NDRIMA NYA GIHEVBULO 19
Lihaladzo ni gululama ha gu giredwa guvivba
“Uwe khuri Nungungulu nya gugole guvivba, muthu nya guvivbe monyo, kha khali vbafuvbi gwago.” — NDZI. 5:4.
NDZIMO 54 Hi fanele kuva ni kukholwa
ESI HI NA SI HEVBULAGO AVBA NYA NDRIMA YEYI *
1-3. a) Khu guya khu Ndzimo 5:4-6, Jehovha a gu dzipwa kharini khu guvivba? b) Khu ginani hi nga ganeyago gu khethu gu pfinya sanana si ngu dwanisana ni “nayo wa Kristo”?
JEHOVHA NUNGUNGULU a ngu nyenya guvivba gwatshavbo. (Leri Ndzimo 5:4-6.) Kha hi ngo ganeya khu gu sagaredwa nya sanana, gi gu gighoho ni gilo nyo nyenyeze ngudzu! Kha nga olu hi gu Dzifakazi dzaye, ha gu pimedzeya uye khu gu nyenya nethu gusagaredwa nya sanana nigu kha hi gu dzumeleyi ndrani nya libandla nya wuKristo. — Rom. 12:9; Hebh. 12:15, 16.
2 Gusagaredwa nya sanana gu ngu dwanisana ngudzu ni “nayo wa Kristo”! (Gal. 6:2) Khu ginani hi ganeyago isoso? Kha nga hi si wonidego ga ndrima yi nga vbindra, nayo wa Kristo, mwendro satshavbo esi Jesu a hevbudzidego khu malito ni giyeyedzo gyaye si di gu seketedwa khu lihaladzo nigu si di gu andrisa gurula. Kha nga olu ma thangedwago khu nayo wowu, maKristo nya lisine ma gu phara sanana sawo khu ndziya nya gu si dzipwa na si gu vhikedwa ni gu haladzwa. Gu pfinya gyanana so girwa khu gu mba na lihaladzo, nigu gigiro nyo vivbe gi girago gyanana gi dzipwa na gya sa vhikedwa ni gu haladzwa.
3 Egi gi si tsakisigo khu gu, gu sagareya sanana khu malawu i tungu nya mafu yatshavbo, nigu maKristo nya lisine ma ngu beledwa khuwo tungu wowu. Khu ginani? “Va nya guvivbedwa khu monyo” va guya va engedzeya; vambe va nga dugeleya libandlani. (2 Thim. 3:13) Gimwegyo nya sighelo khu gu vambe va nga ba va thumeya Jehovha khu tepo nyo khaguri va phede gu tedwa khu gudogoreya nya malawu nyo vivbe va sagareya sanana. Hongoleni hi wonani gu khethu khu ginani gusagareya sanana gi gu gighoho nya gikhongolo. Khu hwane hi na wona esi madhota ma girago gasi gu phasa muthu nyo khaguri libandlani a giridego gighoho nya gikhongolo, nya nga gu pfinya gyanana, ni edzi vavelegi va yedego gu vhikeya khidzo sanana sawe. *
GIGHOHO NYA GIKHONGOLO
4-5. Khu ginani gupfinya gyanana gu gu gighoho ga igyo gyanana gyogyo?
4 Gu pfinya gyanana si ngu resa mihandro nya mba tsakisa ga muthu yoyo khu tepo nyo laphe. Si nga vbisisa monyo wa oyu a pfinyidwego ni ava va khathalago khuye, nya nga valongo vaye ni vandriyaye nya maKristo. Gu sagareya gyanana gighoho nya gikhongolo.
5 Gighoho ga oyu a pfinyidwego. Gighoho gu gira vambe vathu va tshaniseka mwendro gu va vangeya silondra monyoni. Kha nga hi na si wonago omu nya ndrima yi landreyago, oyu a pfinyago mwendro gu sagareya gyanana nyo khaguri a gu gi vangeya sigaradzo nya sikhongolo ngudzu. Si nga gi garadzeya gu tumba gambe vathu, mwendro gu dzipwa na gya sa vhikelega. Gu vbwetega hi vhikeya sanana ga sigiro soso nyo vivbe, hi bwe hi thaveleya ni gu phasa esi si dugeledwego khu gigaradzo gyogyo. — 1 Tes. 5:14.
6-7. Khu ginani gu pfinya gyanana gi gu gighoho ga libandla ni ga mifumo nya litigo?
6 Gighoho ga libandla. Givbango nya libandla gi sagaredego gyanana nyo khaguri, gya gu nyenyezisa lina nya libandla. (Mat. 5:16; 1 Ped. 2:12) Nigu isoso si di hadzi paya ngudzu myonyo nya dzimiliyoni nya maKristo nyo tumbege ma “dwanago khu kotani nya gukhodwe” gwawe! (Judha 3) Khu kharato, kha hi dzumeleyi muthu a simama libandlani a gu ba a giride silo nyo vivbe a si dzi layi a bwe a nyenyezisa lina nya ladi nya libandla.
7 Gighoho ga dzipfhumu nya mafu. Makristo gu vbwetega ma “yingela vathangeli va vegidwego khu nayo.” (Rom. 13:1) Ha gu yeyedza gu khethu hi ngu engisa khu gu ninga githawo ni gu engisa milayo nya mufumo. Givbango nya libandla gyo tshuka gi ndraga nayo wu vegidwego khu mufumo, khu giyeyedzo, gi pfinya gyanana, gya gu ghoheya wufumu nya mafu. (Fananisa Mithumo 25:8.) Madhota kha ma ningwa tshivba nyo tsayise muthu a ndragidego nayo nya litigo. Ambari ulolo, kha ma vhikeyi muthu a pfinyidego gyanana a gu tsayiswa khu mufumo khu kotani nya mithumo yaye. (Rom. 13:4) Mupfinyi yoyo a na vbwera esi a si yadego. — Gal. 6:7.
8. Jehovha a gu si wona kharini sighoho si girwago khu vathu?
8 Gu diga satshavbo, gighoho ga Nungungulu. (Ndzi. 51:4) Tepo muthu a ghoheyago muthu kwawe, a gu ghoheya Jehovha nuye. Khu giyeyedzo, nga dundrugeya khu Nayo owu Nungungulu a nga ba a ningide vaIsrayeli. Nayo wu di gu khuwo muthu a gu kanganyisa muthu kwawe a di gu ‘hambana ni milayo ya PFHUMU Nungungulu,’ mwendro a di gu ghoheya Jehovha. (Levhi 6:2-4) Gasi gu ganeya lisine, givbango nya libandla gi pfinyago gyanana gya gu ghoheya Nungungulu, kholu a gu gi kanganyisa. Gyanana gi di gu mu tumba, ganiolu a gi londrola. Khu kharato kha gi ngo tumba gambe muthu. Oyu a pfinyago gyanana nyo khaguri a gu nyenyezisa lina la Jehovha. Khu gighelo gyogyo, gupfinya mwendro gusagareya sanana gu vbwetega hi gu wona kha nga gighoho nya gikhongolo ga Nungungulu nigu gu vbwetega hi gu nyenya.
9. Mahungu muni ma seketedwago khu Bhibhiliya ma duswago khu hengeledzano ya Jehovha khu gu gimbiya nya myaga, nigu khu ginani?
9 Khu gu gimbiya nya myaga, hengeledzano ya Jehovha yi ngu dusa mahungu nya mangi ma seketedwago khu Bhibhiliya maningano ni gupfinywa nya sanana. Khu giyeyedzo, dzindrima nya Mukhedziseyi ni Khendzugani! dzi ngu tala gu ganeya khedzi ava va pfinyidwego va nga emisanago khidzo ni wuvi wakona, edzi vambe va nga va phasago ni gu va tiyisa khidzo, ni edzi vavelegi va nga vhikeyago khidzo sanana sawe. Madhota ma ngu ningwa sileletelo si seketedwago omu nya Bhibhiliya khu hengeledzano gasi gu khathaleya mahungu nya muthu a giridego gighoho gegi. Hengeledzano yi ngu ba yi tshukwadzisa sileletelo soso. Khu ginani? Gasi gu yi tiyisega gu khiyo edzi mahungu yoyo ma khathaledwago khidzo si ngu pwanana ni nayo wa Kristo gani.
GINANI EGI MADHOTA MA GIRAGO O TSHUKA MUTHU A GIRA GIGHOHO NYA GIKHONGOLO?
10-12. a) Tepo madhota ma khathaleyago mahungu nya gighoho nya gikhongolo, ginani egi ma gi dundrugago, nigu khu yavbi makungo yawe tepo ma girago isoso? b) Khu guya khu Jakobe 5:14, 15, ginani egi madhota ma dzi garadzeyago gu gira?
10 Tepo madhota ma khathaleyago mahungu nya gighoho nya gikhongolo, ma gu dundruga gu khayo nayo wa Kristo wari khuwo gu vbwetega ma phara vathu libandlani khu ndziya nya lihaladzo ma bwe ma gira esi si lulamidego ga Nungungulu. Khu kharato, ma na ni silo nya singi ngudzu nyo dundrugeye khiso tepo ma tugulago gu khayo muthu nyo khaguri giride gighoho nya gikhongolo. Madhota ma gu dzi garadzeya guagisa lina la Nungungulu. (Levhi 22:31, 32; Mat. 6:9) Ma ngu garadzega gambe khu gukhadzisega khu liphuvboni ga vandriyawe libandlani nigu ma dzi emisede gu phasa ni wevbini a sagaredwego.
11 Nigu abari gu mupfinyi wakona givbango nya libandla, madhota ma ngu dzi garadzeya gu zama gu mu phasa sa gu kodzega. (Leri Jakobe 5:14, 15.) Mukristo a dzumeyago gu beledwa khu gudogoreya nyo vivbe a thegeya gighohoni nya gikhongolo a gu dwala khu liphuvboni. Isoso so thula gu khiso wupari waye ni Jehovha wo thigitheya. * Hi nga fananisa madhota ni vadhogodheya. Ayo ma gu dzi garadzeya gu phara gwadi mudwali [a gu mupfinyi]. Ma gu thumisa wusingalagadzi nya Bhibhiliya gasi gu mu phasa gu wusedza wupari waye ni Nungungulu, ganiolu isoso si na kodzega a gu ba a dzi laya khu lisine. — Mith. 3:19; 2 Kor. 2:5-10.
12 Khu lisine, madhota ma na ni thumo nya wukhongolo. Ma ngu khathala ngudzu khu tshambi owu Nungungulu a ma ningidego. (1 Ped. 5:1-3) Ma gu vbweta gu khayo vandriyawe va dzipwa na va sayisegide libandlani. Khu gighelo gyogyo, ayo ma gu dzegeya gu gira gilogyo tepo ma hakhago mwangu nya gighoho nya gikhongolo, gupata ni gusagaredwa nya sanana. Nga dundrugeya khu siwudziso si gomogo gupheyani nya dzindrimana 13, 15, ni 17.
13-14. Ina madhota ma yede gu engisa milayo nya litigo khu gu ya ketsari wufumutunu gyo tshuka gi pfinywa gyanana? Tshamuseya.
13 Ina madhota ma yede gu engisa milayo nya litigo khu gu ya ketsari wufumutunu gyo tshuka gi pfinywa gyanana? Ina. Omu gu gu na ni milayo yoyo, madhota ma gu dzi garadzeya gu engisa milayo nya litigo khu gu ya ketsari gyo tshuka gi pfinywa gyanana nyo khaguri. (Rom. 13:1) Milayo yoyo kha yi dwanisani ni milayo ya Nungungulu. (Mith. 5:28, 29) Khu kharato, madhota mo gara mati gu khayo gu pfinyidwe gyanana, ma gu dzegeya gu wudzisa Bheteli gasi guti gu khayo ma na si pheya khu hayi.
14 Tepo madhota ma bhulago ni ava va pfinyidwego ni vavelegi vawe, mwendro mumbe muthu a tigo gyanana gi pfinyidwego, ma gu va dundrugisa khu gwadi gu khavo va ngu dzumeledwa gu yisa mahungu wufumutunu. Ganiolu, ahati abari gu gighoho gyogyo gi giridwe khu muthu wa libandlani nigu vathu vatshavbo gipandreni va gi tide? Ina muKristo yoyo a nga ya ketsari wufumutunu a yede gu pimisa gu khuye nyenyeziside lina la Nungungulu? Ahihi. Kholu musagareyi khuye a nyenyezisidego lina la Nungungulu.
15-16. a) Khu guya khu 1 Thimoti 5:19, khu ginani gu vbwetegago vathu vavili khu wudugwana wakone gasi gu fakaza, madhota na ma si gu wumbi kometi nya gulamule? b) Ginani egi madhota ma girago tepo ma tugulago gu khayo muthu nyo khaguri libandlani sagarede gyanana gya vane?
15 Khu ginani madhota libandlani ma yedego gu vbweta vathu vavili khu wudugwana wakona gasi gu fakaza gu khavo khu lisine muthu nyo khaguri giride gighoho nya gikhongolo? Nayo wowo wo gira gipandre nya milayo nyo khugege nya Bhibhiliya. Muthu a gu singedzwa gighoho nya gikhongolo, ganiolu a si dzumeyi, gu na vbwetwa vathu vavili gasi va fakaza na yi si gu wumbwi kometi nya gulamule. (Dhet. 19:15; Mat. 18:16; leri 1 Thimoti 5:19.) Ina isoso so thula gu khiso mahungu nya gu sagaredwe nya gyanana ma gu ya ketsarwi wufumutunu, gu na vbwetega vathu vavili gasi gu fakaza gighoho? Ahihi. Gileletelo gyogyo gyo thuma libandlani basi, ganiolu kha gi thumi go gara madhota mwendro vambe vathu va hunga gu ya ketsari gighoho wufumutunu.
16 Tepo madhota ma dzitigo gu khayo givbango nyo khaguri nya libandla gi ngu singedzwa gu pfinya gyanana, ma gu dzi garadzeya gu engisa milayo nya litigo khu gu bedza mahungu wufumutunu, khu hwane ma zama gu landreleya esi si giregidego. Khavbovbo, khu gu landra esi Bhibhiliya yi si ganeyago, ma na hunga gu khayo si ngu lombega gu wumba kometi nya gulamule mwendro ne. Gupheya madhota ma gu wudzisa oyu a singedzwago gu khayo a ngu dzumeya gighoho gyaye gani. A gu bomba, madhota ma na vbweta vambe vathu ava adzina va gi vbanyedego. O gara oyu a mu singedzidego ni muthu moyo khu wudugwana wakona a gi vbanyedego gighoho va fakaza gu khavo khu lisine muthu yoyo sagarede gyanana gyogyo mwendro gimbe gyanana khu tepo nyo khaguri, madhota ma na ni satshavbo ma si vbwetago gasi gu wumba kometi nya gulamule. * Go ba guri mwalo muthu nya wuvili gasi gu fakaza kha si thuli gu khiso oyu wa moyo a bikago gighoho a gu lipha. Ambari go ba guri mwalo vathu vavili gasi gu fakaza gu khavo muthu yoyo pfinyide gyanana kamo, madhota ma ngu dziti gu khayo oyu a singedzwago si nga gira na giride gighoho nya gikhongolo gi vbisisago vambe. Madhota ma na simama gu thaveleya ni gu phasa ava va ghohedwego. Vbavbandze nya isoso, madhota ma na engedzeya gu gengeya gasi gu vhikeya libandla ga muthu yoyo a pfinyago sanana. — Mith. 20:28.
17-18. Tshamuseya thumo nya kometi nya gulamule.
17 Khu wevbini thumo nya kometi nya gulamule? Lito “gulamula” kha li thuli gu khilo madhota ma gu lamula, mwendro gu hunga gu khayo mupfinyi gu vbwetega a tsayiswa khu wufumu kholu a ndragidego nayo. Madhota kha ma dzi bedzedzeyi ga edzi wufumu wu lamulago khidzo mahungu; ayo ma gu si digeya mandzani nya wufumu. (Rom. 13:2-4; Tit. 3:1) Wulangani nya isoso, madhota ma gu lamula mwendro gu hunga gu khayo muthu yoyo a na simama libandlani mwendro ne.
18 Madhota ma girago gipandre nya kometi nya gulamule, ma gu lamula mahungu ma yelanago ni wupari nya muthu ni Nungungulu ni vakhozeyi vakwawe. Ayo ma gu thumisa Bhibhiliya gasi yi va phasa gu wona gu khavo gighohi gyogyo gi ngu dzi laya mwendro ne. A gu mba dzi laya, madhota ma gu mu embeya gu khayo a na duswa libandlani, khu hwane ma tivisa libandla gu khavo kha ngari gambe Fakazi ya Jehovha. (1 Kor. 5:11-13) A gu dzi laya khu lisine, a nga simama libandlani. Ambari ulolo, madhota ma na mu embeya gu khayo kha ngo ninganedwa gambe khu gu ningwa malungelo libandlani mwendro gu gira ni wevbini thumo nya gu thangeye libandlani. Kha nga olu madhota ma khathalago khu gukhadzisega ga gyanana, ma na ndrindra vavelegi khu phuvbo ma va gengedza gu khayo gu vbwetega va gengeya tepo sanana sawe si gimbileyago vbafuvbi ni muthu yoyo. Tepo madhota ma gengedzago vavelegi, gu vbwetega ma dzi woneya gasi ma si poli malina ya vambe va sagaredwego navo.
U NGA VHIKEYA KHARINI SANANA SAGO?
Vavelegi va gu vhikeya sanana sawe gasi si si sagaredwi khu gu si bhuleya esi si yedego gu siti maningano ni malawu. Gasi gu gira isoso, vavelegi va gu thumisa wusingalagadzi va ningwago khu hengeledzano ya Nungungulu. (Wona dzindrimana 19-22)
19-22. Ginani egi vavelegi va nga girago gasi gu vhikeya sanana sawe? (Wona foto avba nya kapa.)
19 Khu mani muthu nyo pheye a yedego gu vhikeya sanana ga dzimhango? Vavelegi vakona. * Sanana sanu siningwa mu ningidwego khu Nungungulu. (Ndzi. 127:3) I thumo wanu gu vhikeya sinigwa soso. Ginani u nga girago gasi gu vhikeya sanana sago gasi si si pfinywi?
20 Gupheya, hevbula mahungu ma ganeyago khu gusagaredwa nya sanana. Guti vathu va talago gu sagareya sanana ni dzindziya va dzi thumisago gasi gu si kanganyisa. Gengeya gasi u tugula siemo ni vathu va nga vangago dzimhango dzodzo. (Mav. 22:3; 24:3) Dundruga gu khuwe gutala nya dzitepo, ava va sagareyago sanana vathu va tidwago ni gu tumbwa khiso.
21 Nya wuvili, tshulega gu bhula ni sanana sago u bwe u si kutsa gu tshulega gu bhula nago. (Dhet. 6:6, 7) Isoso sa gu pata gu khala muengiseyi nya wadi. (Jak. 1:19) Dundruga gu khuwe gutala nya dzitepo gyanana gi pfinyidwego gi ngu thava gu ganeya esi si giregidego. Adzina gi nga thava gu khigyo mwalo a na khodwago, mwendro gu thurugisedwa khoyu a gi pfinyidego gu khuye gi na si wona gyo singita gi ganeya. Wo tugula gu khuwe gyomo gi gu mba gimbiya gwadi, gi gire siwudziso khu gwadi u bwe u engiseya gwadi satshavbo gi na ganeyago.
22 Nya wuraru, hevbudza sanana sago. Si embeye esi si yedego gu siti khu malawu. Mahungu u yedego gu si bhuleya gu vbwetega ma yelana ni tanga ni mapwisiselo yaso. Si hevbudze esi si yedego gu ganeya ni gu gira tepo muthu a zamago gu si pharaphara khu ndziya nyo vivbe. Thumisa mahungu hi ningwago khu hengeledzano ya Nungungulu gasi gu vhikeya sanana sago. — Wona kwadru “ Dzi hevbudze uwe ni sanana sago.”
23. Ho gu wona kharini gusagaredwa nya sanana, nigu giwudziso muni gi na hlamudwago ga ndrima yi landreyago?
23 Kha nga Dzifakazi dza Jehovha, ha gu wona gupfinya sanana kha nga gighoho nya gikhongolo ni gu nyenyeza. Khu gu thangedwa khu nayo wa Kristo, mabandla yathu kha ma vhikeyi vasagareyi nya sanana ga mihandro nya sighoho sawe. Ina ka, ginani hi nga girago gasi gu phasa ava va sagaredwego? Ndrima yi landreyago yi na hlamula giwudziso gyogyo.
NDZIMO 42 Vunetela lava va nga ni gome
^ ndri. 5 Ndrima yeyi yi na yeyedza edzi sanana si nga vhikedwago khidzo gasi si sagaredwi khu malawu. Hi nati esi madhota ma girago gasi gu vhikeya libandla ni edzi vavelegi va nga vhikeyago khidzo sanana sawe.
^ ndri. 3 TSHAMUSELO NYA MALITO NYO KHAGURI: Gupfinya mwendro gu sagareya gyanana khu malawu go girega tepo muthu nya khongolo a thumisago gyanana gasi gu tsakisa gudogoreya gwaye nya malawu. Isoso sa gu pata gu hengeya malawu, gudandzeyana sivbango nya wuvelegi mwendro gu hengeya malawu khu hwane, gupharapharana sivbango nya wuvelegi, mavele, mwendro marago, mwendro simbe silo nyo vivbe si yelanago ni malawu. Wona gu khuwe tepo gyanana gi pfinywago, gyo vangedwa silondra monyoni, gi londrodwa; ganiolu khandri nandru wagyo. Ambari olu nya gu gutala nya dzitepo sagadzyana khiso si pfinywago, sikhwathana niso si ngu pfinywa. Ambari olu nya gu vama khavo va oloveyago gu pfinya, vanyamayi navo va ngu pfinya sanana.
^ ndri. 11 Muthu a gu gira gighoho nya gikhongolo khu gu ba a dwala khu liphuvboni kha si thuli gu khiso kha na nga vbwera mihandro nya mithumo yaye. Gighohi gi na dzi hlamuleya khu mithumo yagyo nigu Jehovha a na gi lamula khesi gi giridego. — Rom. 14:12.
^ ndri. 16 Tepo madhota ma bhulago ni mupfinyi, kha gu vbwetegi gu ma rana gyanana gi pfinyidwego gi ta patega avba nya mabhulo. Muvelegi mwendro mumbe muthu nya khongolo a tumbwago khu gyanana gyogyo na gu dzi emiseya gu ya bhula ni madhota, a nga ya ma tshamuseya esi gyanana gi si ganedego maningano ni edzi si giregidego khidzo. Khu magirelo yoyo, gyanana kha gi na nga vbisega ngudzu.
^ ndri. 19 Mahungu yaya, ambari olu ma lovedwego vavelegi, ma ngu thuma gambe ga ava khathaleyago sanana si sirigo sawe.
