1-2. Abari gu u si dongi gasi u bhabhatiswa, khu ginani u si yeligo gu vbeya tshivba? (Wona fotu avba nya kapa.)

 ABARI gu u ngu dzina gubhabhatiswa u yede gu dzi vegeya misuwo yoyo. Ina u dongide gubhabhatiswa olu? Abari gu u ngu dzina nigu madhota ma na gu dzumeleya, u nga digi gu gira isoso ga tshangano wu landreyago. Wa gu gira isoso, Jehovha a na gu kategisa ngudzu.

² Ina u di nga embedwa gu tshukwadzisa silo nyo khaguri gasi u ninganedwa khu gu bhabhatiswa? Mwendro wa gu si tugula wabune isoso? Abari kharato u nga vbeyi tsivba, uwe u nga si kodza gu ninganedwa khu gu bhabhatiswa gani u muphya mwendro u dandride khu tanga.

3. Ginani mwama moyo nya Muetiyopi a wudzisidego Filipi, nigu giwudziso muni gi khugago? (Mithumo 8:36, 38)

³ Leri Mithumo 8:36, 38. Mwama moyo nya Muetiyopi a nga ba thuma umo nya nyumba nya wufumo a di wudzisa Filipi khuye: “Ginani gi nyi himbedzago gubhapatiswa?” Mwama yoyu nya Muetiyopi a di gu dzina gu bhabhatiswa, ganiolu ina uye kamu a di dongide?

4. Ginani egi mwama nya Muetiyopi a nga ba a vbweta gu simama gu gira?

⁴ Mwama wule nya Muetiyopi “a di endrede Jerusalema [gasi a ya] khozela.” (Mith. 8:27) Uye a di dzumeya wukhozeyi nya Vajudha. Vbavbandze nya gu kanakane, sa gu wonegisa gu khatshi uye a hevbude khu Jehovha umo nya Milowo nya Gihebheru. Ambari ulolo, uye a diri ni gudogoreya nya gu hevbule nya singi khu Jehovha. Filipi a di mana mwama wule na gu gira ginani? Uye a di gu leri rolu nya milowo ya muprofeti Isaya. (Mith. 8:28) Mwama wule nya Muetiyopi kha nga ba a eneledwe khesi a nga ba a hevbude, uye a di nga gu vbweta gu hevbula nya singi khu Jehovha.

5. Ginani egi Muetiyopi a giridego guya khesi a nga ba a hevbula?

 ⁵ Mwama yoyu nya Muetiyopi a diri muthu nya lisima ngudzu, kholu a di gu thumeya pfhumugadzi Kandasi ya Etiyopiya, nigu “a diri muthangeli nya thomba yatshavbo ya [Kandasi].” (Mith. 8:27) Khu kharato, uye a di gu pharegide ngudzu kholu a diri ni mithumo nya yingi gasi gu yi khathaleya. Ambari ulolo, uye a di gu dzi tshiyela tepo gasi gu hevbula khu Jehovha. Uye kha nga ba a tsakiswa basi khu gu hevbula lisine, ganiolu uye a di gu thumisa esi a nga ba a hevbula. Khu kharato, uye a di endra khu Etiyopiya a hongola Jerusalema gasi aya khozeya Jehovha Tempeleni. Gasi gu gira liendro leli, si di gupata gu thumisa tepo yaye, dzithomba dzaye. Khu lisine, giride satshavbo a nga si kodza gasi gu ya khozeya Jehovha.

6-7. Lihaladzo la Muetiyopi khu Jehovha li simamide kharini gu dandra?

⁶ Muetiyopi a hevbudzidwe silo nya singi khu Filipi gupata ni gu hevbula gu khuye Jesu a diri Mesiya. (Mith. 8:34, 35) Uye a tsakide khesi a hevbudego, ganiolu ginani a giridego guya khesi a hevbudego? Adzina uye na simamide ni mavbanyelo yaye, ganiolu lihaladzo laye khu Jehovha ni Jesu li di engedzeya gu dandra, khavbovbo a dzi emiseya gu vbindrugedza gasi a bhabhatiswa ni gu khala mulandreyi wa Jesu Kristo. Filipi a si wonide gu khuye mwama wule a di dongide gasi gubhabhatisa, khu kharato a di mu bhabhatisa.

⁷ Wa gu pimedzeya giyeyedzo gya Muetiyopi, u na ba u dongide gasi gu bhabhatiswa ni gu gambe u na tiya gu wudzisa khuwe: ‘Ginani gi nyi himbedzeyago gubhabhatiswa?’ Olu hongoleni hi wona edzi u nga pimedzeyago khidzo esi si giridwego khu Muetiyopi. Uye simamide gu hevbula, gu thumisa esi a si hevbudego ni gu simama gu engedzeya lihaladzo laye khu Nungungulu.

8. Libhuku la Johane 17:3, la gu gu kutsa gu rini?

⁸ Leri Johane 17:3. Ina malito yaya ya Jesu ma gu phaside gu hunga gu hevbula Bhibhiliya? Khu lisine ma phaside nya vangi gwathu, ganiolu ayo ma ngu hi phasa gambe gu simama gu hevbula. Ethu gima kha hi yeli gu ema “[guti] . . . Nungungulu nya lisine.” (Muh. 3:11) Ethu hi na simama gu hevbula kala gupindruga. Tepo hi simamago gu hevbula hi na tiyisa wupari wathu ni Jehovha. — Ndzi. 73:28.

9. Ginani hi yedego gu gira hwane nya gu ba hi hevbude sihevbudzo nya litshina nya Bhibhiliya?

⁹ Tepo hi nga pheya gu hevbula khu Jehovha, ethu hi hevbude sihevbudzo nya litshina nya Bhibhiliya. Avbo nya lidangaliya laye a lovedego Vahebheru, mupostoli Pawulo a ranide  sihevbudzo soso khuye: “Dzindrima nya guphele.” Uye kha nga ba a ganeya khuye dzi diri mwalo lisima, ganiolu a di gu yeyedza khuye idzo dzi di gu fana ni mahwe. (Hebh. 5:12; 6:1) Ganiolu, uye a di gu kutsa gambe Makristo yatshavbo gu hevbula nya singi guvbindra sihevbudzo nya gupheye, khu gu va simama gu hevbula lisine nya Lito la Nungungulu. Ina u ngu haguleya gudogoreya nya gu hevbule sihevbudzo nya Bhibhiliya si garadzago gu si pwisisa? Ina u ngu simama gu hevbula khu Jehovha ni makungo yaye gasi u dandra khu liphuvboni?

10. Sa gu ba si gu garadzeya gu hevbula, u nga tiyisega khu ginani?

¹⁰ Nya vangi gwathu si ngu hi garadzeya gu hevbula. Ahati uwe, ina si ngu gu vbevbugeya? Xikwatunu ke, u ngu hevbula gwadi ni gu leri gwadi? Ina u tsakide khesi u si hevbudego? Mwendro wa gu dzi wona na wu siri gihevbuli nya gyadi? Abari kharato, dziti gu khuwe khandruwe wenga u dzipwago khu ndziya yoyo. Nigu tiyisega khuwe Jehovha a na gu phasa, kholu uye vbelede nigu Muhevbudzi nya wadi.

11. Jehovha a gu yeyedza kharini gu khuye “Muhevbudzi nya Khongolo”?

¹¹ Jehovha a ngu dzi rana kha nga “Muhevbudzi wago nya Khongolo.” (Isa. 30:20, 21, NM.) Uye a ngu laphisa monyo, a na ni wuwadi nigu muhevbudzi a hi pwisisago. Ni gu gambe a gu khedza silo nya sadi ga sihevbuli saye. (Ndzi. 130:3) Uye kha vireyi gu khuye hi gira esi hi gu mba si kodza gu gira. Dundruga khuwe uye khuye a nga gira wongo wago, a gu giningwa nyo samadzise a gu ningidego. (Ndzi. 139:14) Ethu hi na ni gudogoreya nya gu hevbule, kholu Muvangi wathu a gu vbweta gu khuye hi simama gu hevbula. Wugengeli gu hi vbweta “lisine” nya Bhibhiliya olu. (1 Ped. 2:2) Dzi vegeye misuwo nya gu leri Bhibhiliya tshigu ni tshigu ni gu gira gihevbulo nya muthu enga. (Jos. 1:8) Khu gu phaswa khu Jehovha u na tsakiswa khu gu hevbula khuye tepo yatshavbo.

12. Khu ginani hi yedego gu hevbula khu womi wa Jesu ni thumo waye nyo tshumayele?

¹² Tepo yatshavbo dzi ninge tepo nya gu dundrugeye khu womi wa Jesu ni thumo waye nyo gutshumayele. Ha gu dzi garadzeya gu pimedzeya giyeyedzo gya Jesu, isoso si na hi phasa gu thumeya Jehovha ngudzu-ngudzu ga dzitepo dzedzi nyo garadze. (1 Ped. 2:21) Jesu a embede sigaradzo esi vapizane vaye va nga hadzi tshangana naso. (Luka 14:27, 28) Ambari ulolo, uye a di gu tiyisega khuye valandreyi vaye va di hadzi simama gutumbega ga Nungungulu. (Joh. 16:33) Khu kharato, dzi vegeye misuwo nya gu hevbule khu womi wa Jesu ni gu mu pimedzeya tshigu ni tshigu.

13. Ginani u yedego gu lomba Jehovha nigu khu ginani?

¹³ Guti gwago kha gu eneyi. Egi gimwegyo nya gighelo gi gu girago u vbweta gu hevbula nya singi khu Jehovha gasi u kodza gu engedzeya lihaladzo lago khuye ni gu tiyisa gukhodwa gwago. (1 Kor. 8:1-3) Tepo u simamago gu hevbula, lomba Jehovha gasi a gu engedzeya gukhodwa. (Luka 17:5) Khu kotani nya wuhindzi a gu nawo uye a na hlamula milombelo yago. Nigu, gukhodwa u gu nago gu dzi seketeyago khu guti Nungungulu wago gu na gu phasa gu dandra khu liphuvboni. — Jak. 2:26.

14. Mupostoli Pedro tshingiside kharini lisima nya gu thumise esi hi si hevbulago? (Wona fotu.)

¹⁴ Mupostoli Pedro tshingiside lisima nya gu valandreyi va Jesu va thumisa esi va si hevbulago. Uye khumbugide matimo ya Nowa. Jehovha  a di embeya Nowa khuye a di hadzi resa ndrambi gasi gu fuvisa vathu va matsigoni yale. Guti basi gu khuye Jehovha a di hadzi resa ndrambi kha sa nga ba si eneya gasi uye ni ndranga yaye va vbuluga. Wona gu khuwe Pedro a di khumbuga silo sesi na yi si gu giregi ndrambi: “Matshigu yale Nowa a nga bani a gu gira litaro.” (1 Ped. 3:20) Khu lisine, Nowa ni ndranga yaye va di gira esi va nga embedwa khu Nungungulu, khu gu vbaha litaro. (Hebh. 11:7) Pedro a di fananisa esi Nowa a giridego ni gu bhabhatiswa. Uye a di khuye: “Mati yale a diri giyeyedzo nya gubhapatiswe, mu vbanyiswago khugo enu, muhuno.” (1 Ped. 3:21) Khu ndziya nya gu fane, gudzigaradza hi gu girago gasi hi ninganedwa khu gu bhabhatiswa gu ngu fana ni thumo owu Nowa ni ndranga yaye va wu giridego khu myaga nya yingi gasi gu vbaha litaro. Ginani u yedego gu gira gasi u ninganedwa khu gubhabhatiswa?

15. Gudzilaya khu lisine sa gu pata gu gira ginani?

¹⁵ Gimwegyo nya gilo nya lisima hi yedego gu gira, gu dzilaya khu sighoho hi giridego. (Mith. 2:37, 38) Gudzilaya nya lisine go pata gu vbindrugedza mavbanyelo yathu. Ina u digide mavbanyelo nya mba handzega, gu thumisa sidaha-daha mwendro maganelelo nya wufendre? (1 Kor. 6:9, 10; 2 Kor. 7:1; Efes. 4:29) Abari gu u si digi gu gira silo sesi, zama gu vbindrugedza. Lomba oyu a gu gimbidziseyago gihevbulo nya Bhibhiliya mwendro madhota libandlani gasi va gu phasa. Abari gu u muphya nigu wa gu vbanya ni vavelegi vago, va lombe gasi va gu phasa gu tshukwadzisa silo nyo khaguri gasi u ninganedwa khu gubhabhatiswa.

16. Ginani u yedego gu gira wo ba u vbweta gu khozeya Jehovha tepo yatshavbo?

¹⁶ Gimbe gilo u yedego gu gira gasi u ninganedwa khu gu bhabhatiswa gu manega mitshanganoni nya libandla u bwe u patega gwayo. (Hebh. 10:24, 25) Gimbe gambe u yedego gu dzi garadzeya gu gira, gu patega thumoni nyo tshumayele. Wa gu gira isoso, u na mana litsako nya likhongolo. (2 Thim. 4:5) Abari gu u muphya nigu wa gu vbanya ni vavelegi vago dzi wudzise esi: ‘Ina nya gu vireya gu kheni vavelegi vangu va nyi dundrugisa gu hongola mitshanganoni ni thumoni nya gutshumayele? Mwendro kha nyi vireyi gu dundrugiswa?’  Wa gu ba u si vireyi gu dundrugiswa gu gira silo sesi, u na yeyedza gukhodwa u bwe u yeyedza khuwe u ngu bonga khu satshavbo esi Jehovha a gu ningago. Wa gu gira esi, u na ba u ninga giningwa “nya gutsakise Nungungulu.” (2 Ped. 3:11; Hebh. 13:15) Satshavbo siningwa u ningago Jehovha khu gu dzina gwago si ngu mu tsakisa. (Fananisa 2 Vakorinto 9:7.) Ethu hi ngu tsaka khu gu gira satshavbo hi si kodzago gasi gu tsakisa Jehovha.

17-18. Likhalelo muni nya lisima u yedego gu manega nalo, nigu li nga gu phasa kharini? (Mavingu 3:3-6)

¹⁷ Tepo u yago u gira satshavbo u si kodzago gasi u ninganedwa khu gubhabhatiswa, uwe u na tshangana ni sigaradzo. Vambe va nga gu poyila khu kotani nya gukhodwa gwago mwendro kamu gu wugedwa. (2 Thim. 3:12) Nigu tepo u dzi garadzeyago gu diga gu gira silo u dzitigo gu khuwe si vivbide, dzimbe dzitepo uwe u na tshuka u hosisa. Adzina saye u nga vbeya tshivba mwendro gu goroga khu gu mba kodza gu ema gu gira silo soso. Ginani gi nga gu phasago gu timiseya? Igyo gi nga gu phasago, lihaladzo lago khu Jehovha.

¹⁸ Lihaladzo lago khu Jehovha likhalelo nya lisima u gu nalo. (Leri Mavingu 3:3-6.) Lihaladzo nyo tiye khu Nungungulu khilo li na gu phasago gu emisana ni sigaradzo u na tshanganago naso. Bhibhiliya tepo yatshavbo yi ngu ganeya khu lihaladzo eli Jehovha a gu nalo khu sithumi saye. Lihaladzo lolo la gu hi tiyisegisa gu khilo, uye gima kha na nga diga sithumi saye nya gutumbege mwendro gu ema gu si haladza. (Ndzi. 100:5) Uwe u giridwe khu mufananiso wa Nungungulu. (Gen. 1:26) Ahati uwe, u nga yeyedza kharini lihaladzo?

19. U nga bonga kharini Jehova khu satshavbo a gu giredego? (Vagalatiya 2:20)

¹⁹ Yeyedza gubonga. (1 Tes. 5:18) Tshigu ni tshigu dzi wudzise khuwe: ‘Jehovha a nyi yeyedzide kharini lihaladzo muhuno?’ Khu kharato, bonga Jehovha umo nya milombelo yago khesi a gu giredego. Esi Jehovha a gu gireyago a gu gu gireya kholu a gu haladzago gufana ni esi mupostoli Pawulo a si tugudego. (Leri Vagalatiya 2:20.) Dzi wudzise khuwe: ‘Ina nyi ngu dzina gu mu yeyedza kheni nyi ngu mu haladza?’ Lihaladzo lago khu Jehovha li na gu phasa gu pala silingo ni gu timiseya sigaradzo. Ilo li na gu kutsa gu thumeya Jehovha tshigu ni tshigu u bwe u yeyedza khuwe u ngu mu haladza ngudzu.

20. Khu ginani u yedego gu hendzeledza womi wago ga Jehovha, nigu khu ginani makungo yoyo ma gu na ni lisima?

 ²⁰ Khu gu gimbiya nya tepo lihaladzo u gu nalo khu Jehovha li na gu kutsa gu gira nombelo nya lisima ngudzu, a gu nombelo nya gu dzi hendzeledze ga Nungungulu. Dundruga gu khuwe tepo u dzi hendzeledzago ga Jehovha wa gu mana gutumba nya gu tsakise ngudzu ni gu mu lumba kala gupindruga. Tepo u dzi hendzeledzago ga Jehovha, uwe wa gu mu tumbisa gu mu thumeya ga dzitepo nya dzadi ni edzi nya mba dzadi. Kha si na nga vbwetega gu u mu tumbisa gambe silo sesi. Khu lisine, tepo u dzi hendzeladzago ga Jehovha wa gu hunga makungo nya lisima ngudzu. Khu kharato, dundrugeya khesi: Uwe u na hunga makungo nya mangi nya yadi womini gwago, ganiolu gima kha wu na nga hunga makungo nya lisima gu vbindra aya nya gu dzi hendzeledze ga Jehovha. (Ndzi. 50:14) Sathane a na zama gu vbodzisa lihaladzo lago khu Jehovha a bwe a zama gu gu gira u si tumbegi ga Papayi wago wa ndzadzini. Khu kharato, u nga dzumeyi gu padwa khu Sathane. (Joba 27:5) Lihaladzo u gu nalo khu Jehovha li na gu phasa gu mba bweleleya hwane ni gitumbiso u mu giredego nya gu mu thumeye kala gupindruga.

21. Khu ginani hi ganeyago gu khethu gubhabhatiswa khandri mahegiso, ganiolu maphelo?

²¹ Hwane nya gu ba u dzi hendzeledzide ga Jehovha, ganeya ni madhota ya libandlani gwago esi u hungidego gu gira. Tepo yatshavbo dundruga gu khuwe gubhabhatiswa khandri mahegiso, ganiolu maphelo yakone basi. Uwe wa gu pheya gu thumeya Jehovha, khu kharato tiyisa olu lihaladzo lago khu Papayi wago. Dzi vegeye misuwo yi na tiyisago lihaladzo lago khu Jehovha tshigu ni tshigu. Wa gu gira isoso, u na yeyedza khuwe u dongide gasi u bhabhatiswa. Nigu litshigu u na bhabhatiswago li na ba liri litshigu nya lisima kamu ngudzu womini gwago. Ganiolu, dundruga esi: Ayoyo maphelo basi, khu kharato simama gu tiyisa lihaladzo lago khu Jehovha ni Jesu.