1. Silo muni nya sivili hi nga tiyisegago khiso?

JEHOVHA NUNGUNGULU a ngu haladza vakhozeyi vaye. Uye a ngu va haladza gukhugeya gale, nigu a na simama gu va haladza. A ngu gola gambe gululama. (Ndzi. 33:5) Khu kharato hongoleni hi tiyisegani khu silo sivili: 1) Jehovha a ngu vbisega ngudzu tepo sithumi saye si tshaniswago. 2) Uye a ngu tumbisa gu khuye vathu vaye kha va na nga tshaniswa gambe, nigu a na tsayisa vale va va tshanisago. Ga ndrima nyo pheye nya sasamedzo wowu, * hi hevbude gu khethu Nayo owu Jehovha a ningidego vaIsrayeli khu gu thumisa Mosi wu di gu seketedwa khu lihaladzo. Wu di gu andrisa gululama — ga vatshavbo, gupata ni vale va nga ba vari mwalo wawe. (Dhet. 10:18) Nayo wowo wo yeyedza edzi Jehovha a khathalago khidzo khu vakhozeyi vaye.

2. Siwudziso muni hi na si hlamulago?

² Nayo wa Mosi wu hegiside gu thuma khu 33 E.C. tepo li nga emiswa libandla nya wuKristo. Ina so thula gu khiso maKristo ma di hadzi gu mba phaswa gambe khu nayo wu nga ba wu seketedwa khu lihaladzo ni gu andrisa gululama? Ahihi. Makristo ma diri ni nayo nya wuphya, wu gu Nayo wa Kristo. Omu nya ndrima yeyi, gupheya hi nati gu khethu ginani nayo wowu. Khu hwane hi na hlamula siwudziso sesi: Khu ginani hi nga ganeyago gu khethu nayo wowu wo seketedwa khu lihaladzo? Khu ginani hi gu khethu wu ngu andrisa gululama? Khu guya khu nayo wowu, ava va thangeyago va yede gu phara kharini vambe?

3. Kha nga hi si wonago ga Vagalatiya 6:2, “nayo wa Kristo” wa gu pata ginani?

³ Leri Vagalatiya 6:2. Makristo ma gu thangedwa khu “nayo wa Kristo.” Jesu khandri a di ninga sasamedzo nya milayo vapizane vaye, ganiolu a di va ninga sihevbudzo, sileletelo, ni matshina nya milayo gasi va vbanya khayo. “Nayo wa Kristo” wa gu pata satshavbo esi Jesu a hevbudzidego. Gasi gu pwisisa gwadi nayo wowu, dundrugeya khu siyeyedzo sesi.

4-5. Jesu hevbudzide khu dzindziya muni, nigu hevbudzide ni tepo muni?

⁴ Jesu a di gu hevbudza kharini? Gupheya, a di gu hevbudza vathu khesi a nga ba a ganeya. Malito yaye ma diri ni tshivba kholu ma di gu ganeya lisine khu Nungungulu, ma yeyedza gighelo nya guvbanya, ni gu yeyedza Mufumo wa Nungungulu kha nga ndziya nyo vbedze gutshaniseka gwatshavbo nya vathu. (Luka 24:19) Jesu a di gu hevbudza gambe khu giyeyedzo gyaye. Khu mavbanyelo yaye, a di yeyedza valandreyi vaye edzi va nga ba va yede gu vbanya khidzo. — Johane 13:15.

⁵ Jesu hevbudzide ni tepo muni? Hevbudzide ndrani nya thumo waye mafuni. (Mat. 4:23) Uye hevbudzide gambe valandreyi vaye gitepwana hwane nya guwuswe khu ga vafudego. Khu giyeyedzo, wonegide ga tsawa nya valandreyi— adzina tanga nya 500 nya avo — a va ruma gu “hevbudza mwendro gu gira vapizane.” (Mat. 28:19, 20; 1 Kor. 15:6) Kha nga hungo nya libandla, Jesu simamide gu hevbudza valandreyi vaye ambari hwane nyo bweleye ndzadzini. Khu giyeyedzo, khu 96  E.C., Kristo rumide mupostoli Johane gu tiyisa ni gu ninga wusingalagadzi maKristo nyo todzwe. — Kol. 1:18; Gutu. 1:1.

6-7. a) So manega hayi sihevbudzo sa Jesu? b) Ha gu engisa kharini nayo wa Kristo?

⁶ Ina ka, hi nga si mana hayi sihevbudzo sa Jesu? Omu nya dziIvhangeli nya dzina gu na ni silo nya singi si ganedwego ni gu girwa khu Jesu mafuni. Milowo yeyi yimbe nya giGreki nya wuKristo niyo ya gu hi phasa gu wona mawonelo ya Jesu omu nya silo, kholu valovi vakona va lovide khu tshivba ya Nungungulu nigu va diri ni “mahingigedzo mwendro mapimo ya Kristo.” — 1 Kor. 2:16.

⁷ Sihevbudzo: Sihevbudzo sa Jesu sa gu khuha sipandre satshavbo nya guvbanya gwathu. Khu kharato nayo wa Kristo wa gu thangeya  satshavbo hi girago ndrangani, thumutunu, xikwatunu, ni libandlani. Gu leri ni gu dundrugeya khu Milowo nya giGreki nya wuKristo khiyo ndziya nya gu hi wuti nayo wowu. Ha gu engisa nayo wowu khu gu pwananisa mavbanyelo yathu ni sileletelo ni matshina nya milayo ma gomogo omu nya matimo yoyo. Tepo hi engisago nayo wa Kristo, ha gu engisa Nungungulu wathu, Jehovha, a gu Gifefe nya satshavbo si hevbudzidwego khu Jesu. — Joh. 8:28.

8. Khu yevbini khokhweni nya nayo wa Kristo?

⁸ Ava va vbanyago omu nya nyumba yi vbahidwego vbatshani nya khokhweni nyo tiye, va gu dzipwa na va vhikedwe gwadi. Khu ndziya nyo fane, nayo nya wadi wu seketedwago khu lihaladzo wa gu gira ava va thangedwago khuwo va dzipwa na va vhikedwe. Nayo wa gu seketedwa khu khokhweni nyo tiye ngudzu, gu gu — lihaladzo. Khu ginani hi ganeyago isoso?

9-10. Siyeyedzo muni si yeyedzago gu khiso Jesu a di gu kutswa khu lihaladzo, nigu hi nga mu pimedzeya kharini?

⁹ Nyo pheye, Jesu a di gu kutswa khu lihaladzo gasi gu gira satshavbo a giridego. Gu pweya wusiwana vambe giyeyedzo nya lihaladzo. Khu kotani nya gupweya-wusiwana, Jesu hevbudzide sidzemo, a hawulugisa vadwali, a hodzisa ava va nga ba vapwa ndzala, a bwe a wusa ava va fudego. (Mat. 14:14; 15:32-38; Marko 6:34; Luka 7:11-15) Ambari olu si nga ba si vbweta tepo ni tshivba nya yingi gasi gu gira silo sesi, Jesu a di dzi emisede gu thangisa esi si vbwetegago ga vambe vbatshani nya esi saye. Gu diga satshavbo, yeyedzide lihaladzo khu gu ningeya womi waye khu kotani yathu. — Joh. 15:13.

¹⁰ Sihevbudzo: Hi nga pimedzeya Jesu khu gu thangisa esi si vbwetegago ga vambe vbatshani nya esi sathu. Hi nga mu pimedzeya gambe khu gu haguleya gupweya-wusiwana khu vathu hi va manago gipandreni hi tshumayelago umo. Tepo gupweya-wusiwana gwathu gu hi kutsago gu tshumayela ni gu hevbudza mahungu nya yadi, ha gu engisa nayo wa Kristo.

11-12. a) Ginani gi yeyedzago gu khigyo Jehovha a ngu khathala ngudzu khethu? b) Hi nga pimedzeya kharini lihaladzo la Jehovha?

¹¹ Nya wuvili, Jesu a di gu yeyedza lihaladzo la Papayi waye. Ndrani nya thumo waye, Jesu yeyedzide edzi Jehovha a khathalago khidzo khu vakhozeyi vaye. Vbakari nya silo nya singi a hevbudzidego, Jesu hevbudzide gu khuye: Moyo ni moyo wathu na ni lisima ngudzu ga Papayi wathu wa ndzadzini. (Mat. 10:31) Jehovha a ngu suva gu hakha dzinvuta dzaye dzi dzi layago dzi wuya libandlani. (Luka 15:7, 10) Jehovha yeyedzide lihaladzo laye khethu khu gu hi ninga Gyanana gyaye gasi gi hi dzegisa. — Joh. 3:16.

¹² Sihevbudzo: Hi nga pimedzeya kharini lihaladzo la Jehovha? (Efes. 5:1, 2) Khu gu wona vandriyathu na vari ni lisima ngudzu, ni gu tsaka ngudzu khu gu hakha ‘nvuta yi pengidego’ mwendro yi nga ba yi dzimede yi wuyago ga Jehovha. (Ndzi. 119:176) Ha gu yeyedza gu khethu hi ngu haladza vandriyathu khu gu thumisa tepo ni tshivba yathu gasi gu va phasa, ngudzungudzu tepo va vbwetago giphaso. (1 Joh. 3:17) Tepo hi haladzago vambe, ha gu engisa nayo wa Kristo.

13-14. a) Kha nga si lovidwego omu ga Johane 13:34, 35, ginani egi Jesu a layidego valandreyi vaye gu gira, nigu khu ginani nayo wowo wu gu wuphya? b) Ha gu wu engisa kharini nayo wowu nya wuphya?

¹³ Nya wuraru, Jesu leletede valandreyi vaye gu haladza vakwawe kha nga edzi uye a va haladzidego khidzo. (Leri Johane 13:34, 35.) Nayo wowu wa Jesu wuphya, kholu wa gu hi kutsa gu yeyedza lihaladzo li nga ba liri mwalo omu nya Nayo owu Nungungulu a nga ba a ningide vaIsrayeli: Haladza mukhodwa-kwawe kha nga edzi Jesu a gu haladzidego khidzo. Lihaladzo lolo la gu vbweta gu khilo hi thangisa gugola ga vambe vbatshani nya ogu gwathu. Gu vbwetega hi haladza ngudzu vandriyathu guvbindra ethu vamune.  Gu vbwetega hi va haladza nyo kala hi dzi emiseya gu va feya, kha nga Jesu a hi fedego.

¹⁴ Sihevbudzo: Ha gu wu engisa kharini nayo wowu nya wuphya? Khu ndziya nyo piye, ha gu gira isoso khu gu thangisa gugola ga vandriyathu. Hi ngu va haladza ngudzu nyo bwe hi dzi emiseya gu dzima silo nya sikhongolo khu kotani yawe, nya nga gu ningeya ni womi wathu. Ganiolu hi dzi emisede gambe gu dzima silo nya sidugwana. Khu giyeyedzo, ha gu engisa nayo wa Kristo tepo hi hongolago tshigu ni tshigu hi ya dzega ndriyathu a gumbidego mwendro a dwalago a hongola mitshanganoni, mwendro gu dzima gilo hi gi golago gasi gu tsakisa muthu hi mu golago, mwendro gu thumisa matshigu yathu nya dziferiya gasi gu phasa ava va thegedwego khu mhango nya tumbunugo. Nigu hi ngu phasedzeya gambe gu gira libandla lathu li khala wulanga owu givbango gimwegyo ni gimwegyo gi dzi pwago na gi vhikedwe.

15-17. a) Sigiro sa Jesu si yeyedzide kharini gululama gwaye? b) Hi nga pimedzeya kharini Jesu Kristo?

¹⁵ Lito “gululama”, li thumiswago omu nya Bhibhiliya, gwadigwadi lo thula gu gira esi Nungungulu a gu khuye si lulamide nya mba na gihatheya. Khu ginani hi gu khethu nayo wa Kristo wa gu andrisa gululama?

¹⁶ Nyo pheye, dundrugeya khedzi sigiro sa Jesu si yeyedzidego khidzo gululama gwaye. Matshiguni yaye, vathangeyi nya wukhongeyi nya giJudha va di gu nyenya vathu va nga ba va siri vaJudha, va woneya vbavbatshi vaJudha va nga ba va sa hevbula omu nya wukhongeyi nya giJudha, va bwe va si ningi githawo vanyamayi. Ganiolu, Jesu tepo yatshavbo a di gu phara gwadi vatshavbo, nigu a diri mwalo gihatheya. A di gu dzumeya gu landredwa khu vathu va nga ba va siri vaJudha va nga ba va khodwa gwaye. (Mat. 8:5-10, 13) A di gu tshumayela vatshavbo nya mba khedza khu khovbe, sighanyi ni sisiwana. (Mat. 11:5; Luka 19:2, 9) A di si tshanisi mwendro gu gireya litsoro vanyamayi. Guhambana ni isoso, a di gu ninga githawo ni gu phara gwadi vanyamayi, gupata ni vale va nga ba va wonwa na va siri va gilo khu vambe vathu. — Luka 7:37-39, 44-50.

¹⁷ Sihevbudzo: Hi nga pimedzeya Jesu khu gu mba manega ni gihatheya ni gu tshumayela vatshavbo va dzi emisedego gu hi engiseya — gani sisiwana mwendro sighanyi, gani va gu lumba wukhongeyi muni. Vama nya maKristo va ngu landreya giyeyedzo gyaye khu gu ninga githawo vanyamayi. Tepo hi girago isoso, ha gu engisa nayo wa Kristo.

18-19. Ginani egi Jesu a gi hevbudzidego khu gululama, nigu ginani hi gi hevbulago avba nya sihevbudzo saye?

¹⁸ Nya wuvili, dundrugeya khesi Jesu a si hevbudzidego maningano ni gululama. Hevbudzide matshina nya milayo ma nga hadzi phasa valandreyi vaye gu phara gwadi vambe. Khu giyeyedzo, nga dundrugeya khu litshina nya nayo nyo gireye vambe esi hi vbwetago gu khethu va hi gireya nethu. (Mat. 7:12) Hatshavbo hi ngu dzina gu pharwa gwadi. Khu kharato, gu vbwetega hi phara gwadi vambe. Ha gu gira isoso, anavo va na kutsega gu hi phara gwadi nethu. Ganiolu, ahati ho ba ha sa pharwa gwadi ke? Jesu hevbudzide gambe valandreyi vaye gu tumba gu khavo Jehovha a na “lamula mwendro gu gireya gululama [vale va] mu ranago wutshigu ni mihani.” (Luka 18:6, 7) Khu lisine, malito yoyo, gitumbiso: Nungungulu wathu a ngu si wona sigaradzo hi tshanganago naso matshiguni yaya nyo hegise, nigu a na hi reseya gululama khu tepo a yi vegisidego. — 2 Tes. 1:6.

¹⁹ Sihevbudzo: Ha gu landreya matshina nya milayo hi hevbudzidwego khu Jesu, hi na phara vambe vathu khu ndziya nyo lulame. Nigu ha gu ba hi giredwe guvivba tigoni momu ga Sathane, hi nga thaveledwa khu guti gu khethu Jehovha a na reseya gululama hatshavbothu.

20-21. a) Ava va thangeyago va yede gu phara kharini vambe? b) Mwama a nga yeyedza kharini lihaladzo, nigu vapapayi va yede gu phara kharini sanana sawe?

²⁰ Khu guya khu nayo wa Kristo, ava va thangeyago va yede gu phara kharini vambe? Kha nga olu lihaladzo li gu ilo li gisekelo nya nayo wowu, ava va thangeyago gu vbwetega va phara ava va va thangeyago khu githawo ni lihaladzo. Gu vbwetega va dundruga gu khavo Kristo o vbweta gu khuye hi yeyedza lihaladzo siloni satshavbo hi girago.

²¹ Ndrangani. Mwama gu vbwetega a haladza mwangadzi waye “kha nga idzo Kristo a haladzago khidzo libandla.” (Efes. 5:25, 28, 29) Mwama gu vbwetega a pimedzeya lihaladzo la Jesu khu gu thangisa esi si vbwetegago ga mwangadzi waye vbatshani nya esi saye. Vambe vama si ngu va garadzeya gu yeyedza lihaladzo lolo, adzina khu gu omu va dandredego umo va di si theyi kota khu gu phara gwadi vambe. Lisine gu si nga va garadzeya gu vbindrugedza mavbanyelo yoyo, ganiolu gu vbwetega va vbindrugedza gasi va kodza gu engisa nayo wa Kristo. Vama va yeyedzago lihaladzo lolo va ngu ningwa githawo khu vagadzi vawe. Papayi a haladzago sanana saye gima kha na nga si tshanisa khu malito ni sigiro saye. (Efes. 4:31) Wulangani nya isoso, a gu yeyedza gu khuye a ngu si gola ni gu tsaka khiso nyo bwe si dzipwa na si vhikedwe. Vapapayi vovo va ngu godwa ni gu tumbwa khu sanana sawe.

22. “Dzinvuta” dzi thudwago omu ga 1 Pedro 5:1-3 dza gu lumba mani, nigu dzi yede gu pharwa kharini?

²² Libandlani. Madhota gu vbwetega ma dundruga gu khayo “dzinvuta” dzodzo khandri dzawe. (Joh. 10:16; leri 1 Pedro 5:1-3.) Malito “tshambi wa Nungungulu,” “mbeli ga Nungungulu, NM”, ni “thomba ya Nungungulu, NM” ma gu hi dundrugisa gu khayo dzinvuta dzedzi dza gu lumba Jehovha. A gu vbweta gu khuye dzinvuta dzaye dzi pharwa khu ndziya nya lihaladzo ni githawo. (1 Tes. 2:7, 8) Madhota ma  yeyedzago lihaladzo tepo ma girago mithumo yawo nya wuhavisi ma ngu tsakedwa ngudzu khu Jehovha. Madhota yoyo gambe ma ngu godwa ni gu ningwa githawo khu libandla.

23-24. a) I thumo muni wu girwago khu madhota gukhathaleyani nya mahungu nya gighoho nya gikhongolo nya muthu? b) Ginani egi Madhota ma yedego gu gi dudruga tepo va khathaleyago mahungu yoyo?

²³ I thumo muni wu girwago khu madhota gukhathaleyani nya mahungu nya gighoho nya gikhongolo nya muthu? Thumo wawe wu hambanide ni owu wu nga ba wu girwa khu valamuli ni madhota ma nga ba ma thangedwa khu nayo owu Nungungulu a nga ba a ningide vaIsrayeli. Khu guya khu Nayo wa Mosi, madhota ma di si khathaleyi silo sa liphuvboni basi, ganiolu ma di gu khathaleya gambe silo sa tshigu ni tshigu ni mahungu nya wughevenga. Ganiolu khu guya khu nayo wa Kristo, madhota ma gu khathaleya sighoho si khuhago wukhozeyi wa Jehovha. Madhota ma ngu dziti gu khayo Nungungulu ningide dzipfhumu nya mafu thumo nyo khathaleye sigaradzo sa tshigu ni tshigu ni esi nya wughevenga. Iso si patago dzimulta ni mapaso. — Rom. 13:1-4.

²⁴ Madhota ma gu khathaleya kharini sighoho si khuhago wukhozeyi wa Jehovha? Ma gu thumisa Milowo gasi gu pwisisa gwadi gigaradzo gyogyo ni gu piya mahungu yakona. Ayo kha ma divali gu khayo lihaladzo khilo giseketelo nya nayo wa Kristo. Khu kharato lihaladzo la gu kutsa madhota gu dundrugeya khu silo sesi: Ginani gi yedego gu girwa gasi gu phasa givbango nya libandla gi giredwego guvivba? Maningano ni uye mughohi wakona, lihaladzo la gu kutsa madhota gu dundrugeya khu silo sesi: Ina a ngu dzi laya? Ina hi nga mu phasa gu wusedza wupari waye ni Jehovha?

25. Ginani hi na ganeyago khigyo ga ndrima yi landreyago?

²⁵ Hi ngu bonga ngudzu kholu hi thangedwago khu nayo wa Kristo! Tepo hatshavbo hi dzi garadzeyago gu wu engisa, ha gu phasedzeya gasi libandla li khala wulanga owu givbango ni givbango gi na dzi pwago na gi godwa, na giri ni lisima, ni gu vhikedwa. Ambari ulolo, ha gu vbanya tigoni omu “vathu nya guvivbedwa khu monyo” va engedzeyago “guvivba.” (2 Thim. 3:13) Gu vbwetega hi khala na hi gengede. Libandla nya wuKristo li nga yeyedza kharini gululama ga Nungungulu tepo li emisanago ni gighoho nya gusagaredwe nya sanana? Ndrima yi landreyago yi na hlamula giwudziso gyogyo.