1. Ginani egi Jehovha a giridego khu moyo ni moyo wathu?

JEHOVHA ranide moyo ni moyo wathu gasi a mu thumeya. (Joh. 6:44) Olu nga dundrugeya gu khuwe so thula ginani isoso? Jehovha gevisiside khu wukheta dzibhiliyoni nya vathu mafuni, khavbovbo a wona gilo nya lisima gwago — monyo nya wadi wu si kodzago gu mu haladza. (1 Dzik. 28:9) Jehovha a ngu guti, a ngu gu pwisisa nigu a ngu gu haladza. Guti isoso si ngu hi tiyisa!

2. Jesu a gu hi phasa kharini gu pwisisa gu khethu Jehovha a ngu khathala khu moyo ni moyo wathu?

² Jehovha a ngu khathala ngudzu khuwe nigu a ngu khathala gambe khu vatshavbo vandriyathu. Gasi gu hi phasa gu pwisisa esi, Jesu fananiside Jehovha ni muhavisi nya dzinvuta. O gara muhavisi a gu na ni 100 dzinvuta a dzimeledwa khu mweyo, ginani a girago? “Uye a na diga dzile nya 99 sigomoni a gimbiya a vbwetedzeya eyi yi nga dzimeya.” Tepo a yi manago nvuta yaye, wulangani nya gu a goroga, uye o tsaka khu gu ba a yi mane. Ginani hi gi hevbulago avba nya giyeyedzo gegi? Ga Jehovha, mweyo ni mweyo nya dzinvuta dzaye yi na ni lisima. Jesu a di khuye: “Papayi wangu a gomogo ndzadzini, kha vbweti gu khuye ni moyo nya ava nya vadugwana a dzimeya.” — Mat. 18:12-14.

3. Ginani hi na hevbulago khigyo omu nya ndrima yeyi?

³ Khu lisine kha hi vbweti gu vbedza tshivba ne moyo nya vandriyathu. Ginani hi nga girago gasi hi si tshunganisi vambe? Nigu ginani hi yedego gu gira vambe va gu hi gorosa? Omu nya ndrima yeyi, hi na hlamula siwudziso sesi. Ganiolu, gupheya hongoleni hi pwisisani gu khethu go thudwa vamani “ava nya vadugwana”  ava Jesu a ganede khavo omu ga Matewu gipimo 18.

4. Khu vamani ava nya vadugwana?

⁴ “Ava nya vadugwana” go thudwa vapizane va Jesu nya dzitanga dzatshavbo. Ambari na vari ga tanga muni, avo “sanana” kholu va dzi emisede gu hevbudzwa khu Jesu. (Mat. 18:3) Ambari na vari ga malanga ma gu na ni mavbanyelo nyo hambane, mawonelo ni makhalelo nyo hambane, vatshavbo va ngu khodwa ga Jesu Kristo. Khu kharato, Jesu a ngu haladza moyo ni moyo wawe. — Mat. 18:6; Joh. 1:12.

5. Jehovha o dzipwa kharini tepo muthu a gorosago mwendro gu tshunganisa moyo nya sithumi saye?

⁵ Moyo ni moyo nya “ava nya vadugwana” a na ni lisima ga Jehovha. Gasi gu pwisisa edzi a dzipwago khidzo, dundrugeya edzi u dzipwago khidzo khu sanana. Iso si na ni lisima gwathu. Ethu ho vbweta gu si vhikeya kholu hi ngu dziti gu khethu iso si mwalo tshivba, si si gu vbanyi silo nya singi nigu si mwalo wugengeyi gufana ni vathu nya vakhongolo. Ethu kha hi tsaki khu gu wona muthu na tshaniseka, ngudzungudzu go ba guri gyanana. Khu ndziya nyo fane, Jehovha o vbweta gu hi vhikeya nigu kha tsaki tepo a wonago muthu nyo khaguri na gorosa mwendro gu tshunganisa sithumi saye. — Isa. 63:9; Marko 9:42.

6. Khu guya khu 1 Vakorinto 1:26-29, litigo la gu va wona kharini vapizane va Jesu?

⁶ Khu gevbini gimbe gilo gi girago gu vapizane va Jesu va wonwa kha nga “ava nya vadugwana”? Litigo la gu wona vamani na vari avo va gu na ni lisima? Sighanyi, va nya ndruma ni ava va dugeyago omu nya dzindranga nya wufumu. Ganiolu, litigo la gu wona vapizane va Jesu kha nga ava nya vadugwana mwendro va gu mwalo lisima kholu avo va mwalo naso satshavbo sesi. (Leri 1 Vakorinto 1:26-29.) Ganiolu, Jehovha kha va woni kharato.

7. Jehovha o vbweta gu khuye hi dzipwa kharini khu vandriyathu?

⁷ Jehovha a ngu si haladza sithumi saye satshavbo, gani si na ni myaga nya yingi na si mu thumeya mwendro siphya lisineni. Vandriyathu vatshavbo va na ni lisima ga Jehovha, khu kharato anethu gu vbwetega hi va ninga lisima. Gu vbwetega hi ‘haladza vandriyathu’ vatshavbo, na siri vandriyathu nyo khaguri basi. (1 Ped. 2:17) Gu vbwetega hi gira satshavbo hi si kodzago gasi gu va vhikeya ni gu va khathaleya. Ha gu gorosa mwendro gu gandra ginyalana muthu nyo khaguri, kha hi yeli gu gira nga khatshi kha ga girega gilo, hi pimisa gu khethu muthu yoyo a na hi divaleye a bwe a si diga si vbindra. Ginani gi girago vambe va goroga? Khu kotani nya edzi va dandrisidwego khidzo, vambe vandriyathu va gu dzi wona na vari va vbavbatshi nigu isoso khiso si girago gu gidugwana basi va vbiredza gu goroga. Vambe va ngari vaphya lisineni nigu kha va dziti gu khavo ginani va yedego gu gira gasi va emisana ni gumba vbeleya ga vambe. Gani ginani gi gorosago vandriyathu, hi yede gu gira ni gevbini hi gi kodzago gasi gu gira gurula ni vandriyathu. Ganiolu, anuye ndriyathu wule a vbiredzago gu goroga gu vbwetega a vbindrugedza makhalelo yoyo a bwe a manega ni wupari nya wadi ni vandriyathu.

8. Mapimiselo muni vathu va matshiguni ya Jesu va nga ba vari nawo nigu isoso si kuhide kharini vapizane vaye?

⁸ Khu ginani Jesu a ganedego khava “nya vadugwana”? Kholu vapizane va nga ba va mu wudziside gu khavo: “Khu mani gwadi-gwadi a gu khongolo Mufumoni wa ndzadzini?” (Mat. 18:1) Vajudha nya vangi va di gu vbweta gu wonwa khu vambe na vari vathu nya lisima ngudzu. Na gu ganeya khu mawonelo yaya, mwama nyo khaguri a hevbudego ngudzu, a di khuye: “Vama va di gu thega va wuga khu gu dwaneya gu zundzwa khu vambe ni gu mana ndruma.”

9. Ginani egi vapizane va Jesu va nga ba va yede gu gira?

 ⁹ Jesu a di gu dziti gu khuye vapizane vaye va di gu dzi embeya gu khavo va na ni lisima ngudzu guvbindra vambe. Khu khatato, vapizane vaye va di yede gu dzi garadza gasi va vbindrugedza mapimo yawe. A di va embeya khuye: “Uye a gu khongolo a na khale kha nga mahegisela; ni uye a rumago kha nga uye a thumelago vakwawe.” (Luka 22:26) Ha gu wona vambe na vari tshukwana gwathu hi na “dzi sodzisa” mwendro gu dzi vega vbavbatshi. (Filp. 2:3) Ha gu manega ni makhalelo yoyo, kha hi na nga gira vambe va tshunganeya.

10. Wusingalagadzi muni wa Pawulo hi yedego gu wu thumisa?

¹⁰ Vatshavbo vandriyathu va na ni gilo nyo khaguri va gi girago gwadi gu hi vbindra. Isoso hi nga si wona ha gu vega gupima avba nya makhalelo yawe nya yadi. Gu vbwetega hi engisa wusingalagadzi owu mupostoli Pawulo a ningidego Vakorinto: “Khu mani a nga gu ninga gu khala khongolo ga vakwanu? Iso u gu naso khandri u di ningwa, gani? Khu ginani u dzi gugumugisago gukhwatshi esi u gu naso khandri u di ningwa khu Nungungulu.” (1 Kor. 4:7) Khu kharato, gu vbwetega hi dzi woneya gasi hi si giri vambe va hi hlamala mwendro gu hi wona na hiri va nya vadi vakona guvbindra vambe. Khu giyeyedzo, ndriyathu nya mwama a gu ba a kodza gu vega gwadi dziganelo mwendro ndriyathu nya nyamayi a kodza gu tula sihevbulo nya singi nya Bhibhiliya, gu vbwetega a yisa wuzundzo watshavbo ga Jehovha khesi a girago.

11. Gipimaniso gi thumisidwego khu Jesu nya pfhumu ni githumi gyayo gyo hi hevbudza ginani?

¹¹ Hwane nya gu ba Jesu a gengedzide vapizane vaye gu khuye va si tshunganisi vambe, a di va bhuleya khu gipimaniso nya pfhumu ni githumi gyayo. Pfhumu yi di divaleya githumi gyayo gi nga ba gi mu dhevha dzitsapawu nya gu gima na gya sa si kodza gu dzi livba. Khu gu gimbiya nya tepo, githumi gegi gi di bomba gu divaleya githumi gikwawe gi nga ba gi mu dhevha sitsapawana. Tepo pfhumu yi nga siti isoso, yi di ruma gu khiyo githumi gile nyo vivbedwe khu monyo gi khotedwa pasoni. Ginani hi gi hevbulago? Jesu a di khuye: “Papayi wangu a gu romo ndzadzini a na mi gira sasimweso moyo ni moyo wanu a gu mba divaleya ndriyaye khu monyo waye watshavbo.” — Mat. 18:21-35.

12. Ginani gi na dugeleyago ha gu bomba gu divaleya vambe?

¹² Esi gi giridego githumi gile si reside mihandro nya mba tsakisa ga igyo ni vambe. Nyo pheye, kha gya yeyedza lihaladzo ni pweya wusiwana khu gu mu “khotheya pasoni kala a mu livba mangava yatshavbo.” Nya wuvili, khunguvanyiside sithumi sikwawe, kholu “tepo sithumi-kwawe si nga si wona, si di garadzega ngudzu. Khu ndziya nyo fane, esi hi girago nethu si nga reseya mihandro nyo tsakise mwendro nya mba tsakisa vambe. Ginani gi na dugeleyago a gu tshuka ndriyathu a hi gandra ginyalana hi si vbweti gu mu divaleya? Gilo nyo pheye, hi na ba hi mu vangeya wusiwana nya wukhongolo khu gu mba mu divaleya, khavbovbo adzina hi si mu losi ni gu mu losa ambari gu mu nyenya kamo. Nya wuvili, hi na gira vandriyathu libandlani va garadzega khu gu wona gu khavo kha hi vbaleyani nilo ni ndriyathu yoyo.

13. Ginani hi hevbulago ga esi si dugeledego Crystal?

¹³ Ha gu divaleya vandriyathu, hatshavbo hi na tsaka. Isoso khiso a nga si tugula ndriyathu moyo nya nyamayi nyo pwani khu Crystal. A di gandrwa ginyalana khu mumbe ndriyathu libandlani. Crystal wari khuye: “Dzimbe dzitepo malito yaye ma di gu nyi paya monyo nga khatshi ngala. Ha gu ba hi hongola thumoni nyo tshumayele khu tsawa, nyi di si vbweti gu beya naye movha mweyo. Nyi di pheya gu vbeledwa  khu sighingi ni litsako thumoni nyo tshumayele.” Crystal a di gu dzi wona nari ni razawu nyo goroge. Ganiolu, kha mu vegeya giviti ndriyathu wule. Uye a di dzi nogisa a thumisa wusingalagadzi nya Bhibhiliya a wu manidego omu nya ndrima ““Perdoe de coração” yi gomogo omu nya Mukhedziseyi nya 15 nya Outubro nya 1999 khu Giputukezi. Khavbovbo, Crystal a di divaleya ndriyaye. Wari khuye: “Olu nyi ngu pwisisa gu kheni hatshavbo ho dzi garadza gasi gu ambala muthu muphya nigu Jehovha a dzi emisede gu hi divaleya tshigu ni tshigu. Olu nyo dzipwa nga khatshi va di nyi rula gighodho magatani gwangu. Gutsaka gwangu gu di hugo wuya!”

14. a) Khu guya khu Matewu 18:21, 22, gigaradzo muni egi adzina mupostoli Pedro a nga ba a tshangana nagyo? b) Ginani gi na hi phasago ha gu emisana ni gigaradzo gya gimwegyo?

¹⁴ Ethu hi ngu dziti gu khethu gu vbwetega hi divaleya vambe; khiso hi yedego gu gira. Ganiolu, iso kha si vbevbugi. Mupostoli Pedro adzina dzi pwide kharato ga dzitepo nyo khaguri. (Leri Matewu 18:21, 22.) Ginani gi na gu phasago wo ba u tshangana ni gigaradzo gya gimwegyo? Nyo pheye, dzi wudzise gu khuwe gungani Jehovha a nyi divaledego. (Mat. 18:32, 33) Ambari olu si si hi faneyigo, Jehovha a ngu hi divaleya tepo yatshavbo. (Ndzi. 103:8-10) Khu kharato, hi yede gu dundruga gu khethu “ethu nethu gu vbwetega hi haladzana khu gyathu.” Khu ndziya yoyo, gu divaleya vambe khandri gilo nyo hathe khuwe olu nyi na divaleya mwendro olu kha nyi na nga divaleya. Ganiolu, so hunga gu hi va divaleya vandriyathu. (1 Joh. 4:11) Nya wuvili, dundrugeya khesi si giregago wa gu divaleya vambe. Wa gu divaleya vambe, wo phasa oyu a gu gandridego ginyalana, u andrisa gurula libandlani, u vhikeya wupari wago ni Jehovha u bwe u tshala ni livhalo na li hilo pepe. (2 Kor. 2:7; Kol. 3:14) Nya wuraru, gombeya ga Oyu a hi lombago gu khuye hi divaleya vambe. U nga dzumeleyi gu khuwe Sathane a ghoha wupari wago ni vandriyathu. (Efes. 4:26, 27) Khu gu phaswa khu Jehovha kha hi na nga thegeya omu nya naphwi wowu wa Sathane.

15. Khu guya khu Vakolosi 3:13, ginani hi yedego gu gira ha gu tshuka ndriyathu a hi gorosa?

¹⁵ Abari gu ndriyathu libandlani gu goroside, ginani u na girago? Gira satshavbo u si kodzago gasi gu wuyiseya gurula. Bhuleya Jehovha edzi u dzipwago khidzo. Mu lombe gu khuwe a kategisa oyu a gu gorosidego ni gu bwe a gu phasa gu wona makhalelo nya yadi ya muthu yoyo — makhalelo aya Jehovha a ma golago gwaye. (Luka 6:28) Wa gu mba si kodza gu si diga si vbindra, vbwetedzeya ndziya nya yadi nyo bhule naye. Gwadi gu u dundruga tepo yatshavbo gu khuwe khandri gu di dzina gugya ndriyathu yoyo a ta gu gandra ginyalana. (Mat. 5:23, 24; 1 Kor. 13:7) Tepo u hongolago u ya bhula naye, dundruga isoso. Ahati a gu bomba gu bhula nago ke, ginani u na girago? Simama gu timiseya, mu laphiseya monyo. (Leri Vakolosi 3:13.) Nya lisima ga satshavbo, u nga mu vegeyi giviti ndriyago, kholu isoso si nga ghoha wupari wago ni Jehovha. U nga digi gilo gi gu tshunganisa. Wo gira isoso, u na yeyedza gu khuwe u ngu mu haladza ngudzu Jehovha guvbindra satshavbo. — Ndzi. 119:165.

16. Ginani egi moyo ni moyo wathu a yedego gu gira?

¹⁶ Lithomo gwathu gu thumeya Jehovha gumogo ni vandriyathu kha nga tshambi moyo ni muhavisi moyo! (Joh. 10:16) Omu nya libhuku Organizados para fazer a vontade de Jeová, pajina 165, gu na ni malito ma gu khayo: “Kha nga olu u tsakago khu gupwanana hi gu nago, gu vbwetega u gira gipandre gyago gasi gu si vbeyi.” Khu kharato, gu vbwetega “hi dzi garadzeya gu wona vandriyathu kha nga edzi Jehovha a va wonago khidzo.” Hatshavbo hi na ni lisima mahoni ga Jehovha. Ina anuwe u ngu va wona kharato vandriyathu? Jehovha a ngu si wona ni gu tsaka khu satshavbo hi girago gasi gu khathaleya vandriyathu. — Mat. 10:42.

17. Ginani hi dzi emisedego gu gira?

¹⁷ Ethu hi ngu va haladza ngudzu vandriyathu. Khu kharato, hi dzi emisede “gu mba gira ni gimwegyo gilo gi dzi kodzago gu va tshunganedzisa.” (Rom. 14:13) Ho wona vandriyathu na vari va tshukwana gwathu nigu hi dzi emisede gu va divaleya na si khugeya monyoni. U nga dzumeleyi muthu a gu tshunganisa. Ganiolu, “dzi garadze khu gu vbweta silo sile si hi reselago gurula ni gutiyiselana gukhodwani.” — Rom. 14:19.