LISA * a gu ganela gu khuye: “Igyo gi nga nyi kuha ngudzu wuwadi wa vandriyathu.” Uye a di gu thula egi gi nga mu kuha gasi gu a dzumeya lisine. Isoso khiso si nga girega gambe ni Anne, oyu a ganeyago gu khuye: “Gupheyani eni nyi di kuhwa ngudzu khu lisine khu kotani nya olu Dzifakazi dza Jehovha dzi nga bari vathu nya vadi nasiri khu kotani nya esi va nga ba va hevbudza.” Vandriyathu vava vavili olu va ngu gola ngudzu gu leri Bhibhiliya ni gu dundrugeya khiyo, ganiolu wuwadi khuwo wu nga va kuha ngudzu.

Hi nga yeyedza kharini wuwadi wu kutsago vambe? Hongoleni hi bhula khu dzindziya dzimbili: Nyo pheye, khu maganelelo yathu nigu nya wuwili, khu sigiro sathu. Khavbovbo, hi na bhula gu khethu khu mani hi yedego gu mu yeyedza wuwadi.

Nyamayi nya sighingi a khumbugwago omu ga Mavingu gipimo 31 a na ni ‘nayo nya wuwadi’ avbo nya maganelelo yaye. (Mav. 31:26) A gu dzumeleya ‘nayo’ wowo wu thangeya lidimi laye, idzo a ganeyago khidzo ni esi a ganeyago. Vapapayi anavo va yede gu manega ni ‘nayo’ wowo omu nya maganelelo yawe. Gutala nya vavelegi va ngu dziti gu khawo maganelelo nya gu vivbe ma nga kuha khu ndziya nya mba yadi sanana sawe. Nigu vavelegi va gu ganeya khu ndziya nya gu bhonge, sanana sawe kha si na nga vbweta gu va engiseya. Khu kharato, tepo vavelegi va ganeyago khu ndziya nya yadi si na vbevbugeya sanana sawe gu si va engiseya si bwe si va engisa.

Gani u mu velegi mwendro ne u nga hevbuleya kharini gu ganeya khu ndziya nya yadi? Hi nga hevbuleya esi hi nga girago avba nya gipandre nyo pheye nya libhuku la Mavingu 31:26 li gu khilo: “A gu ganela khu guti” isoso sa gu pata gu hatha malito yathu ni lito lathu khu wugengeyi. Isoso tepo yatshavbo si na hi phasa gu dzi wudzisa esi: ‘Esi nyi vbwetago gu ganeya si na khunguvanyisa ava va nyi engiseyago mwendro si na handrisa gurula?’ (Mav. 15:1) Khu lisine, wugengeyi gu pheya khu gu pimisa na hi nga si ganeyi.

Limbe livingu lari khilo: “Vomo va dusago magana nya gupaye kha nga litshari.” (Mav. 12:18) Tepo hi dundrugeyago khedzi malito yathu ni lito lathu si nga kuhago khidzo vambe, isoso si nga hi kutsa gu woneleya esi hi ganeyago. Tepo hi ganeyago guya khu ‘nayo nya wuwadi’ kha hi na nga thumisa malito nyo paye mwendro gu ganela khu ndziya nya mba yadi. (Efes. 4:31, 32) Ethu hi na tsikedza mapimo ni maganelelo nya mba yadi khu malito ni lito nya ladi. Jehovha vegide giyeyedzo nya gyadi tepo a nga tiyisa githumi gyaye Eliya gi nga ba gi thava. Ngilozi yi nga ba yi emeya Jehovha yi di ganeya khu ndziya nya ‘gurule.’ (1 Dzipf. 19:12) Ambari ulolo, gu yeyedza wuwadi sa gu pata nya singi guvbindra gu ganela basi khu ndziya nya yadi. Hi yede gambe gu gira mithumo yi yeyedzago wuwadi. Khu ndziya muni?

Ethu ho pimedzeya Jehovha khu gu ganeya malito nya yadi ni gu gira mithumo yi yeyedzago wuwadi. (Efes. 4:32; 5:1, 2) Lisa a khumbugidwego gupheyani ganede khu wuwadi a yeyedzidwego. Uye wari khuye: “Tepo ndranga yathu yi nga gurumedzwa gu khuga khavbo hi nga ba hi vbanya umo, khu gu vbiredza mipatwa  mivili nya Dzifakazi yi di dzi ninga tepo gasi dzita hi phasa gu dongiseya sombo sathu. Ga tepo yoyo, kha nya nga ba nyi phede gu hevbula Bhibhiliya.” Mithumo yeyi nya wuwadi yi kutside Lisa gu vbweta gu hevbula nya singi khu lisine nya Bhibhiliya.

Anne a khumbugidwego gupheyani nya ndrima, a di gu bonga gambe khu kotani nya wuhindzi a yeyedzidwego khu Dzifakazi. Uye wari khuye: “Khu kotani nya olu nyi nga ba nyi si pharwi gwadi khu vathu, si nyi garadzede gu tumba ni wevbini muthu.” Uye a gu simama gu khuye: “Tepo nyi nga tshangana ni Dzifakazi nyi di si dzi tumbe, eni nyi di gu garadzega khu gu kheni ‘khu ginani avo va yeyedzago gu khathala kheni?’ Ganiolu, khu kotani nya wuwadi nyi yeyedzidwego khu muhevbudzi wangu si nyi kutside gu mu tumba. Khu kotani nya isoso, nyi di pheya gu vega gupima ga esi nyi nga ba nyi hevbula.”

Wona nya gu khuwe Lisa ni Anne va di gu kuhidwe ngudzu khu mithumo nya lihaladzo va yeyedzidwego khu vandriyathu libandlani ni olu vava phasidego gu hevbula nya singi khu Bhibhiliya. Wuwadi wu yeyedzidwego khu libandla wu va phaside gu pheya gu tumba Jehovha ni vathu vaye.

Vambe adzina va nga ganeya khu ndziya nya yadi ni gu hegeya vambe khu kotani nya edzi va nga dandriswa khidzo. Gwadi gu vathu nyo khaguri va yeyedza wuwadi khu kotani nya edzi va nga dandriswa khidzo mwendro khu kotani nya makhalelo yawe. Ganiolu, abari ha gu kutswa basi khedzi hi nga dandriswa khidzo mwendro makhalelo yathu, adzina si nga yeyedza gu khiso khandri ha gu pimedzeya wuwadi wa Nungungulu. — Fananisa ni Mithumo 28:2.

Wuwadi nya lisine handro nya liphuvbo nya guage la Nungungulu. (Gal. 5:22, 23) Khu kharato, gasi gu haguleya wuwadi nya lisine hi yedi gu dzumeya liphuvbo la Nungungulu li thangeya mapimiselo yathu ni mithumo yathu. Ha gu gira isoso, hi na pimedzeya Jehovha ni Jesu. Khu kharato, ethu hi yede gu kutswa khu lihaladzo hi gu nalo khu Jehovha Nungungulu ni vandriyathu. Wuwadi wathu, likhalelo nya tshivba li khugeyago monyoni li tsakedwago khu Nungungulu.

Adzina si nga vbevbuga gu yeyedza wuwadi vale va yeyedzago navo wuwadi mwendro vale hi va tigo. (2 Sam. 2:6) Mweyo nya dzindziya hi nga yeyedzago khiyo wuwadi khu gu va bonga. (Kol. 3:15) Ganiolu, ahati ha gu pimisa gu khethu muthu nyo khaguri kha yedwe khu gu yeyedzwa wuwadi ke?

Dundrugeya khesi: Jehovha a gu Pfhumu nya yikhongolo, a gu hi ninga giyeyedzo khu gu hi yeyedza wuwadi wu si hi faneyigu nigu Lito laye li gu hi hevbudza lisima nya gu yeyedze likhalelo lolo. Lito “wuwadi wu si hi faneyigu” li ngu thumiswa dzitepo nya dzingi omu nya Milowo nya Gigreki. Nungungulu a gu yeyedza kharini wuwadi?

Jehovha a yeyedzide wuwadi vathu vatshavbo va vbanyidego gale, khu gu va ninga esi va nga ba va si vbweta gasi gu vbanya. (Mat. 5:45) Khu lisine, ambari hwane na hi nga si muti Jehovha uye a hi yeyedzide wuwadi. (Efes. 2:4, 5, 8) Khu giyeyedzo, uye a hi girede wuwadi nya wukhongolo ngudzu khu gu ningeya gyanana gyaye gya gimwegyo khu kotani nya vathu. Mupostoli Pawulo lovide gu khuye Jehovha thumiside dzegiso khu kotani “nya wuhigo waye.” (Efes. 1:7) Nigu gambe ambari olu hi ghohago ni gu khunguvanyisa Jehovha uye a gu simama gu hi thangeya ni gu hi hevbudza. Sihevbudzo saye ni malito yaye ma gu fana ni “hunguva.” (Dhet. 32:2) Ethu kha hi na nga si kodza gu livba watshavbo wuwadi a hi yeyedzidego. Nigu ethu hi ngu dziti gu khethu nari khatsi Jehovha kha hi yeyedza wuwadi wu gumba hi fanela, ethu hi di hadzi gu mba manega ni gutumba khu wumindru. — Fananisa ni 1 Pedro 1:13.

Nya mba kanakana wuwadi wa Jehovha wu ngu hlamadzisa nigu wu ngu kutsa. Khu kharato, vbavbandze basi nya gu yeyedze wuwadi ga vathu nyo khaguri, hi yede gu dzi garadzeya gu pimedzeya Jehovha khu gu hi yeyedza wuwadi vambe tshigu ni tshigu. (1 Tes. 5:15) Tepo hi yeyedzago wuwadi tepo yatshavbo ethu ha gu fana ni nilo ga litshigu nya girame. Ethu hi ngu thaveledwa khu sivbango nya ndranga yathu, vandriyathu, sithumi khwathu, sihevbuli khwathu ni vavizinhu.

Dundrugeya khu va ndrangani gwago mwendro vandriyathu libandlani va nga hadzi phasega khidzo khu malito yago ni mithumo yago nya yadi. Adzina libandlani gwago womo muthu nyo khaguri a vbwetago giphaso nya gu khathaleye ndranga yaye, jardim mwendro gu rengarenga silo nyo khaguri merikadhu. Nigu wa gu mana muthu nyo khaguri thumoni nyo tshumayele a vbwetago giphaso ina u di hadzi gu mu phasa khu ndziya nyo khaguri?

Pimedzeya Jehovha, khu gu tepo yatshavbo u ganeya malito nigu gira mithumo yi thangedwago khu ‘nayo nya wuwadi.’