1. Ginani egi Jehovha a hi dzumeleyago gu gira?

Jehovha a ngu hi dzumeleya gu hatha edzi a na vbanyago khidzo. Uye a gu hi hevbudza edzi hi nga hungago khidzo makungo nya yadi nigu tepo hi hungago gu gira esi si mu tsakisago, uye a gu hi phasa gasi hi dugeleya avba nya makungo yoyo. (Ndzi. 119:173) Tepo hi thumisago guti gu gomogo omu nya Lito la Nungungulu, sa gu hi vbevbugeya gu hunga makungo nya yadi. — Hebh. 5:14.

2. Gigaradzo muni adzina hi nga emisanago nagyo hwane nya gu hunge makungo?

² Ganiolu, ambari ha gu ba hi giride makungo nya yadi, adzina si nga hi garadzeya gu vbedzisa esi hi si phedego. Nga wona siyeyedzo nyo khaguri: Ndriyathu nyo khaguri nya lidzaha a di hunga gu leri Bhibhiliya yatshavbo. Uye giride isoso khu dzisemana nya dzidugwana ganiolu khu hwane a di ema gu yi leri khu kotani nya sighelo nyo khaguri. Ndriyathu nya nyamayi a di hunga gu thuma kha nga piyonero nya tepo yatshavbo ganiolu a khaleya gu thindreka litshigu a nga hadzi pheya khilo. Huwo nya madhota yi di hunga gu gireya maendro nya wuhavisi vandriyathu libandlani, ganiolu gu di vbindra migima nya yingi na va nga si pheyi gu gira isoso. Siemo sesi si hambanide, ganiolu gu na ni gilo nyo khaguri gi fanago. Vathu va giride makungo ganiolu kha va tadzisa esi va si hungidego. Makristo ya lizana myaga nyo pheye ya Korinto ma emisanide ni gigaradzo nyo fane. Hongoleni hi wonani egi hi nga gi hevbulago khavo.

3. Makungo muni vaKorinto va ma hungidego, ganiolu ginani gi nga girega?

³ Omu nya 55 E.C., vaKorinto va hungide makungo nya lisima. Avo va pwide gupwani vandriyathu Jerusalema ni Judheya va di gu emisana ni gutshaniseka ni wusiwana, nigu mambe mabandla ma di gu henga dzitsapawu gasi gu va phasa. Khu kotani nya wuwadi ni wuhindzi, vaKorinto va di hunga navo gu phasa vandriyathu va nga ba va vbweta giphaso, khu kharato va di wudzisa mupostoli Pawulo edzi va nga phasedzeyago khidzo. Uye a di rumeya  sileletelo libandlani a bwe a emisa Titu gasi gu woneleya dzitsapawu nyo hengwe. (1 Kor. 16:1; 2 Kor. 8:6) Hwane nya migima nyo khaguri, Pawulo tugude gu khuye vaKorinto kha va gira mihengo va nga tumbisa. Kha nga handro, miningelo yawe kha ya kodzega gu girwa khu tepo yakone yi feya gu hongola Jerusalema gasi yi ya patwa neyi ya mambe mabandla. — 2 Kor. 9:4, 5.

4. Kha nga si tshingisidwego omu ga 2 Vakorinto 8:7, 10, 11, ginani egi Pawulo a kutsidego vaKorinto gu gira?

⁴ Vakorinto va di giride makungo nya yadi, nigu Pawulo va zundzide khu kotani nya gukhodwa gwawe nyo tiye ni gudogoreya gwawe gu yeyedza wuhindzi. Ganiolu uye a di yede gambe gu va kutsa gu vbedzisa esi va nga ba va si phede. (Leri 2 Vakorinto 8:7, 10, 11.) Matshango yawe ma gu hi hevbudza gu khayo, ambari maKristo nyo tumbege adzina si nga ma garadzeya gu gira esi ma hungidego gu gira.

5. Khu sevbini siwudziso hi na si hlamulago?

⁵ Kha nga vaKorinto, anethu adzina si nga hi garadzeya gu gira esi hi nga ganeya gu khethu hi na gira. Khu ginani? Khu kotani nya gu mba vbeleya, adzina hi nga khaleya gu thidrekiseya. Dzimbe dzitepo sigiro nya mba si vireya si nga hi gira hi tandrega gu gira esi hi si hungidego. (Muh. 9:11; Rom. 7:18) Ginani hi yedego gu gira ha gu vbweta gu gevisisa makungo hi ma hungidego gale, gasi gu hunga gu khethu hi na vbindrugedza gilogyo mwendro ne? Hi nga gira ginani gasi hi tadzisa esi hi si hungidego?

6. Khu ginani si tshukago si lomba gu hi vbindrugedza makungo?

⁶ Mambe makungo nya lisima kha hi yeli gu ma vbindrugedza. Khu giyeyedzo, kha hi vbindrugedzi makungo yathu nya gu thumeye Jehovha, ni gudziemiseya gu tumbega avba nya pari yathu nya wugadzi. (Mat. 16:24; 19:6) Ganiolu mambe makungo, adzina hi yede gu ma vbindrugedza. Khu ginani? Kholu siemo si ngu vbindrugedza. Ginani gi nga hi phasago gu hunga makungo nya yadi?

7. Ginani hi yedego gu gi gombeleya, nigu khu ginani?

⁷ Gombeya gasi u mana guti. Jehovha ningide tshivba Jakobe nya gu love khuye: “A gu bani a romo moyo wanu a keneledwago khu guti, a na gu lombe ga Nungungulu a ningago khu wuhindzi ga vatshavbo.” (Jak. 1:5) Khu ndziya nyo khaguri hatshavbo hi ngu ‘keleneledwa khu guti.’ Khu kharato lomba Jehovha gasi a gu phasa tepo u hungago makungo ni tepo u vbwetago gu vbindrugedza. Khavbovbo Jehovha a na gu phasa gu hunga makungo khu guti.

8. Wugevisisi muni u yedego gu gira na wu nga si hungi makungo?

⁸ Gira wugevisisi nyo vbeleye. Hevbula Lito la Nungungulu, leri mabhuku nya hengeledzano ya Jehovha, ni gu bhula ni muthu u mu tumbago. (Mav. 20:18) Gu gevisisa khya lisima na wu nga si hungi gu vbindrugedza thumo, gu fuluga, mwendro gu hatha sihevbudzo u na si beleyago gasi gu mana dzitsapawu nyo dzi vbanyise ni gu simama gu thumeya Jehovha.

9. Hi na phasega kharini ha gu tumbega ga ethu vamune?

⁹ Pimisa gwadi khu gighelo nya makungo yago. Jehovha a ngu khatala khu sighelo si hi girago hi hunga silo nyo khaguri. (Mav. 16:2) Jehovha o vbweta gu khuye hi tumbega siloni satshavbo. Khu kharato tepo hi hungago silo hi yede gu tumbega ga ethu vamune ni ga vambe maningano ni sighelo si hi girago hi hunga makungo nyo khaguri. Wa gu mba tumbega khu gu vbeleya, si na gu garadzeya gu simama gu tadzisa esi u si hungidego. Khu giyeyedzo, ndriyathu moyo nya lidzaha a di hunga gu khala piyonero nya tepo yatshavbo. Khu hwane nya tepo, si mu garadzeya gu enedza dziora dzi vbwetegago khu kharato a hamuga gutsaka thumoni nya gutshumayele. Adzina uye pimiside gu khuye egi gi mu kutsidego gu khala piyonero gudogoreya gwaye nyo vbwete gu tsakisa Jehovha. Ganiolu, si nga  gira gu igyo gi mu giridego a khala piyonero, gu diri gu vbweta gu tsakisa vavelegi vaye mwendro mumbe muthu a mu golago.

10. Ginani gi vbwetegago gasi gu vbindrugedza?

¹⁰ Nga dundrugeya khu gihevbuli nya Bhibhiliya gi hungidego gu diga gu daha. Gu pheya, gi dwana kamo nya dzadi, gi si kodza khu semana mweyo mwendro dzimbili ambari na si garadza, ganiolu khu hwane gi pheledza gambe gu daha. Khu mahegiso, gi za gi si kodza gu diga khu guvbeleya! Lihaladzo lagyo khu Jehovha ni gudogoreya gwagyo gu Mu tsakisa, si gi phaside gu pala giolovedzo gile. — Kol. 1:10; 3:23.

11. Khu ginani hi yedego gu manega ni misuwo nyo kongome?

¹¹ Manega ni misuwo nyo kongome. Abari gu misuwo yago khya gukongoma, si na gu vbevbugeya gu yi vboheya. Ku giyeyedzo, adzina u hungide gu leri Bhibhiliya tepo yatshavbo. Ganiolu, wa gu ba wa sa gira longoloko nyo kongome adzina khu na nga si kodza gu gira esi u si hungidego. * Mwendro madhota libandlani adzina ma nga hunga gu gira maendro nya wuhavisi tepo yatshavbo, ganiolu khu gu gimbiya nya tepo, ma si landri esi ma si hungidego. Gasi gu dugeleya ayo ma yede gu dzi wudzisa esi: “Ina hi giride sasamedzo nya vandriyathu va na phasegago khu maendro yathu? Ina hi vegide tepo hi na va endreyago khiyo?”

12. Ginani adzina hi yedego gu gira nigu khu ginani?

¹² Wona silo khedzi si gu idzo. Mwalo gwathu a gu ni tepo, dzitsapawu mwendro tshivba nya gu gire ni gevbini a gi dogoreyago gu gira. Khu kharato wona silo khedzi si gu idzo u bwe u ninganiseya. Adzina si nga lomba gu u vbindrugedza makungo u tandregago gu ma tadzisa. (Muh. 3:6) Nga dundrugeya khesi: u gevisiside gwadi esi u si hungidego, u vbindrugedza esi si nga ba si vbwetega, u bwe u dzipwa khuwe olu u na si kodza gu si tadzisa. Wona livbandre mazambo ma nga gu phasago gu vbedzisa esi u si phedego.

13. U nga yi mana kharini tshivba u yi vbwetago gasi gu tadzisa esi u si hungidego?

¹³ Gombeya gasi u mana tshivba nyo tadzise esi u si hungidego. Nungungulu a nga gu ninga “tshivba nya gu thume” ni gu tadzisa esi u si hungidego. (Filp. 2:13, NM) Khu kharato lomba Jehovha liphuvbo nya guage gasi li gu ninga tshivba u yi vbwetago. Simama gu gombeya ambari so gira nga katshi milombelo yago kha yi hlamudwi. Jesu a di khuye: “Lombani, [liphuvbo nya guage] mu na ningwa.” — Luka 11:9, 13.

14. Litshina nya nayo li gomogo omu ga Mavingu 21:5, li nga gu phasa kharini gu tadzisa makungo yago?

¹⁴ Gira longoloko. (Leri Mavingu 21:5.) Gasi gu vbedzisa thumo u wu phedego u yede gu gira longoloko. Khavbovbo gu vbwetega u landreya longoloko u wu giridego. Khu gu fana, tepo u hungago makungo, gira sasamedzo nya esi u yedego gu si gira gasi gu tadzisa makungo yoyo. Abari gu gilo nyo khaguri gi ngu gu garadzeya gu gira, gi kabanise khu sipandre nya sidugwana. Tepo yatshavbo u girago gimwego nya sipandryana soso, u na wona gu khuwe u giride silo nya sikhongolo ngudzu. Pawulo kutside vaKorinto gu vega gilogyo gasi gu gira miningelo yawe “khu litshigu nya guhegule nya sumana,” vbavbandze nya gu zame gu gira miningelo basi tepo a vbohago. (1 Kor. 16:2) Gu kabanisa mithumo nya yikhongolo khu sipandre nya sidugwana si na gu gira u dzipwa na wa sa lemeledwa.

15. Hwane nya gu gire longoloko, ginani gi yedego gu girwa?

¹⁵ Wa gu yedza khu gu lova esi u hungidego gu gira, si na gu vbevbugeya gu si tadzisa. (1 Kor. 14:40) Khu giyeyedzo, huwo nya madhota ya gu kutswa gu emisa lidhota nyo khaguri gasi gu lova ni gevbini egi madhota ma gi hungidego gu gira, oyu a emisidwego gu si gira ni litshigu si  yedego gu vbeya khilo. Tepo madhota ma girago sasamedzo wowo, si ngu ma vbevbugeya gu gira esi ma si hungidego gu gira. (1 Kor. 9:26) Anuwe u nga gira sasimweso avba nya longoloko wago wabune. Khu giyeyedzo, u nga gira sasamedzo wago nya esi u vbwetago gu gira litshigu ni litshigu, u bwe u si sasamedza guya khegi u na pheyago khigyo gu gira. Wa gu gira isoso, si na gu vbevbugeya gu vbedzisa esi u si phedego u bwe u si tadzisa.

16. Ginani gi vbwetegago gasi gu tadzisa esi u si hungidego, nigu libhuku la Varoma 12:11 la gu si seketeya kharini isoso?

¹⁶ Dzi garadze. Gu vbwetega gu dzi garadza gasi gu landra longoloko wago u bwe u vbedzisa esi u si phedego. (Leri Varoma 12:11.) Pawulo embede Thimoti gu “simamisa gu hevbulela” ni gu “tiyisela” gasi gu a khala muhevbudzi nya wadi. Hi nga thumisa wusingalagadzi wa Pawulo ni ga gevbini gilo hi vbwetago gu gireya Jehovha. — 1 Thim. 4:13, 16.

17. Libhuku la Vaefeso 5:15, 16, li nga hi phasa kharini gu gira esi hi si hungidego?

¹⁷ Thumisa gwadi tepo yago. (Leri Vaefeso 5:15, 16.) Hatha tepo gasi gu gira esi u si hungidego nigu u nga vbindrugedzi. Potsa gu vireya yimbe tepo gasi gu gira silo; kholu tepo yoyo kha yi na nga vboha. (Muh. 11:4) Dzi woneye, u nga dzumeleyi silo nya mba pwala si gu beya tepo yago ni tshivba u nga hadzi yi thumisa gasi gu gira silo nya lisima ngudzu. (Filp. 1:10) Sa gu kodzega, hatha tepo nya gu gimwalo gi na tsolopeteyago esi u girago. Embeya vambe gu khuwe u pharegide. Tshima telefone yago nigu khedza mahungu omu nya e-mail hwane nya gu ba u vbedzide esi u girago. *

18-19. Ginani gi nga gu phasago gu simama gu zama gu tadzisa esi u si hungidego ambari sa gu ba si garadza?

¹⁸ Vega gupima avba nya mihandro nya yadi u yi manago. Mihandro u yi manago khu makungo u ma hungidego ya gu fana ni gu vboha wulanga nyo khaguri hwane nya liendro. Wa gu ba u dzina kamo gu vboha wulanga wowo, u na simama gu gimbiya ambari wa gu tugula gu khuwe u yede gu thumisa yimbe ndziya. Khu ndziya nyo fane, ha gu vega gupima avba nya mihandro nya esi hi si hungago, kha hi na nga vbiredzeya gu tsukula tepo hi mananago ni sighodho mwendro so lomba gu thumisa yimbe ndziya. — Gal. 6:9.

¹⁹ Gu hunga makungo nya yadi kha si vbevbugi, nigu gu ma tadzisa si nga khala gigaradzo. Ganiolu, khu gu phaswa khu Jehovha, u nga mana guti ni tshivba u yi vbwetago gasi gu vbedzisa esi u si phedego.