NDRIMA NYA GIHEVBULO 45
Edzi liphuvbo nya guage li hi phasago khidzo
“Nyi ngu kodza gupala satshavbo tshivbani ya wule a nyi tiyisago.” — FILP. 4:13.
NDZIMO 104 Liphuvbo nya guage, giningwa gya Nungungulu
ESI HI NA SI HEVBULAGO AVBA NYA NDRIMA YEYI *
1-2. a) Ginani gi hi phasago gu timiseya tshigu ni tshigu? Tshamuseya. b) Ginani hi na ganeyago khigyo avba nya ndrima yeyi?
“NYA gu dundrugeya khu gilingo nyi emisanidego nagyo, nya gu wona gu kheni gima na nya sa gi pala khu tshivba yangu.” U di nga tshuka u ganeya malito nya nga aya? Gu tala nya ethu hi ngu ganeya. Si nga gira na wu pimiside kharato hwane nyo dundrugeye khedzi u kodzidego khidzo gu emisana ni madwali nya makhongolo mwendro gu fedwa khu muthu u mu golago. Tepo u khedzago hwane, wo wona gu khuwe u di si kodza gu timiseya tshigu ni tshigu kholu liphuvbo nya guage la Jehovha li gu ningidego “tshivba . . . nya yikhongolo.” — 2 Kor. 4:7-9.
2 Ha gu tumba liphuvbo nya guage gambe gasi gu emisana ni mikutsedzelo nya litigo leli nyo vivbe. (1 Joh. 5:19) Gimbe gambe, khu gu hi ngu dwana ni “dzitshivba nya maphuvbo nya guvivbe.” (Efes. 6:12) Olu hi na ganeya khu dzindziya dzimbili edzi liphuvbo nya guage li hi phasago khidzo gu emisana ni sigaradzo sesi. Khavbovbo hi na ganeya gambe khesi hi nga girago gasi gu hi phasega ngudzu khu liphuvbo nya guage.
LIPHUVBO NYA GUAGE LI NGU HI NINGA TSHIVBA
3. Khu yevbi mweyo nya dzindziya eyi Jehovha a yi thumisago gasi gu hi phasa gu timiseya silingo?
3 Liphuvbo nya guage la Jehovha la gu hi phasa khu gu hi ninga tshivba nya gu gire satshavbo si vbwetegago ambari ha gu ba hi emisana ni silingo. Mupostoli Pawulo a dzipwide gu khuye a di gu kodza gu simama gu thumeya Jehovha ambari olu a nga ba a tshangana ni sigaradzo kholu a di gu tumba “tshivba ya Kristo.” (2 Kor. 12:9) Ndrani nya liendro laye nya wuvili nya wumisiyonariyu, Pawulo kha dzi garadzeya gu tshumayela basi ganiolu a di yede gu dzi sayisa khu nyamani gambe. Uye a di ya khala Korinto, gaya ga Akila ni Prisila. Avo va diri va giri nya matendra. Kha nga olu Pawulo a nga ba a wuti thumo wowo, a di gu thuma navo matshigu nyo khaguri. (Mith. 18:1-4) Liphuvbo nya guage li ningide Pawulo tshivba nyo gire thumo nya gudzivbanyise ni gu tshumayela.
4. Guya khu 2 Vakorinto 12:7b-9, gigaradzo muni egi Pawulo a emisanidego nagyo?
4 Leri 2 Vakorinto 12:7b-9. Ginani a nga ba a vbweta gu ganeya Pawulo avba nya livhesi leli tepo a nga khuye a di gu dwana ni “muba givilini”? Nari khatshi u di gu payidwe khu muba wu beya nyamani na wupwa guvbisa nya gukhongolo ngudzu. Khu kharato Pawulo a di gu ganeya khu gu khuye a emisanide ni gilingo nyo khaguri nyo vbise. Uye a di rana gilingo gyogyo khuye “ngilozi ya Sathane” yi nga ba yi mu “vetelela.” Adzina Sathane mwendro dzingilozi dzaye nya madhemoni kha dza gireya gigaradzo Pawulo, egi gi nga ba gi fana ni muba givilini. Ganiolu tepo maphuvbo nya guvivbe ma nga tugula gigaradzo gyaye, adzina ma zamide gu gi lemedza nyo bwe gi gira nga khatshi muthu nyo khaguri a mu payago. Ginani egi Pawulo a giridego?
5. Jehovha hlamude kharini milombelo ya Pawulo?
5 Nyo pheye Pawulo a di gu vbweta gu khuye Jehovha a mu duseya “Muba.” Uye wari khuye: “Nyi lombide guraru ga Pfhumu [Jehovha] gukheni a nyi duse muba yoyo.” Ambari olu Pawulo a nga ba a gombeya, muba wu di gu simama givilini. Ina soso so thula khiso Jehovha kha hlamula milombelo ya Pawulo? Ahihi. Uye a mu hlamude milombelo yaye. Jehovha kha dusa gigaradzo, ganiolu a ningide Pawulo tshivba nya gu gi timiseye. Jehovha a di khuye: “Tshivba yangu ya gu dzi yeyedza . . . ga vale va gu mwalo tshivba.” (2 Kor. 12:8, 9) Khu gu phaswa khu Jehovha, Pawulo a si kodzide gu simama ni gutsaka ni gu rula! — Filp. 4:4-7.
6. a) Jehovha a nga hlamula kharini milombelo yathu? b) Gitumbiso muni gi khumbugidwego avba nya lowo wu gomogo avba nya ndrimana yeyi gi gu tiyisidego?
6 Kha nga Pawulo, ina u ngu lomba gu khuwe Jehovha a gu duseya silingo? Yimbe tepo u gombede dzitepo nya dzingi khu gigaradzo gyagimwegyo ganiolu gigaradzo kha givbindri mwendro, gyo bwe gi engedzeya. Ina isoso si ngu gu gira u pimisa gu khuwe Jehovha kha gu tsakeyi? Abari kharato, dundruga giyeyedzo gya Pawulo. Kha nga olu Jehovha a hlamudego milombelo ya Pawulo, khu lisine a na hlamula milombelo yago nuwe! Adzina Jehovha kha na nga gu duseya gigaradzo. Ganiolu khu gu thumisa liphuvbo nya guage, uye a na gu ninga tshivba u yi vbwetago gasi gu timiseya silingo. (Ndzi. 61:3, 4) Ambari wa gu “bayiswa” Jehovha kha na nga gu diga. — 2 Kor. 4:8, 9; Filp. 4:13.
LIPHUVBO NYA GUAGE LI NGU HI PHASA GU SIMAMA GU THUMEYA JEHOVHA
7-8. a) Liphuvbo nya guage la gu fana ni phuvbo khu ndziya muni? b) Pedro wu tshamusede kharini thumo wu girwago khu liphuvbo nya guage?
7 Khu yevbini yimbe ndziya eyi liphuvbo nya guage li hi phasago khiyo? Hi nga fananisa liphuvbo nya guage ni phuvbo. Ngalava yi nga thumisa phuvbo yi vetago gasi gu vboha omu yi hongolago, ambari liduwa na li kudzugide. Khu gu fana, liphuvbo nya guage li nga hi phasa gu simama gu thumeya Jehovha ambari ha gu ba hi emisana ni silingo kala li vboha litigo nya liphya hi tumbisidwego khu Nungungulu.
8 Kha nga mugogi nya dzindzandzi, mupostoli Pedro a di guti nya singi maningano ni gu gimbiya khu ngalava. Adzina khiso si mu giridego a thumisa lito li gimbileyanago ni gu gimbiya khu ngalava tepo a nga tshamuseya edzi liphuvbo nya guage li thumago khidzo. A di lova khuye: “Ma mwalo magana nya vaprofeti ma nga lowago khu gudzina nya muthu, aholu, vathu va di kutsedzedwa khu Liphuvbo nya Guage, va ganela Mahungu nya gute khu ga Nungungulu.” Lito nya giGreki li vbindrugedzedwego gu “kutsedzedwa” la gu thula “gu kutswa; gu gimbidziswa.” — 2 Ped. 1:21.
9. A di gu vbweta gu khuye ginani Pedro tepo a nga ganeya khu lito “gu gimbidziswa”?
9 A di gu vbweta gu khuye ginani Pedro tepo a nga ganeya khu lito “gu gimbidziswa”? Malito yamamowo nya giGreki ma thumisidwe khu Luka, mulovi nya libhuku la Mithumo, gasi gu tshamuseya ngalava yi “gimbidziswago” khu phuvbo. (Mith. 27:15) Muhevbuli nyo khaguri nya matimo nya Bhibhiliya a di khuye tepo Pedro a nga lova gu khuye valovi nya Bhibhiliya va di “gu gimbidziswa” khu liphuvbo nya guage, a di thumisa giyeyedzo gi nga hadzi gira vathu va dundrugeya khu ngalava yi gimbidziswago khu phuvbo. Pedro a di khuye: Kha nga olu phuvbo yi gimbidzisago ngalava gasi yi vboha omu yi hongolago, valovi nya Bhibhiliya va di gimbidziswa khu liphuvbo nya guage gasi gu gira thumo wawe. Muhevbuli yoyo nya matimo nya Bhibhiliya ganede esi: “Vaprofeti va di gu fana ni dzingalava dzi khusedzidego matanga. Va di gu dzi emisede gu gira thumo va nga ba va gimbidziswa khu liphuvbo nya guage gasi gu wu gira.” Jehovha a di gu gira gipandre gyaye. Uye a va ningide “phuvbo” a gu liphuvbo nya guage. Valovi nya Bhibhiliya navo va giride gipandre gyawe. Avo va dzumede gu gimbidziswa khu liphuvbo nya guage.
LIZAMBO 1: Gira thumo u ningidwego khu Jehovha tepo yatshavbo
LIZAMBO 2: Patega mithumoni ya Jehovha tepo yatshavbo khavba u si kodzago khavbo (Wona ndrimana 11) *
10-11. Silo muni nya sivili hi yedego gu gira gasi hi gimbidziswa khu liphuvbo nya guage? Ninga giyeyedzo.
10 Khu lisine, muhuno Jehovha kha nga gu thumisa liphuvbo laye nya guage gasi gu gira vathu va lova mabhuku nya Bhibhiliya. Ambari ulolo, liphuvbo nya guage li ngo phasa vathu va Nungungulu. Jehovha a ngo gira gipandre gyaye. Liphuvbo nya guage li nga hi phasa kharini? Gu vbwetega hi tiyisega gu khethu hi ngu gira gipandre gyathu. Hi nga si gira kharini isoso?
11 Nga dundrugeya khu giyeyedzo gegi. Gasi a phasega khu phuvbo, marinyeru yede gu gira silo sivili. Nyo pheye, gu vbwetega a djikiseya ngalava iyo yi veteyago iyo phuvbo. Kholu, ngalava yaye kha yi na nga gimbiya o gara marinyeru a diga gu landra eyi phuvbo yi veteyago iyo. Nya wuvili, uye yede gu khusedza ni gu tula gwadi litanga khavba a si kodzago khavbo. Khu lisine, ambari go ba gu veta phuvbo, ngalava yi na gimbiya basi litanga lo ba li tade gwadi khu phuvbo. Khu ndziya nyo fane, hi na si kodza gu timiseya thumoni wathu wa Jehovha ha gu ba hi phaswa khu liphuvbo nya guage. Gasi hi phasega khilo, gu vbwetega hi gira silo sivili. Gupheya, gu vbwetega hi gira esi liphuvbo nya guage li hi leleteyago gu gira. Nya wuvili, gu vbwetega hi “tula gwadi matanga yathu” khavba hi si kodzago khavbo gasi hi thumeya Jehovha khu tshivba yathu yatshavbo. (Ndzi. 119:32) Ha gu gira isoso, liphuvbo nya guage li na hi ninga tshivba hi yi vbwetago gasi hi simama gu thumeya Jehovha khu gutumbega kala hi vboha litigoni nya liphya la Nungungulu.
12. Ginani hi na bhulago khigyo olu?
12 Kala avba hi bhude khu dzindziya dzimbili nya edzi liphuvbo nya guage li hi phasago khidzo. Liphuvbo nya guage li ngu hi ninga tshivba ni gu hi phasa gu ema na hi tiyide tepo hi emisanago ni silingo. Liphuvbo nya guage li ngu hi gimbidzisa ni gu hi phasa gu gira mithumo eyi Jehovha a vbwetago gu khuye hi gira a gu iso si na gu hi ningago womi nya pindrugedwa. Olu hi na wona silo sina esi hi yedego gu gira gasi hi phasega khu liphuvbo nya guage.
HI NGA PHASEGA KHARINI KHU LIPHUVBO NYA GUAGE
13. Guya khu 2 Thimoti 3:16, 17, milowo yi nga hi phasa gu gira ginani, ganiolu ginani hi yedego gu gira?
13 Nyo pheye, hevbula Lito la Nungungulu. (Leri 2 Thimoti 3:16, 17.) Nungungulu thumiside liphuvbo laye gasi gu theya maalakanyo yaye omu nya mapimo nya valovi nya Bhibhiliya. Sileleletelo sa Nungungulu sa gu beya mapimoni gwathu ni monyoni gwathu tepo hi lerigo Bhibhiliya hi bwe hi dundrugeya khesi hi lerigo. Iso sa gu hi gira hi vbindrugedza mavbanyelo yathu gasi hi tsakisa Jehovha. (Hebh. 4:12) Gasi hi phasega gwadi khu liphuvbo nya guage hi yede gu hevbula Bhibhiliya tepo yatshavbo hi bwe hi dundrugeya ngudzu khesi hi si hevbulago. Lito la Nungungulu li na khuha satshavbo esi hi ganeyago ni esi hi girago.
14. a) Khu ginani hi nga ganeyago gu khethu liphuvbo nya guage lomo mitshanganoni yathu? b) Ginani gi na hi phasago gu phasega gwadi khu liphuvbo nya guage mitshanganoni yathu?
14 Nya wuvili, khozeya Nungungulu ni vakhwathu. (Ndzi. 22:22) Liphuvbo la Jehovha lomo mitshanganoni. (Gutu. 2:29) Khu ginani hi ganeyago isoso? Kholu tepo hi tshanganago gasi gu khozeya ni maKristo-kwathu, ha gu lomba liphuvbo nya guage, hi embeleya dzindzimo nya Mufumo dzi seketedwago omu nya Lito la Nungungulu ni gu bwe hi engiseya sileletelo sa omu nya Bhibhiliya si ningedwago khu vandriyathu va hathidwego khu liphuvbo nya guage. Nigu Liphuvbo lalimwedo li ngu phasa vandriyathu nya vanyamayi gu dongiseya ni gu yeyedza sipandre sawe. Gasi gu hi phasega gwadi khu liphuvbo nya guage, hi yede gu dongiseya gasi hi ya hlamula mitshanganoni. Khu ndziya yoyo, ha gu ba hi romo mitshanganoni, hi na ba hi dongide gu hakha liphuvbo nya guage gu fana ni ngalava yi gu na ni matanga ma tudwego.
15. Liphuvbo nya guage li nga hi phasa kharini thumoni nya gutshumayele?
15 Nya wuraru, gu tshumayela. Tepo hi thumisago Bhibhiliya thumoni nya gutshumayele ni gu hevbudzani, ha gu dzumeleya liphuvbo nya guage gasi li hi phasa thumoni gwathu. (Rom. 15:18, 19) Gasi gu phasega gwadi khu liphuvbo nya guage, u yede gu patega thumoni nyo tshumayele tepo yatshavbo ni gu thumisa Bhibhiliya ni yevbini tepo si kodzegago. Mweyo nya dzindziya dzi nga girago gu u dugeleya thumoni gwago nyo tshumayele, khu gu thumisa mabelelo ma gomogo avba nya Gibhukwana nya mitshangano nya thumo ni mavbanyelo nya wuKristo.
16. Khu yevbini ndziya nya yadi gasi hi mana liphuvbo nya guage?
16 Nya wuna, gombeya ga Jehovha. (Mat. 7:7-11; Luka 11:13) Ndziya nya yadi nya gu hi mana liphuvbo nya guage khu gu bhula ni Jehovha khu nombelo. Gimwalo gi na tandregisago milombelo yathu gu vboha ga Jeovha mwendro gu hi gira hi si hakhi liphuvbo nya guage. Liphuvbo nya guage li na hi phasa ambari ha gu ba hi romo pasoni nigu Sathane mwalo makodzelo nyo gire gilo gi na hi tandregisago gu hakha liphuvbo nya guage. (Jak. 1:17) Hi nga gombeya kharini gasi hi phasega gwadi khu liphuvbo nya guage? Gasi gu mana hlamulo, hongoleni hi hevbulani maningano ni nombelo wa avba nya giyeyedzo gi gomogo omu nya Ivhangeli ya Luka. *
U NGA GARALI KHU GU GIRA NOMBELO
17. Ginani hi gi hevbulago maningano ni nombelo avba nya gipimaniso gya Jesu gi lovidwego omu ga Luka 11:5-9, 13?
17 Leri Luka 11:5-9, 13. Giyeyedzo gya Jesu gya gu yeyedza edzi hi nga lombago khidzo liphuvbo nya guage. Avba nya giyeyedzo gyogyo, mwama wule hakhide esi a nga ba a si vbweta khu kotani nya “gu gurumedze gwaye, NM.” Uye kha thava gu lomba giphaso ga pari yaye ambari olu gu nga ba guri vbakari nya wutshigu. (Luka 11:8) Ginani egi hi gi hevbulago avba nya esi Jesu a ganedego avba nya gipimaniso gegi nya nombelo? Uye a di khuye: “Lombani, mu na ningwa; vbwetani, mu na si mana; khokhothani, mu na tuledwa.” Khu kharato ginani hi gi hevbulago? Gasi gu hi mana liphuvbo nya guage, gu vbwetega gu hi gombeya hi lomba liphuvbo nya guage nya mba garala.
18. Guya khu gipimaniso gya Jesu khu ginani hi nga tiyisegago gu khethu Jehovha a na hi ninga liphuvbo laye nya guage?
18 Gipimaniso gya Jesu gya gu hi phasa gambe gu wona gu khethu khu ginani Jehovha a na gu hi ningago liphuvbo nya guage. Mwama wa avba nya gipimaniso a di gu vbweta gu gireya silo nya sadi pfhumba waye. A di si wona na si gu vbwetega gu ningeya guhodza ni vbakari wule nya wutshigu ganiolu a diri mwalo gilo nyo mu ninge. Jesu a di khuye vhizinyo waye a di kala a wuga khu kotani nya olu a nga gurumedza gu lomba pawu. Ginani egi Jesu a nga ba a vbweta gu hi hevbudza? Ambari muthu nya mba vbeleya a kodzago gu phasa vhizinyo waye a gurumedzago, hi nga tiyisega gu khethu Babe wathu nya wadi wa ndzadzini a na phasa vale va si garaligo khu gu lomba liphuvbo nya guage! Khu kharato hi nga lomba na hi tiyisega gu khethu Jehovha a na hlamula milombelo yathu tepo hi lombago liphuvbo nya guage. — Ndzi. 10:17; 66:19.
19. Khu ginani hi tiyisegago gu khethu hi na kodza gu timiseya?
19 Hi nga tiyisega gu khethu hi na kodza gu timiseya ambari olu Sathane a gu mba diga gu hi wugeya. Khu ginani? Kholu liphuvbo nya guage li ngu hi phasa khu dzindziya dzimbili. Nyo pheye, ilo li ngu hi ninga tshivba yi vbwetegago gasi gu pala silingo. Nya wuvili, liphuvbo nya guage khiyo tshivba yi hi phasago gu simama gu thumeya Jehovha kala hi vboha mafuni nya maphya. Hongoleni hi dzi emiseya gu phasega ngudzu khu giphaso nya liphuvbo nya guage!
NDZIMO 41 Engiseya nombelo wangu
^ ndri. 5 Ndrima yeyi ya gu tshingisa edzi liphuvbo nya guage la Nungungulu li nga hi phasago khidzo gu timiseya. Yi na ganeya gambe khesi hi nga girago gasi gu hi phasega ngudzu khu liphuvbo nya guage.
^ ndri. 16 Guvbindra gutala nya dziIvhangeli dzi lovidwego, eyi ya Luka yi ngu hi phasa gu pwisisa gu khethu nombelo wu diri gilo nya lisima guvbanyani ga Jesu. — Luka 3:21; 5:16; 6:12; 9:18, 28, 29; 18:1; 22:41, 44.
^ ndri. 59 TSHAMUSELO NYA DZIFOTO: LIZAMBO 1: Ndriyathu nya mwana ni ndriyathu nya nyamayi va vbohago Salawuni nya Mufumo. Khu gu tshangana gumogo ni vandriyathu, avo va gu patega ga gigiro li gu romo liphuvbo nya guage. LIZAMBO 2: Avo va dzi dongisede gasi gu patega mitshanganoni. Sipandre sesi sasivili si ngu pata gambe simbe silo hi si hevbudego avba nya ndrima yeyi: gu hevbula Lito la Nungungulu, gu tshumayela mahungo nya yadi ni gu gombeya ga Jehovha.
