NDRIMA NYA GIHEVBULO 20
NDZIMO 67 Tshumayela Lito
Lihaladzo li ngu hi kutsa gu simama gu tshumayela
“Mahungu nya yadi ma yede gu tshumayedwa mafuni gwatshavbo gu pheya.” — MARKO 13:10.
MAKUNGO NYA GIHEVBULO GEGI
Hi na wona edzi lihaladzo li hi kutsago khidzo gu tshumayela khu sighingi.
1. Ginani hi tivisidwego avba nya tshangano nya mwaga nya 2023?
GA TSHANGANO nya mwaga nya 2023, a hi pwide mapwisiselo nyo hlamadzisi maningano khesi hi si khodwago ni sitiviso nyo khaguri si ganeyago khu thumo wathu nyo tshumayele. Khu giyeyedzo, hi hevbude gu khethu vathu nyo khaguri adzina va na patana ni vathu va Jehovha hwane nya gu ba a fuvisidwe Bhabhiloni nya Khongolo. Nigu hi tivisidwe gu khethu, gukhugeya khu Novembro nya 2023, vahuweleyi nya Mufumo va di hadzi gu mba ningeya gambe dziora nya thumo nyo tshumayele. Ina guvbindrugedza gogu, gwa gu thula gu khugo thumo nyo tshumayele khandri wa givbiredza guvbindra gale? Ahihi.
2. Khu Ginani thumo nyo tshumayele wu khalago nya givbiredza tshigu ni tshigu gu gyago? (Marko 13:10)
2 Tshigu ni tshigu gu gyago, thumo wathu nyo tshumayele wa gu engedzeya gu khala nya givbiredza. Khu ginani? Kholu yi tshade tepo nya yidugwana basi gasi gu vboha mahegiso. Hongoleni hi wona esi Jesu a ganedego maningano khu thumo nyo tshumayele, matshigoni nyo hegise. (Leri Marko 13:10.) Guya khu matimo ma gomogo omu ga Matewu, Jesu a di ganeya gu khuye mahungu nya yadi ma di hadzi tshumayedwa mafuni gwatshavbo na ma si vbohi “mahegiso.” (Mat. 24:14) Lito leli la gu thula mahegiso nya litigo leli nyo vivbe la Sathane. Jehovha vegide ‘litshigu ni ora’ gasi silo satshavbo soso si girega. (Mat. 24:36; 25:13; Mith. 1:7) Tshigu ni tshigu, litshigu lolo la gu hidzimeya. (Rom. 13:11) Na ma nga si vbohi mahegiso, hi yede gu simama gu tshumayela.
3. Ginani gi hi kutsago gu tshumayela?
3 Tepo hi dundrugeyago khu thumo wathu nyo tshumayele, hi yede gu dzi gira giwudziso gegi nya lisima: Khu ginani hi tshumayelago mahungu nya yadi? Lihaladzo khilo li hi kutsago gu tshumayela. Tepo hi tshumayelago ha gu yeyedza gu khethu hi ngu haladza mahungu nya yadi, hi ngu haladza vathu nigu gu diga satshavbo hi ngu haladza Jehovha ni lina laye. Hongoleni hi bhula khu gimwegyo ni gimwegyo nya silo sesi.
HA GU TSHUMAYELA KHOLU HI HALADZAGO MAHUNGU NYA YADI
4. Ginani u giridego tepo u ngapwa mahungu nya yadi?
4 Ina u ngu dundruga edzi u dzipwidego khidzo tepo u ngapwa mahungu nya yadi? Adzina saye gu diri gu velegwa nya gyanana nyo khaguri mwendro u di mana thumo u nga ba u wu dileya ngudzu. Nya mba kanakana, u di gu virede khu maho nyo fuviye gu bhuleya ndranga yago mwendro dzipari dzago, mahungu yoyo. Ina si ngu fana ni tepo u ngapwa mahungu nya lisima guvbindra yatshavbo, a gu mahungu nya yadi nya Mufumo wa Nungungulu?
5. U dzipwide kharini tepo u nga hevbula lisine nya Lito la Nungungulu khu tepo nyo pheye? (Wona dzifotu.)
5 Dundrugeya khedzi u dzipwidego khidzo tepo u nga hevbula lisine nya Lito la Nungungulu khu tepo nyo pheye. U hevbude gu khuwe Papayi wago wa ndzadzini a ngu gu haladza, o vbweta gu khuye u gira gipandre nya ndranga nya wukhozeyi waye, a ngu tumbisa gu vbedza wuvi ni gu tshaniseka, a ngu tumbisa gu wusa sigodwa sathu si fudego si vbanya gambe mafuni nya maphya ni simbe silo. (Marko 10:29, 30; Joh. 5:28, 29; Rom. 8:38, 39; Gutu. 21:3, 4) Esi u si hevbudego si gu giride u tsaka. (Luka 24:32) U di gu gola ngudzu esi u nga ba u si hevbula nigu u di gu vbweta gu bhuleya vambe khiso.— Fananisa ni Jeremiya 20:9.
Tepo hi nga pheya gu hevbula mahungu nya yadi, hi di gu vbweta ngudzu gu bhuleya vambe khesi hi nga ba hi hevbula! (Wona paragrafu 5)
6. Ginani u gi hevbudego khu giyeyedzo gya Ernest ni Rose?
6 Wona giyeyedzo gegi. Ndriyathu nyo pwani khu Ernest a diri ni 10 myaga tepo a nga fedwa khu papayi waye. Ernest a gu dundruga gu khuye: “Eni nyi dzi wudziside gu kheni: ‘Ina uye a di hongola ndzadzini? Mwendro a difa kala gupindruga?’ Nyi di gu pweya lidiwo simbe sanana si nga ba siri ni vapapayi vaso.” Tepo yatshavbo, Ernest a di gu hongola simiteru avba a nga ba a dzingidwe papayi waye aya khidzima a gombeya gu khuye: “Nungungulu, nyo lomba, nyo vbweta gu dziti gu kheni womo hayi papayi wangu.” Na gu vbindride 17 myaga papayi waye na fude, Ernest a di dzumeya gihevbulo nya Bhibhiliya. Uye tsakide khu gu dziti gu khuye ava va fudego kha vati gilo, va gu fana ni muthu a ladego nigu Bhibhiliya yi ngu tumbisa gu va wusa mindru watshigu. (Muh. 9:5, 10; Mith. 24:15) Khu gu hegisa, uye a manide mihlamulo nya siwudziso si nga ba si mu garadza khu tepo nyo laphe. Ernest a di gu tsaka ngudzu khu lisine nya Bhibhiliya a nga ba a hevbula. Mwangadzi waye Rose, anuye a dzumede gihevbulo nya Bhibhiliya nigu a yeyedzide lihaladzo khu mahungu nya Mufumo. Khu 1978 va di bhabhatiswa. Avo va tshumayede valongo vawe, dzipari ni wevbini muthu a nga ba a vbweta gu va engiseya. Kha nga handro wakona, Ernest ni Rose va phaside 70 vathu ni guvbindra gu dandra khu liphuvboni va bwe va bhabhatiswa.
7. Ginani gi giregago tepo u haladzago lisine nya Bhibhiliya? (Luka 6:45)
7 Tepo hi haladzago esi hi si hevbulago omu nya Bhibhiliya, hi na vbweta gu bhuleya vambe khesi hi si hevbulago. (Leri Luka 6:45.) Hi na dzipwa nga edzi vapizane va Jesu va lizana myaga nyo pheye va dzipwidego khidzo tepo va nga khavo: “Kha hi yeli gu diga gu ganeya khu silo hi nga si wona ni gu sipwa.” (Mith. 4:20) Ethu hi ngu haladza ngudzu lisine nyo bwe hi vbweta gu bhuleya vathu nya vangi khilo.
HA GU TSHUMAYELA KHOLU HI HALADZAGO VATHU
8. Khu ginani hi vbwetago gu bhuleya vambe mahungu nya yadi? (Wona kwadru yi gu khiyo: “ Haladza vathu — Gira vapizane.”) (Wona fotu.)
8 Gu fana ni Jehovha ni Gyanana gyaye, ethu hi ngu haladza vathu. (Mav. 8:31; Joh. 3:16) Ethu hi ngu pweya-wusiwana vale va gu “mwalo gutumba” ni vale va gu mba “muti Nungungulu.” (Efes. 2:12) Avo va na ni sigaradzo nya singi nigu ethu hi na ni rendre wakone, a gu mahungu nya yadi nya Mufumo wa Nungungulu. Lihaladzo ni pweya-wusiwana hi gu nawo khu vathu vovo, wu ngu hi kutsa gu gira satshavbo hi si kodzago gasi gu va bhuleya mahungu nya yadi. Mahungu yaya nya lisima, ma nga va ninga gutumba, ma va phasa gu mana womi nya wadi olu ni gu va ninga gutumba nya “womi nya lisine,” a gu womi nya mba vbeya mafuni nya maphya. — 1 Thim. 6:19.
Lihaladzo ni pweya-wusiwana hi gu nawo khu vathu wu ngu hi kutsa gu gira satshavbo hi si kodzago gasi gu va bhuleya mahungu nya yadi (Wona paragrafu 8)
9. Gigengedzo muni hi ningago vathu maningano khu wumindru nigu khu ginani? (Ezekiyeli 33:7, 8)
9 Lihaladzo hi gu nalo khu vathu, li ngu hi kutsa gu va gengedza gu khethu mahegiso nya litigo leli nyo vivbe momo vbafuvbi. (Leri Ezekiyeli 33:7, 8.) Ethu hi ngu pweya-wusiwana vathu vatshavbo, gupata vavhizinyu vathu ni valongo vathu va gu mba thumeya Jehovha. Vathu nya vangi va gu dzi vbanyeya na va si dziti gu khavo yi na manega “tshanisa nya yikhongolo nya gu gima yi si manegi, gukhugeya guvangwani nya litigo kala olu, nigu gima kha yi na nga manega gambe.” (Mat. 24:21) Ethu ha gu vbweta gu va embeya esi si na dugeleyago ga tepo yoyo nyo lamule. Ga tepo yoyo, wukhongeyi nya malipha wu na fuviswa, nigu litigo leli nyo vivbe la Sathane li na fuviswa ndrani nya nyimbi ya Arimagedhoni. (Gutu. 16:14, 16; 17:16, 17; 19:11, 19, 20) Ethu ha gu gombeleya gu khethu nya vangi va hakha gigengedzo gegi va bwe va patana ni ethu avba nya wukhozeyi nya guage olu. Ganiolu, ahati vale va gu mba engisa gigengedzo gyathu, gupata valongo vathu hi va golago?
10. Khu ginani si gu na ni lisima gu simama gengedza vathu maningano khesi si na giregago mindru watshigu?
10 Kha nga hi tshamusedego ga ndrima yi vbindridego, adzina saye gugola ga Jehovha gu vbulugisa vathu va na khodwago gwaye tepo va na wonago gu fuviswa ga Bhabhiloni nya Khongolo. Abari kharato, si na ni lisima gu simama gu va gengedza. Dundruga gu khuye: Satshavbo hi va embeyago olu, adzina saye va na dundruga gilogyo mindru watshigu. (Fananisa ni Ezekiyeli 33:33.) Adzina va na dundruga gigengedzo hi va embedego va bwe va ta patana ni ethu avba nya wukhozeyi nya guage na ngari dzimindru. Gu fana ni ghwardha ya tigoni ga Filipi yi nga vbindrugedza tepo basi gi nga girega “girevareva nya gikhongolo,” adzina saye vathu nyo khaguri va gu mba engiseya mahungu nya yadi olu, va na vbindrugedza tepo va na wonago gu fuviswa ga Bhabhiloni nya khongolo. — Mith. 16:25-34.
HA GU TSHUMAYELA KHOLU HI HALADZAGO JEHOVHA NI LINA LAYE
11. Ha gu ninga kharini Jehovha wuzundzo, wudhumo ni tshivba? (Gutuledwa 4:11) (Wona dzifotu.)
11 Gighelo nya lisima gi hi girago hi tshumayela mahungu nya yadi kholu hi haladzago Jehovha ni lina laye nya guage. Ethu ha gu wona thumo nyo tshumayele nga ndziya nya gu dhumise Nungungulu hi mu haladzago. (Leri Gutuledwa 4:11.) Ethu hi ngu dzumeleyana ni malito ma khugeyago ndzadzini ma gu khayo: “Jehovha Nungungulu wathu u ngu yedwa khu gu hakha wudhumo, wuzundzu ni tshivba.” Ethu ha gu mu ninga wuzundzu ni wudhumo tepo hi bhuleyago vambe gu khethu Jehovha khuye a nga ‘vanga satshavbo’ nigu ha gu vbanya kholu a nga hi ninga womi. Ethu ha gu ninga tshivba yathu Jehovha tepo hi thumisago gwadi tepo yathu, tshivba ni dzithomba dzathu gasi gu tshumayela khavbo hi si kodzago khavbo. (Mat. 6:33; Luka 13:24; Kol. 3:23) Khu ndziya nyo piye, hi ngu tsaka tepo hi ganeyago khu Nungungulu hi mu haladzago. Ethu hi ngu kutsega gambe gu bhuleya vambe maningano khu lina laye ni edzi a gu idzo. Khu ginani?
Ethu ha gu ninga tshivba yathu Jehovha tepo hi thumisago gwadi tepo yathu, tshivba ni dzithomba dzathu gasi gu tshumayela khavbo hi si kodzago khavbo (Wona paragrafu 11)
12. Ha gu agisa kharini lina la Jehovha thumoni nyo tshumayele?
12 Lihaladzo hi gu nalo khu Jehovha li ngu hi kutsa gu agisa lina laye. (Mat. 6:9) Isoso so thula gu khiso ha gu vbweta gu embeya vambe gu khethu satshavbo esi Sathane a ganedego maningano khu Jehovha, malipha. (Gen. 3:1-5; Joba 2:4; Joh. 8:44) Tepo hi tshumayelago, hi na ni gudogoreya nya gukhongolo nya gu embeye vatshavbo va vbwetago gu hi engiseya gu khethu khu mani gwadi-gwadi Jehovha ni edzi a gu idzo khu lisine. Ethu ha gu vbweta gu khethu va dziti gu khavo likhalelo nya likhongolo la Jehovha, lihaladzo nigu ndziya a fumago khiyo khyadi nigu yi lulamide. Ni guti gambe gu khavo Mufumo waye nya mba hweya wu na vbedza gutshaniseka gwatshavbo, wu resa gurula ni gutsaka ga vathu vatshavbo omu mafuni. (Ndzi. 37:10, 11, 29; 1 Joh. 4:8) Tepo hi bhuleyago vambe khu silo sesi maningano khu Jehovha ha gu agisa lina laye. Nigu hi ngu tsaka, kholu ha gu gira esi hi yedego gu gira kha nga Dzifakazi dza Jehovha. Khu ndziya muni?
13. Khu ginani hi tsakago khu gu ranwa Dzifakazi dza Jehovha? (Isaya 43:10-12)
13 Jehovha a di hi hatha gasi gu khala “Dzifakazi” dzaye. (Leri Isaya 43:10-12.) Myagana hwane, lidangaliya litago khiyo ga Huwo nya Guthangeye li ganede gu khilo: “Lithomo nya likhongolo ngudzu gwathu gu ranwa kha nga Dzifakazi dza Jehovha.” b Khu ginani hi ganeyago Isoso? Wona giyeyedzo gegi. Dundrugeya nari gu u di singedzwa gu pwani u di gira gilo nyo khaguri nyo vivbe. Olu wa gu vbweta muthu nyo khaguri gasi gu embeya vambe gu khuye esi u singedzwago khiso, malipha nigu gima u di hadzi gu mba gira gilo gyogyo nyo vivbe. U di hadzi hatha mani? Khu lisine, u di hadzi gu hatha muthu u mutigo, u mu tumbago nigu a gu na ni mavbanyelo nya yadi gasi vambe va mu tumba. Khu gu ba Jehovha a hi hatha kha nga Dzifakazi dzaye, a gu yeyedza gu khuye a ngu hi tumba gasi gu yeyedza vambe gu khuye, uye khuye basi Nungungulu nya lisine. Hi ngu dzipwa na hi tsakide khu gu khala Dzifakazi dzaye nyo bwe hi londrowa yatshavbo mathomo gasi gu tivegisa lina laye ni gu ganedza malipha ma ganedwago maningano khuye. Khu ndziya yeyi, ha gu gira esi lina lathu li hi rumago gu gira, a gu gu khala Dzifakazi dza Jehovha. — Ndzi. 83:18; Rom. 10:13-15.
HI NA SIMAMA GU TSHUMAYELA KALA MAHEGISO
14. Silo muni nya lisima hi si vireyago gu si wona mindru watshigu?
14 Hi virede khu maho nyo fuviye gu wona esi si na giregago mindru watshigu! Khu gu kategiswa khu Jehovha, hi na ni gutumba nya gu khethu na yi si pheye tshanisa nya yikhongolo vathu nya vangi va nata dzi pata ni ethu. Nigu gambe, hi ngu tsaka khu gu dziti gu khethu ndrani nya tshanisa nya yikhongolo vathu nya vangi va na diga litigo leli la Sathane va ta dzi pata ni ethu gasi gu dhumisa Jehovha Nungungulu.— Mith. 13:48.
15-16. Ginani hi na simamago gu gira, nigu kala lini?
15 Olu hi na ni thumo nya wungi nyo gire. Hi na ni lithomo nya gu patege avba nya gu huweleye mahungu nya gu gima kha ma na nga tiviswa gambe, a gu gu tshumayela mahungu nya yadi nya Mufumo mafuni gwatshavbo. Khu tepo yayimweyo, hi yede gu gengedza vathu khesi si na giregago nugunugu. Vathu va yede gu dziti gu khavo mahegiso nya litigo leli nyo vivbe momo vbafuvbi. Khu kharato, tepo yoyo nyo lamule yi na vbohago, va na dziti gu khavo mahungu hi nga ba hi ma tshumayela mo guta khiyo ga Jehovha Nungungulu.— Ezek. 38:23.
16 Ginani hi dzi emisedego gu gira? Ha gu vbweta gu simama gu tshumayela khu lihaladzo: A gu lihaladzo hi gu nalo khu mahungu nya yadi, lihaladzo hi gu nalo khu vathu, nigu guvbindra satshavbo lihaladzo hi gu nalo khu Jehovha ni lina laye. Nigu gambe, ha gu vbweta gu simama gu tshumayela khu sighingi, khu gu tsaka ni givbiredza kala Jehovha a ganeya gu khuye: “Thumo wu hegiside!”
NDZIMO 54 ‘Eyi khiyo ndziya’
a Tshangano nya mwaga wu giridwe khu 7 nya Outubro nya 2023, omu nya Salawu nya dziasembleya nya Dzifakazi dza Jehovha ya Newburgh, Nova York, Estados Unidos. Tshangano watshavbo wu yeyedzidwe omu nya JW Broadcasting® — Gipandre nyo pheye khu Novembro nya 2023 ni Gipandre nya wuvili khu Janeiro nya 2024.