Ginani gi hi girago hi simama gu “ninga mihandro nya yingi”?
“Babe wangu a na dhumiswa mwa gu ninga mihandro nya yingi; khu kharato, mu na khala vapizane vangu.” — JOHANE 15:8.
DZINDZIMO: 145, 144
1, 2. a) Ginani egi Jesu a ganedego khigyo ni vapizane vaye ga wutshigu nyo hegise na si gufi? (Wona foto vbatshani.) b) Khu ginani si gu sa lisima gwathu gu dundruga sighelo si hi girago hi tshumayela? c) Ginani hi na ganeyago khigyo?
GA WUTSHIGU nyo hegise na si gufi, Jesu manegide ni libhulo nyo laphe ni vapostoli vaye. Uye va giride va tiyisega gu khavo a di gu va haladza ngudzu. A bwe a ganeya navo khu gipimaniso nya miuvha, hi ganedego khigyo avba nya ndrima yi vbindridego. Jesu a di gu vbweta gu kutsa vapizane vaye gu khuye va simama gu “ninga mihandro nya yingi,” iso si thulago gu timiseya thumoni nya gutshumayele mahungu nya Mufumo. — Johane 15:8.
2 Ambari ulolo, Jesu kha a embeya vapizane vaye esi basi va nga ba va yede gu gira, ganiolu a di va embeya ni gighelo gyakona. A di va ninga sighelo nya va gu simama gu tshumayela. Gwadi gu anethu hi dundruga sighelo si hi girago hi tshumayela. Gu dundrugeya khisoso si na hi kutsa gu timisela tepo hi ningago “wufakazi mayigoni gwatshavbo.” (Matewu 24:13, 14) Ga ndrima yeyi, hi na ganeya khu sighelo sina si gomogo omu nya Bhibhiliya si hi girago hi tshumayela. Nigu, hi na ganeya gambe khu siningwa sina si tago khu ga Jehovha si hi phasago gu simama gu ninga mihandro.
KHOLU HA GU RUNGUDZA JEHOVHA
3. a) Khu guya khu Johane 15:8, khu gevbini gighelo nya lisima ngudzu gi hi girago hi tshumayela? b) Dziuvha nya gipimaniso gya Jesu dza gu emeya ginani, nigu khu ginani gipimaniso gyogyo gi yelago?
3 Gighelo nya gikhongolo ngudzu gi hi girago hi tshumayela khu gu ho vbweta gu dhumisa Jehovha ni gu agisa lina laye. (Leri Johane 15:1, 8.) Tepo Jesu a nga ganeya khu gipimaniso nya miuvha, fananiside Jehovha ni mulimi a dandrisago dziuvha. Jesu a di khuye uye khuye miuvha, nigu vapizane vaye khavo matamo. (Johane 15:5) Khu kharato avba nya gipimaniso gegi, dziuvha dzo emeya mihandro yi ningwago khu vapizane va Jesu, mwendro thumo nyo tshumayele va wu girago. Jesu embede vapostoli vaye khuye: “Babe wangu a na dhumiswa mwa gu ninga mihandro nya yingi.” Tepo miuvha yi theyago dziuvha nya dzadi, sa gu resa wuzundzu ga mulimi. Khu ndziya yamweyo, tepo hi girago satshavbo hi si kodzago thumoni nyo tshumayele mahungu nya Mufumo, ha gu zundza, mwendro rungudza Jehovha. — Matewu 25:20-23.
Tepo hi girago satshavbo hi si kodzago gasi gu tshumayela khu Mufumo, ha gu zundza Jehovha
4. a) Ha gu agisa kharini lina la Nungungulu? b) Wo dzipwa kharini khu lithomo u gu nalo nyo agise lina la Nungungulu?
4 Lina la Nungungulu li agide khu gale. Gimwalo hi nga gi girago gasi gu engedzeya gu li agisa. Ina ka, ho agisa kharini lina la Nungungulu tepo hi tshumayelago? Nga wona esi si ganedwego khu muprofeti Isaya: “[Jehovha, NM] nya Tshivba Yatshavbo, khuye basi mu yelago gu mu rana gukhenu agide.” (Isaya 8:13) Ha gu agisa lina la Nungungulu, Jehovha, tepo hi li wonago na liri likhongolo ngudzu ga yatshavbo, ni tepo hi phasago vambe gu pwisisa gu khavo li agide. (Matewu 6:9; NM, Tshamuselo wa vbavbatshi) Khu giyeyedzo, tepo hi hevbudzago vathu lisine khu makhalelo nyo samadzise ya Jehovha ni makungo yaye nya gu vathu va vbanya kala gupindruga Paradhesini, ho va phasa gu wona gu khavo gwatshavbo guvbivba ogu Sathane a ganedego khu Jehovha malipha. (Genesi 3:1-5) Ha gu agisa lina la Jehovha gambe tepo hi phasago vathu guti gu khavo Jehovha a ngu yedwa “khu gu hakha gidhumo, ni rungudzo ni tshivba.” (Gutuledwa 4:11) Rune, a gu piyonero khu 16 myaga, khuye: “Nyi ngu tsaka ngudzu khu guti gu kheni nyi na ni lithomo nyo khale fakazi ya Muvangi nya mafu ni ndzadzi. Isoso so nyi ninga tshivba nyo simame gu tshumayela.”
KHOLU HI HALADZAGO JEHOVHA NI GYANANA GYAYE
5. a) Gighelo muni nyo tshumayele gi gomogo omu ga Johane 15:9, 10? b) Jesu phaside kharini valandreyi vaye gu pwisisa gu khavo va di yede gu timiseya?
5 Leri Johane 15:9, 10. Gighelo nya wuvili gi hi girago hi tshumayela mahungu nya Mufumo wa Nungungulu khu gu hi ngu haladza Jehovha ni Jesu. (Marko 12:30; Johane 14:15) Jesu embede vapizane vaye gu khuye va di yede gu ‘simama lihaladzoni laye.’ Khu ginani Jesu a ganedego isoso? Khu gu uye a di gu dziti gu khuye gu di gu vbwetega gutimiseya gasi gu valandreyi vaye vbanya kha nga maKristo nya lisine. Khu lisine, umo ga Johane 15:4-10, ha gu wona gu khethu Jesu thumiside ngudzu lito ‘simamani mwendro khalani’ gasi gu phasa valandreyi vaye gu pwisisa gu khavo va di yede gu timiseya.
6. Hi nga yeyedza kharini gu khethu ha gu vbweta gu simama lihaladzoni la Kristo?
6 Ha gu yeyedza kharini gu khethu ha gu vbweta gu simama lihaladzoni la Kristo hi bwe tsakedwa khuye? Khu gu simama gu mu engisa. Jesu a gu hi lomba basi gu gira esi uye a giridego. Uye a di khuye: ‘Eni nya gu simama lihaladzoni ga Babe wangu, kholu nyi nga vegedza milayo yaye.’ Jesu hi ningide giyeyedzo nyo gi landreye. — Johane 13:15.
7. Gu engisa go gimbiya gumogo ni lihaladzo khu ndziya muni?
7 Jesu si vegide guagani gu khuye gu engisa go gimbiya gumogo ni lihaladzo tepo a nga khuye: “Oyu atigo milayo yangu, a gu yi vegedza, khuye a nyi golago.” (Johane 14:21) Milayo ya Jesu ya guta khiyo ga Babe waye, khu kharato tepo hi engisago nayo wa Jesu nyo tshumayele, ho yeyedza gu khethu hi ngu haladza Jehovha. (Matewu 17:5; Johane 8:28) Nigu tepo hi yeyedzago Jehovha ni Jesu gu khethu hi ngu va haladza, avo navo va na simama gu hi haladza.
HO GENGEDZA VATHU
8, 9. a) Khu gevbini gimbe gighelo hi gu nagyo nyo tshumayele? b) Malito ya Jehovha ma gomogo omu ga Ezekiyeli 3:18, 19 ni 18:23 ma gu hi kutsa kharini gu simama gu tshumayela?
8 Gighelo nya wuraru gi hi girago hi tshumayela khu gu ho vbweta gu gengedza vambe khu litshigu la Jehovha li hidzimeyago. Omu nya Bhibhiliya, Nowa a gu tshamusedwa kha nga “mutshumayeli.” (2 Pedro 2:5, NM) Na yi si guti Ndrambi, mahungu aya Nowa a nga ba a tshumayela ga vathu adzina ma di gu pata gu va gengedza khu gumbembiswa gu nga ba guta. Khu ginani hi ganeyago kharato? Khu gu Jesu a di khuye: “Na wu si gu dugi talo nya mati, vathu va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago litaroni. Kha va nga tugula gilo, kala gu vboha talo nya mati wu ngata va mwaladza vatshavbo. Kharato nugo gu na girega litshigu a na tago Mwamana wa Muthu.” (Matewu 24:38, 39) Ambari olu vathu nya vangi va mu yeyisidego Nowa, uye a di tshumayela mahungu nyo gengedze a nga ba a ningidwe khu Jehovha khu gutumbega.
9 Muhuno, ho tshumayela mahungu nya Mufumo wa Nungungulu gasi gu ninga vathu lithomo nyo hevbule khesi Nungungulu a na Ezekiyeli 18:23) Tepo hi tshumayelago khu ndranga ni ndranga ni omu gu manegago ngudzu vathu, ha gu gengedza vathu nya vangi khavba hi si kodzago khavbo gu khethu Mufumo wa Nungungulu wu na ta fuvisa litigo leli nyo vivbe. — Ezekiyeli 3:18, 19; Dhaniyeli 2:44; Gutuledwa 14:6, 7.
gireyago vathu mindru wa tshigu. Kha nga Jehovha, ho vbweta gu khethu vathu va vega gupima avba nya mahungu gasi va “vbanye.” (KHOLU HI HALADZAGO VATHU
10. a) Khu gevbini gighelo gi hi girago hi tshumayela gi ganedwago omu ga Matewu 22:39? b) Pawulo ni Silasi va phaside kharini ghadhi nya lipaso ya dhoropani ga Filipi?
10 Gighelo nya wuna gi hi girago hi tshumayela kholu hi haladzago vathu. (Matewu 22:39) Lihaladzo lolo lo hi phasa gu simama gu tshumayela kholu hi ngu dziti gu khethu vathu va nga vbindrugedza mavbanyelo yawe tepo siemo sawe si vbindrugedzago. Khu giyeyedzo, vawugeyi va di khoteya Pawulo ni Silasi pasoni dhoropani ga Filipi. Ganiolu vbakari nya wutshigu, gu di manega girevareva gi nga kutsunga lipaso gi bwe gi tula malimba yalo. Ghadhi nya lipaso yi di thava ngudzu na yi pimisa gu khiyo sibotswa si tutumide, yi vbweta ni gu dzi songa. Ganiolu Pawulo a di yi emisa, huye khuye: “U nga dzi songi!” Ghadhi yi wudzisa khiyo: “Ginani nyi yelago gu gira gasi nyi mane guvbanyiswa?” Pawulo ni Silasi va di mu embeya gu khavo: “Khodwa ga Pfhumu Jesu u na mana guvbanya.” — Mithumo 16:25-34.
Ho tshumayela kholu hi haladzago Jehovha, Jesu, ni vambe vathu (Wona dzindrimana 5, 10)
11, 12. a) Ginani hi gi hevbulago avba nya matshango nya ghadhi nya lipaso maningano ni gutshumayela? b) Khu ginani hi vbwetago gu simama gu tshumayela?
11 Matshango nya ghadhi yile nya lipaso ma gu hi hevbudza ginani khu thumo nyo tsumayele? Wona gu khuwe ghadhi yile nya lipaso yi di vbindrugedza mavbanyelo yi bwe yi lomba giphaso hwane nya girevareva. Khu ndziya yamweyo, vambe vathu va bombago gu engiseya mahungu nya Bhibhiliya va nga vbindrugedza mavbanyelo yawe va bwe va vbweta giphaso vo tshuka va dugedwa khu sigaradzo guvbanyani. Khu giyeyedzo, vambe va nga garadzega khu gu ba va vbeledwe khu thumo mwendro gu ba va tshude wugadzi. Vambe va nga vbeya ngudzu tshivba khu gu ba va tugude gu khavo va na ni madwali nya makhongolo mwendro gu ba va fedwe khu muthu va mu golago ngudzu. Tepo gu dugeleyago silo nya nga soso, vathu va nga pheya gu dzi gira siwudziso maningano ni guvbanya, siwudziso va nga ba va si dzi giri gale. Adzina va nga dzi wudzisa kharati: Ginani nyi yedego gu gira gasi nyi vbanyiswa? Adzina saye va nga dzumeya gu engiseya mahungu yathu ma ganeyago khu gutumba khu tepo nyo pheye womini gwawe.
12 Khu kharato ho simama gu tshumayela khu gutumbega, hi na ba hi dongide tepo vathu va na dzi emiseyago gu dzumeya guthaveleya hi va ningago. (Isaya 61:1) Charlotte a gu piyonero khu 38 myaga, khuye: “Vathu muhuno va dzimede. Gu vbwetega gu va vbindrugedza gasi gu vapwa mahungu nya yadi.” Ejvor, a gu piyonero khu 34 myaga, khuye: “Muhuno, vathu nya vangi va mwalo gutsaka. Nyi ngu dzina ngudzu gu va phasa. Isoso so nyi kutsa gu va tshumayela.” Khu lisine, lihaladzo hi gu nalo khu vathu gighelo nya lisima nya gu hi simama gu tshumayela.
SININGWA SI HI PHASAGO GU TIMISEYA
13, 14. a) Khu gevbini giningwa gi thudwago omu ga Johane 15:11? b) Hi nga gu mana kharini gutsaka a gu nago Jesu? c) Gutsaka go hi phasa karini thumoni gwathu nyo tshumayele?
13 Wutshigu nyo hegise Jesu na si gufi,
ganede gambe khu siningwa si nga hadzi phasa vapostoli vaye gu simama gu theya mihandro. Khu sevbini siningwa soso, nigu si nga hi phasa kharini muhuno?14 Gutsaka. Ina gutshumayela i thumo nyo lemeye? Ahihi. Hwane nya gu ba Jesu a ganede khu gipimaniso nya miuvha, uye a di khuye tepo hi tshumayelago hi na mana gutsaka gwaye. (Leri Johane 15:11.) So kodzega kharini isoso? Dundruga gu khuwe avba nya gipimaniso gyaye, Jesu dzi fananiside ni miuvha, vapostoli vaye a va fananisa ni matamo. Matamo mo mana mati ni satshavbo ma si vbwetago mo ba ma ngari vbalitshinatunu nya miuvha. Khu ndziya yamweyo, hi nga tsaka ngudzu kha nga Jesu ho simama gupwanana naye ni gu mu landreya. Khavbovbo hi na mana gutsaka ogu a gu nago, a gu gutsaka hi gu manago khu gu gira gugola ga Nungungulu. (Johane 4:34; 17:13; 1 Pedro 2:21) Hanne, a gu piyonero khu 40 myaga ni guvbindra, khuye: “Gutsaka nyi gu pwago tepo yatshavbo hwane nya thumo nyo tshumayele go nyi ninga tshivba nyo simame thumoni wa Jehovha.” Gutsaka gu na hi ninga tshivba nyo simame gu tsumayela ambari tepo vathu va bombago gu hi engiseya. — Matewu 5:10-12.
15. a) Khu gevbini ginigwa gi ganedwago umo ga Johane 14:27? b) Gurula go hi phasa kharini gu simama gu theya mihandro?
15 Gurula. (Leri Johane 14:27.) Ga siyambo si nga landredwa khu litshigu eli Jesu a ngafa khilo, a di embeya vapostoli vaye khuye: “Nyi ngu mi tshiyelani gurula.” Gurula ga Jesu go hi phasa kharini gu simama gu tshumayela? Tepo hi simamago gu tshumayela, ha gupwa gurula kholu hi ngu dziti gu khethu ha gu tsakisa Jehovha ni Jesu. (Ndzimo 149:4; Varoma 5:3, 4; Vakolosi 3:15) Ulf, a gu piyonero khu 45 myaga, khuye: “Thumo nya gutshumayele wu ngu nyi garadzisa, ganiolu wu ngu nyi ninga gutsaka nya lisine ni gilo nyo gi vbanyeye khu lisine.” Hi ngu bonga ngudzu kholu hi manidego gurula nya mba vbeya!
16. a) Giningwa muni gi ganedwago omu ga Johane 15:15? b) Vapostoli va di hadzi simama kharini gu khala dzipari dza Jesu?
16 Wupari ni Jesu. Hwane nyo ba na Jesu a embede vapostoli vaye gu khuye a di gu vbweta gu khuye va tsaka, a di va tshamuseya lisima nya gu va yeyedza lihaladzo nya lisine. (Johane 15:11-13) Khavbovbo, a di khuye: “Nya gu mi rana dzipari dzangu.” Ina kamo khandri giningwa nya lisima gu khala pari ya Jesu? Ganiolu vapostoli va di hadzi simama kharini gu khala dzipari dza Jesu? Jesu tshamusede gu khuye gimbiyani mu ya ninga mihandro nya yingi nigu mihandro yanu yi na simame. (Leri Johane 15:14-16.) Khu mambe maganelelo, simamani gu tshumayela. Tanga nya myaga milivi na si gu ganeyi isoso, Jesu embede vapizane vaye khuye: “Gimbilani na mu gu huwelela, khenu: ‘Wufumu wa Ndzadzini womo vbafuvbi.’” (Matewu 10:7) Khu kharato ga wutshigu waye nyo hegise mafuni, Jesu a di kutsa valandreyi vaye gu timiseya thumoni nyo tshumayele. (Matewu 24:13; Marko 3:14) Khu lisine, Jesu a di gu dziti gu khuye gu landreya gileletelo gegi kha si na nga vbevbuga. Ganiolu va di hadzi si kodza va bwe va simama gu khala dzipari dzaye. Khu ndziya muni? Khu gu phaswa khu gimbe giningwa.
17, 18. a) Khu gevbini giningwa gi ganedwago omu ga Johane 15:7? b) Giningwa gyogyo gi phaside kharini vapizane va Jesu? c) Siningwa muni si hi phasago muhuno?
17 Mihlamulo nya milombelo yathu. Jesu a di khuye: “Satshavbo iso mu na lombago mu na ningwa.” (Johane 15:7, 16) Gitumbiso gyogyo gya Jesu si nga gira na gi tiyiside ngudzu vapostoli! * (Tshamuselo wa vbavbatshi.) Vapostoli kha va nga si pwisisa gwadi gu khavo Jesu a diri vbafuvbi ni gufa. Ganiolu gufa gwaye si di si thuli gu khiso va di hadzi tshala nya mba na giphaso. Jehovha a di dzi emisede gu hlamula milombelo yawe ni gu va phasa thumoni wawe nyo tshumayele. Nigu khiso kamo a giridego. Gitepwana hwane nyo ba Jesu a fude, vapostoli va di lomba Jehovha gu khavo a va ninga gutiya-hwambo, Jehovha a di hlamula milombelo yawe. — Mithumo 4:29, 31.
Hi nga tiyisega gu khethu Jehovha a ngu hlamula milombelo yathu tepo hi lombago giphaso (Wona ndrimana 18)
18 Khidzo saye ni muhuno gambe. Tepo hi timiseyago thumoni nyo tshumayele, ha gu simama gu khala dzipari dza Jesu. Nigu hi nga tiyisega gu khethu Jehovha dzi emisede gu hlamula milombelo yathu tepo si hi garadzeyago gu tshumayela. (Vafilipi 4:13) Hi ngu bonga ngudzu kholu Jehovha a hlamulago milombelo yathu ni olu hi gu na ni Jesu kha nga pari yathu. Siningwa soso sa Jehovha si ngu hi tiyisa ni gu hi phasa gu simama gu theya mihandro. — Jakobe 1:17.
19. a) Khu ginani hi simamago gu tshumayela? b) Ginani gi hi phasago gu vbedzisa thumo hi ningidwego khu Nungungulu?
19 Ga ndrima yeyi, hi hevbude khu sighelo sina si hi girago hi simama gu tshumayela: gu dhumisa Jehovha ni gu agisa lina laye, gu yeyedza lihaladzo lathu khu Jehovha ni Jesu, gu gengedza vathu, ni gu yeyedza gu khethu hi ngu haladza vathu. Nigu hi hevbude gambe khu siningwa sina: gutsaka, gurula, wupari ni Jesu, ni mihlamulo nya milombelo yathu. Siningwa soso si ngu hi ninga tshivba gasi gu vbedzisa thumo hi ningidwego khu Nungungulu. Jehovha a ngu tsaka ngudzu tepo a hi wonago na hi gu dzi garadzeya gu simama gu “thela mihandro nya yingi”!
^ ndri. 17 Vbakari nya mabhulo yaye ni vapostoli, Jesu va dundrugiside dzitepo nya dzingi gu khuye Jehovha a na hlamula milombelo yawe. — Johane 14:13; 15:7, 16; 16:23.