1. Ginani egi Adhamu ni Evha va gi luzidego, nigu khu yevbini mihandro yakone?

KHU mani u mu wonago na ninganedwa khu gu vega milayo nya esi nya sadi ni esi nyo vivbe? Tepo Adhamu ni Evha va nga hodza handro nya simbo nya guti esi nya sadi ni esi nyo vivbe, va di yeyedza gu khavo kha va mu tumbi Jehovha ni milayo yaye. Va di hatha gu dzi vegeya vabune milayo nya esi nya sadi ni esi nyo vivbe. (Gen. 3:22) Ganiolu nga dundrugeya khesi va si luzidego. Va luzide wupari wawe ni Jehovha. Va luza gambe lithomo nyo vbanye kala gupindruga, va bwe va vbindriseya gighoho ni gufa ga sanana sawe. (Rom. 5:12) Esi Adhamu ni Evha va si hathidego si va yiside libangoni.

2-3. a) Ginani egi muEtiyopi a giridego tepo a nga tshumayedwa khu Filipi? b) Makategwa muni hi na ma manago ha gu bhapatiswa, nigu siwudziso muni hi na bhulago khiso?

² Nga fananisa mapimo ya Adhamu ni Evha ni ya thenwa nya muEtiyopi a tshumayedwego khu Filipi. Muetiyopi a di tsaka ngudzu khesi Jehovha ni Jesu va mu giredego, khavbovbo a dzegeya gu bhapatiswa. (Mith. 8:34-38) Tepo hi dzi hendzeledzago ga Nungungulu, hi bhapatiswa, kha nga muEtiyopi, ho yeyedza gu khethu hi ngu bonga khesi Jehovha ni Jesu va hi gireyago. Ho yeyedza gambe gu khethu hi ngu mu tumba Jehovha nigu hi ngu dziti gu khethu khuye enga a yedego gu vega milayo nya esi nya sadi ni esi nyo vivbe.

³ Nga dundrugeya khu makategwa hi ma manago khu gu thumeya Jehovha! Limwedo nya makategwa yoyo, khu gu Jehovha a na hi ninga satshavbo esi Adhamu ni Evha va si luzidego gupata ni lithomo nyo vbanye kala gupindruga. Khu kotani nya gukhodwa hi gu nago ga Jesu Kristo, Jehovha a ngu divaleya sihoso sathu hi bwe hi manega ni livhalo li agidego.  (Mat. 20:28; Mith. 10:43) Hi ngu bwe hi gira gipandre nya ndranga nya sithumi si tsakedwago khu Jehovha, si viredwego khu makategwa nyo tsakise ngudzu. (Joh. 10:14-16; Rom. 8:20, 21) Ambari olu hi gu na ni makategwa nya bagubagu, vambe vbakari gwathu va mu tigo Jehovha, va ngu kingima gu landreya giyeyedzo gya thenwa nya muEtiyopi. Gasi ginani gi va himbedzeyago gu bhapatiswa? Nigu va nga si pala kharini sigaradzo soso?

4-5. Sigaradzo muni esi Avery ni Hannah va tshanganidego naso?

⁴ Gu mba dzi tumba mwendro gu dzi wona na va si ninganedwi. Vavelegi va Avery Dzifakazi dza Jehovha. Papayi waye a di gu tidwa kha nga papayi nya wadi ni lidhota nya ladi. Ambari ulolo, Avery a di gu kingimakingima gu bhapatiswa. Khu ginani? Wari khuye: “Kha nya nga ba nyi dzi wona na nyi si kodza gu fana ni papayi wangu.” Avery gambe kha nga ba a tumba gu khuye a na si kodza gu gira mithumo a nga hadzi ningwa libandlani mindru wa tshigu. “Nyi di gu garadzega khu gu kheni nyo tshuka nyi lombwa gu gombeya mitshanganoni, gu vega dziganelo, mwendro gu thangeya tsawa nya thumo nyo tshumayele ke!”

⁵ Hannah, a gu na ni 18 myaga, a di si dzi woni na gu ninganedwa nuye gu bhapatiswa. Dandrisidwe khu vavelegi va thumeyago Jehovha. Ambari ulolo, a di gu kanakana gu khuye ina a na si kodza gu vbanya khu milayo ya Jehovha gani. Khu ginani? Khu gu Hannah a di gu dzi wona na si phasi gilo. Dzimbe dzitepo, mapimo yoyo ma di gu mu beleya hungoni avba nyo bwe a dzi bayiseya, iso si nga ba si engedzeya gigaradzo basi. Wari khuye: “Kha nya nga ba nyi bhuleya muthu esi nyi nga ba nyi gira, ambari vavelegi vangu, nigu nyi di gu pimisa gu kheni Jehovha gima kha na nga nyi tsakeya khesi nyi nga ba nyi dzi giredzeya.”

6. Ginani gi giridego Vanessa a kingima gu bhapatiswa?

⁶ Kutsedzelo nya dzipari. Vanessa, a gu na ni 22 myaga, wari khuye: “Nyi diri ni dzipari nya dzadi nyi nga ba nyi tivana nadzo khu myaga nya yingi.” Ambari ulolo, dzipari dza Vanessa kha dza nga ba dzi seketeya makungo yaye nyo bhapatiswe. Isoso kha sa mu phara gwadi Vanessa. Wari khuye: “Si di gu nyi garadzeya gu gira dzipari, khu kharato nyi di gu dzi wudzisa gu kheni nya gu piya wupari navo, nyi na si kodza gu mana dzimbe dzipari nya dzadi gani.”

7. Ginani egi Makayla a nga ba a gi thava, nigu khu ginani?

⁷ Guthava gu ghoha. Makayla a diri ni 5 myaga tepo ndriyaye a nga duswa libandlani.  Tepo a nga dandra, pwisiside edzi vavelegi vaye va nga ba va vbisega khidzo khu mithumo ya ndriyaye. Makayla wari khuye: “Nyi di gu thava gu kheni nyo bhapatiswa, nyi na ghoha, nyi duswa libandlani, nyi engedzeya guvbisa ga vavelegi vangu.”

8. Ginani egi Miles a nga ba a gi thava?

⁸ Guthava guwugedwa. Papayi ni madrasta wa Miles Dzifakazi dza Jehovha, ganiolu mamayi waye nyo mu velege khandri Fakazi. Miles wari khuye: “Nyi vbanyide ni mamayi wangu khu 18 myaga, nigu nyi di gu thava gu mu bhuleya khu makungo yangu nyo vbwete gu bhapatiswa. Tepo papayi wangu a nga khala Fakazi, kha sa mu phara gwadi mamayi. Nyi di gu thava gu kheni a na nyi wuseya neni kudzudzwane.”

9. Ginani gi na dugeleyago tepo u yago u hevbula khu gulaphisa-monyo ni lihaladzo la Jehovha?

⁹ Adhamu ni Evha va hathide gu mba thumeya Jehovha kholu va nga ba va si mu haladzi ngudzu. Ambari ulolo, Jehovha va dzumelede gu vbanya kala va velega sanana ni gu dzi vegeya milayo nyo si dandrise khiyo. Mihandro yi manidwego khu Adhamu ni Evha hwane nyo ba va hungide gu mba vbweta gu thangedwa khu Nungungulu, yi di dzegeya gu yeyedza wupumbu wawe. Gyanana gyawe nya matewula gi di songa ndriyagyo, khavbovbo wughevenga ni makolo si di pheya gu fuma drindrangani nya vathu. (Gen. 4:8; 6:11-13) Ambari ulolo, Jehovha a di tula ndziya nyo vbulugise sanana satshavbo sa Adhamu ni Evha si vbwetago gu mu thumeya. (Joh. 6:38-40, 57, 58) Tepo u yago u hevbula khu gulaphisa-monyo ni lihaladzo la Jehovha, lihaladzo lago khuye la gu engedzeya. U na potsa giyeyedzo gya Adhamu ni Evha, khavbovbo u dzi hendzeledza ga Jehovha.

10. Khu ginani gu drundrugeya khu Ndzimo 19:7 si nga gu phasago gu thumeya Jehovha?

¹⁰ Simama gu hevbula khu Jehovha. Tepo u yago u hevbula nya singi khu Jehovha, u na engedzeya gu tumba gu khuwe u na si kodza gu mu thumeya. Avery a khumbugidwego gupheyani, wari khuye: “Nyi tiyisidwe khu gu leri ni gu dundrugeya khu gitumbiso gya Jehovha gi gomogo omu ga Ndzimo 19:7.” (Leri.) Tepo Avery a nga wona edzi Jehovha  a tadzisidego khidzo gitumbiso gyogyo, lihaladzo laye khu Nungungulu li di engedzeya gu tiya. Lihaladzo khu Nungungulu kha li hi giri hi tumba basi gu khethu hi na si kodza gu mu thumeya, ganiolu la gu hi phasa gambe gu mba gira silo a si nyenyago. Hannah, a khumbugidwego gupheyani wari khuye: “Omu nya longoloko wangu nya gu leri ni gu hevbula Bhibhiliya, nyi tugude gu kheni tepo nyi dzi bayiseyago, nya gu bayiseya Jehovha nuye.” (1 Ped. 5:7) Hannah a di khala ‘mulandrisi nya mahungu’ ya Nungungulu. (Jak. 1:22) Khu wevbini handro nya isoso? Wari khuye: “Tepo nyi nga ba nyi wona edzi nyi nga ba nyi phasega khidzo khu gu engisa Jehovha, lihaladzo langu khuye li di dandra. Olu nyi ngu tumba gu kheni Jehovha a na nyi thangeya tepo yatshavbo nyi na vbwetago giphaso gyaye.” Hannah a di diga gu dzi bayiseya. Khu hwane, a dzi hendzeledza ga Jehovha ni gu bhapatiswa.

11. Ginani a giridego Vanessa gasi gu mana dzipari nya dzadi, nigu ginani hi nga gi hevbulago khu isoso?

¹¹ Hatha gwadi dzipari. Vanessa, a khumbugidwego gupheyani, khu guhegisa a di tugula gu khuye dzipari dzaye dzi di gu mu himbedzeya gu thumeya Jehovha. Ku kharato a di piya wupari nadzo. Ganiolu kha hageya gu gira isoso basi. A di dzi garadzeya gu vbweta dzipari nya dziphya libandlani. Wari khuye giyeyedzo gya Nowa ni ndranga yaye gi mu phaside ngudzu. “Va di randredwe khu vathu va nga ba va si khozeyi Jehovha, ganiolu avo va diri dzipari khu gyawe.” Hwane nyo bhapatiswe, Vanessa a di thuma kha nga piyonero. Olu wari khuye: “Isoso si nyi phaside gu gira dzipari nya dzadi libandlani gwathu, ni omu nya mambe mabandla.” Anuwe u nga si kodza gu gira dzipari nya dzadi khu gu dzi hita khavba u si kodzago khavbo thumoni wa Jehovha. — Mat. 24:14.

12. Hwanga muni owu Adhamu ni Evha va nga ba vari mwalo nawo, nigu khu wevbini handro wakone?

¹² Manega ni hwanga nya wadi. Gu na ni lifumbo nya hwanga wu gu mba vivba gu manega nawo. Khu giyeyedzo, gu vbwetega hi thava gu gira silo si gu mba tsakisa Jehovha. (Ndzi. 111:10) Nari khatshi Adhamu ni Evha va di manegide ni hwanga wowo, na va sa diga gu engisa Jehovha. Ganiolu, khiso kamo va  giridego. Hwane nyo ba va giride isoso, maho yawe ma di tulega, va tugula gu khavo va di ghohide. Gyakona va gi kodzidego gu gira, gu vbindriseya gighoho ni gufa ga sanana sawe. Kha nga olu va nga ba va kodza gu wona ni gu pwisisa giemo gyawe, va di khala dzitshoni kholu va nga ba vari wumbwiri, khavbovbo va ya dzi fenengedza. — Gen. 3:7, 21.

13-14. a) Khu guya khu 1 Pedro 3:21, khu ginani hi gu mba yela gu thava ngudzu gufa? b) Sighelo muni hi gu naso nyo haladze Jehovha?

¹³ Ambari olu hi yedego gu thava gu gira silo si gu mba tsakisa Jehovha, kha gu vbwetegi gu hi thava ngudzu gufa. Jehovha hi tulede ndziya nya gu hi mana gambe womi nya pindrugedwa. Ho tshuka hi gira gighoho, ganiolu khu hwane hi dzi laya khu monyo wathu watshavbo, Jehovha a na hi divaleya. A na hi divaleya kholu hi khodwago ga muphaso nya gudzegiswe wa Mwanaye. — Leri 1 Pedro 3:21.

¹⁴ Hi na ni sighelo nya singi nyo haladze Jehovha. Khandri ha gu mu haladza kholu a hi ningago silo nya singi nya sadi tshigu ni tshigu basi, ganiolu kholu a hi hevbudzago lisine maningano khuye ni situmbiso saye. (Joh. 8:31, 32) Hi ningide libandla nya wuKristo gasi gu hi thangeya ni gu hi phasa. A ngu hi phasa gu timiseya sigaradzo sathu olu, a bwe a hi ninga gutumba nyo vbanye kala gupindruga mindru wa tshigu. (Ndzi. 68:19; Gutu. 21:3, 4) Tepo hi dundrugeyago khu satshavbo esi Jehovha a hi giredego gasi gu hi yeyedza gu khuye a ngu hi haladza, anethu ha gu kutsega gu mu haladza ngudzu. Nigu ha gu haladza Jehovha, hi na manega ni hwanga nya wadi. Hi na thava gu gorosa oyu a hi haladzo ngudzu.

15. Makayla pade kharini hwanga nyo ghohe?

¹⁵ Makayla, a khumbugidwego gupheyani pade hwanga nyo ghohe a nga ba ari nawo tepo a nga tugula gu khuye Jehovha, Nungungulu nya wuhindzi. “Nyi tugude gu kheni hatshavbo hi vathu nya mba vbeleya, khu kharato hi ngu gira sihoso. Ganiolu nyi pwisiside gambe gu kheni Jehovha a ngu hi haladza, nigu a na hi divaleya khu kotani nya muphaso nya gudzegiswe wa Mwanaye.” Lihaladzo laye khu Jehovha li mu kutside gu dzi hendzeledza ga Jehovha a bwe a bhapatiswa.

16. Miles phasidwe kharini gu pala hwanga nyo wugedwe?

¹⁶ Miles, a nga ba a thava gu wugedwa khu mamayi waye a gu bhapatiswa, a di lomba giphaso ga muwoneleyi nya gipandre. Miles wari khuye: “Uye nuye a di dandrisidwe khu vavelegi va nga ba va hambanide khu wukhongeyi. A di nyi yeyedza dzindzinya nyo phase mamayi gu pwisisisa khu khuye kheni nyabune nyi nga dzi hungeya gu bhapatiswa, khandri papayi a nga ba a nyi gurumedza gu gira isoso.” Ganiolu isoso kha sa mu phara gwadi mamayi waye. Khu guhegisa, a di khuga khu ndrangani ga mamayi waye, ganiolu a simama ni makungo yaye. Wari khuye: “Gu hevbula khu silo nya sadi esi Jehovha a nyi giredego,  si nyi khuhide ngudzu monyo. Hwane nyo dundrugeye ngudzu khu muphaso nya gudzegiswe wa Jesu, nyi di tugula edzi Jehovha a nyi haladzo khidzo. Isoso si nyi kutside gu dzi hendzeledza ga Jehovha ni gu bhapatiswa.”

17. Lithomo muni hi gu nalo hatshavbo?

¹⁷ Tepo Evha a nga hodza handro nya simbo wule wa Edheni, a di danga Papayi waye. Tepo Adhamu a nga hodza nuye, a di yeyedza gu mba bonga khu satshavbo nya sadi esi Jehovha a mu giredego. Hatshavbo hi na ni lithomo nyo yeyedze gu khethu kha fani ni Adhamu ni Evha. Hi ngu bonga khu satshavbo esi Jehovha a hi gireyago. Khu gu bhapatiswa, ha gu yeyedza Jehovha gu khethu hi ngu khodwa gu khethu khuye enga a ninganedwago khu gu hi vegeya milayo nya esi nya sadi ni esi nyo vivbe. Gu vbwetega hi yeyedza gu khethu hi ngu haladza Papayi wathu ni gu mu tumba.

18. U nga dugeleya kharini thumoni wago ga Jehovha?

¹⁸ Hwane nyo bhapatiswe, gu vbwetega hi simama gu gira gugola ga Jehovha, na siri ogu gwathu. Dzimiliyoni nya sithumi sa Jehovha dzi ngu gira isoso mwaga ni mwaga. Anuwe u nga si kodza gu fana nadzo wa gu simama gu engedzeya guti u gu nago khu Lito la Nungungulu, Bhibhiliya; gu manega mitshanganoni ni vandriyago tepo yatshavbo; u bwe u bhuleya vambe esi u si hevbudego khu Papayi wago nya lihaladzo. (Hebh. 10:24, 25) Tepo u vbwetago gu hunga makungo nyo khaguri, engisa wusingalagadzi wa Jehovha hi wu manago omu nya Lito laye ni hengeledzano yaye. (Isa. 30:21) Khavbovbo, satshavbo u girago si na dugeleya. — Mav. 16:3, 20.

19. Ginani u yedego gu simama gu gi dundruga, nigu khu ginani?

¹⁹ Tepo u simamago gu wona edzi u phasegago khidzo khu gu thangedwa khu Jehovha, lihaladzo lago khuye ni milayo yaye li na dandra. Khu kharato wu mwalo ni naphwi moyo wa Sathane wu na gu digisago gu thumeya Jehovha. Nga dzi dundrugeya hwane nya 1000 myaga khavba. U na khedza hwane u wona gu khuwe gu hunga gu bhapatiswa, gilo nya lisima ngudzu ga satshavbo u hungidego!