1. Khu wevbini hwanga vandriyathu nyo khaguri va nga emisana nago?

 DUNDRUGEYA khu siemo sesi si tshanganidego ni Dzifakazi dza Jehovha nyo khaguri. Nestor ni mwangadzi waye María va di gu vbweta gu thuma umo gu nga ba gu vbwetega giphaso. * Gasi gu gira isoso, avo va di yede gu vbanya khu dzitsapawu nya dzidugwana. Ganiolu, va di gu thava gu khavo kha va na nga tsaka khu lisine va gu vbanya khu dzitsapawu nya dzidugwana. Tepo Biniam a nga khala mweyo nya Fakazi ya Jehovha omu nya litigo thumo wathu wu nga ba wu himbedzedwa, uye a di tugula gu khuye kha nga moyo nya vathu va Nungungulu a di hadzi gu wugedwa. Isoso si mu resede hwanga. Ganiolu, uye a di gu thava ngudzu khesi si na girwago khu valongo vaye va gu tugula gu khavo uye i Fakazi ya Jehovha. Valérie a di tugudwa gu pwani a diri ni madwali nya Câncer, nigu uye a di gu vbweta ngudzu gu mana dhogodheya a nga hadzi gu mu gira operasawu na gu ninga githawo matshina nya Milayo nya Bhibhiliya ma ganeyago khu novba. Khu lisine, uye a di gu thava ngudzu gufa.

2. Khu ginani hi yedego gu hevbuleya gu woneleya hwanga wathu?

² Ina u di nga tshangana ni hwanga nya nga owu? Nya vangi gwathu va tshanganide nago. Ha gu mba hevbuleya gu woneleya hwanga wathu, hi na hunga gu gira silo nyo vivbe si na ghohago wupari wathu ni Jehovha. Khiso kamu Sathane a si vbwetago. Uye o zama gu thumisa hwanga wathu gasi hi si engisi Milayo ya Jehovha, gupata ni gileletelo nya gu tshumayele Mahungo nya yadi. (Gutu. 12:17) Sathane vivbedwe khu monyo nigu na ni tshivba. Ganiolu, u nga dzi vhikeya gwaye. Khu ndziya muni?

3. Ginani gi na hi phasago gu pala hwanga?

³ Tepo hi tiyisegago gu khethu Jehovha a ngu hi haladza nigu  a na ni ethu, sathane kha na nga si kodza gu hi thaviseya. (Ndzi. 118:6) Khu giyeyedzo, mulovi nya ndzimo 118 emisanide ni siemo nyo khaguri nya gu garadze. Uye a diri ni valala nya vangi, vambe vakone va diri vathu nya lisima (mavhesi 9, 10). Dzimbe dzitepo, uye a di gu emisana ni gu garadzega nya gu khongolo (livhesi 13). Uye a di gu tsayisidwe khu Jehovha (livhesi 18). Ambari ulolo, muembi nya dzindzimo a kutsidwe gu lova gu khuye: “Kha nyi thavi gilo.” Ginani gi nga mu gira a dzipwa na vhikelegide? Uye a di gu dziti gu khuye ambari olu Jehovha a nga ba a mu tsayiside, Papayi waye wa ndzadzini nya lihaladzo a di gu mu haladza ngudzu. Muembi nya dzindzimo a di gu tiyisega gu khuye ni gevbini giemo a na emisananago nagyo, Nungungulu waye nya lihaladzo tepo yatshavbo a na ba a dzi emisede gu mu phasa. — Ndzi. 118:29.

4. Hwanga muni hi na wu palago ha gu tumba gu khethu Jehovha a ngu hi haladza?

⁴ Hi yede gu tumba gu khethu Jehovha a ngu hi haladza. Isoso si na hi phasa gu pala hwanga. Nyo pheye, gu thava gu tandrega gu sayisa ndranga. Nya wuvili, gu thava vathu. Nya wuraru, gu thava gufa. Vandriyathu hi ganedego khavo gupheyani nya ndrima yeyi avo va si kodzide gu pala hwanga wawe kholu va di gu tumba lihaladzo la Nungungulu.

5. Khu sevbini siemo si nga girago hungo nya ndranga a garadzega? (Wona fotu avba nya kapa.)

⁵ Hungo nya ndranga a gu Mukristo na ni rwalo nya wukhongolo nya gu khathaleye ndranga yaye khu nyamani. (1 Thim. 5:8) Abari gu u hungo nya ndranga, yimbe tepo ndrani nya tungu wowu adzina u garadzegide ngudzu khu gu khuwe u na luza thumo. Uwe adzina u garadzegide khu gu khuwe kha wu na nga si kodza gu mana guhodza ni wulanga nyo khale gasi gu ninga ndranga yago. Uwe adzina gambe u garadzegide khu gu khuwe wa gu luza thumo kha wu na nga si kodza gu mana wumbe. Mwendro gufana ni Nestor ni María, va khumbugidwego gupheyani uwe adzina u pimiside gu khuwe kha wu na nga si kodza gu vbanya khu dzitsapawu nya dzidugwana. Sathane a gu gira satshavbo a si kodzago gasi gu gira vathu nya vangi va diga gu thumeya Jehovha khu kotani nya gu dzipwe khu ndziya yeyi.

6. Ginani egi Sathane a zamago gu hi gira hi khodwa ga igyo?

⁶ Sathane o zama gu hi gira hi khodwa gu khethu Jehovha kha hi khathaleyi nigu kha na nga hi phasa gu sayisa ndranga yathu. Kha nga handro wakone, ethu adzina hi nga pimisa gu khethu hi yede gu gira satshavbo hi si kodzago gasi hi simama ni thumo wathu, ambari isoso na si gu pata gu ndraga matshina nya Milayo nya Bhibhiliya.

7. Ginani egi Jesu a hi embedego?

⁷ Jesu, oyu atigo gwadi Papayi guvbindra ni wevbini muthu a ganede gu khuye, Nungungulu wathu “a ngu siti esi [hi] si vbwetago ambari na [hi] ngasi mu lombi.” (Mat. 6:8) Nigu Jesu a ngu dziti gu khuye Jehovha a dzi emisede gu hi ninga esi si hi keneleyago. Kha nga Makristo, ethu hi sivbango nya ndranga ya Nungungulu. Jehovha Hungo nya ndranga yathu, nigu hi nga tiyisega gu khethu uye a na gira gwadi esi a embeyago yatshavbo mihungo nya dzindranga gu gira omu ga 1 Thimoti 5:8.

8. a) Ginani gi na hi phasago gu pala hwanga nya gu tandregi gu ninga esi ndranga yathu yi si vbwetago? (Matewu 6:31-33) b) Hi nga pimedzeya kharini patwa wa avba nya fotu wu hongolago wa ninga guhodza ndriyathu nya nyamayi?

⁸ Tepo hi tiyisegago gu khethu Jehovha a ngu hi haladza nigu a ngu haladza ndranga yathu, kha si na nga hi garadzeya gu tiyisega gu khethu uye a na hi ninga esi si hi keneleyago. (Leri Matewu 6:31-33.) Jehovha a ngu dzina gu hi  ninga esi si hi keneleyago kholu uye a na ni lihaladzo ni wuhindzi. Tepo a nga gira mafu, uye giride nya singi guvbindra basi esi hi nga ba hi si vbweta gasi gu vbanya khiso. Uye giride silo nya singi mafuni si hi tsakisago. (Gen. 2:9) Ambari dzimbe dzitepo ha gu mana basi esi hi si vbwetago, hi yede gu dundruga gu khethu hi naso kholu khu Jehovha a nga hi ninga. (Mat. 6:11) Ethu tepo yatshavbo hi yede gu dundruga gu khethu esi Jehovha a na hi ningago si na ni lisima ngudzu guvbindra esi hi si digago olu. Nigu mindru watshigu a na hi ninga womi nya gupindruge. Khiso esi Nestor ni María va si tugudego. — Isa. 65:21, 22.

9. Ginani u gi hevbulago khu giyeyedzo gya Nestor ni María?

⁹ Nestor ni María va diri ni ndranga nyo khadzisege ni thumo nya wadi Colômbia. Avo va ri khavo: “Hi di dundrugeya khu gu vbevbugisa womi wathu gasi gu gira nya singi thumoni nyo tshumayele, nigu ethu hi di gu thava khu gu khethu kha hi na nga tsaka ha gu vbanya khu dzitsapawu nya dzidugwana.” Ginani gi va phasidego gu pala hwanga wawe? Avo va di dundrugeya khu dzindziya nya dzingi edzi Jehovha ava yeyedzidego khidzo lihaladzo. Khu gu tiyisega gu khavo Jehovha tepo yatshavbo a na va khathaleya, avo va di diga thumo wawe nya wadi. Avo va di rengisa ndranga yawe va bwe va fuluga va hongola ga litigo gu nga ba gu vbwetega ngudzu vatshumayeli nya Mufumo. Va gu dzipwa kharini khu gu ba va giride isoso? Nestor wari khuye: “Ethu hi ngu wona malito ma gomogo umo ga Matewu 6:33 na ma gu tadzisega. Ethu gima kha ha nga keneledwa khu silo sa nyamani nigu olu ha gu vbanya womi nya gu tsakise.”

10. Khu ginani si si hlamadzisigo gu wona vathu na va gu thava vambe vathu?

¹⁰ Gu khugeya tepo Adhamu ni Evha va nga wugeya Jehovha, vathu va gu gireya silo nyo vivbe vambe vathu. (Muh. 8:9) Khu giyeyedzo, vathu va gu thumisa wuthangeyi va gu nawo gasi gu phara vambe khu ndziya nya gu vivbe. Wughevenga wa gu andra, vathu nyo khaguri xikwatunu va ngu vala mwendro gu wugeya sihevbuli kwanu, nigu vathu nyo khaguri va ngu phara dzindranga dzawe khu ndziya nya mba yadi. Khu kharato, kha si hlamadzise gu wona vathu na va gu thava vambe vathu. Sathane o zama gu londrola kharini guthava hi gu nawo khu vathu?

11-12. Sathane a gu thumisa kharini hwanga wathu khu vathu gasi gu hi wugeya?

¹¹ Sathane o zama gu hi gira hi thava vathu  gasi hi ema gu tshumayela mwendro gu gira simbe silo esi Jehovha a hi embeyago gu gira. Khu gu kutsedzedwa khu Sathane, mifumo yi ngu himbedzeya thumo wathu ni gu hi wugeya. (Luka 21:12; Gutu. 2:10) Ga litigo leli la Sathane, vathu nya vangi va ngu phalalegiseya malipha maningano ni Dzifakazi dza Jehovha. Vathu va khodwago ga malipha yoyo adzina va nga hi hega va bwe va hi wugeya. (Mat. 10:36) Ina hi ngu hlamadziswa khu milaphwi yeyi ya Sathane? Ahihi. Uye thumiside milaphwi yeyi ga lizana nya myaga nyo pheye! — Mith. 5:27, 28, 40.

¹² Gu thava gu wugedwa khu mufumu khandri uwo basi naphwi wu thumiswago khu Sathane. Vambe va ngu thava esi valongo vawe va na si pimisago tepo khiyo va na khalago Dzifakazi dza Jehovha. Dzimbe dzitepo, avo va ngu thava ngudzu isoso guvbindra gu vetwa mwendro gu tshaniswa. Avo va ngu haladza ngudzu valongo vawe nigu avo va gu vbweta gu khavo vati Jehovha ni gu mu haladza. Avo va ngu garadzega tepo valongo vawe va ganeyago guvivba khu Nungungulu nya lisine ni vakhozeyi vaye. Ambari ulolo, ga simbe siemo valongo va nga ba va wugeya gupheyani khu gu hegisa va ngu dzumeya lisine. Ganiolu, nga dundrugeya sivbango nya ndranga yathu si si pwanani ni ethu khu kotani nya esi hi si khodwago? Ginani hi nga girago?

13. Gu tiyisega gu khethu Jehovha a ngu hi haladza si nga hi phasa kharini tepo valongo vathu va hi digago? (Ndzimo 27:10)

¹³ Hi nga thaveledwa khu malito nyo mbure ma gomogo umo ga Ndzimo 27:10. (Leri.) Tepo hi dundrugeyago gu khethu Jehovha a ngu hi haladza, ethu kha hi garadzegi khesi si na giregago ambari valongo vathu va gu hi diga. Nigu hi ngu dziti gu khethu uye a na hi tshatshazeya khu gu timiseya gwathu. Jehovha a na hi ninga ni gevbini hi vbwetago gasi gu vbanya, a hi phasa gu mana gu rula ni gutsaka, nigu a na hi phasa gu simama vbafuvbi gwaye guvbindra ni wevbini muthu. Esi khiso Biniam a khumbugidwego gupheyani a nga si tugula.

14. Ginani u gi hevbulago khu giyeyedzo gya Biniam?

¹⁴ Biniam khade moyo nya Dzifakazi dza Jehovha ambari olu a nga ba a dziti gu khuye mifumo ya tigoni gwaye yi di gu wugeya Dzifakazi. Wona edzi a padego khidzo hwanga nya vathu khu gu dziti gu khuye Jehovha a ngu mu haladza. Uye wari khuye: “Gu wugedwa gu di gu vbisa ngudzu guvbindra esi nyi nga ba nyi si dundrugeya, ganiolu egi nyi nga ba nyi gi thava ngudzu guvbindra gu wugedwa khu mufumo gu diri gu wugedwa khu valongo vangu. Nyi di  gu thava gu kheni nyo hunga gu khala Fakazi ya Jehovha si di hadzi khunguvanyisa papayi wangu a nga ba a siri Fakazi, nigu vandrangani gwangu va di hadzi gu mba nyi ninga gambe githawo.” Ambari ulolo, Biniam a di gu tiyisega gu khuye Jehovha tepo yatshavbo a ngu khathaleya vale a va haladzago. Biniam o tshamuseya, khuye: “Eni nyi di dundrugeya khedzi Jehovha a phasidego khidzo vambe gasi gu emisana ni gu hamuga nya dzitsapawu, gu pharwa khu ndziya nya mba yadi ni gu wugedwa. Eni nyi di gu dziti gu kheni nyo simama na nyi tumbegide ga Jehovha, uye a na nyi kategisa. Tepo nyi nga kuruvisedwa khu dzitepo nya dzingi nyi bwe nyi tshaniswa nyi di si wona gu kheni Jehovha tepo yatshavbo a ngu hi phasa ha tumbega gwaye.” Jehovha khade Papayi nya lisine ga Biniam, nigu vathu va Jehovha va yeyedzide gu khavo va diri valongo nya lisine gwaye.

15. Khu ginani si olovelegidego gu thava gufa?

¹⁵ Bhibhiliya yi ngu ganeya gu khiyo gufa nala. (1 Kor. 15:25, 26) Ha gu dundrugeya khu gufa adzina hi nga garadzega ngudzungudzu abari gu ethu mwendro muthu nyo khaguri hi mu golago a gu dwala ngudzu. Ganiolu, khu ginani hi thavago gufa? Khu gu Jehovha hi giride na hiri ni gudogoreya nyo vbanye kala gupindruga. (Muh. 3:11) Ganiolu, gu thava gufa gu nga hi phasa gu vhikeya womi wathu. Khu giyeyedzo, ugo gu nga hi kutsa gu hunga gu hatha silo nya sadi nyo hodze ni gu gira mihaganu nya gu tiyise givili, gu vbweta giphaso ga dhogogheya ni gu mana mirendre yi vbwetegago hi bwe hi potsa gu vega womi wathu mhangoni.

16. Sathane o zama kharini gu londrola hwanga hi gu nawo khu gufa?

¹⁶ Sathane a ngu dziti gu khuye hi ngu ninga lisima womi. Uye wari khuye ethu hi na gira ni gevbini ambari sa gu lomba gu diga wupari wathu ni Jehovha khu gu vbweta gu sayisa womi wathu. (Joba 2:4, 5) Sathane vivbedwe khu monyo, nigu kha nga olu a gu na ni “tshivba nya gu songe,” a gu zama gu londrola gu thava nya gufa hi gu nago gasi gu hi gira hi diga Jehovha. (Hebh. 2:14, 15) Ga siemo nyo khaguri, dzimbe dzitepo vathu va thangedwago khu Sathane vo ganeya gu khavo va na hi songa ha gu mba tsukula esi hi si khodwago. Ga simbe siemo ha gu ba hi dwala, Sathane a nga londrola lithomo lolo gasi gu hi gira hi ndraga milayo ya Nungungulu. Gimbe gambe khu gu vadhogodheya mwendro vambe ndrangani gwathu va sirigo Dzifakazi va nga hi kutsedzeya gu thedwa novba a gu silo si fanyago nayo wa Nungungulu. Mwendro muthu nyo khaguri a nga zama gu hi kutsedzeya gu dzumeya mambe mathumelo nya madwali ma gu mba gimbileyana ni matshina nya milayo nya Bhibhiliya.

17. Guya khu Varoma 8:37-39, khu ginani hi si yeligo gu thava gufa?

¹⁷ Ambari hi si dzinigo gufa, ethu hi ngu dziti gu khethu Jehovha kha na nga diga gu hi haladza khu gu ba hi fude. (Leri Varoma 8:37-39.) Tepo dzipari dza Jehovha dzi fago, uye a ngo simama gu dzi dundruga nga khatshi dzi ngo vbanya. (Luka 20:37, 38) Uye a ngu dzina gu dzi wusa dzi vbanya gambe. (Joba 14:15) Jehovha livbide tengo nyo dhure khethu “gasi . . . hi mane guvbanya nya gupindruge.” (Joh. 3:16) Ethu hi ngu dziti gu khethu Jehovha a ngu hi haladza ni gu hi khathaleya, khu kharato vbavbandze nya gu hi diga Jehovha tepo hi dwalago ni tepo hi vbwetago gufa ethu ha gu hongola gwaye hi ya lomba guthaveledwa, guti ni tshivba. Isoso khiso Valérie ni mwama waye va giridego. — Ndzi. 41:3.

18. Ginani u gi hevbulago khu giyeyedzo gya Valérie?

¹⁸ Tepo Valérie a nga ba ari ni 35 myaga, vadhogogheya va di tugula gu khavo na ni madwali  nya câncer. Wona edzi lihaladzo li mu phasidego khidzo gu pala hwanga nya gufe. Uye wari khuye: “Tepo vadhogodheya va nga tugula gu khavo nyi na ni câncer, eni ni mwama wangu hi di garadzega. Nyi di gu vbweta dhogodheya nya khongolo gasi gu nyi gira operasawu gasi nyi hawuluga. Hi vbwetedzede vadhogodheya nya vangi, ganiolu vatshavbo va di bomba gu nyi gira operasawu nya mba theya novba. Nyi di gu thava ngudzu, ganiolu khu kotani nya nayo wa Nungungulu nyi di bomba gu thedwa novba. Ndrani nya womi wangu, Jehovha nyi yeyedzide gu khuye a ngu nyi haladza. Olu nyi na ni lithomo nyo mu yeyedze lihaladzo langu khuye. Ni yevbini tepo nyi pwago mahungu nya mba yadi, so nyi gira nyi dzi emiseya gu tsakisa Jehovha nasiri Sathane. Nyi hegiside khu gu girwa operasawu nya mba thedwa novba. Ambari olu gigaradzo gyangu gi simamago, Jehovha tepo yatshavbo a ngu hi ninga esi hi si vbwetago. Khu giyeyedzo, mitshanganoni yathu nya libandla ya guvbeyani nya semana na si nga si tugulegi gu nyi na ni madwali nya câncer, nyi hevbude ndrima nya Mukhedziseyi yi gu khiyo: ‘Dwana ni sigaradzo nya tepo yeyi khu gutiya-hwambo.’ * Ndrima yeyi yi hi thavelede ngudzu. Hi di yi leri gungani-gungani. Dzindrima nya nga edzi ni gu simama gu gira silo nya nga gutshumayela ni gu manega mitshanganoni si phaside eni ni mwama wangu gu simama na hi rude hi bwe hi hunga gu gira silo nya sadi.”

19. Ginani gi na giregago nugunugu?

¹⁹ Makristo ma gomogo mafuni gwatshavbo ma ngu pala sigaradzo nya singi ma bwe ma dugeleya tepo ma wugedwago khu Dhiyabhulosi. (1 Ped. 5:8, 9) Anuwe u nga si kodza. Nya mba hweya, Jehovha a na ruma Jesu ni vaphasedzeyi vaye gasi gu “pfhungumula mithumo ya Sathane.” (1 Joh. 3:8) Khu hwane nya isoso, vathu va Nungungulu va mu thumeyago omu mafuni kha va na nga “thava gilo ambari gu thusedzedwa.” Kala yi vboha tepo yoyo, hi yede gu gira satshavbo hi si kodzago gasi gu pala hwanga hi gu nawo.

20. Ginani gi na hi phasago gu pala hwanga hi gu nawo?

²⁰ Hi yede gu simama gu tumba gu khethu Jehovha a ngu haladza ni gu vhikeya sithumi saye. Gasi gu gira isoso, hi yede gu dundrugeya khedzi Jehovha a vhikedego khidzo sithumi saye sa gale hi bwe hi bhuleya vambe khu isoso. Hi yede gambe gu dundrugeya khedzi Jehovha a hi phasidego gu emisana ni sigaradzo sathu. Khu gu phaswa khu Jehovha hi na si kodza gu pala hwanga hi gu nawo. — Ndzi. 34:4.