NDRIMA NYA GIHEVBULO 10
Lihaladzo ni gu bonga khesi Jehovha a gu gireyago si na gu kutsa gu bhapatiswa
“Ginani gi nyi himbedzago gubhapatiswa?” — MITH. 8:36.
NDZIMO 37 Thumeya Jehovha khu monyo watshavbo
ESI HI NA SI HEVBULAGO AVBA NYA NDRIMA YEYI *
1-2. Ginani gi yeyedzwago omu ga Mithumo 8:27-31, 35-38, gi kutsidego muEtiyopi wule nya thenwa gu bhapatiswa?
INA u ngu dzina gu bhapatiswa kha nga mupizane wa Kristo? Lihaladzo ni gu vbweta gu yeyedza gubonga si kutside vathu nya vangi gu bhapatiswa. Nga wona giyeyedzo nya githumi gimwegyo gya pfhumu nya nyamayi ya Etiyopiya.
2 Muetiyopi wule kha gira mihuni gu bhapatiswa tepo a nga hevbula omu nya Milowo gu pwani a di yede gu gira isoso. (Leri Mithumo 8:27-31, 35-38.) Ginani gi nga mu kutsa? Khu lisine uye a di wona Lito la Nungungulu na liri ni lisima kholu a di gu leri sipandre nyo khaguri nya libhuku la Isaya tepo a nga ba ari omu nya kareta. Tepo Filipi a nga ganeya naye uye a di bonga ngudzu khesi Jesu a nga ba a mu girede. Ganiolu khu ginani muEtiyopi wule a hongodego Jerusalema? Kholu a di gu hagulede lihaladzo khu Jehovha. Ha gu dziti kharini? Kholu uye a di gu khozeya Jehovha tepo a nga ba ari Jerusalema. So wonega khatshi mwama yoyu a di gu digide wukhongeyi a nga ba a dandrisidwe khuwo aya dzi pata ni vathu va nga ba va dzi hendzeledzide ga Nungungulu nya lisine. Gu haladza Jehovha gu mu kutside gu gira gimbe gilo nya lisima, gu gu gubhapatiswa a khala mupizane wa Kristo. — Mat. 28:19.
3. Ginani gi nga himbedzeyago muthu gu bhapatiswa? (Wona kwadru “Monyo wago wu khade kharini?”)
3 Gu haladza Jehovha gu na gu kutsa gu bhapatiswa. Ganiolu, si nga gira gu lihaladzo gambe li gu himbedzeya gu bhapatiswa. Khu ndziya muni? Wona siyeyedzo sivili. Si nga gira na wu gu haladza ngudzu valongo vago ni dzipari dzago dzi sirigo Dzifakazi khavbovbo u garadzega khu gu khuwe wa gu bhapatiswa avo va na gu nyenya. (Mat. 10:37) Si nga gira gambe na wu gu gola gu gira silo nyo khaguri u dzitigo gu khuwe Nungungulu a ngu si nyenya ganiolu u si wona na si gu garadza gu diga gu gira silo soso. (Ndzi. 97:10) Mwendro saye u dandride na wu gu gola gu hodza dzifexita dzi gimbileyanago ni wukhozeyi nya malipha nigu u ngu tsaka ngudzu tepo u dundrugago silo nyo khaguri si gimbileyanago ni dzifexita dzodzo. Khavbovbo si gu garadzeya gu diga gu gira siolovedzo si gu mba tsakisa Jehovha. (1 Kor. 10:20, 21) Giwudziso khegi: “Ginani mwendro khu mani nyi mu haladzago ngudzu?”
OYU HI YEDEGO GU MU HALADZA NGUDZU
4. Ginani gi na gu gu kutsago gu bhapatiswa?
4 U ni silo nya singi nyo si gole ni sighelo nya singi nyo bonge. Khu giyeyedzo, na wu si gu pheyi gu hevbula Bhibhiliya ni Dzifakazi dza Jehovha adzina u di gu yi ninga ngudzu githawo Bhibhiliya. Si nga gira na wu gu haladza ngudzu Jesu. Adzina olu u ngati Dzifakazi dza Jehovha si nga gira na wu gola gu dzi pata nadzo. Ganiolu gu gola silo sesi nya sadi basi khandriso si na gu girago u vbweta gu dzi hendzeledza ga Jehovha u bwe u bhapatiswa. Gilo nyo pheye gi na gu gu girago u vbweta gu bhapatiswa gu haladza Jehovha Nungungulu. Wa gu ba u haladza Jehovha gu vbindra satshavbo kha wu na nga dzumeleya gilo mwendro muthu a gu himbedzeya gu mu thumeya. Gu haladza Jehovha gu na gu gira u bhapatiswa u bwe u simama na wu tumbegide gwaye hwane nyo bhapatiswe.
5. Siwudziso muni hi na ganeyago khiso?
5 Jesu a di khuye hi yede gu haladza Jehovha khu monyo wathu watshavbo, hefemulo wathu watshavbo, mapimo yathu yatshavbo ni tshivba yathu yatshavbo. (Marko 12:30) U nga hevbula kharini gu haladza Jehovha ni gu mu ninga githawo nya gikhongolo ngudzu? Gu dundrugeya khedzi Jehovha a hi haladzago khidzo ngudzu si na hi phasa gu mu haladza nethu. (1 Joh. 4:19) U na dzipwa kharini nigu ginani u na girago wa gu haguleya lihaladzo lolo nya lisima ngudzu? *
6. Guya khu Varoma 1:20, khu yevbi mweyo nya dzindziya u nga hevbulago khiyo khu Jehovha?
6 Hevbula khu Jehovha khu gu khedza esi a si vangidego. (Leri Varoma 1:20; Gutu. 4:11) Dundrugeya khu guti hi gu wonago avba nya edzi yi giridwego khidzo misimbo ni sirengo. Hevbula khedzi givili gyago gi giridwego khidzo. (Ndzi. 139:14) Nga dundrugeya gambe khu tshivba eyi Jehovha a ningidego lidambo na wu gu dundruga gambe gu khuwe ilo mweyo basi nya dzibhiliyoni nya dzinyeledzi. * (Isa. 40:26) Wa gu dundrugeya khesi Jehovha a si vangidego githawo gyago khuye gi naya gi dandra. Ambari ulolo, guti gu khuwe Jehovha na ni guti ni tshivba nya yikhongolo maphelo basi nya silo si na tiyisago wupari wago naye. Gasi gu manega ni lihaladzo li tiyidego khu Jehovha gu vbwetega uti nya singi khuye.
7. Gasi u si kodza gu manega ni lihaladzo li tiyidego khu Jehovha gu vbwetega u tiyisega khu ginani?
7 Gu vbwetega u tiyisega gu khuwe Jehovha a ngu gu haladza khu lisine. Ina si ngu gu garadzeya gu khodwa gu khuwe Muvangi nya ndzadzi ni mafu a ngu dziti gu khuye u womo nigu a ngu khathala khuwe? Wa gu ba u dzipwa kharato dundruga gu khuwe Jehovha “mwalo hwindzo ga moyo ni moyo nya ethu.” (Mith. 17:26-28) Uye a ngu “khedza . . . myonyo yatshavbo” nigu a ngu tumbisa gu khuye “wa gu mu vbweta u na mu mana.” (1 Dzik. 28:9) Khu lisine egi gi gu girago u hevbula Bhibhiliya khegi gi ganedwago khu Jehovha khuye “nyi gu ndrindredzede.” (Jer. 31:3) Tepo u yago u pwisisa esi Jehovha a gu giredego, lihaladzo lago khuye li na engedzeya gu dandra.
8. U nga yeyedza kharini gubonga khu lihaladzo la Jehovha?
8 Yimbe ndziya nyo yeyedze gubonga khu lihaladzo la Jehovha khu gu ganeya naye khu nombelo. Lihaladzo lago khu Nungungulu li na engedzeya tepo u mu bhuleyago sigaradzo sago ni gu mu bonga khu satshavbo a gu gireyago. Nigu wupari wago naye wu na tiya ngudzu tepo u na wonago edzi a na hlamulago khidzo milombelo yago. (Ndzi. 116:1) U na khodwa gu khuwe uye a ngu gu pwisisa. Ganiolu, gasi gu khala pari ya Jehovha gu vbwetega u pwisisa gu khuwe khu ginani a golago silo nyo khaguri a bwe a nyenya simbe ni egi gi mu girago a gira silo nyo khaguri. Nigu gu vbwetega u siti esi a si vbwetago gwago. Gu hevbula Lito laye, Bhibhiliya, khiyo ndziya yamweyo yi nga gu phasago guti silo soso.
Gu hevbula Bhibhiliya khiyo ndziya nya yadi ga dzatshavbo gasi gu khala dzipari dza Nungungulu ni guti esi a si vbwetago gwathu (Wona ndrimana 9) *
9. U nga yeyedza kharini gu khuwe u ngu ninga lisima Bhibhiliya?
9 Hevbula gu ninga lisima Lito la Nungungulu, Bhibhiliya. Bhibhiliya khiyo yonga yi gu na ni lisine maningano ni Jehovha ni makungo yaye khuwe. U nga yeyedza gu khuwe u ngu ninga lisima Bhibhiliya khu gu yi leri tshigu ni tshigu, khu gu dongiseya gihevbulo gyago nya Bhibhiliya u hevbulago ni muhevbudzi wago ni gu vbanya khesi u si hevbulago. (Ndzi. 119:97, 99; Joh. 17:17) U na ni longoloko wago nya gu leri Bhibhiliya? Ina u ngu wu landreya khu gu leri Bhibhiliya tshigu ni tshigu?
10. Gilo muni nya gimwegyo gi girago Bhibhiliya yi khala libhuku nya gu hathege?
10 Gimwegyo nya silo nyo hathege hi si manago omu nya Bhibhiliya khu gu iyo yi na ni matimo nya vathu va wonidego Jesu. Khilo libhuku leli basi li tshamuseyago silo nya lisine esi Jesu a gu giredego. Tepo u lerigo esi Jesu a ganedego ni gu si gira si na gu kutsa gu manega ni wupari nya wukhongolo ngudzu naye.
11. Ginani gi na gu phasago gu haladza Jehovha?
11 Hevbula gu haladza Jesu nigu lihaladzo lago khu Jehovha li na dandra. Khu ginani? Kholu Jesu a na ni makhalelo ya Papayi waye. (Joh. 14:9) Tepo u yago u hevbula nya singi khu Jesu, u na engedzeya gu pwisisa Jehovha ni gu u na engedzeya gu mu bonga. Nga dundrugeya khu pweya-wusiwana wu yeyedzidwego khu Jesu ga vale va nga ba va wonedwa vbavbatshi khu vambe kholu va nga ba vari sisiwana, va nga ba va dwala ni gu mba na tshivba. Nga dundrugeya gambe khu wusingalagadzi maningano ni guvbanya gwago ga tshigu ni tshigu ni edzi womi wago wu gimbiyago khidzo gwadi tepo u mu engisago. — Mat. 5:1-11; 7:24-27
12. Tepo u hevbulago maningano ni Jesu ginani u na kutsegago gu gira?
12 Lihaladzo lago khu Jesu li na engedzeya gu dandra tepo u dundrugeyago khu muphaso a wu giridego gasi hi kodza gu divaledwa sighoho sathu. (Mat. 20:28) Tepo u na pwisisago gu khuwe Jesu a ningede womi waye khu kotani yago u na kutsega gu dzi laya u bwe u vbweta gu divaledwa khu Jehovha. (Mith. 3:19, 20; 1 Joh. 1:9) Tepo u yago u haladza Jehovha ni Jesu u na vbweta gu manega gumogo ni vathu va va haladzago navo.
13. Ginani egi Jehovha a gu ningago?
13 Hevbula gu haladza vathu va haladzago Jehovha. Si nga gira valongo ni dzipari dzago va sirigo Dzifakazi va si si pwisisi gu khavo khu ginani u vbwetago gu dzi hendzeledza ga Jehovha. Yimbe tepo va nga gu wugeya. Jehovha a na gu phasa khu gu gu ninga valongo va liphuvboni. Wa gu pwana ni valongo vovo va liphuvboni u na mana lihaladzo ni giphaso u gi vbwetago. (Marko 10:29, 30; Hebh. 10:24, 25) Khu gu gimbiya nya tepo si nga gira valongo vago navo va thumeya Jehovha ni gu mu engisa. — 1 Ped. 2:12.
14. Kha nga si lovidwego ga 1 Johane 5:3, ginani u gi tugudego maningano ni milayo ya Jehovha?
14 Hevbula gu bonga milayo ya Jehovha ni gu vbanya khiyo. Na wu si gu muti Jehovha adzina u di gu dzi hatheya wabune esi nya sadi ni esi nya mba sadi ganiolu olu u wonide gu khuwe milayo ya Jehovha khiyo yi gu yadi guvbindra yatshavbo. (Ndzi. 1:1-3; leri 1 Johane 5:3.) Nga dundrugeya khu milayo nya Bhibhiliya maningano ni vama, vagadzi, vavelegi ni sanana. (Efes. 5:22–6:4) Ina ndranga yago yi ngu mana gutsaka khu gu landreya milayo yoyo? Ina mavbanyelo yago ma vbindrugedzide ma khala nya yadi kholu u landreyago wusingalagadzi wa Jehovha nyo hathe gwadi dzipari? Ina olu u na ni gutsaka guvbindra gale? (Mav. 13:20; 1 Kor. 15:33) Adzina hlamulo wago avba nya siwudziso sesi i ina.
15. Ginani u yedego gu gira wa gu ba u vbweta giphaso nya edzi u nga thumisago khidzo matshina nya milayo nya Bhibhiliya?
15 Dzimbe dzitepo si nga gu garadzeya guti gu khuwe u nga ma thumisa kharini matshina nya milayo nya Bhibhiliya u ma hevbulago. Khu kharato Jehovha a gu thumisa hengeledzano yaye gasi gu gu ninga mabhuku ma gu phasago gu pwisisa Bhibhiliya ni gu tugula esi nya sadi ni esi nyo vivbe. (Hebh. 5:13, 14) Wa gu leri ni gu hevbula mabhuku yoyo u na wona edzi ma phasago khidzo nigu ma na gu kutsa gu vbweta gu gira gipandre nya hengeledzano ya Jehovha.
16. Jehovha sasamedzide kharini vathu vaye?
16 Hevbula gu haladza ni gu phasedzeya hengeledzano ya Jehovha. Jehovha sasamedzide vathu vaye khu mabandla; Gyanana gyaye Jesu khigyo hungo nya mabandla yatshavbo. (Efes. 1:22; 5:23) Jesu emiside tsawa nya wudugwana nya vama va todzidwego gasi gu thangeya thumo a vbwetago gu khuye wu girwa muhuno. Jesu a gu wona tsawa wowu nya vama vovo kha nga “githumi nya gutumbege ni nya gugengeye,” nigu thumo wawe khu gu gu hodzisa ni gu gu vhikeya khu liphuvboni. (Mat. 24:45-47) Mweyo nya dzindziya eyi githumi nya gutumbege gi gu sayisago khiyo khu gu emisa vama va ninganedwago gu khala madhota gasi ma gu thangeya ni gu gu vhikeya. (Isa. 32:1, 2; Hebh. 13:17; 1 Ped. 5:2, 3) Madhota ma dzi emisede gu gira ni gevbini gi gomogo tshivbani gwavo gasi gu gu thaveleya ni gu engedzeya wupari wago ni Jehovha. Gimwegyo nya silo nya lisima ngudzu va nga gu gireyago khu gu gu phasa gu hevbudza vambe maningano ni Jehovha. — Efes. 4:11-13.
17. Guya khu Varoma 10:10, 13, 14, khu ginani hi bhuleyago vambe maningano ni Jehovha?
17 Phasa vambe gu haladza Jehovha. Jesu rumide valandreyi vaye gu hevbudza vambe maningano ni Jehovha. (Mat. 28:19, 20) Si ngu kodzega gu engisa gileletelo gyogyo kholu hi ngu dziti gu khethu hi yede gu gi engisa. Tepo lihaladzo lago khu Jehovha li yago li dandra u na dzipwa nga edzi a dzipwidego khidzo Pedro ni Johane va nga khavo: “Ethu, kha hi dzi kodzi gumba pwadza vathuni iso hi nga si wonago ni gu sipwa.” (Mith. 4:20) Hi na tsaka ngudzu ha gu kodza gu phasa muthu gu haladza Jehovha. Nga dundrugeya khu gutsaka a gu pwidego Filipi tepo a nga phasa muEtiyopi wule gu hevbula lisine nya Milowo a bwe a bhapatiswa! Tepo u pimedzeyago Filipi khu gu engisa gileletelo gya Jesu nya gu tshumayele, wa gu yeyedza gu khuwe u ngu dzina gu khala moyo nya Dzifakazi dza Jehovha. (Leri Varoma 10:10, 13, 14.) Khu kharato u na dzi gira giwudziso nya nga egi a dzi giridego muEtiyopi wule: “Ginani gi nyi himbedzago gubhapatiswa?” — Mith. 8:36.
18. Ginani hi na ganeyago khigyo avba nya ndrima yi landreyago?
18 Tepo u bhapatiswago wa gu gira gilo nya lisima ngudzu ga satshavbo womini wago. Kha nga olu gi gu gilo nya lisima ngudzu ga satshavbo gu vbwetega u pwisisa gwadi gu khuwe ginani gi pategago avba nya gu bhapatiswe. Ginani u yedego gu giti maningano ni gu bhapatiswa? Ginani u yedego gu gira na wu si gu bhapatiswe ni hwane nyo bhapatiswe? Siwudziso sesi hi na ganeya khiso avba nya ndrima yi landreyago.
NDZIMO 2 Lina lago khuwe Jehovha
^ ndri. 5 Vambe vathu va mu haladzago Jehovha va nga gu kanakana gu khavo gani va dongide gasi gu bhapatiswa va khala Dzifakazi dza Jehovha mwendro ne. Wa gu ba u dzipwa kharato, ndrima yeyi yi na gu phasa gu wona silo u yedego gu gira si na gu phasago gasi u bhapatiswa.
^ ndri. 5 Vathu vatshavbo va hambanide, khu kharato, si nga gira muthu ni muthu a thumisa mawonelo ma khumbugwago omu nya ndrima yeyi khu ndziya nyo hambane ni eyi ma sasamedzidwego khiyo avba.
^ ndri. 6 Gasi gu mana simbe siyeyedzo wona broxura A Vida — Teve um Criador? ni A origem da vida — Cinco perguntas que merecem resposta.
^ ndri. 65 TSHAMUSELO NYA FOTO: Ndriyathu nya nyamayi a ningago gidangaliyana nyamahegyane a mananidego naye bazarituno.
