1-2. Ga dzitepo nya dzingi ginani gi giregago tepo vathu va hongolago vaya bhabhatiswa nigu ginani hi na gi wonago?

 U DI NGA wona tsawa nya ava va hongolago vaya bhabhatiswa? Uwe u ngu vapwa na va gu hlamula siwudziso sivile khu lito nyo khugege na va si hongole vaya bhabhatiswa. U wona valongo ni dzipari dzawe na dzi tsakide. U ngu wona vambe na va gu veta mandza u bwe u va wona na va gu tsakide. Myaga yatshavbo, dzimiliyoni nya vathu va ngu hendzeledza womi wawe ga Jehovha va bwe va bhabhatiswa kha nga Dzifakazi dzaye.

² Uwe ke? Wa gu ba u vbweta gu bhabhatiswa, uwe u na ni lisima ngudzu mafuni momu nya guvivbe kholu u moyo nya ava “a vbwetago Nungungulu.” (Ndzi. 14:1, 2) Ndrima yeyi, yi lovedwe vaphya ni ava va dandridego khu tanga. Kholu vale va bhabhatisidwego avo navo vo vbweta gu hi tiyisa gasi hi dzi emiseya gu thumeya Jehovha kala gupindruga. khu kharato, hongoleni hi wona sighelo siraru hi gu naso nya gu thumeyi Jehovha.

3. Khu ginani sithumi sa Jehovha si golago lisine ni gululama? (Ndzimo 119:128, 163)

³ Jehovha a di embeya vathu vaye gasi gu “gola lisine.” (Zak. 8:19) Jesu gengedzide valandreyi vaye gu andrisa gululama. (Mat. 5:6) Iso si thulago gu khiso hi yede gu manega ni gudogoreya nya gukhongolo nya gu gire esi nya sadi ni guaga mahoni ga Nungungulu. Ina uwe u ngu gola lisine ni gululama? Ethu hi ngu tiyisega gu khethu ina. Uwe u ngu nyenya malipha ni satshavbo nyo vivbe. (Leri Ndzimo 119:128, 163.) Oyu a liphago a gu pimedzeya Sathane a gu uye a fumago mafu yaya. (Joh. 8:44; 12:31) Limwedo nya makungo ya Sathane gu tsundzisa lina nya guage la Jehovha. Gukhugeya thembweni ga  Edheni, Sathane a gu swayela malipha maningano khu Nungungulu. Uye a zamide gu gira vathu va pimisa gu khavo Jehovha Pfhumu nya magundrele yi gu mba tumbega nigu yi tshanisago vathu. (Gen. 3:1, 4, 5) Malipha ya Sathane maningano khu Jehovha ma ngu simama gu gira vathu va wona Jehovha khu ndziya nya mba yadi. Tepo vathu va hathago gu mba “gola lisine,” Sathane a gu va kutsedzeya gu gira silo nya mba lulama ni esi nyo vivbe. — Rom. 1:25-31.

4. Jehovha o yeyedza kharini gu khuye “Nungungulu nya lisine”? (Wona fotu.)

⁴ Jehovha “Nungungulu nya lisine” nigu a ngu hevbudza lisine vale va mu haladzago. (Ndzi. 31:5) Tepo a girago isoso, a gu va tshula ga malipha ya Sathane. Jehovha gambe a gu hevbudza sithumi saye gu tumbega ni gululama. Isoso sa gu va phasa gu ninga githawo ni gu manega ni gurula mapimoni. (Mav. 13:5, 6) Ina Jehovha a gu phaside tepo u nga ba u hevbula Bhibhiliya? Uwe u hevbude gu khuwe dzindziya dza Jehovha khyadi ga vathu vatshavbo ni gwago. (Ndzi. 77:13) Khu kharato, uwe wa gu vbweta gu gira esi Nungungulu a ganeyago gu khuye khyadi. (Mat. 6:33) Uwe gambe wo vbweta gu emeya lisine gasi gu phasa gu agisa lina la Nungungulu, Jehovha. Ganiolu u nga gira kharini isoso?

5. U nga yeyedza kharini gu khuwe u ngu haladza Jehovha?

⁵ Uwe u nga gira ni gevbini womini gwago, ganiolu u yede gu yeyedza gu khuwe u ngu nyenya malipha ya Sathane u bwe u gola lisine. U nga yeyedza gu khuwe wa gu vbweta Jehovha kha nga Mufumeli wago ni gu gira esi a ganeyago gu khuye khyadi. U nga gira kharini isoso? Khu gu ganeya ni Jehovha khu nombelo, u mu embeya gu khuwe u na mu thumeya womini wago watshavbo u bwe u bhabhatiswa. Gu gola lisine ni gululama si na gu kutsa gu hatha gu bhabhatiswa.

6. Sighelo muni si gomogo umo ga Ndzimo 45:4 si gu girago u gola Jesu Kristo?

⁶ Khu ginani u golago Jesu Kristo? Wona sighelo nyo khaguri si gomogo umo ga Ndzimo 45:4. (Leri.) Jesu a di gu gola lisine, a di gu gola gu dzi nogisa ni gululama. Wa gu ba u gola lisine ni gululama, isoso so yeyedza gu khiso uwe gambe u ngu gola Jesu Kristo. Dundrugeya khedzi Jesu khu gu tiya-hwambo a nga emeya khidzo lisine ni esi nya sadi. (Joh.  18:37) Jesu a gu andrisa kharini gu dzinogisa?

7. Jesu yeyedzide kharini gu khuye a ngu dzi nogisa?

⁷ Jesu a gu andrisa gurula khu giyeyedzo gyaye. Khu giyeyedzo, uye a di yisa wuzundzo watshavbo ga Papayi waye nasiri avbo gwaye. (Marko 10:17, 18; Joh. 5:19) Wa gu dzipwa kharini khu gu wona gudzinogisa ga Jesu? Ina kha gu gu kutsi gu haladza Gyanana gya Nungungulu ni gu gi landreya? Khu lisine ina. Ganiolu, khu ginani Jesu a dzi nogisago? Kholu uye a gu pimedzeya Papayi waye oyu a dzi nogisago. (Ndzi. 18:35; Hebh. 1:3) Ina khu kutswi khu Jesu, oyu a pimedzeyago gwadi makhalelo ya Jehovha?

8. Khu ginani hi vbwetago gu khethu Jesu a khala Pfhumu yathu?

⁸ Ethu ha gu vbweta gu khethu Jesu a khala Pfhumu yathu kholu uye Mufumeli nya wadi. Jehovha trenaride Gyanana gyaye a bwe a gi emisa gasi gu fuma. (Isa. 50:4, 5) Dundrugeya gambe khu lihaladzo eli Jesu a li yeyedzidego tepo a ngata hi feya. (Joh. 13:1) Kha nga olu Jesu a gu Pfhumu yago gu vbwetega u mu gola. Uye a ganede gu khuye vale va mu golago a gu va wona kha nga dzipari dzaye, nigu avo va gu yeyedza gu khavo va ngu mu gola khu gu engisa sileletelo saye. (Joh. 14:15; 15:14, 15) Lithomo nya likhongolo gu khala pari ya Gyanana gya Jehovha.

9. Gubhabhatiswa ga valandreyi va Kristo gwa gu fana kharini ni gubhabhatiswa ga Jesu?

⁹ Gimwegyo nya gileletelo gya Jesu khu gu vapizane vaye va yede gu bhabhatiswa (Mat. 28:19, 20) Uye a hi vegede giyeyedzo. Gubhabhatiswa gwaye ni gubhabhatiswa ga valandreyi vaye gu hambanide khu ndziya nyo khaguri. (Wona kwadru yi gu khiyo: “ Gu hambana gu gomogo avbo nya gu bhabhatiswe ga Jesu ni gu bhabhatiswa ga valandreyi vaye.”) Ganiolu, gu ngu fana gambe khu ndziya nyo khaguri. Tepo a nga bhabhatiswa Jesu a di gu yeyedza gu khuye a di gu vbweta gu gira gugola ga Papayi waye. (Hebh. 10:7) Tepo valandreyi va Kristo va bhabhatiswago avo vo yeyedza ga vatshavbo gu khavo va hendzeledzide womi wawe ga Jehovha Nungungulu. Nigu gambe, tepo va girago isoso vo yeyedza gu khavo igyo gi gu na ni lisima gwawe gu gira gugola ga Nungungulu nasiri gugola gwawe. Khu kharato, va yeyedza gu khavo va gu landreya giyeyedzo gya Jesu.

10. Gu gola Jesu gu nga gu kutsa gu gira ginani?

¹⁰ Uwe u ngu khodwa gu khuwe Jesu Gyanana gya Jehovha, nigu u ngu tsaka khu gu ba Nungungulu a hathide Jesu kha nga Pfhumu yathu. U ngu dziti gu khuwe Jesu a ngu dzi nogisa a bwe a pimedzeya Papayi waye khu gu vbeleya. Uwe u hevbude gambe gu khuwe Jesu a hodziside gitshungu nya gikhongolo a thaveleya ava va nga ba va vbede tshivba a bwe a hawulugisa ava va nga ba va dwala. (Mat. 14:14-21) Uwe u ngu wona edzi a thangeyago khidzo libandla laye muhuno. (Mat. 23:10) Nigu u ngu dziti gu khuwe na hi gu fumedwa khu Jesu, Mufumo wa Nungungulu wu na hi gireya silo nyo mburi ngudzu mindru watshigu. U nga yeyedza kharini gu khuwe u ngu gola Jesu? (Joh. 14:21) U nga gira isoso khu gu landra giyeyedzo gyaye u hendzeledza womi wago ga Jehovha u bwe u bhabhatiswa.

11. Khu gevbini gighelo nya lisima gi yedego gu gu gira u vbweta gu bhabhatiswa?

¹¹ Khu gevbini gighelo nya lisima gi yedego gu gu gira u vbweta gu bhabhatiswa? Jesu a hi embede nayo nya wukhongolo wa Nungungulu wu gu khuwo: “U na gola Pfhumu Nungungulu wago khu monyo wago watshavbo, khu hefemulo wago watshavbo, khu mapimo yago  yatshavbo ni tshivba yago yatshavbo.” (Marko 12:30) Ina malito yaya ma ngu tshamuseya edzi uwe u haladzago khidzo Nungungulu?

12. Khu ginani u haladzago Jehovha? (Wona fotu.)

¹² Uwe u na ni sighelo nya singi nya gu haladze Jehovha. Khu giyeyedzo, uwe u pwisiside gu khuwe, uye “gibuga nya womi” nigu Muninge nya “satshavbo nya sadi hi hakhidego ni giningwa nya gululame.” (Ndzi. 36:9; Jak. 1:17) Nigu satshavbo nya sadi u gu naso sa guta khiyo ga Nungungulu.

13. Khu ginani dzegiso a gu ginigwa nya lisima ngudzu?

¹³ Dzegiso ginigwa nyo mburi hi ningidwego khu Jehovha. Khu ginani hi ganeyago isoso? Dundrugeya khu wupari nyo tiye wu gu na ni Jehovha ni Gyanana gyaye. Jesu a di khuye: “Babe [a ngu nyi gola]” nigu eni “nyi ngu gola Babe.” (Joh. 10:17; 14:31) Wupari wawe wu tiyide ngudzu tepo va nga ba va vbanya vatshavbo ndzadzini khu myaga nya yingi. (Mav. 8:22, 23, 30) Dundrugeya khedzi Nungungulu a dzipwidego khidzo tepo a nga ningeya Gyanana gyaye gasi gu ta tshaniseka ni gu songwa. Jehovha a ngu gola vathu vatshavbo gupata ni uwe. Khu kharato, uye a di dzi emisede gu ningeya gyanana gyaye kha nga dzegiso gasi uwe ni vambe mu si kodza gu vbanya kala gupindruga. (Joh. 3:16; Gal. 2:20) Egi gighelo nya gikhongolo hi gu nagyo nyo haladze Nungungulu.

14. Makungo muni u nga hungago guvbanyani gwago?

 ¹⁴ Lihaladzo lago khu Jehovha li engedzede gu dandra tepo u nga hevbula nya singi khuye. Khu lisine, u ngu dzina gu hidzimeya gwaye olu ni kala gupindruga. Uye a gu gu kutsa gu tsakisa monyo waye. (Mav. 23:15, 16) U nga gira isoso khu mithumo nasiri khu malito basi. U nga yeyedza gu khuwe u ngu haladza Jehovha khu lisine khidzo u vbanyango khidzo. (1 Joh. 5:3) Aya makungo nya yadi u nga hungago guvbanyani gwago.

15. U nga yeyedza kharini gu khuwe u ngu haladza Jehovha?

¹⁵ U nga yeyedza kharini lihaladzo lago khu Jehovha? Gupheya, khu gu gira nombelo gasi gu dzi hendzeledza ga Nungungulu nya lisine. (Ndzi. 40:8) Khu gu landreya u bhabhatiswa. Kha nga hi si wonidego gupheyani nya ndrima, tepo u bhabhatiswago wa gu tsaka nigu litshigu lolo lo khala nya lisima ngudzu womini gwago. Uwe wa gu pheya womi nya wuphya a gu gu thumeya Jehovha. (Rom. 14:8; 1 Ped. 4:1, 2) Gubhabhatiswa gilo nya lisima ngudzu u hathidego gu gira, nigu ugo gu ngu gu tuleya dzindziya nya gu mane womi nya tshukwana. Khu ndziya muni?

16. Guya khu Ndzimo 41:12, Jehovha a na tshatshazeya kharini vale va mu thumeyago?

¹⁶ Jehovha a na ni wuhindzi. Uye a ngu gu ninga nya singi guvbindra esi uwe u mu ningago. (Marko 10:29, 30) Uye a na gu tshatshazeya ni gu gu ninga womi nyo tsakise ambari olu hi vbanyago ga litigo leli nyo hine. Aya maphelo yakone basi, tepo u bhabhatiswago kha si thuli gu khiso si di vbeleya avbovbo. Uwe u yede gu simama gu thumeya Papayi wago wa ndzadzini kala gupindruga. Lihaladzo lago khu Papayi wago wa ndzadzini li yede gu simama gu dandra, nigu u na vbanya kala gupindruga. — Leri Ndzimo 41:12.

17. U nga yeyedza kharini gu khuwe u ngu bonga Jehovha?

¹⁷ Tepo u hungago gu dzi hendzeledza ni gu bhabhatiswa, uwe wo ninga gilo nya lisima Papayi wago wa ndzadzini. Uye a gu ningide silo nya singi nya sadi si gu giridego u tsaka tepo yatshavbo. Gasi gubonga oyu a giridego ndzadzi ni mafu, uwe u yede gu dzi emiseya gu mu  thumeya khu gu tumbega. (Joba 1:8; 41:11; Mav. 27:11) Eyi ndziya nya yadi nya gu londrole khiyo womi wago. Nya mba kanakana, lihaladzo lago khu Jehovha khilo li gu kutsago gu vbweta gubhabhatiswa.

18. Siwudziso muni u yedego gu dzi gira?

¹⁸ Ina uwe u na bhabhatiswa? Hlamulo nya giwudziso gegi khuwe u wutigo. Ganiolu, igyo gi na gu phasago gasi gu hlamula giwudziso gegi khu gu u dzi wudzisa gu khuwe: ‘Ginani nyi vireyago gasi nyi bhabhatiswa?’ (Mith. 8:36) Dundruga khu sighelo siraru hi si wonidego. Nyo pheye, gola lisine ni gululama. Dzi wudzise gu khuwe: ‘Ina nyi ngu vireya gu wona vathu na va gu ganeya lisine ni gu gira silo nya sadi? Nya wuvili, gola Jesu Kristo. Dzi wudzise gu khuwe: ‘Ina nyi ngu dzina gu kheni Gyanana gya Nungungulu gi nyi fumeya nigu nyi pimedzeya giyeyedzo gyaye? Nigu nya wuraru ni egi nya lisima ngudzu, u yede gu haladza Jehovha. Dzi wudzise gu khuwe: ‘Ina nyi ngu dzina gu tsakisa Jehovha ni gu mu thumeya? Abari gu mihlamulo nya siwudziso sesi i ina, khu ginani u gu mba bhabhatiswa. Wo vireya ginani? — Mith. 16:33.

19. Khu ginani u gu mba yela gu kanakana gubhabhatiswa? Ninga giyeyedzo. (Johane 4:34)

¹⁹ Wa gu ba u kanakana gu bhabhatiswa wona giyeyedzo gi thumisidwego khu Jesu. (Leri Johane 4:34.) Jesu a fananiside gu gira gugola ga Papayi waye ni guhodza. Khu ginani? Kholu guhodza gu ngu hi phasa. Jesu a di gu dziti gu khuye satshavbo esi Jehovha a hi lombago gu gira si ngu hi phasa. Jehovha kha vbweti gu khuye hi gira silo si na hi vangeyago sigaradzo. Ina gu gira gugola ga Jehovha sa gupata gubhabhatiswa? Ina. (Mith. 2:38) Khu kharato, u nga tiyisega gu khuwe u na wuyedwa ngudzu khu gu engisa gileletelo nyo bhabhatiswe. Abari gu u ngu ruta dzindura khu gu wona guhodza nyo tshambe, khu ginani u kanakanago gu bhabhatiswa?

20. Ginani hi na bhulago khigyo avba nya ndrima yi landreyago?

²⁰ Ginani u gi vireyago? Nya vangi adzina va nga hlamula gu khavo: “Nyi si dongi.” Khu lisine, gu dzi hendzeledza ga Jehovha u bwe u bhabhatiswa gilo nya lisima ngudzu u na hungago gu gira. Khu kharato, u yede gu dundregeya gwadi khu makungo yaya nigu si na dzega tepo gasi u dzipwa na wu dongide gu bhabhatiswa. Abari gu u na ni gudogoreya nya gu vbweti gu bhabhatiswa, ginani u nga girago olu gasi gu dzi dongiseya gu gira isoso? Hi na mana hlamulo nya giwudziso gegi avbo nya ndrima yi landreyago.