1. Ginani egi vavelegi va suveyago sanana sawe?

 VAVELEGI ethu hi ngu dziti gu khethu mu ngu dzina gu phasa sanana sanu guti Jehovha ni gu mu haladza. Ganiolu, kha hi si kodzi gu wona Nungungulu. U nga phasa kharini gyanana gyago guti gu khigyo Nungungulu womo ni gu hidzimeya vbafuvbi gwaye? — Jak. 4:8.

2. Vavelegi va nga hevbudza kharini sanana sawe khu makhalelo ya Jehovha?

² Mweyo nya dzindziya yi nga phasago sanana gu tiyisa wupari waso ni Jehovha gu hevbula naso Bhibhiliya. (2 Thim. 3:14-17) Ganiolu, Bhibhiliya yi ngu ganeya khu yimbe ndziya eyi vaphya va nga yi thumisago gasi gu hevbula khu Jehovha. Omu nya libhuku la Mavingu, papayi nyo khaguri a gu dundrugisa gyanana gyaye gasi gi si emi gu dundrugeya khu makhalelo ya Jehovha, hi ma wonago avba nya sivangwa saye. (Mav. 3:19-21) Hongoleni hi wona dzindziya nyo khaguri edzi vavelegi va nga dzi thumisago gasi gu phasa sanana sawe gu hevbula khu makhalelo ya Jehovha khu gu thumisa sivangwa.

3. Ginani egi vavelegi va yedego gu gira gasi gu phasa sanana sawe?

³ Bhibhiliya yari khiyo: “Makhalelo nyamba wonega ya Nungungulu . . . Ma ngu wonega gwadi gu khugela gu vangwa nya mafu khu sigiro saye a si giridego.” (Rom. 1:20) Vavelegi, adzina enu mu ngu gola gu vbungadza ni sanana sanu. Thumisani gwadi tepo mu gu nayo gasi gu wona gupwanana gu gomogo avba nya esi Jehovha a “giridego” ni makhalelo yaye. Hongoleni hi wona esi vavelegi va nga si hevbulago khu ndziya eyi Jesu a nga hevbudza khiyo.

4. Jesu a thumiside kharide sivangwa gasi gu hevbudza vapizane vaye? (Luka 12:24, 27-30)

⁴ Wona edzi Jesu a thumisidego khidzo sivangwa gasi gu hevbudza  khiso. Ga tepo nyo khaguri, uye embede valandreyi vaye gasi va khedziseya vamahigonganye ni sifilori. (Leri Luka 12:24, 27-30.) Jesu na khumbugide simbe sinyoni ni sifilori, ganiolu uye a di hatha gu ganeya khu sifilori ni sinyoni esi valendreyi vaye va nga ba va siti gwadi. Valandreyi va Jesu va di gu wonide vamahigonganye ni sifilori sile Jesu a ganedego khiso. Nga dundrugeya Jesu na gu va yeyedza sile a nga ba a ganeya khiso. Ginani a giridego khu gu landreya hwane nya gu ba a khumbugide silo sile? Uye hevbudzide silo nya lisima vapizane vaye khu wuwadi wa Papayi waye. Jehovha a na khathaleya sithumi saye nyo tumbege gufana ni edzi a khathaleyago khidzo vamahigonganye ni sifilori.

5. Vavelegi va nga thumisa kharini sivangwa gasi gu hevbudza sanana sawe khu Jehovha?

⁵ Vavelegi, mu nga pimedzeya kharini Jesu tepo mu hevbudzago sanana sanu? Uwe u nga gira isoso khu gu bhuleya gyanana gyago khu sivangwa u si golago. Tepo u gi bhuleyago khu isoso, gi tshamuseye edzi silo soso si hi hevbudzago khu Jehovha. Adzina nuwe u nga wudzisa gyanana gyago khu sivangwa gi si golago. Wa gu bhula ni gyanna gyago khu silo esi igyo gi si golago, isoso si na vbevbugeya ngudzu gyanana gyago gu gu engiseya tepo u gi hevbudzago khu Jehovha.

6. Ginani hi gi hevbulago khu giyeyedzo gya mamayi wa Christopher?

⁶ Vavelegi, kha si lombi gu mu vbedza tepo nya yingi na mu gevisisa givangwa nyo khaguri na mu si bhuli khesi givangwa gyogyo gi hi hevbudzago khu Jehovha. Jesu kha vbedza tepo nyo laphe na ganeya khedzi vamahigonganye va hodzago khidzo mwendro edzi sifilori si dandrago khidzo. Abari gu gyanana gyago gi ngu gola gu hevbula khesi Jehovha a si vangidego, dzimbe dzitepo khu gu thumisa malito nya khaguri basi, isoso si na phasa gyanana gyago gu pwisisa mahungu mu bhulago khayo. Ndriyathu moyo nyo pwane khu Christopher na gu dundruga wanana waye wari khuye: “Mamayi wangu a di gu ganeya malito nya madugwana gasi gu hi phasa gu ninga lisima sivangwa si hi randredego. Khu giyeyedzo, tepo hi nga ba hi gimbileya vbafuvbi ni sigomo, uye a di gu ganeya gu khuye: ‘Nga khedzani sigomo sesi edzi si gu sikhongolo khidzo ni edzi si mburidego khidzo! Esi si ngu hlamadzisa ngudzu.’ Mwendro tepo hi nga ba hi gimbileya vbafuvbi ni yipwa, a di gu khuye: ‘Nga khedzani edzi mabimbi yaya ma gu na ni tshivba khidzo! Khu lisine Nungungulu a ni tshivba.’” Christopher wari khuye: “Malitwana yaya ma hi phaside gu hevbula nya singi khu Jehovha.”

7. U nga trenari kharini sanana sago gasi si dundrugeya khu sivangwa?

⁷ Tepo sanana sago siyago si dandra, u nga si trenari gasi si kodza gu dundrugeya khu sivangwa ni gu bwe si wona esi si si hevbulago khu Jehovha. Adzina u nga bhula ni gyanana gyago khu gimwegyo nya sivangwa esi Jehovha a si giridego, khavbovbo u gi wudzisa gu khuwe: “Wa gu hevbula ginani khu Jehovha?” Adzina u na samadziswa ni gu tsakiswa khesi sanana sago si si pimisago. — Mat. 21:16.

8. Lithomo muni Vaisrayeli va nga ba vari nalo tepo va nga ba va “gimbila ndzilani?”

⁸ Vavelegi nya va Israyeli, va kutsidwe gu hevbudza sanana sawe ambari tepo va nga ba va “gimbila ndzilani.” (Dhet. 11:19) Khu kotani nya olu dzindziya dzi nga ba dzi vbindra khu ndrani nya lidhoropa la Israyeli, avo va di gu kodza gu wona sirengo, sinyoni ni sifilori nyo hambane-hambane. Tepo vavelegi nya Vaisrayeli va nga ba va vbindra khomu nya dzindziya dzodzo, avo va di gu londrola lithomo lolo gasi gu hevbudza sanana sawe khu sivangwa sa Jehovha.  Anenu vavelegi mu na ni lithomo la limwedo nyo hevbudze sanana sanu khu gu thumisa sivangwa. Olu hongoleni hi wona edzi vavelegi nyo khaguri va girago khidzo isoso.

9. Ginani u gi hevbulago khu giyeyedzo gya Punitha ni Katya?

⁹ Mamayi nyo pwani khu Punitha, a vbanyago dhoropani ga Índia wari khuye: “Tepo hi wuseyago valongo va vbanyago vbavbandze nya lidhoropa, ho wona nga lithomo nyo phase sanana sathu gu hevbula khu sivangwa nyo samadzise sa Jehovha. Eni nyi ngu dziti gu kheni si ngu vbevbugeya sanana sangu gu hevbula khu sivangwa sa Jehovha tepo hi gomogo vbavbandze nya lidhoropa omu gu gu mwalo vathu nya vangi.” Vavelegi, sanana sanu kha si divala tepo mu yi vbedzidego naso ga wulanga nyo mbure. Ndriyathu nyo pwani khu Katya a vbanyago Moldávia wari khuye: “Eni nyi ngu dundruga dzitepo nyo tsakise ngudzu nyi nga vbedza ni vavelegi vangu vbavbandze nya lidhoropa. Nyi ngu va bonga ngudzu vavelegi vangu khu gu ba va nyi hevbudzide na nyi ngari muphya gu khedziseya esi Jehovha a si vangidego ni gu hevbula khiso.”

10. Ginani egi vavelegi va nga girago so ba si va va garadzeya gu hongola vbavbandze nya lidhoropa gasi gu wona sivangwa? (Wona kwadru yi gu khiyo: “ Esi si nga phasago vavelegi.”)

¹⁰ Abari gu kha wu si kodzi gu endra u hongola vbavbandze nya lidhoropa, ginani u nga girago? Mwama moyo nyo pwani khu Amol a vbanyago Índia wari khuye: “Omu nyi vbanyago umo, vavelegi nya vangi va gu thuma khu dziora nya dzingi nigu gasi gu endra va hongola vbavbandze nya madhoropa go vbwetega dzitsapawu nya dzingi. Khu kharato, avo va gu khedziseya sivangwa ni gu hevbula khu makhalelo ya Jehovha na va romo vharandani mwendro vbavbandze nya nyumba.” Khu ndziya nyo fane, anuwe wa gu khedziseya gwadi u na si kodza gu mana sivangwa u nga si thumisago gasi gu hevbudza sanana sago. (Ndzi. 104:24) Nya mba kanakana, uwe u na wona sinyoni, sirengwanana,  misimbo ni simbe ni simbe. Karina a vbanyago Alemanha wari khuye: “Mamayi wangu a ngu si gola ngudzu sifilori, khu kharato tepo nyi nga ba nyiri muphya na hi gu gimbiya ndziyani uye a di gu nyi yeyedza sifilori nyo mburi tepo yatshavbo.” Vavelegi, mu nga thumisa gambe dzivhidhiyu, mabhuku dzi ganeyago khu sivangwa edzi dzi dusidwego khu hengeledzano yathu gasi gu hevbudza sanana sanu. Khu kharato, ni hayini u khalago avbo uwe u nga si kodza gu wona esi Nungungulu a si vangidego. Olu hongoleni hi wona makhalelo nyo khaguri ya Jehovha u nga ma hevbudzago sanana sago.

11. Vavelegi va nga phasa kharini sanana sawe gu wona lihaladzo la Jehovha?

¹¹ Gasi gu phasa sanana sago gu wona lihaladzo la Jehovha, si ninge giyeyedzo khedzi sirengo si khathaleyago khidzo sanana saso. (Mat. 23:37) U nga tshingisa gambe silo nya singi nyo mburi hi si wonago omu nya sivangwa. Karina hi ganedego khuye gupheyani wari khuye: “Tepo hi nga ba hi gimbiya, mamayi wangu a di gu nyi kutsa gu ema nyi wona edzi sifilori si nga mbura khidzo ni edzi isoso si yeyedzago khidzo lihaladzo la Jehovha. Eni nyi ngo simama gu khedziseya gwadi sifilori nigu nyi ngu wona gu kheni iso si hambanide khu dzikori ni gu iso si giridwe khu ndziya nyo hambane. Isoso si ngu nyi dundrugisa gu kheni Jehovha a ngu hi haladza ngudzu.”

12. Vavelegi mu nga phasa kharini sanana sanu gu wona guti ogu Jehovha a gu nago? (Ndzimo 139:14) (Wona gambe fotu.)

¹² Phasa sanana sago gu wona guti ga Nungungulu. Khu lisine, Jehovha a ni guti nya gungi gu hi vbindra. (Rom. 11:33) Khu giyeyedzo, u nga bhuleya gyanana gyago edzi ma giregago khizo marefu. (Joba 38:36, 37) U nga bhuleya gambe gyanana gyago khedzi givili gi giridwego khidzo khu ndziya nyo samadzise. (Leri Ndzimo 139:14.) Wona edzi papayi moyo nya pwani khu Vladimir a giridego khidzo isoso, uye a di khuye: “Gyanana gyathu gi di thega khavbo nya bicicleta yagyo gi bwe gi dzi bayisa. Hwane nya matshigu nyo khaguri gilondra gyaye gi di vbola. Eni ni mwangadzi wangu hi di gi tshamuseya edzi Jehovha a giridego khidzo givili ni makodzelo nyo ha gu dzibayisa gilondra gi vbola khu gyabune. Gimwalo gilo gi girwago khu muthu gi kodzago gu gira silo nya nga esi.  Khu giyeyedzo, movha ya gu gira asidhenti kha yi kodzi gu dzi lungisa yabune. Esi si phaside gyanana gyathu gu pwisisa guti ogu Jehovha a gu nago.”

13. Vavelegi va nga phasa kharini sanana sawe gu dundrugeya khu tshivba ya Jehovha? (Isaya 40:26)

¹³ Jehovha a ngu hi rana gasi gu khusa maho hi khedza ndzadzini hi wona dzinyeledzi dzi yeyedzago tshivba yaye nya gu samadzise. (Leri Isaya 40:26.) Uwe u nga kutsa gyanana gyago gu khedziseya ndzadzini ni gu dundrugeya khesi gi si wonago. Wona esi ndriyathu moyo wa Taiwan a dundrugago khu wanana waye: “Litshigu limwedo mamayi wangu, a di nyi dzega hi hongola ga wulanga nyo khaguri ni wutshigu gasi hi ya khedziseya dzinyeledzi. Ganiolu, ga tepo yoyo eni nyi di gu garadzega ngudzu kholu dzikolega dzangu dzi di gu zama gu nyi gira nyi si tumbegi ga Jehovha. Mamayi wangu a di nyi kutsa gu dundrugeya khu tshivba ya Jehovha, eyi a yi thumisidego gasi gu gira dzinyeledzi dzile a bwe a nyi embeya khuye Jehovha a na thumisa tshivba yayimweyo gasi gu nyi phasa gu pala silingo nyi nga ba nyi tshangana naso. Hwane nya gu wone dzinyeledzi ndrani nya lipfhumba leli, eni nyi di dzi emiseya guti gwadi Jehovha ni gu vbweta gu mu thumeya khu gutumbega.”

14. Vavelegi va nga thumisa kharini sivangwa gasi gu phasa sanana sawe gu wona gu khiso Jehovha Nungungulu nya gutsake?

¹⁴ Satshavbo esi Jehovha a giridego sa gu yeyedza gu khiso, uwe Nungungulu nya gutsake nigu a gu vbweta gu anethu hi tsaka. Vasiyentista va tugude gu khavo sirengo gupata sinyoni ni dzindzadzi si ngu hagana. (Joba 40:20) Ina sanana sago si ngu tsaka khu gu wona sirengo na si hagana? Adzina saye sanana sago si di nga wona sirengo nyo khaguri na si gu hagana, khu giyeyedzo gimbwana na gi gu hagana ni bhola. Wa gu wona sanana sago na si gu hega khu gu hegiswa khu girengo nyo khaguri, si dundrugise gu khuwe ha gu thumeya Nungungulu a tsakidego. — 1 Thim. 1:11.

15. Ginani gi nga phasago vavelegi guti esi si gu romo mapimoni ga sanana sawe? (Mavingu 20:5) (Wona gambe foto.)

¹⁵ Dzimbe dzitepo, si nga garadzeya vavelegi gu gira sanana sawe si ganeya khu sigaradzo si  tshanganago naso. Abari gu u womo ga giemo gegi u nga zama guti esi sanana sago si si pimisago. (Leri Mavingu 20:5.) Vambe vavelegi si ngu va vbevbugeya gu gira isoso tepo va khedziseyago sivangwa gumogo ni sanana sawe. Gimwegyo nya sighelo khu gu ga malanga nya nga aya, si mwalo silo nya singi si nga tsolopeteyago sanana ni vavelegi vaso. Papayi nyo pwane khu Masahiko a vbanyago Taiwan a khumbugide gimbe gighelo, uye wari khuye: “Eni ni mwangadzi wangu ni sanana sangu ha gu dzipwa na hi tsakide tepo hi gimbiyago masigomoni ni phwani. Khu kharato, si ngu hi vbevbugeya guti esi sanana sathu si pimisago.” Katya hi ganedego khuye gupheyani wari khuye: “Tepo nyi nga ba nyi duga khu xikwatunu, mamayi wangu a di gu nyi dzega hi hongola ga wulanga nyo mbure ngudzu. Kha nga ou gu nga ba guri wulanga nyo rule ngudzu, si di gu nyi vbevbugeya gu mu embeya esi nyi nga ba nyi tshangana naso xikwatunu ni esi si nga ba si nyi garadza.”

16. Dzindranga dza gu thumisa kharini esi Jehovha a si giridego gasi dzi manega ni gupwanana ni gurula?

¹⁶ Tepo dzindranga dzi tsakiswago khesi Jehovha a giridego, idzo dzi na simama na dzi rude dzi bwe dzi vbanya khu gupwanana. Bhibhiliya yari khiyo, “gyomo gikhati nya gutsake” ni . . . “gikhati nya gu ghiye khu gutsaka.” (Muh. 3:1, 4) Jehovha a giride malanga nyo mburi omu hi nga girago esi hi si golago. Dzindranga nya dzingi dzi ngu gola gu hongola phwani gasi guya wona esi Jehovha a si vangidego. Sanana nyo khaguri si ngu gola gu hagana phwani si bwe si hamba. Aya mathomo hi nga ma londrolago gasi hi tsakiswa khesi Jehovha a si giridego.

17. Khu ginani vavelegi va yedego gu phasa sanana sawe gu tsaka khu sivangwa sa Nungungulu?

¹⁷ Mafuni nya maphya, vavelegi ni sanana va na tsakiswa khesi Jehovha a si giridego guvbindra olu. Hi na ba hiri mwalo gighelo nyo thave sirengo mwendro iso si hi thava. (Isa. 11:6-9) Hi na ba hiri ni tepo nyo khedziseye esi Jehovha a si giridego kala gupindruga. (Ndzi. 22:26) Vavelegi mu nga vireyi kala mafuni nya maphya gasi gu phasa sanana sanu gu tsaka khu sivangwa. Tepo u thumisago sivangwa gasi gu hevbudza sanana sago khu Jehovha, iso si na dzumeya esi Pfhumu Dhavhidhe a ganedego. Uye a di khuye: “[O Jehovha] mwalo a kodzago gu gira mithumo uwe u yi girago.” — Ndzi. 86:8.