1. Ginani egi vathu va gi wonago tepo va tago mitshanganoni yathu khu tepo nyo pheye? (Wona gambe fotu.)

 NGA DUNDRUGEYA patwa nyo khaguri owu wu pategago avba nya mitshangano nya libandla nya Dzifakazi dza Jehovha khu tepo nyo pheye. Patwa wowo wo hlamadziswa tepo wu wonago wupari wu gu na ni vandriyathu ni edzi va haladzanago khidzo. Tepo va nga ba hongola gaya, mwangadzi a di embeya mwama waye khuye: ‘Vathu vava va ngu hambana ni ava nyi tivanidego navo, nigu eni nyi tsakide ngudzu khu gu manega navo.’

2. Khu ginani vandriyathu nyo khaguri va khunguvanyegago?

² Lihaladzo va yeyedzanago vathu va Jehovha li na ni lisima ngundzu. Khu lisine, Dzifakazi dza Jehovha kha dza vbeleya. (1 Joh. 1:8) Tepo hi yago hiti vandriyathu libandlani, hi na tugula sihoso sawe. (Rom. 3:23) Nya mba tsakisa khu gu vandriyathu nyo khaguri va ngu khugunvanyega khu kotani nya olu va vegago gupima avba nya gu mba vbeleya ga vambe.

3. Ginani gi tivegisago valandreyi nya lisine va Jesu? (Johane 13:34, 35)

³ Wona gambe lowo wu seketeyago ndrima yeyi. (Leri Johane 13:34, 35.) Hi nga mati kharini Makristo nya lisine? Hi nga mati khu lihaladzo ma gu navo khu gyawe. Ganiolu, Bhibhiliya kha yi ganeyi gu khiyo ayo vathu nya guvbeleya. Wona gambe esi Jesu a nga ne gu ganeya. Jesu kha ganeya gu khuye: ‘Khavbo uwe u na dzitigo nya gu khuwe u mupizane wangu.’ Ganiolu, uye a di khuye: “Khavbo vathu va na dzitigo gu khavo mu vapizane vangu.” Jesu kha ganeya basi gu khuye valandreyi  vaye va nga hadzi gu wona lihaladzo leli, ganiolu ni vale va gu siri Makristo nya lisine.

4. Siwudziso muni vathu nyo khaguri va nga dzi girago?

⁴ Vathu va gu siri Dzifakazi dza Jehovha adzina va nga wudzisa gu khavo: ‘Lihaladzo li nga hi phasa kharini gu tugula valandreyi nya lisine va Jesu? Jesu a yeyedzide kharini lihaladzo ga vapizane vaye? Nigu ethu hi nga gira kharini gasi gu pimedzeya giyeyedzo gya Jesu muhuno?’ Ambari ethu hi gu Dzifakazi dza Jehovha khya lisima gu dundrugeya khu mihlamulo nya siwudziso sesi. Gu gira isoso, si na hi phasa gu yeyedza lihaladzo ga vambe ambari olu hi nga ne gu vbeleya. — Efes. 5:2.

5. Malito hi ma manago umo ga Johane 15:12, 13 ma gu tshamuseya ginani?

⁵ Jesu a di khuye valandreyi vaye va di hadzi gu yeyedzana lihaladzo khu ndziya nya gu hathege. (Leri Johane 15:12, 13.) Jesu a va embede gu khuye: “Haladzanani kha nga idzo nyi mi haladzidego khidzo.” A di vbweta gu khuye ginani khu malito yaya? Kha nga edzi Jesu a nga ba a si tshamusede, uye a di gu vbweta gu khuye moyo ni moyo nya valandreyi vaye va haladza vambe gu vbindra edzi va dzi haladzago khidzo. Lihaladzo lolo, khilo li nga hadzi gu va kutsa gu feya vandriyawe sa gu lombega. b

6. Lito la Nungungulu la gu tshingisa kharini lisima nya lihaladzo?

⁶ Lito la Nungungulu li ngu hi hevbudza gu khilo Lihaladzo likhalelo nya lisima ngudzu. Khu giyeyedzo, vathu nya vangi va ngu gola mavhesi yaya: “Nungungulu lihaladzo.” (1 Joh. 4:8) “Haladza ndriyago nga edzi u dzi haladzago khidzo.” (Mat. 22:39) “Lihaladzo li ngu dzi kodza gu tsetselela sighoho nya  singi.” (1 Ped. 4:8) “Lihaladzo gima kha Ii vbeli.” (1 Kor. 13:8) Mavhesi yaya ni mambe ma ngu yeyedza guagane gu khayo khya lisima gu hi yeyedza likhalelo leli nya gu mbure ngudzu.

7. Khu ginani Sathane a gu mba si kodza gu gira wukhongeyi wu gu na ni vathu va haladzanago khu lisine?

⁷ Vathu nya vangi va ngu dzi wudzisa gu khavo: ‘Nyi nga wuti kharini wukhongeyi nya lisine? Dzatshavbo dzitshetshe dzo ganeya gu khidzo dzo hevbudza lisine, ganiolu idzo dzo hevbudza silo nyo hambane maningano khu Nungungulu.’ Sathane o gira gu wukhongeyi nya malipha wu engedzeya gasi si garadzeya vathu gu tugula wukhongeyi nya lisine. Ganiolu, uye kha kodze gu gira wukhongeyi nya vathu va haladzanago ni gu pwanana mafuni gwatshavbo. Khu Jehovha basi a si kodzago gu gira isoso. Ethu ha guti isoso kholu lihaladzo la guta khiyo ga Jehovha. Vale va gu na ni liphuvbo la Jehovha ni gu kategiswa khuye khavo basi va haladzanago khu lisine. (1 Joh. 4:7) Esi khiso si giridego Jesu a ganeya gu khuye valandreyi vaye va di hadzi gu tidwa khu lihaladzo va gu nalo khu gyawe.

8-9. Ninga siyeyedzo nya vathu va kuhidwego khu lihaladzo va li wonidego vbakari nya Dzifakazi dza Jehovha?

⁸ Kha nga Jesu a ganedego, valandreyi nya lisine va di hadzi gu tidwa khu lihaladzo va gu nalo khu gyawe. Khu giyeyedzo, ndriyathu nyo pwani khu Ian, a ngu dundruga Kongresu nyo pheye a yi wonidego yi nga girwa vbafuvbi ni gaya gwaye umo nya kampu nyo veteye bhola. Migima hwane Ian a di manegide umo nya kampu yoyo na gu wona Jogu. Uye wari khuye: “Vathu nyi nga va wona avbo nya Kongresu va di hambanide ngudzu ni vathu nyi nga ba nyi wona navo Jogu. Dzifakazi dza Jehovha dzi diri vathu nya vadi, va di gu ambade gwadi nigu sanana sawe si di gu yeyedza githawo.” Uye a di engedza gambe gu khuye: “Vatshavbo va di gu tsakide nigu va di gu rude. Isoso khiso nyi nga ba nyi si vbweta neni womini gwangu. Eni kha nyi dundrugi ni mweyo nya dziganelo dzi vegidwego litshigu lile, ganiolu nyo dundruga basi edzi Dzifakazi dza Jehovha dzi nyi pharidego khidzo.” c Isoso si kodzegide khu kotani nya lihaladzo va nga ba va yeyedzana khu gyawe. Khu kotani nya olu hi haladzago vadriyathu, ethu hi ngu va phara gwadi ni gu va ninga githawo.

⁹ Ndriyathu moyo nyo pwani khu John a dzipwide khu ndziya ya yimweyo tepo a nga patega mitshanganoni nya libandla khu tepo nyo pheye, uye wari khuye: “Eni nyi hlamadzisidwe khu wupari va nga ba vari nawo nyi bwe nyi pimisa gu kheni va diri vathu nyo vbeleye. Lihaladzo lawe nya lisine, li nyi giride nyi tiyisega gu kheni nyi manide wukhongeyi nya lisine.” d Siyeyedzo sesi ni simbe sa gu yeyedza gu khiso vathu va Jehovha Makristo nya lisine.

10. Ga giemo muni hi nga yeyedzago lihaladzo nya Wukristo? (Wona tshamuselo wa vbavbatshi.)

¹⁰ Kha nga hi si wonidego vandriyathu kha va vbeleya. Dzimbe dzitepo, avo va na ganeya mwendro gu gira silo si na hi khunguvanyisago. e (Jak. 3:2) Tepo avo va hi khunguvanyisago, ethu hi na ni lithomo nya gu va yeyedze lihaladzo nya lisine khesi hi ganeyago ni gu gira. Ginani hi nga gi hevbulago khu giyeyedzo hi vegedwego khu Jesu? — Joh. 13:15.

11. Makhalelo muni nyo vivbe Johane ni Jakobe va ma yeyedzidego? (Wona gambe fotu.)

¹¹ Jesu kha vireya gu khuye vapostoli vaye va vbeleya. Wulangani nya isoso, khu lihaladzo ava phaside gu tshukwadzisa makhalelo yawe gasi gu va tsakedwa khu Jehovha. Ga giemo nyo khaguri Mupostoli Jakobe ni Johane, va lombide mamayi wawe guya ganeya ni Jesu gasi gu va ninga gikhalo Mufumoni ga Jehovha. (Mat. 20:20, 21) Esi Jakobe ni Johane va giridego si di gu yeyedza gu khiso avo va di gu dzi khusedza nigu va di gu vbweta gu khala vathu nya lisima ngudzu guvbindra vambe. — Mav. 16:18.

12. Ina khu Jakone ni Johane basi va yeyedzidego makhalelo nya mba yadi? Tshamuseya.

¹² Jakone ni Johane khandri avo basi va nga yeyedza makhalelo nya mba yadi ga tepo yeyi. Wona esi vambe Vapostoli va giridego. “Tepo vale nya 10 va ngapwa isoso, va di sola va na ndruye ni ndruye vale vavavili.” (Mat. 20:24) Nga dundrugeya edzi Jakone, Johane ni vambe vapostoli va nga ganedzisana khidzo. Adzina vambe va wudziside gu khavo: ‘Ina mwa gu pimisa gu khenu mu tshukwana guvbindra ethu? Khu ginani mu nga lomba gikhalo umo nya Mufumo wa Nungungulu? Mwa gu pimisa gu khenu, khenu basi mu thumago khu gu dzi garadza ni Jesu? Hatshavbo avba hi ngu yedwa khu gu hakha sikhalo  nya lisima.’ Gani va ganede esi mwendro simbe silo, avo va dzumelede giemo gile gi va tandregisa gu yeyedzana lihaladzo.

13. Ginani egi Jesu a giridego tepo vapostoli vaye va nga ganedzisana? (Matewu 20:25-28)

¹³ Ginani egi Jesu a giridego ga giemo gegi? Uye kha goroga nigu kha ganeya gu khuye khu mani a nga ba ari mupostoli nya wadi a nga ba a dzi nogisa ni gu yeyedza lihaladzo tepo yatshavbo. Wulangani nya isoso, Jesu a di ganeya navo khu wuwadi, kholu uye a di gu dziti gu khuye avo va di gu vbweta gu gira silo nya sadi. (Leri Matewu 20:25-28.) Uye a simamide gu va phara khu ndziya nya lihaladzo ambari olu va nga ba va simama gu ganedzisana gu khavo khu mani a nga ba ari khongolo gwawe. — Marko 9:34; Luka 22:24.

14. Vapostoli va Jesu va dandrede ga wulanga muni?

¹⁴ Jesu a dundrugede khomu vapostoli vaye va dandridego umo. (Joh. 2:24, 25) Avo va di gu dandride ga wulanga omu vathangeyi nya wukhongeyi va nga ba va ninga lisima sikhalo nya gukhugege. (Mat. 23:6; fananisa ni vhidhiyu yi gu khiyo: “Primeiros assentos na Sinagoga.”) Vakhongeyi nya Vajudha, anavo va di gu dzi wona na vari vakhongolo guvbindra vambe. f (Luka 18:9-12) Jesu pwisiside gu khuye adzina isoso khiso si kuhidego vapostoli vaye. (Mav. 19:11) Uye kha nga ba a vireya gu khuye vapostoli vaye kha va na nga gira sighoho. Ganiolu, tepo yatshavbo a di va yeyedza wuwadi ni gu va laphiseya monyo. Uye a di gu dziti gu khuye avo tepo yatshavbo va di gu vbweta gu gira esi nya sadi, khu kharato uye a va hevbudzide gu dzi nogisa, gu yeyedza lihaladzo vambe ni gu gira esi si gu sadi tepo yatshavbo.

15. Ginani hi gi hevbulago khesi si giregidego Johane, Jakobe ni vambe vapostoli?

¹⁵ Hi nga hevbula nya singi khesi si girigidego Jakobe ni Johane. Avo va phazamide khu gu lomba gikhalo Mufumoni ga Nungungulu. Nigu vambe vapostoli va phazamide khu gu mba andrisa gupwanana khu gyawe. Ganiolu, Jesu a yeyedzide lihaladzo ni wuwadi ga vapostoli vaye vatshavbo. Ginani hi gi hevbulago? Esi si gu na ni lisima ngudzu, khandri esi vambe va girago, ganiolu khedzi va pharago khidzo sihoso sa vambe. Ginani gi nga hi phasago? Tepo ndriyathu nyo khaguri a hi khunguvanyisago, hi nga dzi wudzisa gu khethu: ‘Khu ginani esi ndriyathu a giridego si nyi gorosago? Ina so yeyedza gu khiso nyi na ni makhalelo nya mba yadi nyi yedego gu ma tshukwadzisa? Ina oyu a nyi khunguvanyisidego o tshangana ni sigaradzo? Abari gu nyi na ni gighelo nya gyadi nyo goroge khesi a nyi giredego, Ina nyi na mu yeyedza lihaladzo nyi bwe nyi mu divaleya?’ Tepo hi yeyedzanago lihaladzo, ethu ha gu yeyedza gu khethu hi valandreyi nya lisine va Jesu.

16. Ginani gambe hi nga gi hevbulago khu giyeyedzo gya Jesu?

¹⁶ Giyeyedzo gya Jesu gya gu hi hevbudza gambe gu khigyo hi yede gu pwisisa vandriyathu. (Mav. 20:5) Ethu kha hi si kodzi gu wona esi si gomogo monyoni nya vathu nga Jesu. Ganiolu, hi yede gu laphiseya monyo vandriyathu tepo va hi khunguvanyisago. (Efes. 4:1, 2; 1 Ped. 3:8) Si na hi vbevbugeya gu gira isoso, ha gu dzi garadzeya gu vati gwadi. Hongoleni hi wona giyeyedzo nyo khaguri.

17. Muwoneleyi nya gipandre a phasegide kharini khu gu dzi garadzeya guti vandriyathu?

 ¹⁷ Muwoneleyi moyo nya gipandre a gu dundruga ndriyathu moyo wa África Oriental. Gupheyani, uye a di gu pimisa gu khuye ndriyathu yoyo kha yeyedzi wuwadi. Ganiolu, ginani a giridego? Uye a di khuye: “Vbavbandze nya gu mu potse-potse, eni nyi di hunga gu muti gwadi.” Tepo a nga ba zama guti gwadi ndriyathu wule, tugude gu khuye edzi a dandrisidwego khidzo ndriyathu wule si kuhide edzi a pharago khidzo vambe. Uye a gu simama gu ganeya gu khuye: “Tepo nyi tugudego edzi si mu garadzidego khidzo gasi gu vbindrugedza, ni esi a vbindrugedzidego khu gu vbeleya, si nyi hlamadziside ngudzu nigu hi di bwe hi khala dzipari.” Gudzigaradzeya guti vandriyathu si na hi vbevbugeya gu vati gwadi ni gu va haladza tepo yatshavbo.

18. Ha gu ba hi khunguvanyisidwe khu ndriyathu, siwudziso muni hi yedego gu dzi gira? (Mavingu 26:20)

¹⁸ Dzimbe dzitepo, hi ngu dogoreya guya bhula ni ndriyathu a hi khunguvanyisidego. Ganiolu, gupheya hi yede gu dzi wudzisa gu khethu: ‘Ina nyi ngu siti satshavbo si pategago?’ (Mav. 18:13) ‘Ina uye a di nyi khunguvanyisa khu nyagigwenye?’ (Muh. 7:20) ‘Ina nyi di nga tshuka nyi gira gihoso gyagimwegyo?’ (Muh. 7:21, 22) ‘Nya guya ganeya ni ndriyathu yoyo, ina nyi na engedzeya gu thedzeya petroli?’ (Leri Mavingu 26:20.) Ha gu dzi gira siwudziso sesi, nigu kutswa khu lihaladzo hi na hunga gu mu divaleya.

19. Hi yede gu dzi emiseya gu gira ginani?

¹⁹ Dzifakazi dza Jehovha dza gu yeyedza gu khidzo valandreyi nya lisine va Jesu khu gu yeyedzana lihaladzo khu gyaye. Moyo ni moyo wathu a gu yeyedza gu khuye mulandreyi wa Jesu khu gu haladza vambe ambari olu va nga mba vbeleya. Tepo hi yeyedzanago lihaladzo nya lisine, isoso si na phasa vambe gu tugula wukhongeyi nya lisine va bwe va khozeya Jehovha, Nungungulu nya lihaladzo. Khu kharato, hongoleni hi dzi emiseya gu yeyedzana lihaladzo, a gu iso si hi tivegisago kha nga Makristo nya lisine.