DZITEPONI nya Bhibhiliya muthangeyi nya dzithomba a di gu woneleya wulanga nyo khaguri mwendro ndranga ya mumbe muthu.

Tepo Josefa gyanana gya Jakobe, a nga ba ari gumbi Egipito, a di khala muthangeyi nya dzithomba dza ndrangani ga mune waye. Khu lisine mune waye nya muGipiti a di “vega mandzani ga Josefa satshavbo a nga bani ari naso.” (Gen. 39:2-6) Khu hwane, tepo uye Josefa a nga khala mufumeyi nya tshivba tigoni ga Egipito, a di emisa nuye muthangeyi nya dzithomba nya ndranga yaye. — Gen. 44:4.

Dziteponi dza Jesu, vathu va nga ba vari ni sipeto va di gu khala madhoropani hwindzo nya mathembo yawe. Khu kharato avo va di gu emisa vathangeyi nya dzithomba gasi gu woneleya mithumo yi nga ba yi girwa tshigu ni tshigu khu sithumi sa mune lithembo lolo.

Khu mani a nga ba a ninganedwa khu gu thuma nga muthangeyi nya dzithomba? Mulovi moyo nya muRoma wa lizana myaga nyo pheye nyo pwani khu Columella a di gu khuye gumbi yi nga ba yi vegwa nga muwoneleyi mwendro muthangeyi nya dzithomba a di yede gu na “hevbude gwadi gu gira thumo wowo.” A di yede gu nari muthu a nga ba “a kodza gu thumisana ni vathu ganiolu nya mba va tshanisa.” A di bwe khuye: “Muthangeyi nya dzithomba kha nga ba a yede gu pimisa gu khuye a ngu siti satshavbo ganiolu a di yede gu nari muthu a dzi emisedego gu hevbula silo nya siphya.”

Lito la Nungungulu li ngu thumisa giyeyedzo nya muthangeyi nya dzithomba gasi gu fananisa mithumo nyo khaguri yi girwago libandlani nya wuKristo. Khu giyeyedzo: Mupostoli Pedro kutside maKristo gu thumisa makodzelo va ningidwego khu Nungungulu gasi gu “thumeya vambe kha nga muthangeyi nya dzithomba nya wadi nya wuhigo wa Nungungulu.” — 1 Ped. 4:10, NM.

Jesu nuye thumiside giyeyedzo nya muthangeyi nya dzithomba avba nya gipimaniso gi lovidwego omu ga Luka 16:1-8. Khu kharato, avba nya giprofeto maningano ni esi si nga hadzi yeyedza guwuya gwaye kha nga Pfhumu, Jesu tiyiside valandreyi vaye gu khuye a na emisa ‘githumi nya gutumbege ni nya gugengeye’ mwendro “muthangeyi nya dzithomba nyo tumbege.” Thumo nya muthangeyi yoyo wu di hadzi gu khala nya gu ninge valandreyi va Kristo guhodza ga liphuvboni gu vbwetegago ndrani nya matshigu nya guhegise. (Mat. 24:45-47; Luka 12:42, NM) Ethu hi ngu bonga ngudzu kholu hi hakhago mabhuku ma tiyisago gukhodwa ma dongisedwago khu muthangeyi nya gutumbege ma bwe ma manega tigoni gwatshavbo.