Khu myaga nya yingi Vaisrayeli va di gu henga dzitsapawu gasi gu phasedzeya wukhozeyi nya lisine. Ganiolu, matshiguni ya Jesu si di gu lemeleya Vajudha gu livba khupo.

Gasi gu phasedzeya wukhozeyi wa Nungungulu wu nga ba wu giredwa omu nya Tabernakeli, khu gu gimbiya nya tepo wu nga giredwa umo nya tempele, Vajudha vatshavbo va dandridego va di yede gu livba singerengere sivili nya dzidrakma. Matshiguni ya Jesu dzitsapawu dzile dzi di gu thumisedwa gu sayisa tempele yi nga ba yi vbahidwe khu Herodhi ni gu phasedzeya miphaso yi nga ba yi girwa mule. Vajudha nyo khaguri va wudziside Pedro gu khavo Jesu a di gu livba khupo gani, ni gu Jesu tshamusede gu khuye kha sa vivba gu livba khupo. Uye gambe embede Pedro omu a nga manago gingerengere nyo livbe khigyo khupo. — Mat. 17:24-27.

Sithumi sa Nungungulu gambe si di yede gu livba khupo wu nga ba wu ranwa pwani gipandre nya likhumi, a gu 10% (dziporsento) nya dzithomba dzawe. (Levhi 27:30-32; Mite. 18:26-28) Vathangeyi nya wukhongeyi va teponi yile va di gu embeya vathu gu khavo va di yede gu dzi woneya tepo va livbago khupo nya mitongwe gu pata ni “ortela, endro ni kominyo.” Jesu kha nga ba a si wona na si vivbide gu livba khupo, ganiolu ranide valovi ni Vafarisi gu khuye vapfhadzedzeyi kholu va nga ba va thumisa nayo nya gu livbe khupo khu ndziya nya mba yadi. — Mat. 23:23.

Ga tepo yile, Vajudha va di gu fumedwa khu Varoma, khu kharato avo va di yede gu livba mikhupo nya yingi. Khu giyeyedzo, avo va diri ni sipeto si nga ba si yede gu livba khupo khu dzitsapawu mwendro khu mihandro. Go ganedwa gu pwani va di yede gu livba 20 mwendro 25% (dziporsento) nya esi va nga ba va lima. Wulangani nya isoso basi, Mujudha moyo ni moyo, a di yede gu livba khupo. Vafarisi va wudziside Jesu khu khupo wowu. Uye yeyedzide edzi hi yedego gu dzipwa khidzo maningano ni khupo tepo a nga khuye: “Livbani ga Sezari esi si gu sa Sezari, ganiolu, ga Nungungulu esi si gu sa Nungungulu.” — Mat. 22:15-22.

Nigu gasi gu bedza silo nyo rengise ni gu dusa, va di gu livba khupo gambe. Khupo wowu, wu di gu livbedwa omu nya dziporto, mabhulahu, dzikruzamento, dziruwa, na wu beya madhoropani ni dzimerkadhu.

Khupo owu vathu va nga ba va yede gu livba Roma, wu diri wukhongolo ngudzu. Mulovi moyo nya matimo nya Muroma nyo pwani khu Tácito, a di khuye: “Ndrani nya mufumo wa pfhumu Tibério, Jesu na ngari mafuni, Siriya ni Judheya, na va garade khu gu livba dzitsapawu nya dzingi nya khupo, avo va di lomba gu khavo wu vbungudwa.”

Edzi wu nga ba wu hengiswa khidzo khupo, si di gu lemedzisa womi nya vathu. Fanelo nya gu muthu a hengisa khupo yi di gu rengiswa, ganiolu yi di gu manwa basi khu wule a livbago dzitsapawu nya dzingi. Oyu a rengidego fanelo nya gu hengise khupo, a di gu si kodza nuye gu vbwetedzeya vambe gasi va hengiseya navo mikhupo nigu vatshavbo va pategago ga isoso, va di gu zama gu lukrari. So wonega gu khatsi Zakewu a di vbwetide vathu gasi vaya hengiseya khupo vata mu ninga. (Luka 19:1, 2) Si ngu pwisisega gu khu ginani vathu va nga ba va garade khu gu livba khupo ni gu nyenya vakhupisi vakona.