1. Khu ginani vambe vathu va si tsakiswigo gu hevbula?

MUHUNO, vathu nya vangi va ngu thuma khu gudzigaradza gasi gu dzi vbanyisa. Vandriyathu nya vangi va ngu thuma dziora nya dzingi gasi va mana gilo nyo hodze, nyo ambale, ni wulanga nyo lale. Vambe nya vangi va ngu vbedza dziora nya dzingi tshigu ni tshigu na va gu hongola ni gu wuya khu thumotunu. Nya vangi va gu gira mithumo nyo lemeye gasi gu mana dzitsapawu nyo khathaleye dzindranga dzawe. Guvbeyani nya litshigu, vandriyathu nya vangi va garade! Khu kharato va gu ya hevbula na va si vbweti gambe gilo khu migaralo.

2. Wo oloveya gu hevbula khu tepo muni?

² Khu lisine, gu vbwetega hi dzi ninga tepo nyo hevbule, hi hevbula kamo gwadi Lito la Nungungulu ni mabhuku yathu nya wuKristo. Gu hevbula gu na ni lisima ngudzu ho ba hi vbweta gu khala dzipari dza Jehovha hi bwe hi vbanya kala gupindruga! (1 Thim. 4:15) Vambe va gu vindrugeya gu wuga tshigu ni tshigu va hevbula na gu ngo rude nigu mapimo yawe na ma ngo rude hwane nyo hefemule. Vambe va gu tshiya dzimeneti nyo khaguri guvbeyani nya litshigu na va si tsolopetedwi khu gilo gasi va hevbula Bhibhiliya ni mambe mabhuku va bwe va dundrugeya khesi va si hevbulago.

3-4. Guvbindrugedza muni gu giridwego avba nya mabhuku hi nga ba hi hakha, nigu khu ginani?

³ Kha hi kanakani gu khethu u ngu li wona lisima nyo dzi ninge tepo nyo hevbule. Ganiolu ginani hi yedego gu hevbula? Adzina u nga khuwe ‘Singi si vbwetago gu hevbudwa. Khu kharato si ngu nyi garadzeya gu hevbula satshavbo.’ Vambe va ngu kodza gu leri yatshavbo mabhuku ni gu sixitiri dzatshavbo dzivhidhiyu hi ningwago, ganiolu vambe si ngu va garadzeya. Huwo nya Guthangeye yi ngu siti isoso. Khu gighelo gyogyo, yi hungide gu vbungula mabhuku, aya nyo ghandlwe ni aya ya omu nya interneti.

⁴ Khu giyeyedzo, kha hi ngo dusa gambe Anuário das Testemunhas de Jeová, kha nga olu matshango nyo tsakise ya vandriyathu ma dugago  omu nya jw.org^® ni omu nya longoloko nya ngima ni ngima nya JW Broadcasting^®. Olu dzirevhista nya vathu vatshavbo nya Mukhedziseyi ni Khendzugani! dza gu duswa guraru khu mwaga. Guvbindrugedza gogo khandri gu di giredwa gu hi tshaledwa khu tepo nyo gire mithumo yathu. Ganiolu, gasi hi kodza gu khathaleya “iso si gu sadi mwendro si gu na ni lisima.” (Filp. 1:10) Hongoleni hi ganeyani khedzi u nga thangisago khidzo esi si gu na ni lisima ni edzi u nga phasegago khidzo khu gihevbulo gyago nya Bhibhiliya.

5-6. Khu yavbini mabhuku hi yedego gu ma hevbula gwadi?

⁵ Ginani hi yedego gu hevbula gupheya? Gu vbwetega hi dzi ninga tepo nyo hevbule Lito la Nungungulu tshigu ni tshigu. Olu gu vbungudwe mavhesi ma ningedzwago avba nya guleri nya Bhibhiliya nya semana ni semana nya libandla gasi hi tshaledwa khu tepo nya yingi nyo dundrugeye khayo ni gu gira wugevisisi gasi hi mana mahungu nyo engedzelege. Tepo hi lerigo, hi nga dwaneyi basi gu vbedza mavhesi nya semana yoyo, ganiolu gu vbwetega hi dzumeleya mahungu yoyo nya Bhibhiliya ma khuha myonyo yathu ma bwe ma tiyisa wupari wathu ni Jehovha. — Ndzi. 19:14.

⁶ Khu yavbini mambe mabhuku hi yedego gu ma hevbula gwadi? Gu vbwetega hi dongiseya gwadi Gihevbulo nya Mukhedziseyi ni Gihevbulo nya Bhibhiliya nya libandla, gumogo ni simbe sipandre nya tshangano wa vbakari nya semana. Gu vbwetega hi leri gambe dzirevhista Mukhedziseyi nya vathu vatshavbo ni Khendzugani!

7. Ha gu ba hi si kodzi gu leri dzindrima dzatshavbo dza omu nya sayiti ni dzivhidhiyu dza omu nya JW Broadcasting, ina hi yede gu vbeya tshivba?

⁷ Adzina u nga khuwe: ‘Ina ka, ahati dzindrima ni dzivhidhiyu dzatshavbo dzi dugago omu nya sayiti yathu, jw.org, ni edzi dza omu nya JW Broadcasting? Singi ngudzu phe!’ Nga dundrugeya khu guhodza nyo hambanehambane nyo tshambe gu dongisedwago omu nya rexitawuranti. Dzikliyenti gima kha dzi na nga si kodza gu hodza gwatshavbo guhodza nyo hambanehambane gu dongisedwago mule. Khu kharato dza gu hodza ogu gu gomogo basi. Khu ndziya nyo fane, abari gu anuwe kha wu si kodzi gu wona satshavbo si thedwago omu nya sayiti mwendro JW Broadcasting^®, u nga vbeyi tshivba. Leri mwendro gu sixitiri esi u si kodzago. Hongoleni hi wonani esi si pategago avba nya gu hevbule ni esi hi nga girago gasi hi phasega ngudzu gihevbuloni gyathu.

8. Dzindziya muni hi nga dzi thumisago tepo hi hevbulago Mukhedziseyi, nigu isoso si na hi phasa kharini?

⁸ Tepo u hevbulago, wo vega gupima avba nya esi u lerigo gasi u hevbula gilogyo nya lisima. Gu hevbula khandri gu leri khu gitshwati ni gu funga mihlamulo yakona basi. Khu giyeyedzo, tepo u dongiseyago Gihevbulo nya Mukhedziseyi, pheya khu gu leri magavbudzo ma gomogo gupheyani nya ndrima. Khu gulandreya, leri ni gu dundrugeya khu hungo nya mahungu, sihungwana nya mahungu ni siwudziso nya guwusedze. Khavbovbo, leri ndrima yatshavbo khu gwadi. Vega gupima avba nya wuroma nya ndrimana ni ndrimana, owu gutala nya dzitepo wu manegago avba nya frazi nyo pheye nya dzindrimana dzatshavbo. Gutala nya dzitepo, frazi yoyo yi na gu phasa guti mongo nya litshina wu tshamusedwago khu ndrimana. Tepo u lerigo ndrima yatshavbo, zama gu wona edzi ndrimana ni ndrimana yi seketeyago khidzo gihungwana nya mahungu ni hungo nya mahungu nya ndrima yatshavbo. Lova khu wulanga malito u gu mba ma oloveya ni dzipontu u tsakeyago gu engedzeya gu dzi kemba.

9. a) Khu ginani hi yedego gu vega ngudzu gupima avba nya milowo tepo hi hevbulago Mukhedziseyi nigu khu ndziya muni? b) Kha nga hi si wonidego omu ga Josuwa 1:8, ginani gimbe hi yedego gu gira tepo hi lerigo milowo?

⁹ Gihevbulo nya Mukhedziseyi libandlani gyo hi phasa gu pwisisa Bhibhiliya. Tepo libandla li hevbulago ndrima nyo khaguri, vega ngudzu  gupima omu nya milowo, ngudzungudzu eyi yi na lerwigo ndrani nya gihevbulo. Zama gu wona edzi malito nya litshina mwendro dzifrazi nya milowo dzi seketeyago khidzo pontu yi tshingiswago avba nya ndrimana. Vbavbandze nya isoso, dzi ninge tepo nyo dundrugeye khu milowo u lerigo, u zama gu wona edzi uwe u nga yi thumisago khidzo guvbanyi gwago. — Leri Josuwa 1:8.

10. Khu guya khu Vahebheru 5:14, khu ginani vavelegi va yedego gu dzi ninga tepo nyo hevbudze sanana sawe gu hevbula ni gu gira wugevisisi avba nya wukhozeyi nya ndranga?

¹⁰ Khu lisine, vavelegi va gu vbweta gu khavo sanana sawe si tsakiswa khu Wukhozeyi nya ndranga nya semana. Ambari olu vavelegi va yedego gu hunga tepo yatshavbo esi si na hevbudwago avba nya wukhozeyi nya ndranga, kha va gurumedzegi gu dongiseya silo nyo hathege ni gu tsakisa gasi gu gira. Lisine gu Wukhozeyi nya ndranga wu nga girwa khu gu sixitiri longoloko nya ngima ni ngima nya JW Broadcasting, mwendro gu gira dziprojeto nyo khaguri nyo hathege khu ndranga, nya nga gu vbaha litaro la Nowa, ganiolu si na ni lisima gambe gu hevbudza sanana ndziya nya yadi nyo hevbule khiyo. Khu giyeyedzo, gu vbwetega si hevbuleya gu dongiseya mitshangano, mwendro gu gevisisa mahungu nyo khaguri si wudzisidwego xikwatunu. (Leri Vahebheru 5:14.) Sa gu dzi ninga tepo nyo hevbule Bhibhiliya ndrangani, kha si na nga pwisisa dzivhidhiyu basi, ganiolu si na vbevbugedwa gambe gu pwisisa esi si hevbudwago mitshanganoni nya libandla, mitshanganoni nya sipandre, ni mitshanganoni nya mughanga. Khu lisine, tanga ni makhalelo nya gyanana khiso si na phasago muvelegi gu hunga gu khuye tepo muni a na vbedzago na gu hevbula nagyo.

11. Khu ginani si gu na ni lisima gu hevbudza sihevbulo sathu nya Bhibhiliya gu etisa gihevbulo gyaso?

¹¹ Sihevbulo sathu nya Bhibhiliya niso gu vbwetega si kodza gu hevbula. Sa gu ba si ngo pheya, hi ngu tsaka tepo hi si wonago na si gu funga mihlamulo nya siwudziso tepo si dongiseyago gihevbulo gyaso nya Bhibhiliya mwendro mitshangano nya libandla. Ganiolu gu vbwetega hi si hevbudza guti magirelo nya wugevisisi ni edzi si nga etisago khidzo gihevbulo gyaso sabune. Khu ndziya yoyo, so tshangana ni sigaradzo, wulangani nyo tutumeye ga vandriyathu va libandlani gasi gu lomba giphaso, si nati gilo nyo gire gasi gu mana mahungu ma na si phasago gu gira wugevisisi omu nya mabhuku yathu.

12. Misuwo muni hi nga manegago nayo tepo hi hevbulago?

¹² Wo ba u si goli gu hevbula, u nga dzi embeyi gu khuwe khu na nga tshuka u si kodza. U na si kodza. Pheya gu hevbula khu gitepwana nyo role, vbadugwanavbadugwana u na ya u engedzeya tepo u vbedzago nu hevbula. Dzi vegeye misuwo nyo khaguri tepo u hevbulago. Khu lisine, gu  tiyisa wupari wathu ni Jehovha gu vbwetega giri gilo nya lisima ngudzu guvbanyani gwathu. Misuwo nyo pheye hi nga tadzisago, gu hlamula giwudziso gi giridwego khu muthu mwendro gu gevisisa khu gigaradzo hi tshanganago nagyo.

13. a) Tshamuseya dzindziya dzi nga thumiswago khu muphya gasi gu emeya gukhodwa gwaye xikwatunu. b) Hi nga wu thumisa kharini wusingalagadzi wu gomogo omu ga Vakolosi 4:6?

¹³ Khu giyeyedzo, wo ba u ngari muphya xikwatunu, adzina sihevbuli sikwawe sago si ngu khodwa gihevbudzo nya evhulusawu. Adzina u ngu dogoreya gu tshamuseya sighelo si gu girago u khodwa gu khuwe silo si di vangwa kha nga edzi Bhibhiliya yi hevbudzago khidzo, ganiolu adzina u dzipwa nuri mwalo makodzelo nyo gire isoso. Khu kharato gu vbwetega u hevbula! U nga hevbula ni makungo yaya: 1) gu tiyisa gukhodwa gwago ga Nungungulu kha nga muvangi nya silo satshavbo ni 2) ni gu hevbula ndziya nya yadi nyo emeye khiyo gukhodwa gwago. (Rom. 1:20; 1 Ped. 3:15) Gupheyani adzina u nga dzi wudzisa gu khuwe: ‘Khu ginani sihevbuli sikwawe si khodwago evhulusawu?’ Khavbovbo, gevisisa gwadi mahungu yoyo omu nya mabhuku yathu. Wo gira isoso, si nga vbevbuga gu tshamuseya gukhodwa gwago guvbindra esi u si pimisago. Vathu nya vangi va gu khodwa evhulusawu kholu basi va pwidego muthu va mu ningago githawo na gu khuye lisine. Khu kharato, wa gu mana pontu mweyo mwendro dzimbili nya dzadi, adzina u nga phasa muthu a vbwetago guti lisine. — Leri Vakolosi 4:6.

14-16. a) U nga gira kharini gasi uti gwadi libhuku nyo khaguri nya Bhibhiliya u gu mba liti gwadi? b) Tshamuseya edzi milowo yi khumbugidwego avba nya ndrimana yi nga gu phasago khidzo gu pwisisa gwadi libhuku la Amosi. (Wona gambe kwadru “Vbanyeya matimo u ma hevbulago omu nya Bhibhiliya.”)

¹⁴ Nga dundrugeya na hi gu vbweta gu leri ni gu dundrugeya khu limwedo nya mabhuku nyo role nya siprofeto nya Bhibhiliya (Hoseya kala Malakiya) tshanganoni nya libandla, adzina limwedo nya aya u si ma tigo gwadi. Gupheya gu na vbwetega gu engedzeya gu dogoreya guti nya singi si gomogo omu nya libhuku lolo. U nga si gira kharini isoso?

¹⁵ Gupheya, dzi wudzise gu khuwe: ‘Ginani nyi gi tigo khu mulovi nya libhuku leli? Khu mani, a di gu vbanya hayi, i thumo muni a nga ba a gira?’ Tepo hi tigo silo nya singi khu mulovi wakona, hi na gi pwisisa gighelo gi mu giridego a thumisa sifananiso nyo khaguri omu nya libhuku laye. Tepo u lerigo Bhibhiliya, vbweta dzifrazi dzi na gu phasago gu pwisisa makhalelo ya mulovi.

¹⁶ Khu gulandreya, u na tsaka khu guti tepo nya gulowe nya libhuku lolo. Ndziya nyo vbevbuge nyo gire khiyo isoso khu gu khedza “Tabelas dos Livros da Bíblia” yi gomogo omu nya dzipajina nyo hegise nya Tradução do Novo Mundo da Bíblia Sagrada. Khu hwane nya isoso, u nga khedza kwadru yi ganeyago khu vaprofeti ni dzipfhumu yi gomogo omu nya Apêndice 6. Abari gu libhuku nya Bhibhiliya u lerigo lo ganeya khu siprofeto, gwadi gu vbweta guti giemo nya mavbanyelo nya vathu va dziteponi nya gulowe nya libhuku lolo. Sigiro muni ni mavbanyelo muni nya vathu aya muprofeti yoyo a rumidwego gu ma kawuka? Khu mani a kotsanidego gu vbanya nango mweyo naye? Gasi gu mana mahungu yatshavbo yoyo, adzina si na vbweta u khedza omu nya mambe mabhuku nya Bhibhiliya. Khu giyeyedzo, gasi gu pwisisa gwadi esi si nga ba si girega teponi ya muprofeti Amosi, u nga phasega khu gu leri mavhesi ya omu ga 2 Dzipfhumu ni 2 Dzikoronika, ma gu mavhesi ma yelanago ni Amosi 1:1. Vbavbandze nya isoso, adzina u nga khedza libhuku la Hoseya, oyu a adzina a kotsanidego gu vbanya ni Amosi. Wo khedza mabhuku yoyo yatshavbo nya Bhibhiliya, u na pwisisa edzi womi wu nga ba wu khade khidzo dziteponi dza Amosi. — 2 Dzipf. 14:25-28; 2 Dzik. 26:1-15; Hos. 1:1-11; Amosi 1:1.

17-18. Thumisa siyeyedzo sa omu nya ndrimana mwendro sago gasi gu yeyedza gu khuwe mahungu ma wonegago na mari mwalo lisima ma nga gu phasa gu tsakeya gihevbulo gyago nya Bhibhiliya.

¹⁷ Gwadi gu leri Bhibhiliya nuri ni gudogoreya nya gukhongolo nya guti silo. Khu giyeyedzo, nga dzi dundrugeya nu leri gipimo 12 nya giprofeto gya Zakariya, gi ganeyago khu gufa ga Mesiya. (Zak. 12:10) Tepo u vbohago avba nya livhesi 12, u mana malito yaya “linyumba la Natani” li na liya ngudzu khu kotani nya gufa ga Mesiya. Wulangani nyo leri khu gitshwati, ema u dzi wudzisa gu khuwe: ‘Khu gwevbini guyelana gu gomogo ga linyumba la Natani ni Mesiya? Ina yomo ndziya nyo mane mambe mahungu nyo yelane ni aya?’ Khavbovbvo, u pheya thumo nyo “kembe.” Khu giyeyedzo, u nga khedza yimbe milowo nyo yelane ni owu u lerigo omu nya Tradução do Novo Mundo da Bíblia Sagrada (ndrani nya livhesi ni livhesi, gu na ni dziletra dzi yeyedzago milowo nyo yelane.) Lowo nyo pheye khowu wa 2 Samuweli 5:13, 14, wu yeyedzago gu khuwo Natani a diri gimwegyo nya sanana sa Pfhumu Dhavhidhe. Lowo nya wuvili, i Luka 3:23, 31, wu yeyedzago gu khuwo Jesu a diri gitugulwana kamo gya Natani khavbo ga Mariya. (Wona Mukhedziseyi nya Agosto nya 2017, paj. 32, ndri. 4, khu giThwa.) Nya mba hweya, wo pheya gu samala khesi u si manidego! U ngu dziti gu khuwe gu profetidwe gu pwani Jesu a di hadzi khala gitugulwana gya Dhavhidhe. (Mat. 22:42) Ganiolu Dhavhidhe a diri ni 20 sanana ni guvbindra. Ina kha si tsakisi gu ba Zakariya a ganede khu gukongoma gu khuye ndranga ya Natani yi di hadzi manega ni gighelo nyo liye gufa ga Jesu?

¹⁸ Nga dundrugeya khu gimbe giyeyedzo. Omu nya gipimo nyo pheye gya Luka, ha gu hevbula gu khethu ngilozi Gabriyeli yi di hongola ga Mariya yi ya mu tivisa mahungu nyo samadzise khu gyanana a nga hadzi velega: “A na bani ari muthu khongolo, a na ranwa pwani Mwamana wa Nungungulu a guromo vbatshani Ngudzu. Pfhumu Nungungulu a na mu pharisa ndronga nya wufumu wa babe waye Dhavhidhe. A na fuma ndranga  ya Jakobe kala gupindruga.” (Luka 1:32, 33) Adzina maho yathu ma nga tutumeya avba nya gipandre nyo pheye nya mahungu ya Gabriyeli, gi gu khigyo Jesu a di hadzi ranwa pwani “Mwamana wa Nungungulu a guromo vbatshani Ngudzu.” Ganiolu Gabriyeli profetide gambe gu khuye Jesu a di hadzi “fuma [kha nga Pfhumu, MN].” Khu kharato adzina hi nga dzi wudzisa gu khethu pwisiside ginani Mariya avba nya malito ya Gabriyeli. Ina pimiside gu khuye Gabriyeli a di vbweta khuye Jesu a di hadzi tshikedza Pfhumu Herodhi, mwendro mweyo nya dzipfhumu dza Israyeli dzi nga ba dzi mu landreya? Nari khatshi Jesu a di khade pfhumu, Mariya na manide wuzundzo nya wukhongolo nyo khale mamayi wa Pfhumu, nigu ndranga yaye yi di hadzi ya vbanya ndrangani nya wufumu. Ganiolu Bhibhiliya kha yi ganeyi gu khiyo Mariya khumbugide silo nya nga isoso ga Gabriyeli; ambari gu lomba gikhalo nyo hathege Mufumoni wa Jesu, kha nga edzi va giridego khidzo vapizane vavili vaye. (Mat. 20:20-23) Mitshamuselo yoyo ya gu engedzeya gu hi tiyisa gu khiyo Mariya a diri nyamayi nyo dzi nogise kamo ngudzu!

19-20. Kha nga si tshamusedwago omu ga Jakobe 1:22-25 ni 4:8, khu yavbini makungo yathu tepo hi hevbulago?

¹⁹ Hongoleni hi dundruga gu khethu makungo yathu nyo pheye tepo hi lerigo Lito la Nungungulu ni mabhuku nya wuKristo, gu tiyisa wupari wathu ni Jehovha. Ha gu vbweta gu wona gambe “edzi [hi] guromo khidzo” hi bwe hi vbindrugedza esi si vbwetegago gasi hi tsakisa Nungungulu. (Leri Jakobe 1:22-25; 4:8.) Tepo ni tepo hi pheyago gu hevbula, gu vbwetega hi lomba Jehovha a hi ninga liphuvbo laye nya guage. Gu vbwetega gambe hi mu lomba a hi phasa gu pwisisa gwadi mahungu hi vbwetago gu leri, a bwe a hi phasa gu wona omu hi yedego gu tshuwkadzisa.

²⁰ Moyo ni moyo wathu gu vbwetega a fana ni githumi nyo tumbege gya Nungungulu gi tshamusedwego khu mulovi nya dzindzimo: “Gutsaka gwaye [gomo] nayoni wa PFHUMU Nungungulu, a wu alakanyela wutshigu ni mihani.  . . . Sigiro saye satshavbo sa gu duga gwadi.” — Ndzimo 1:2, 3.