Jehovha a ngu haladza ava va theyago mihandro “nyamba rereka”
“Yile yi nga thegela wulimeni nya wadi khu vale, . . . nyamba rereka kala va gu thela mihandro.” — LUKA 8:15.
DZINDZIMO: 44, 10
1, 2. a) Khu ginani hi tiyiswago khu vandriyathu va simamago gu tshumayela sipandreni esi vathu nya vangi va si tsakeyigo? (Wona foto vbatshani.) b) Ginani egi Jesu a ganedego maningano ni gu tshumayela “tigoni gwawe”? (Wona tshamuselo wa vbavbatshi.)
SERGIO NI OLINDA i patwa nya vapiyonero wa Estados Unidos. Vavavili va na ni gipimo nya 80 myaga. Matshigwanaya, va ngu tshaniswa khu mawundru. Ganiolu, kha nga edzi va tago na va gu gira khidzo khu myaga, khu dzi 7 ora va gu tsheteya kala avba gu khiledwago avbo sibhomba dhoropani gwawe. Va ya ema va ninga mabhuku vathu va vbindrago khu vbale. Vathu nya vangi kha va khathali khavo, ganiolu Sergio ni Olinda va gu simama wulangani wawe na va gu hegeya ava va va khedzago. Vbamihanitunu, va gu tsheteya va bweleya gaya. Dzimindru dzile gambe, khu dzi 7 ora, va gu bweleya gambe wulanga wa wumowo. Vo tshumayela 6 matshigu khu semana, ndrani nya mwaga.
2 Kha nga Sergio ni Olinda, gu na ni vandriyathu nya vangi nyo * (Tshamuselo wa vbavbatshi.) Giyeyedzo gyago gi ngu kutsa vandriyathu nya vangi, ambari ava va gu na ni myaga na va gu tshumayela. Ngapwa esi si ganedwego khu moyo nya muwoneleyi nya gipandre: “Tepo nyi tshumayelago ni vandriyathu nyo tumbege nya nga vovo, nyo dzipwa na nyi gu tiyiswa khu giyeyedzo gyawe.” “Gutumbega gwawe go nyi kutsa gu timiseya ni gu tiya hwambo gutshumayelani.” “Giyeyedzo gyawe gi ngu nyi tangadzisa.”
tumbege va tshumayelago gipandreni gyawe khu myaga nya yingi, ambari olu vathu nya vangi va gu mba va engiseya. Adzina anuwe u ngu tshumayela gipandreni nya nga gyogyo. Abari kharato hi ngu gu zundza ngudzu kholu u timiseyago u bwe u simama gu tshumayela ambari olu si garadzago.3. Siwudziso muni nya siraru hi na ganeyago khiso, nigu khu ginani?
3 Omu nya ndrima yeyi hi na hlamula siwudziso siraru: Khu ginani dzimbe dzitepo hi nga dzipwago na hi vbede tshivba? So thula ginani gu theya mihandro? Ginani gi na hi phasago gu simama gu theya mihandro nya mba rereka? Guti mihlamulo nya siwudziso sesi gu na hi kutsa gu simama gu gira thumo nya gutshumayele hi ningidwego khu Jesu.
KHU GINANI HI NGA VBEYAGO TSHIVBA?
4. a) Pawulo dzi pwide kharini kholu vaJudha nya vangi va nga bomba mahungu nya Mufumo? b) Khu ginani Pawulo a nga dzipwa khu ndziya yoyo?
4 U di nga dzipwa na wu vbede tshivba khu gu ba vathu va gipandreni gyanu va si tsakeyi gupwa mahungu nya Mufumo? Abari kharato u na gu pwisisa gudzipwa ga mupostoli Pawulo. Vbedzide gipimo nya 30 myaga na gu tshumayela, nigu phaside vathu nya vangi gu khala maKristo. (Mithumo 14:21; 2 Vakorinto 3:2, 3) Ambari ulolo, kha si kodza gu vbindrugedza vaJudha nya vangi va khala maKristo. Wulangani nya isoso, nya vangi vakona va di gu bomba gu engiseya Pawulo, vambe va di gu mu wugeya. (Mithumo 14:19; 17:1, 4, 5, 13) A dzi pwide kharini Pawulo khu sigiro soso nya mba tsakisa? A di khuye: “Monyo wangu wu tade khu gu garadzega nya gukhongolo ni wuvi nyamba hegisa.” (Varoma 9:1-3) Khu ginani a dzi pwidego kharato? Khu gu a di gu gola gu tshumayela nigu a di gu gola vathu. Pawulo a di gu khathala ngudzu khu vaJudha nigu garadzegide tepo va nga bomba wuhindzi wa Nungungulu.
5. a) Ginani gi hi kutsago gu tshumayela? b) Khu ginani si olovelegidego gu dzipwa na hi vbede tshivba?
5 Gufana ni Pawulo, anethu ha gu tshumayela vathu kholu hi khathalago khavo ni gu vbweta gu va phasa. (Matewu 22:39; 1 Vakorinto 11:1) Hi ngu si wona habune gu khethu gu thumeya Jehovha khiyo ndziya nya yadi nyo thumise womi wathu. Nigu ha gu vbweta gu phasa vambe gu wona edzi womi wawe wu nga va tsakisago khidzo navo! Khigyo gi girago gu hi simama gu va kutsa gu hevbula lisine maningano ni Jehovha ni makungo yaye khu vathu. Isoso sa gu fana ni gu ba hi va ninga giningwa nyo mbure ngudzu hi bwe hi va lomba khethu: ‘Gira wuhindzi u dzumeya egi.’ Khu kharato, tepo va bombago giningwa gyogyo, si olovelegide gu hi ‘garadzega monyoni’, kha nga Pawulo. Ha gu garadzega monyoni, nasiri khu gu mba na gukhodwa, ganiolu kholu hi haladzago vathu khu lisine. Khu kharato, ambari olu dzimbe dzitepo hi dzipwago na hi vbede tshivba, hi ngo simama gu tshumayela. Adzina hi nga dzumeleyana ni esi si ganedwago khu Elena, a gu piyonero khu 25 myaga: “Nyi di gu wona gutshumayela na gu garadza. Ambari ulolo, wu mwalo wumbe thumo nya wadi nyi nga wu girago.”
SO THULA GINANI GU THEYA MIHANDRO?
6. Giwudziso muni hi na bhulago khigyo olu?
6 Khu ginani hi nga tiyisegago gu khethu hi nga dugeleya gutshumayelani ni hayini hi tshumayelago umo? Gasi gu hlamula giwudziso gyogyo nya lisima ngudzu, hongoleni hi ganeya khu siyeyedzo sivili sa Jesu si ganeyago khu lisima nya gu hi “thela mihandro.” (Matewu 13:23) Giyeyedzo nyo pheye khya miuvha.
7. a) Avba nya gipimaniso gya Jesu, khu mani “mulimi,” “litshina nya . . . miuvha,” ni ‘matamo’? b) Giwudziso muni hi ngo vbwetago gu mana hlamulo wagyo?
7 Leri Johane 15:1-5, 8. Avba nya gipimaniso gegi, Jesu tshamusede gu khuye Jehovha khuye “mulimi,” uye Jesu khuye “litshina nya . . . miuvha,” nigu vapizane vaye khavo ‘matamo.’ * (Wona tshamuselo wa vbavbatshi.) Khavbovbo Jesu a di embeya vapizane vaye khuye: “Babe wangu a na dhumiswa mwa gu ninga mihandro nya yingi; khu kharato, mu na khala vapizane vangu.” Gasi so thula ginani gu theya mihandro? Avba nya gipimaniso gegi, Jesu kha nga ba a ganeya khegi handro wowo wu gu igyo khu lisine, ganiolu a di gu ninga magavbudzo basi ma hi phasago gu mana hlamulo nya giwudziso gyogyo.
8. a) Avba nya gipimaniso gya Jesu, khu ginani gu “thela mihandro” si gu mba thula gu gira vapizane nya vaphya? b) Ginani hi nga tiyisegago khigyo avba nya esi Jehovha a hi lombago gu gira?
8 Jesu ganede esi khu Babe waye: “Ni levbini litamo li nyi lumbago, la gu mba ninga mihandro, uye a na li pila.” Khu mambe maganelelo, hi nga khala basi sithumi sa Jehovha ha gu thela mihandro. (Matewu 13:23; 21:43) Khu kharato avba nya gipimaniso gegi, gu theya mihandro kha si thuli gu gira vapizane nya vaphya. (Matewu 28:19) Nari khatshi kharato, Dzifakazi nyo tumbege dzi nga mba phasa muthu gu khala mupizane wa Jesu dzi di hadzi fana ni matamo ma gu mba theya mihandro. Ganiolu khandri kharato! Khu ginani? Kholu kha hi si kodzi gu gurumedza vathu gu khala vapizane. Jehovha na ni lihaladzo. Kha na nga tshuka a hi lomba gu gira silo hi gu mba si kodza. Uye a gu hi lomba basi gu gira esi hi si kodzago. — Dhewuteronome 30:11-14.
9. a) Ho theya kharini mihandro? b) Gipimaniso muni hi na ganeyago khigyo avba nya ndrimana yi landreyago?
9 Ina ka, so thula ginani gu theya mihandro? Gilo nya gu hatshavbo hi ngu gi kodza gu gira. I thumo muni owu Jehovha a ningidego sithumi saye satshavbo? Gu tshumayela mahungu nya yadi nya Mufumo wa Nungungulu. * (Wona tshamuselo wa vbavbatshi.) (Matewu 24:14) Gipimaniso gya Jesu nya muyali gi ngu si vega gwadi guagani. Hongoleni hi ganeya khu gipimaniso gyogyo.
10. a) Ginani dzimbewu ni wulimi avba gipimaniso gya Jesu? b) Ginani egi litshina nya tirigo li theyago?
10 Leri Luka 8:5-8, 11-15. Avba nya gipimaniso nya muyali, Jesu tshamusede gu khuye mbewu “magana ya Nungungulu,” mwendro mahungu ma ganeyago khu Mufumo wa Nungungulu. Wulimi go thudwa monyo nya muthu. Mbewu yi thegidego wulimeni nya wadi yi di tsitsa mikhamba, yi thunga, yi khala simbo. Khavbovbo, simbo wu di theya “lizana dzimbewu.” Nari khatshi simbo wowo wu diri litshina nya tirigo, na wu thede mihandro muni? Ina wu di hadzi theya sitshinana nya tirigo? Ne, na wu thede dzimbewu, edzi khu gu gimbiya nya tepo dzi dandrago dzi khala matshina nya tirigo. Avba nya gipimaniso gegi, mbewu mweyo yi di theya lizana dzimbewu. Isoso sa gu hi hevbudza ginani khu thumo wathu nya gutshumayele?
Hi nga theya kharini mihandro “nyamba rereka”? (Wona ndrimana 11)
11. a) Gipimaniso nya muyali gya gu hi hevbudza ginani khu thumo nya gutshumayele? b) Hi nga theya dzimbewu nya dziphya khu ndziya muni?
11 Tepo vavelegi vathu nya maKristo mwendro dzimbe Dzifakazi dza Jehovha va hi hevbudzidego khu Mufumo wa Nungungulu, si di gu fana ni gu ba va yala mbewu wulimeni nya wadi. Va tsakide ngudzu khu gu wona gu khavo hi dzumede mahungu yoyo. Mbewu yoyo yi simamide gu dandra kala yi pheya gu theya mihandro. Isoso khidzo saye ni litshina nya tirigo hi ganedego khilo gu khethu kha li theyi matshina ya walo, ganiolu la gu theya mbewu nya yiphya, khu kharato anethu kha hi giri vapizane nya vaphya, ganiolu ha gu yala dzimbewu nya dziphya. * (Tshamuselo wa vbavbatshi.) Ha gu si gira kharini isoso? Tepo yatshavbo hi bhuleyago vambe khu Mufumo wa Nungungulu, khidzo saye ni gu ba na hi swaya dzimbewu dzi yadwego myonyoni gwathu. (Luka 6:45; 8:1) Khu kharato tepo hi simamago gu tshumayela mahungu nya Mufumo wa Nungungulu, ha gu theya mihandro “nyamba rereka.”
12. a) Ginani hi gi hevbulago avba nya gipimaniso nya miuvha ni muyali? b) Wa gu dzipwa kharini khu gihevbudzo gyogyo?
12 Ginani hi gi hevbulago avba nya gipimaniso gya Jesu nya miuvha ni muyali? Ho hevbula gu khethu gu “thela mihandro” kha si thuli gu vathu va dzumeya mahungu nya Mufumo. Sa gu thula gu hi simama gu tshumayela. Pawulo ganede sasimweso tepo a nga khuye: “Muthu ni muthu a na hakhiswa mayelano khu thumo waye.” (1 Vakorinto 3:8) Jehovha a na hi tshatshazeya khu thumo wathu, nasiri khu mihandro yakona. Matilda, a gu piyonero khu 20 myaga, wari khuye: “Si ngu nyi tsakisa guti gu kheni Jehovha a gu tshatshazeya gudzigaradza gwathu.”
HI NGA THEYA KHARINI MIHANDRO NYA MBA REREKA?
13, 14. Khu guya khu Varoma 10:1, 2, khu gevbini gighelo gi giridego Pawulo a si digi gu tshumayela?
13 Ginani gi na hi phasago gu theya mihandro “nyamba rereka”? Hongoleni hi nga khedzisisa gwadi giyeyedzo gya Pawulo. Hi ngu dziti gu khethu Pawulo a di gu vbeya tshivba kholu vaJudha va nga ba va bomba mahungu Varoma 10:1, 2) Ina ka, khu ginani Pawulo a nga simama gu tshumayela?
nya Mufumo. Ambari ulolo, Pawulo gima kha diga gu va tshumayela. Uye tshamusede edzi a nga ba a dzipwa khidzo khu vaJudha vovo tepo a nga khuye: “Esi nyi si vbwetago khu monyo wangu watshavbo, nyi si lombago ga Nungungulu milombeloni gwangu, khu gu kheni . . . [va] vbanyiswe. Kholu nyi ngu dzi kodza gu va emela nyi fakaza gukheni avo va ngu dzi garadza ngudzu khu silo sa Nungungulu. Nombo basi khu gu va gu dzi garadzela wukhumuni.” (14 Nyo pheye, Pawulo a di khuye a di gu tshumayela vaJudha kholu ‘khiso a nga ba a si vbweta khu monyo waye watshavbo.’ Khu lisine uye a di gu vbweta gu khuye va vbulugiswa. (Varoma 11:13, 14) Nya wuvili, wari khuye a di va ‘lombeleya ga Nungungulu.’ Pawulo lombide Jehovha gu khuye a phasa vaJudha khu moyo ni moyo gasi gu va dzumeya mahungu nya Mufumo. Nya wuraru, Pawulo a di khuye: “Avo va ngu dzi garadza ngudzu khu silo sa Nungungulu.” Pawulo a di gu wona silo nya sadi ga vathu ni makodzelo yawe nya gu thumeye Jehovha. A di gu dziti gu khuye vaJudha vovo nyo vbisege na va khade valandreyi nyo vbisege va Kristo, kha nga uye.
15. Hi nga mu pimedzeya kharini Pawulo? Ninga siyeyedzo.
15 Hi nga mu pimedzeya kharini Pawulo? Nyo pheye, hi yede gu vbweta ava va ‘dzi emisedego gu hakha guvbanya nya gupindruge.’ Nya wuvili, hi lomba Jehovha gu khethu a phasa va nya myonyo nya yadi gu dzumeya tepo hi va tshumayelago. (Mithumo 13:48; 16:) Khiso a girago Silvana, a gu piyonero khu gipimo nya 30 myaga. Wari khuye: “Na nyi si gu beyi ndrangani nyo khaguri gipandreni gwangu, nyo gombeya ga Jehovha, nyi mu lomba gu kheni a nyi ninga mawonelo nya yadi.” Anethu hi ngu gombeya gasi gu dzingilozi dzi hi phasa gu mana vathu va tsakeyago. ( 14Matewu 10:11-13; Gutuledwa 14:6) Robert, a gu piyonero khu 30 myaga ni gu vbindra, wari khuye: “Si ngu tsakisa ngudzu gu thuma ni dzingilozi edzi dzi si tigo esi si dugeleyago womini ga ava hi va tshumayelago.” Nya wuraru, ha gu zama gu wona esi nya sadi ga vathu ni makodzelo va gu nawo gasi gu thumeya Jehovha. Carl, lidhota li gu na ni 50 myaga ni gu vbindra na li gu bhapatisidwe wari khuye: “Nya gu zama gu tugula gilwana gi na yeyedzago gutsakeya nya muthu, gani mahegonyana, makhedzelo nya yadi mwendro giwudziso nyo pwale.” Ha gu gira silo sesi, hi nga theya mihandro “nyamba rereka,” kha nga Pawulo.
“U NGA KHALI KHU MAWOGO”
16, 17. a) Gihevbudzo muni hi nga gi manago omu ga Muhevbudzi 11:6? b) Thumo wathu nyo tshumayele wu nga khuha kharini ava va hi wonago?
16 Gima hi nga divali edzi thumo nya gutshumayele wu nga phasago khidzo vathu, ambari so ba si wonega nga khatshi mwalo a hi engiseyago. (Leri Muhevbudzi 11:6.) Hi ngu wonwa khu vathu. Avo va ngu si wona gu khavo hi ambade gwadi nigu hi na ni githawo nigu hi ngu hidzimelega. Isoso si nga va samadzisa, nigu khu gu gimbiya nya tepo, ambari ava va nga ba va hi tsorodzeya va nga pheya gu hi wona gwadi. Sergio ni Olinda va si wone khu maho isoso.
17 Sergio wari khuye: “Hi di emidenyana gu hongola sibhombatunu khu kotani nya madwali. Litshigu hi nga pheledza, ava va nga ba va vbindra va di gu hi wudzisa gu khavo, ‘Ginani gi nga dugeleya? Hi di gu mi dileya.’” Na gu hega, Olinda a di engedzeya khuye: “Vatshembeyi nya sibhomba va di gu hi khusedzeya mawogo nigu vambe vakona na va khade sibhombane gwawe va di gu khavo: ‘Thumani gwadi!’ Va bwe va lomba dzirevhista dzathu.” Sergio ni Olinda va samade ngudzu tepo mwama nyo khaguri a ngata avba nya gikarinyana gyawe nyo tshumayele khigyo, a ta va ninga senge, a bwe a va bonga khu thumo va wu girago.
18. Khu ginani u dzi emisedego gu theya mihandro “nyamba rereka”?
18 Wa gu mba ‘khala khu mawogo,’ u simama gu bhuleya vambe khu Mufumo wa Nungungulu, u na ba na uri ni gipandre nya lisima ngudzu thumoni nyo ninge “wufakazi mayigoni gwatshavbo.” (Matewu 24:14) Guvbindra satshavbo, u nga mana gutsaka nya gukhongolo khu guti gu khuwe wa gu tsakisa Jehovha. Uye a ngu haladza vatshavbo va theyago mihandro “nyamba rereka”!
^ ndri. 2 Ambari Jesu ganede khuye gutshumayela “tigoni gwawe” gu di gu garadza. Isoso si lovidwe omu nya mabhuku yatshavbo nya mana ma ganeyago khu gutshumayela gwaye. — Matewu 13:57; Marko 6:4; Luka 4:24; Johane 4:44.
^ ndri. 7 Ambari olu matamo ya avba nya gipimaniso gegi ma thulago maKristo ma na gu hongolago ndzadzini, igyo gya gu ninga gihevbudzo sithumi satshavbo sa Nungungulu.
^ ndri. 9 Lito gu “thela mihandro” li nga tshamuseya gambe gu theya “[mihandro, NM] nya liphuvbo.” Ambari ulolo, ndrima yeyi ni eyi yi landreyago dzi na ganeya ngudzu khu gu theya mihandro khu magana yathu, mwendro gu tshumayela khu Mufumo wa Nungungulu. — Vagalatiya 5:22, 23; Vahebheru 13:15.
^ ndri. 11 Dzimbe dzitepo, Jesu thumiside siyeyedzo nya gu yale ni gu funyeya gasi gu fananisa thumo nya gu gire vapizane. — Matewu 9:37; Johane 4:35-38.