Vathu nyo khaguri va nga leri matimo yaya va dzi giride giwudziso gegi. Ganiolu, mavhesi yaya ma gu ganeya khu vama vavili va ranwago khu lina la Mefibhoseti, nigu hi nga hevbula gilogyo khu gu wusedza esi si dugeledego.

Pfhumu ya Israyeli, Sawule, yi diri ni 7 sanana nya sikhwathana ni sanana sivili nya sagadzyana. Jonatane a diri gyanana nyo pheye gya Sawule. Khu hwane pfhumu yi di velega gimbe gyanana nyo pwane khu Mefibhoseti ni mwangadzi waye nya dugwana nya gu pwane khu Risipa. Igyo gi samadzisago khu gu Jonatane a nuye a diri ni gyanana nyo pwane khu Mefibhoseti. Khu kharato, pfhumu Sawule a diri ni gyanana nyo pwane khu Mefibhoseti ni gitugulwana gi nga ba gi ri ni lina la limwedo.

Pfhumu Sawule a di pheya gu nyenya Vagibheyoni a zama gu songa vatshavbo. Khu lisine, isoso si di gu vivbide. Khu ginani? Kholu matshigoni ya Josuwa, vathangeyi va Israyeli va di tumbisa gu gira gurula ni Vagibheyoni. — Jos. 9:3-27.

Isoso si di nga gu thuma matshigoni ya Pfhumu Sawule. Gu hambana ni esi gidzumeledzwano gi nga ba gi ganeya, Pfhumu Sawule a di gu vbweta gu fuvisa Vagibheyoni. Khu gu ba a zamide gu gira isoso “Sawule ni ndranga yaye khavo va gu ni nandru nya wusongi.” (2 Sam. 21:1) Khu gu hegisa Dhavhidhe a di khala pfhumu. Vagibheyoni va nga vbuluga va embede Dhavhidhe gighoho egi Sawule a nga ba a giride. Dhavhidhe a di va wudzisa gu khuye ginani a nga ba a yede gu gira gasi gu lulamisa esi Sawule a giridego khu kharato a tula ndziya nya gu Jehovha a kategisa litigo. Wulangani nya gu Vagibheyoni va lomba dzitsapawu, avo va di lomba 7 sanana sa oyu a nga hunga “gikungo nya gu [va] mbembise” gasi gu va ningeya va bwe va songwa. (Mite. 35:30, 31) Dhavhidhe a dzumede gilombo gyawe. — 2 Sam. 21:2-6.

Sawule ni Jonatane va songidwe nyimbitunu, ganiolu Mefibhoseti, gyanana gya Jonatane, gi di ngo vbanya. Uye a di haside gu khugeya wananani waye nigu so wonegisa gu khiso kha patega avbo nya nyimbi tepo vhovho waye a nga wugeya Vagibheyoni. Dhavhidhe a di gu giride gidzumeledzwano ni pari yaye Jonatane gi ganeyago gu khigyo a di hadzi gu phasa situgulwana saye gupata Mefibhoseti, gyanana gya Jonatane. (1 Sam. 18:1; 20:42) Matimo ma ri khayo: “[Pfhumu Dhavhidhe] a di vbulugisa Mefibhoseti, mwamana wa Jonatane, mwamana wa Sawule, khu kotani nya gisambanyo a sambanyidego ga Pfhumu Nungungulu.” — 2 Sam. 21:7.

Ambari ulolo, Dhavhidhe a giride esi Vagibheyoni va nga mu lomba. Uye a ningede sanana sivili sa sawule gimwegyo gyakone gi ranwago gu pwani khu Mefibhoseti ni 5 situgulwana sa Sawule. (2 Sam. 21:8, 9) Esi Dhavhidhe a giridego si vbedzide ni nandru nya novba wu nga ba wu romo tigoni.

Esi si giregidego, khandri matimo basi, ganiolu si giregide khu lisine. Nayo wa Nungungulu wu di gu pwisisega. Uwo wari khuwo: “Sanana si mwalo fanelo nya gusongwe khu sighoho sa vavelegi vawe.” (Dhet. 24:16, NM) Jehovha na sa dzumeleya esi si nga dugeleya ni sanana sivili sa Sawule ni 5 situgulwana saye nari khatshi avo va di ri mwalo nandru. Nayo wo engedza khuwo: “Muthu ni muthu a nafa khu gighoho gyaye.” Sa gu wonega gu khatshi 7 situgulwana sa Sawule si fudego si di pategide khu ndziya nyo khaguri avbo nya gu wugeye Vagibheyoni. Kha nga handro wakone, vatshavbo nya 7 va livbide khu sighoho sawe.

Matimo yaya ma gu yeyedza gu khayo muthu kha yeli gu dzi emeleya na giride silo nya gu vivbe ambari a gu ganeya gu khuye a di gu landrisa sileletelo. Livingu nyo khaguri lari khilo: “Khedza ndzila u gimbilago khiyo, dzindzila dzago dzatshavbo dzi na lulame!” — Mav. 4:24-27; Efes. 5:15.