MATIMO NYA GUVBANYA
Nyi phede nga gisiwana, nyi hegisa nga gighanyi
Nyi velegedwe gibarakanani, omu nya gidhoropana gi ranwago pwani Liberty, Indiana, E.U.A. Tepo nyi nga velegwa, vavelegi vangu va diri ni gikhwatana gimwegyo ni sagadzyana sivili. Khu hwane, mamayi a di velega gambe sikwathana sivili ni gyagadzyana gimwegyo.
Gibarakana nyi nga velegedwa umo
NA NYI ngo hevbula xikola, kha ga vbindrugedza silo nya singi. Vathu u nga ba u pheya gu hevbula navo khavo va vamowo u nga ba u hegisa navo gu hevbula. U di gu mati malina nya vathu nya vangi va dhoropani, nigu anavo va di gu liti lago.
Nyi diri moyo nya 7 sanana, nigu nyi hevbulede gu lima na nyi ngari gyanana
Gidhoropana gya Liberty gi di gu randredwe khu mathembo, nigu egi gi nga ba gi limwa ngudzu, sivbiya. Tepo nyi nga velegwa, papayi wangu a di gu thuma omu nya lithembo la gipandreni gwathu. Na nyi ngari muphya, nyi di hevbuleya gu gimbidzisa torotoro ni gu gira yimbe mithumo thembweni.
Kha nya manega ni papayi nya lidzaha. Tepo nyi nga velegwa, papayi wangu a diri ni 56 myaga, mamayi wangu a diri ni 35 myaga. Ambari ulolo, papayi wangu a diri ni tshivba nigu a diri mwalo sitshetsheya. A di gu wu gola thumo nya tshivba nigu hevbudzide sanana saye gu wu gola niso. Kha nga ba a mana dzitsapawu nya dzingi, ganiolu a di gu hi ninga wulanga nyo lale, sombo nyo ambale, ni guhodza nyo eneye. Nigu a di gu oloveya gu hagana ni ethu. Papayi wangu fude na ari ni 93 myaga. Mamayi wangu fude na ari ni 86 myaga. Mwalo gwawe a nga thumeya Jehovha. Ambari ulolo, moyo nya vandriyangu, lidhota nyo tumbege gukhugeya khu 1972.
WANANA WANGU
Mamayi wangu a diri mukhongeyi nya khongolo. Dzatshavbo dzidimingu a di gu hongola ni ethu tshetsheni yi
ranwago pwani Bhatista. Tepo nyi nga ba nyiri ni 12 myaga, nyi di pheya gupwa na gu ganedwa khu gihevbudzo nya Vararu-moyo. Khu kharato nyi di wudzisa mamayi kheni: “So kodzega kharini gu Jesu a khala Gyanana ni Babe khu tepo yamweyo?” Nyi ngu wu dundruga hlamulo waye: “Mwanagu, sihalo wu gu mwalo tshamuselo. Ethu kha ha giredwa gu si pwisisa isoso.” Khu lisine si diri mwalo tshamuselo gwangu. Ambari ulolo, tepo nyi nga ba nyiri ni 14 myaga, nyi di bhapatiswa omu nya tshetshe ya gipandreni gwathu. Va di nyi nega guraru matini, nyo pheye khu lina la Babe, nya wuvili khu Gyanana, nya wuraru khu liphuvbo nya guage!1952 Na nyi ri ni 17 myaga, na nyi si gu hongoli wusotshwatunu
Na nyi ngo hevbula, nyi diri ni pari yi nga ba yiri mudwani nya boxe, nigu yi di nyi kutsedzeya gu hevbuleya gu dwana neni. Khavbovbo nyi di pheya gu trenari, nyi bwe nyi gira gipandre nya tsawa nya vadwani wu nga ba wu ranwa pwani Luvas de Ouro. Nyi di si si kodzi gwadi, khu kharato kha nya hweya gu si tsukula. Khu hwane nya tepo, nyi di ranwa ga tsawa nya masotshwa wa Estados Unidos nyi rumedwa Dzerimani. Tepo nyi nga ba nyi thumeya iyoyo, dzipfhumu dzangu dzi di nyi rumeya gu ya engedzeya sihevbulo nya wusotshwa kholu va di gu pimisa gu khavo nyi na khala muthangeyi nya wadi. Avo va di gu vbweta gu khavo nyi thuma wusotshwa womi wangu watshavbo. Ambari ulolo, kha nya nga ba nyi dzina gu simama wusotshwatunu, khu kharato hwane nyo ba nyi vbedzide thumo wangu nya myaga mivili, nyi di duga wusotshwatunu khu 1956. Nya mba hweya, nyi di dzi pata ni wumbe tsawa nya masotshwa.
1954-1956 Myaga mivili na nyi ri wusotshwatunu, Estados Unidos
NYI PHEYA WOMI NYA WUPHYA
Na nyi si gu hevbuli lisine, nyi diri ni mawonelo nyo hosege maningano ni edzi mwama nya lisine a yedego gu khala khidzo. Nyi di gu pengisidwe khu dzifilmu ni vathu nyi nga ba nyi vbanya navo. Nyi di gu kheni vama va ganeyago khu Bhibhiliya khandri vama-vama. Ganiolu nyi di pheya gu hevbula silo si nga vbindrugedza womi wangu. Litshigu limwedo, na nyi gu gimbidzisa movha yangu nyo fuviye ni gu mbura ngudzu dhoropani, nyi khusedzedwa libogo khu sagadzyana sivili gasi gu nyi si yela. Gu diri sagadzyana sivili nya valandra va mwama wa hane wangu. Sa sivili si diri Dzifakazi dza Jehovha. Si di nyi ningide dzirevhista Mukhedziseyi ni Despertai! gupheyani, ganiolu Mukhedziseyi wu di gu nyi garadzeya ngudzu gu wu pwisisa. Si di nyi raneya Gihevbulo nya libhuku nya libandla, wu diri tshangano nya wudugwana nya gihevbulo nya Bhibhiliya ni gubhudzisana wu nga ba wu giredwa gaya gwaso. Nyi di si embeya gu kheni nyi ngo no pimisa khiso. Si di hega, hiso khiso: “U ngu tumbisa?” Eni kheni: “Nyi ngu tumbisa.”
Nyi dzi layide khu gu ba nyi ganede isoso, ganiolu nyi di yede gu tadzisa gitumbiso gyangu. Khu kharato, ga wutshigu wowo nyi di hongola mitshanganoni. Nyi samadzisidwe ngudzu khu sanana. Kha nya khodwa tepo nyi nga wona edzi si nga ba si yiti khidzo Bhibhiliya! Ambari olu nyi nga ba nyi hongola tshetsheni ni mamayi wangu khu Dzidimingu dzatshavbo, sidugwana ngudzu nyi nga ba nyi siti khu Bhibhiliya. Olu nyi di gu dzina ngudzu gu hevbula silo nya singi, khu kharato nyi di dzumeya gihevbulo nya Bhibhiliya. Gimwegyo nya silo nyo pheye nyi nga hevbula, lina nya lisine la Nungungulu nya Tshivba yatshavbo, Jehovha. Ga myaga yi nga ba yi vbindride, tepo nyi nga wudzisa mamayi wangu khu Dzifakazi dza Jehovha, a di ganeya basi khuye: “Ohh, avo va gu khozeya mwama moyo wa gale nya pwani khu Jehovha.” Ganiolu, olu nyi ngu wona gu kheni maho yangu ma di gu tudwa!
Nyi vbiredzide gu dandra khu liphuvboni, kholu nyi di gu dziti gu kheni nyi di li mane lisine. Khu Março nya 1957, hwane nya 9 migima basi na nyi wonide tshangano nyo pheye, nyi di bhapatiswa. Mavbanyelo yangu ma di vbindrugedzide. Nyi tsakide ngudzu kholu nyi hevbudego esi Bhibhiliya yi si hevbudzago maningano ni Isaya 53:2, 7) Nyi hevbude gu kheni mulandreyi nya lisine wa Jesu “gu vbwetega gu pwanana ni vathu vatshavbo.” — 2 Thimoti 2:24.
mwama nya lisine. Jesu a diri mwama nyo vbeleye. A diri ni tshivba guvbindra vama vatshavbo. Ganiolu uye kha dzi bedzedzeya omu nya midwanisanu. Wulangani nya isoso, a di “tshaniswa a pwiswa wuvi” kha nga si nga ba si profetidwe. (Ga mwaga wu nga landreya, khu 1958, nyi di pheya thumo nya wupiyonero. Nya mba hweya, si di hunga gu nyi ema khu gitepwana. Khu ginani? Nyi di hungide gu tshadha ni Gloria, moyo nya sagadzyana sile sa sivili si nga nyi raneya gihevbulo nya libhuku! Gima kha nyi dzi layi khisoso. Gloria a diri genge, nigu a ngari genge kala muhuno. Gwangu, uye na ni lisima ngudzu guvbindra dzidhiyamante nya lisima ngudzu, nigu nyi tsakide ngudzu khu gu ba nyi tshadhide naye! Emani a mu tshamuseya vbadugwana khu guvbanya gwaye.
“Vandriyangu vatshavbo va diri 16, 8 nya vama ni 8 nya vanyamayi. Mamayi wangu a diri Fakazi nyo tumbege. Fude na nyiri ni 14 myaga. Hwane nya isoso, papayi wangu a di pheya gu hevbula Bhibhiliya. Khu kotani nya olu hi nga ba hiri mwalo gambe mamayi, papayi a di ya ganeya ni muthangeyi nya xikola. Koma wangu nya nyamayi a diri ga mwaga nyo hegise nya xikola sekundariya, khavbovbo papayi a di ya lomba gu khuye hi hongola xikwatunu khu matshigu nyo hambaneyane. Khu kharato moyo wathu a di hadzi tshala gaya a sayisa valandra vathu. Nigu papayi a di hadzi wuya khu thumotunu a ta mana guhodza na gu vidzidwe. Muthangeyi nya xikola a di dzumeya, hi di simama gu gira kharato kala a nga vbedza xikola koma wangu. Dzindranga dzimbili nya Dzifakazi dza Jehovha dzi di hevbula ni ethu Bhibhiliya, 11 nya ethu hi di khala Dzifakazi dza Jehovha. Nyi di gu gola ngudzu gu tshumayela, ambari olu nyi nga ba nyi khala dzitshoni tepo yatshavbo. Mwama wangu, Sam, a ngu nyi phasa gu emisana nadzo myaga yeyi yatshavbo.”
Eni ni Gloria hi tshadhide khu Fevereiro nya 1959. Hi dzi buzide hatshavbo khu thumo nya wupiyonero. Khu Julho nya mwaga wowo, hi di lomba gu ya thumeya Bheteli. Khu lisine hi di gu dzina ngudzu guya thuma tsindza nya mafu yatshavbo. Moyo nya ndriyathu nyo golege ngudzu nyo pwani khu Simon Kraker, a di bhudzisana ni ethu. A di hi embeya gu khuye Bheteli yi di si vbweti mipatwa khu tepo yoyo. Hi di gu dzina ngudzu gu ya thumeya Bheteli, ganiolu si dzegide myaga nya yingi gasi gu hi hongola.
Hi di loveya tsindza nya mafu yatshavbo hi lomba gu khethu va hi rumeya omu gu nga ba gu vbwetega ngudzu vahuweleyi. Va di hi ninga lithomo nyo hongole wulanga wumowo basi: Pine Bluff, Arkansas. Khu tepo yoyo gu diri ni mabandla mavili basi Pine Bluff. Limwedo nya vahuweleyi nya vatsungu basi ni limbe nya vahuweleyi nya valandre basi. Ethu hi di rumedwa ga eli nya valandre, li nga ba liri ni 14 vahuweleyi basi.
SIGARADZO NYA GIHATHEYA NYA VATHU NI TSHONGE
Adzina u nga dzi wudzisa gu khuwe khu ginani Dzifakazi dza Jehovha dzi hambanisa vahuweleyi nya valandre ni ava nya vatsungu. Khu gu hi diri mwalo lipindru khu tepo yoyo. Wufumu wu di gu himbedzeya gu patedzeya dzitshonge, nigu gu diri ni maghilivindra gambe. Malangani nya mangi, vandriyathu va di gu thava gu tshungunuledwa Salawu yawe nya Mufumo va gu pata vathu nya dzitshonge nyo hambane wulanga wa wumowo gasi gu khozeya. Silo soso si di gu girega kamo. Dzifakazi dza Jehovha nya valandre dza gu tshumayela khu ndranga ni ndranga gipandreni nya vatsungu, dzi di gu modwa, adzina dzi bwe dzi vetwa. Khu kharato gasi gu thumo nyo tshumayele wu simama, hi di engisa milayo na hi vireya gu khethu silo si na vbindrugedza.
Gutala nya dzitepo kha sa nga ba si vbevbuga gu tshumayela. Tepo hi nga ba hi tshumayela gipandreni nya valandre, hi di gu tshuka hi phazama hi khokhota ndrangani nya vatsungu. Si di gu lomba gu hi hunga khu guvbiredza esi hi na girago, gu khethu: Hi na zama gu mu tshumayela khu guvbiredza mwendro hi na lomba divalelo basi hi vbindra? Khidzo si nga ba si khade khidzo silo matshiguni yale.
Khu lisine, kha nga vapiyonero, gu di gu vbwetega gu hi mana dzitsapawu gasi gu dzi vbanyisa. Gutala nya mithumo yathu yi di gu hakhisa dzitsapawu nya dzidugwana. Gloria a di gu thuma dzikitalini. Mambe malanga nyi di gu dzumeledwa gu mu phasa gasi gu a vbiredza gu vbedza. Va di gu hi ninga guhodza, ogu nyi nga ba nyi hodza ni Gloria. Semana ni semana, Gloria a di gu pasari ga ndranga nyo khaguri. Eni nyi di gu sayisa senge, nyi handza dzijanela ni simbe ni simbe ndrangani momo. Hi di ya handza dzijanela ndrangani nyo khaguri. Gloria a di gu handza khu ndrani eni nyi handza khu vbavbandze. Isoso si dzegide lidambo latshavbo, khu kharato va di hi ninga guhodza. Gloria a di ya hodzeya nyumbani ganiolu eni nyi di yede gu dzi hambanisa navo. Nyi di yede gu hodzeya omu nya garaji, ganiolu
nyi di si khathali khiso. Gu di ri guhodza nya gwadi. Avo va di ri vathu nya vadi ngudzu, ganiolu va di gu giriswa khu vathu va gipandreni gwawe. Nyi ngu dundruga litshigu limwedo hi nga ema dzibhombatunu. Hwane nyo ba hi thede mafura movhani gwathu, nyi di lomba mwama moyo nya tsungu a nga ba ari vbale gu kheni Gloria a nga thumisa gipeto gani. A di nyi khedza na gorogide ngudzu khuye: “Gi segidwe.”SIGIRO NYA WUWADI NYI SI SI DIVALIGO
Ambari ulolo, hi manegide ni dzitepo nyo tsakise ni vandriyathu, nigu hi di gu wu gola thumo nyo tshumayele! Tepo hi nga vboha Pine Bluff, hi di ya khala gaya ga moyo nya ndriyathu a nga ba a gira thumo wu girwago khu mutshanganisi nya huwo nya madhota olu. Mwangadzi waye a di si gu hevbuli lisine, khu kharato Gloria a di pheya gu hevbula naye Bhibhiliya. Khu tepo yamweyo, eni nyi di pheya gu hevbula ni gyanana gyawe ni mwama wagyo. Mamayi ni gyanana va di hunga gu thumeya Jehovha, khavbovbo va di bhapatiswa.
Hi di ri ni dzipari nyo golege libandlani nya vatsungu. Dzi di gu hi rana dzindrangani gwadzo gasi gu ya hodza nadzo, ganiolu si di gu lomba gu hi hongola na li pfode gasi gu hi si wonwi khu vathu na hiri gumogo. Hengeledzano mweyo yi nga ba yi ranwa pwani i Ku Klux Klan (KKK), yi nga ba yi seketeya wughevenga ni gihatheya nya dzitshonge, yi di kudzugide ngudzu teponi yoyo. Nyi ngu dundruga wutshigu nyo khaguri nyi nga wona mwama na khade vbamwanya nya ndranga yaye, na ambade ngandzu nyo age ni gihugo, nya nga esi sa na KKK. Silo nyo vivbe si nga ba si dugeleya tepo yile kha sa nga ba si digisa vandriyathu gu yeyedza wuwadi. Litshigu limwedo, hi di gu vbweta dzitsapawu gasi gu hongola tshanganoni nya mughanga, khavbovbo moyo nya ndriyathu a di dzumeya gu renga movha yathu gasi gu hi kodza gu hongola. Litshigu limwedo, na gu vbindride ngima, hi di garade ngudzu khu gu gimbiya khu ndranga ni ndranga hi gimbidzisa sihevbulo nya singi nya Bhibhiliya teponi nyo vbise. Khavbovbo hi di bweleya gaya hi ya mana gilo gi nga hi samadzisa. Hi di ya mana movha yathu na yi emisidwe mbeli nya nyumba! Gu di ri ni gidangaliyana avba nya livhidru nya movha gi nga ba gi khigyo: “Nya gu mi bweledzeya movha yanu kha nga giningwa. Kheni ndriyanu.”
Gu na ni gimbe gigiro nya wuwadi gi nyi khuhidego ngudzu. Khu 1962, nyi di ranedwa gu ya hevbula Xikola nya Wuthumeli nya Mufumo, Lansing, Novha Yorki. Ngima rumba na gu hevbudzwa vawoneleyi nya mabandla, nya sipandre, ni vawoneleyi nya mughanga. Khu tepo yoyo, nyi diri mwalo thumo, nigu dzitsapawu hi nga ba hiri nadzo dzi diri dzidugwana ngudzu. Ambari ulolo, koponi nya dzitelefone ya Pine Bluff yi di bhudzisanide ni eni gasi gu nyi thola. Nari khatshi va di nyi thode, nyi di hadzi khala mulandre nyo pheye gu thuma omu nya koponi yoyo. Khu gu hegisa va di nyi embeya gu khavo va na nyi thola. Nyi di hadzi rini? Nyi diri mwalo dzitsapawu nyo hongole Novha Yorki. Gasi gu ganeya lisine, nyi di pimiside gu dzumeya thumo nyi thindreka gu hongola xikwatunu. Na nyi vbweta gu loveya Bheteli, gu di dugeleya gilo nya gu gima kha nyi na nga gi divala.
Moyo nya ndriyathu nya nyamayi wa libandlani gwathu, oyu mwama waye a nga ba ari mwalo lisineni, a di khokhotha lidimba lathu ni dzimindru ngudzu a hi ninga envhilope. Yi di tade khu dzitsapawu. Uye gumogo ni simbe sanana saye va di gu phindruleya gu hongola thembweni gwawe nya wughama va ya hagula. Va di gu gira isoso gasi gu va mana dzitsapawu nyo eneye nya gu
nyi hongola Novha Yorki. Uye a di khuye: “Gimbiya xikwatunu u ya hevbula silo nya singi khavba u na si kodzago khavbo, gasi u wuya u ta hi hevbudza!” Khavbovbo, nyi di wudzisa koponi nya dzitelefone gu kheni nyi nga pheya gu thuma hwane nya livbandre dzisemana gani. Va di dzegeya gu khavo, “Ahihi!” Ganiolu isoso kha sa nyi garadza. Nyi di hunga gu hongola xikwatunu. Nyi ngu tsaka ngudzu kholu nyi nga ne dzumeya thumo wule!Gloria a gu dundruga edzi a nga ba a dzipwa khidzo tepo hi nga ba hiri Pine Bluff: “Nyi di gu gi gola gipandre gile! Nyi di gu gimbidzisa sihevbulo nya Bhibhiliya nyo khugeye 15 kala 20. Khu kharato nyi di gu thuma khu ndranga ni ndranga ni dzimindru, khu hwane nyi gimbidzisa sihevbulo nya Bhibhiliya lidambo latshavbo, yimbe tepo kala dzi 22. Gu tshumayela gu di gu tsakisa ngudzu! Nyi di gu tsakeya gu simama iyo. Gasi gu ganeya lisine, kha nya nga ba nyi dzina gu vbindrugedza thumo wangu gasi gu beleya thumo nyo endreye mabandla, ganiolu Jehovha a di gu pimisa simbe.” Khiso kamo a giridego.
THUMO NYO ENDREYE MABANDLA
Na hi ngo thuma wupiyonero Pine Bluff, hi di lomba gu thuma kha nga vapiyonero nyo hathege. Khu lisine hi di virede gu ranwa. Khu ginani? Kholu hi di gu dziti gu khethu muwonelyi nya mughanga a di gu vbweta gu khuye hi ya phasedzeya libandla la Texas, nigu a di gu vbweta gu khuye hi ya thuma iyo kha nga vapiyonero nyo hathege. Hi ma tsakede mawonelo yoyo. Khu kharato hi di vireya hi vireya, na hi gu khethu hi na hlamudwa, ganiolu hi di si hakhi mahungu nya maphya. Khu hegisa, li di vboha lidangaliya. Hi di gu rumedwa gu ya woneleya gipandre! Ulolo khu Janeiro nya 1965. Ndriyathu Leon Weaver, a gu mutshanganisi nya Kometi nya Litamo ya Estados Unidos olu, anuye a di rumedwa gu ya thuma kha nga muwoneleyi nya gipandre.
Nyi di si wu tiyeli wuwoneleyi nya gipandre. Na nyi si gu pheyi, ndriyathu James A. Thompson, a di khedziseya mathumelo yangu. Khu gwadi, a di nyi yeyedza omu nyi nga ba nyi yede gu tshukwadzisa, a nyi yeyedza wugengeyi a yedego gu manega nawo muwoneleyi nya gipandre. Gitepwana hwane nya isoso, nyi di pheya thumo nyo endeye mabandla, nyi li wona lisima nya wusingalagadzi wule. Hwane nyo ba nyi phede gu thuma, Ndriyathu Thompson a diri uye muwoneleyi nya mughanga nyo pheye nyi thumidego naye. Nyi hevbude nya singi ga ndriyathu yoyo nyo tumbege.
Nyi ngo dundruga giphaso nyi ningidwego khu vandriyathu nyo vidzwe
Matshiguni yale, muwoneleyi nya gipandre a di gu mana sihevbulo nya sidugwana. Nyi khedzisede muwoneleyi nya gipandre na gu endreya libandla ndrani nya semana mweyo. Khavbovbo uye a di nyi khedziseya na nyi gu endreya limbe libandla khu semana mweyo. A di nyi ninga mawonelo ni wuthangeyi. Ganiolu hwane nya isoso hi di thuma honga. Nyo dundruga tepo nyi nga embeya Gloria kheni: “Ina kamo so hunga gu a hongola olu?” Khu gu gimbiya nya tepo, nyi di pwisisa gilogyo nya lisima ngudzu. Vandriyathu nya gu hi phase, vomo tepo yatshavbo, ganiolu wo nga nga va dzumeleya gu gu phasa. Nyi ngo gi dundruga giphaso nyi ningidwego khu vandriyathu nyo vidzwe nya nga J. R. Brown, muwoneleyi nya gipandre, ni Fred Rusk a gomogo Bheteli.
Gihatheya gi diri malangani yatshavbo matshiguni yale. Ga tepo mweyo, va na KKK va di hunga gu gi wusa ga lidhoropa nyo khaguri hi nga ba hi li endreya Tennessee. Nyo dundruga yimbe tepo hi nga ema avba nya restawurante gasi gu degudzanya nyakhwali na hiri gutshumayelani. Tepo nyi nga vbweta gu thumisa gipeto, nyi di landrwa khu mwama moyo a nga ba a dzi lovetede sithombe nya gihatheya nya dzitshonge na gu nyi khedza nyagu. Ndriyathu moyo nya tsungu, a nga ba a zimukide gu hi vbindra, a di hi teya. A ta nyi wudzisa khuye: “Ndriyathu Herd, gasi ginani?” Mumbe nuye a nga ba a vbweta thumisa gipeto a di phalalega khu guvbiredza. Myaga yatshavbo yeyi, nyi ngu si wona gu kheni egi gi vangisago gihatheya khandri tshonge nya muthu ganiolu gighoho hi gu nagyo hatshavbothu. Nyi hevbude gambe gu kheni ndriyago i ndriyago ambari a gu ba ari wa tshonge muni, nigu a na tshuka a gu feya so vbwetega.
MAHEGISO NYO TSAKISE
Hi thumide 12 myaga thumoni nyo endreye mabandla ni 21 myaga thumoni nya mughanga. Myaga nyo tsakise ni makategwa, nyo tale khu matshango nyo tiyisane. Ganiolu gu di ngari ni mambe makategwa ma nga ba ma hi vireya. Khu Agosto nya 1997 gusuva gwathu nyo khugeye gale gu di tadzisega. Hi di ranedwa gu ya thuma Bheteli ya Estados Unidos. Ulolo hwane nya 38 myaga na hi lombide. Khu ngima wu nga landreya, hi di pheya thumo wathu Bheteli. Nyi di gu pimisa gu kheni vandriyathu va nga ba va thangeya Bheteli va di gu nyi vbweta khu gitepwana, ganiolu khandriso si giregidego.
Gloria a diri genge tepo nyi nga tshadha naye, nigu a ngari genge kala muhuno
Gupheya nyi thumide omu nya Gipandre nya Thumo. Nyi hevbude silo nya singi! Vandriyathu va di gu hakha siwudziso nya singi nyo garadze si nga ba si girwa khu dzihuwo nya madhota ni vawoneleyi nya gipandre va tigoni. Nyi ngu bonga khedzi vandriyathu nyo laphise monyo va nyi hevbudzidego khidzo. Nari khatshi nyi di gu rumedwa gu ya thuma iyo gambe, nyi di hadzi ya hevbula silo nya singi ni vandriyathu vovo.
Eni ni Gloria hi ngu ma gola mavbanyelo ya Bheteli. Hi ngu gola gu heguleya gu wuga tepo yatshavbo, isoso si ngu hi phasa ngudzu Bheteli. Hwane nya mwaga, nyi di pheya gu thuma kha nga muphasedzeyi nya Kometi nya Thumo nya Huwo nya Guthangeye ya Dzifakazi dza Jehovha. Khu 1999, nyi di emiswa kha nga givbango nya Huwo nya Guthangeye. Nyi ngu hevbula silo nya singi thumoni wowo. Ganiolu gihevbulo nya lisima ngudzu khegi nya gu hungo nya libandla nya wuKristo khu Jesu Kristo, khandri muthu.
Gukhugeya khu 1999, nyi na ni lithomo nyo thume omu nya Huwo nya Guthangeye
Tepo nyi dundrugeyago khu womi wangu, nyi ngu tshuka nyi dzipwa vbadugwana nga muprofeti Amosi. Jehovha a di wona muhavisi yoyo nyo dzi nogise oyu basi a nga ba a thuma gu sayisa misimbo nya pwani figueiras, guhodza gu nga ba gu hodzwa khu sisiwana basi. Ambari ulolo, Nungungulu a di emisa Amosi kha nga muprofeti a bwe a mu kategisa ngudzu thumoni waye. (Amosi 7:14, 15) Khu ndziya yamweyo, Jehovha a di wona eni, gyanana nya mulimi nya gisiwana wa Liberty, Indiana. Jehovha nyi kategiside ngudzu, khu makategwa nya mangi nyi ma khumbugidego avba! (Mavingu 10:22) Womi wangu wu phede nga gisiwana khu nyamani, ganiolu mahegiso gakona nyo dzipwa na nyi ghanyide ngudzu guvbindra esi nyi nga nyi si pimisa!