Valevhi va nga ba va siri vaphasi nya mhamba va di gu thuma kha nga dzipolisiya. Avo va di gu thangedwa khu muwoneleyi nya tempele. Mulovi nya muJudha, Philo, a ngu tshamuseya mithumo yi nga ba yi girwa khu dzipolisiya dzodzo: “Vambe va di gu vegwa omu nya malimba kha nga vaghadhi nya myanya, vambe va di gu ghadha mbeli nya wulanga nya guage gasi va si dzumeleyi muthu a beya wulangani nya guage na ari mwalo fanelo, ambari nari khu gu phazama. Vambe va di gu gimbiyagimbiya dzibambe nya tempele gasi gu yi woneleya. Avo va di gu tshikedzana wutshigu ni mihani.”

Dzipolisiya dzodzo dzi di gu thuma gambe nyumbani nya wulamuli nya giJudha. Khuwo basi tsawa nya maJudha wu nga ba wu dzumeledwa gu phara matshari khu masotshwa nya vaRoma.

Mutshamuseyi nya mahungu nya Bhibhiliya, Joachim Jeremias, wari khuye: “Tepo dzipolisiya dzi nga mola Jesu uye a di va wudzisa gu khuye khu ginani mu nga mba nyi mola tepo nyi nga ba nyi hevbudza tempeleni. Jesu na sa gira giwudziso nya nga egi nari khatshi dzipolisiya dzile kha dza nga ba dzi gira gipandre nya dzipolisiya dza tempeleni.” Mulovi yoyu ganede gambe gu khuye vale va nga rumedwago guya mola Jesu ga tepo nyo pheye va diri dzipolisiya dza tempeleni navo. (Joh. 7:32, 45, 46) Khu hwane nya tepo valamuli va nyumbani nya wulamuli nya giJudha va rumede muwoneleyi nya tempele ni dzipolisiya nyo khaguri gasi gu ya mola vapostoli nyo khaguri. Si nga gira nari idzo gambe dzi nga ndrindrandrindra mupostoli Pawulo dzi duga naye khu tempeleni. — Mith. 4:1-3; 5:17-27; 21:27-30.