uye kha na nga ganeya nago khu gukongoma nga edzi a giridego ga Eliya, ganiolu a na ganeya nago khu thumisa Lito laye Bhibhiliya ni hengeledzano yaye. Matimo u ma hevbulago umo nya Bhibhiliya ma nga gu thaveleya ni gu gu ninga gutumba. Nigu, vandriyago va nga gu tiyisa. — Rom. 15:4; Hebh. 10:24, 25.

9. Pari nyo tumbege yi nga gu phasa kharini?

⁹ Jehovha a di kutsa Eliya gu ninga yimbe nya mithumo yaye Elizewu. Khu ndziya yoyo, Jehovha a di ninga Eliya pari nya yadi yi nga hadzi mu phasa tepo a nga ba a vbeya tshivba. Khu ndziya nyo fane, tepo hi bhuleyago pari yathu edzi hi dzipwago khidzo, iyo yi nga hi phasa gu rwala ni ethu gugaradzega gwathu. (2 Dzipf. 2:2; Mav. 17:17) Wo ba uri mwalo pari mwendro muthu nyo mu bhuleye sigaradzo sago, gombeya, u lomba gu khuwe Jehovha a gu phasa gu mana ndriyathu a vidzidwego a na gu tiyisago-hwambo.

10. Giyeyedzo gya Eliya gyo hi ninga kharini gutumba, nigu gitumbiso gi gomogo omu ga Isaya 40:28, 29, gi nga hi phasa kharini?

¹⁰ Jehovha phaside Eliya gu pala gu garadzega ni gu mu thumeya khu gu tumbega khu myaga nya yingi. Giyeyedzo gya Eliya gi ngu hi ninga gutumba. Dzimbe dzitepo hi nga garadzega ngudzu nyo bwe hi vbeya tshivba. Ambari  ulolo, ha gu tumba Jehovha, uye a na hi ninga tshivba hi yi vbwetago gasi gu simama hi mu thumeya. — Leri Isaya 40:28, 29.

11-13. Gugaradzega gu khuhide kharini sithumi sesi sa siraru sa Nungungulu?

¹¹ Bhibhiliya yi ngu ganeya khu vambe vathu anavo va tshanganidego ni gu garadzega. Khu giyeyedzo, Ana a di gu garadzega ngudzu khu gupwa dzitshoni khu kotani nya olu a nga ba ari gifule, ni olu a nga ba a tsorodzedwa ni gu hegwa khu kwanu waye. (1 Sam. 1:2, 6) Ana a di garadzega ngudzu nyo bwe a khaleya gu liya basi ni gu guhodza a si gu vbweti. — 1 Sam. 1:7, 10.

¹² Dzimbe dzitepo, Pfhumu Dhavhidhe a di gu vbeya tshivba khu gugaradzega. Nga dundrugeya khu sigaradzo a tshanganidego naso. Uye a di gu dzipwa nandru khu sighoho nya singi a giridego. (Ndzi. 40:12) Gyanana gyaye nya gigodwa Abhisalamo gi di mu kanyisa, khu hegisa gifa. (2 Sam. 15:13, 14; 18:33) Nigu mweyo nya dzipari dzaye nya dzikhongolo yi di mu kangayisa yi mu diga. (2 Sam. 16:23–17:2; Ndzi. 55:12-14) Dzindzimo nya dzingi dzi lovidwego khu Dhavhidhe dzo yeyedza edzi a nga ba a vbede khidzo tshivba ni gutumba gwaye nyo tiye ga Jehovha. — Ndzi. 38:5-10; 94:17-19.

¹³ Khu gu gimbiya nya tepo muembi moyo nya dzindzimo a di pheya gu nyenya mavbanyelo nya vathu nyo vivbe. Uye adzina a diri moyo nya situgulwana sa Asafe, nigu a di gu thuma omu nya tabhernakeli ya Nungungulu. Muembi yoyu nya dzindzimo a di gu garadzega ngudzu, nigu khu kotani nya isoso a di gu hamuga gutsaka. A di bwe a pheya gu kanakaneya makategwa a nga ba a ma mana khu gu thumeya Nungungulu. — Ndzi. 73:2-5, 7, 12-14, 16, 17, 21.

14-15. Ginani hi gi hevbulago avba nya siyeyedzo siraru nya Bhibhiliya maningano ni gu tutumeya ga Jehovha gasi gu mana giphaso?

 ¹⁴ Sithumi sesi sa siraru sa Jehovha si tutumede gwaye gasi gu mana giphaso. Va di bhuleya Jehovha gu garadzega gwawe khu gu thumisa nombelo. Va di dzi tshula, va mu embeya sighelo si nga ba si va vangeya gugaradzega. Nigu va di simama gu hongola malanga va nga ba va khozeya umo Jehovha. — 1 Sam. 1:9, 10; Ndzi. 55:22; 73:17; 122:1.

¹⁵ Khu kotani nya gupweya wusiwana, Jehovha a di hlamula milombelo ya sithumi saye sa siraru. Ana a di rula mapimo. (1 Sam. 1:18) Dhavhidhe a di lova esi: “Sigaradzo nya muthu nya gululame singi ngudzu, aholu PFHUMU Nungungulu a gu mu vbulugisa ga satshavbo.” (Ndzi. 34:19) Nigu, khu gu gimbiya nya tepo, muembeleyi wule nya dzindzimo a di dzipwa nga khatshi Jehovha a di mu ‘phara khu libogo laye la nyamudye,’ a mu thangeya khu wusingalagadzi nya lihaladzo. Uye a di embeleya, khuye: “Eni nya gu gola gu khala vbafuvbi ni Nungungulu; uwe PFHUMU Nungungulu khuwe wuthavelo wangu.” (Ndzi. 73:23, 24, 28) Ginani hi gi hevbulago ga siyeyedzo sesi? Dzimbe dzitepo hi na tshangana ni sigaradzo nya singi si na hi vangeyago gugaradzega. Ganiolu hi nga si pala ho dundrugeya khedzi Jehovha a phasidego khidzo vambe, hi tutumeya gwaye khu nombelo, hi bwe hi mu engisa hi gira esi a hi lombago. — Ndzi. 143:1, 4-8.

16-17. a) Khu ginani hi si yeligo gu dzi hambanisa ni vambe? b) Hi nga engedzeya kharini gu tiya?

¹⁶ Siyeyedzo sesi sa siraru so hi hevbudza gimbe gilo gambe nya lisima, gu vbwetega hi si dzi hambanisi ni Jehovha gumogo ni vathu vaye. (Mav. 18:1) Nancy, a pwidego wuvi nya wukhongolo tepo a bhangudwego khu mwama waye, wari khuye: “Momo matshigu nyi si vbwetigo gu wona mwendro gu bhula ni muthu. Ambari ulolo, tepo nyi dzi hambanisago ni vambe, khavbo wuvi wu engedzeyago.” Silo si vbindrugedzide tepo Nancy a nga vbwetedzeya dzindziya nyo phase vambe navo va tshanganago ni sigaradzo. Wari khuye: “Nyi di gu engiseya gwadi tepo vambe va nyi tshamuseyago sigaradzo sawe. Nyi di pheya gu wona gu kheni tepo nyi vegago gupima avba nya sigaradzo sawe, nyi di si vegi gupima avba nya esi sangu.”

¹⁷ Hi nga tiyiswa khu gu manega mitshanganoni nya libandla. Tepo hi gomogo mitshanganoni, ha gu engedzeya gu tula dzindziya gasi Jehovha a hi “phasa ni gu [hi] tangadzisa.” (Ndzi. 86:17) Avbovbo, Jehovha a gu thumisa liphuvbo laye nya guage, Lito laye, ni vathu vaye gasi gu hi tiyisa. Mitshangano yi ngu hi tuleya lithomo nyo ‘tiyiselane hatshavbo mwendro gu tiyisana khu gyathu.’ (Rom. 1:11, 12) Ndriyathu nya nyamayi nyo pwani khu Sophia a di khuye: “Jehovha ni vandriyathu va mafuni gwatshavbo va ngu nyi phasa gu timiseya. Gilo nya lisima ngudzu gwangu mitshangano yathu nya libandla. Nyi tugude gu kheni tepo nyi pharegago ngudzu khu thumo nya gutshumayele ni libandla, khavbo gambe nyi kodzago gu emisana gwadi ni sigaradzo sangu.”

18. Ho ba hi vbede tshivba, ginani egi Jehovha a hi ningago?

¹⁸ Ho ba hi vbede tshivba, hongoleni hi dundruga gu khethu Jehovha khuye enga a hi tumbisago gu hi duseya gu garadzega kala gupindruga, nigu gambe a na hi ninga giphaso hi gi vbwetago olu gasi gu pala gu garadzega gwathu. A gu hi ninga “gusuva” ni tshivba gasi hi simama hi tiya hi bwe hi manega ni gutumba. — Filp. 2:13.

19. Gitumbiso muni hi ningwago khu Varoma 8:37-39?

¹⁹ Leri Varoma 8:37-39. Mupostoli Pawulo hi tiyisegiside gu khuye gimwalo gi na kodzago gu hi hambanisa ni lihaladzo la Nungungulu. Ginani hi nga girago gasi gu phasa vandriyathu va zamago khu pala gu garadzega? Ndrima yi landreyago yi na ganeya khedzi hi nga pimedzeyago khidzo Jehovha khu gu yeyedza gupweya-wusiwana ni gu phasa vandriyathu va garadzegidego.