HWANE nya gu ba Jesu a wusidwe khu gufani, uye wonegide ga vapizane vaye Galileya. Uye a diri ni gilo nya lisima gasi gu va embeya. Khu gevbini gilo gyakona? Esi a ganedego, somo omu ga Matewu 28:18-20. — Leri.

2. Siwudziso muni hi na bhulago khiso?

² Gileletelo gya Jesu nyo gire vapizane gi ngu thuma gambe ga sithumi sa Nungungulu muhuno. Khu kharato, hongoleni hi wona siwudziso siraru si yelanago ni thumo hi ningidwego khu Jesu. Nyo pheye, ginani hi yedego gu gira gasi gu hevbudza sileletelo sa Nungungulu vapizane nya vaphya? Nya wuvili, vahuweleyi vatshavbo libandlani va nga phasa kharini sihevbuli nya Bhibhiliya gu dandra khu liphuvboni? Nya wuraru, hi nga phasa kharini vandriyathu va vbodego khu liphuvboni gu patega gambe thumoni nyo gire vapizane?

3. Khu sevbini sihevbudzo nyo kongome esi Jesu a si patidego avba nya gileletelo gyaye?

³ Sileletelo sa Jesu si ngu pwala gwadi. Gu vbwetega hi hevbudza vambe esi a hi leletedego. Ambari ulolo, kha hi yeli gu divala gilo nya lisima ngudzu. Jesu kha ganeya gu khuye: ‘Va hevbudzeni satshavbo iso nyi nga mi hevbudzani.’ Ganiolu, a di khuye: Va hevbudzeni “gu landrisa satshavbo iso nyi nga mi hevbudzani.” Gasi gu engisa gileletelo gya Jesu, hi yede gu phasa gihevbuli gyathu nya Bhibhiliya guti esi gi yedego gu gira hi bwe hi gi yeyedza edzi gi nga girago khidzo. (Mith. 8:31) Khu ginani hi yedego gu gira isoso?

4. So thula ginani gu landrisa gileletelo? Ninga giyeyedzo.

 ⁴ Gu “landrisa” gileletelo so thula gu gi engisa. Gasi gu yeyedza edzi hi nga hevbudzago khidzo muthu gu landrisa mwendro gu engisa esi Kristo a hi leletedego, hi nga dundrugeya khu giyeyedzo gegi: Oyu a hevbudzago mumbe muthu gu gimbidzisa a nga mu phasa kharini gu landrisa sileletelo nya magimbidziselo? (Leis de trânsito.) Gupheya, muhevbudzi yede gu hevbudza gihevbuli gyaye milayo gi yedego gu yi landrisa ruwani. Ambari ulolo, gasi gu hevbudza sihevbuli saye edzi si nga engisago khidzo milayo yoyo, uye yede gu gira gimbe gilo gambe. Muhevbudzi yede gu hongola ni gihevbuli gyaye a bwe a gi ninga wusingalagadzi tepo gi gimbidzisago movha na gi zama gu thumisa esi gi si hevbulago. Ginani hi nga gi hevbulago avba nya giyeyedzo gegi?

5. a) Guya khu Johane 14:15 ni 1 Johane 2:3, ginani egi hi yedego gu phasa sihevbuli sathu nya Bhibhiliya gu gira? b) Ninga siyeyedzo nya edzi hi nga phasago khidzo sihevbuli sathu nya Bhibhiliya.

⁵ Tepo hi hevbulago Bhibhiliya ni muthu nyo khaguri ho mu hevbudza esi Nungungulu a vbwetago gu khuye hi gira. Ganiolu, hi yede gu gira nyo vbindre isoso. Hi yede gu phasa sihevbuli sathu nya Bhibhiliya gu thumisa esi si si hevbulago womini waso tshigu ni tshigu. (Leri Johane 14:15; 1 Johane 2:3.) Khu giyeyedzo, hi nga yeyedza sihevbuli sathu edzi si nga thumisago khidzo matshina nya milayo nya Bhibhiliya xikwatuno, thumotuno mwendro so ba si vbungadza. Hi nga si bhuleya khu gilo nyo khaguri gi hi dugeledego womini wathu, gasi gu si yeyedza edzi sileletelo nya Bhibhiliya si hi vhikedego khidzo mwendro edzi si hi phasidego khidzo gu hatha gu gira silo nya sadi. Ha gu ba hiri ni sihevbuli sathu hi nga gombeya ga Jehovha hi bwe hi lomba gu khethu liphuvbo laye nya guage li si thangeya. — Joh. 16:13.

6. Ginani gi pategago avba nyo phase vambe gu landrisa sileletelo sa Jesu?

⁶ Ginani gi pategago avba nyo phase vambe gu landrisa sileletelo sa Jesu? Hi yede gu phasa sihevbuli sathu nya Bhibhiliya gu haguleya gudogoreya nyo gire vapizane. Sihevbuli nyo khaguri adzina si nga manega ni hwanga nyo tshumayele. Khu kharato, hi yede gu laphisa monyo tepo hi si phasago gu pwisisa lisine nya Bhibhiliya gasi si manega ni gukhodwa nyo tiye. Isoso si na kuha myonyo yaso si bwe si kutsega gu tshumayela. Hi nga phasa kharini sihevbuli sathu gu manega ni gudogoreya nyo tshumayele mahungu nya yadi?

7. Hi nga phasa kharini gihevbuli gu haguleya gudogoreya nyo tshumayele mahungu nya yadi?

⁷ Hi nga wudzisa gihevbuli gyathu nya Bhibhiliya khethu: “Gu thumisa esi u si hevbulago omu nya Bhibhiliya si tshukwadziside kharini womi wago? Wa gu si wona kharini, ina vambe va yede navo gupwa mahungu yaya? Ginani u nga girago gasi gu va phasa?” (Mav. 3:27; Mat. 9:37, 38) Gi yeyedze sidangaliyana si gomogo omu nya dziferameta hi hevbudzago khidzo u bwe u gi hathisa egi gi gi wonago gu khigyo gi na tsakisa valongo, dzipari mwendro sithumi kwanu. Ninga gihevbuli gyago sidangaliyana nya singi. Gi trenari edzi gi nga si thumisago khidzo. Khu lisine, hwane nyo ba gihevbuli gyathu gi dzumeledwe gu khala muhuweleyi nya mba bhapatiswa, hi yede gu duga nagyo thumoni nyo tshumayele gasi hi gi phasa. — Muh. 4:9, 10; Luka 6:40.

8. Khu ginani si gu sa lisima gu sihevbuli sathu nya Bhibhiliya si haguleya lihaladzo nyo tiye khu Nungungulu ni muthu-kwanu? (Wona gambe kwadru yi gu khiyo: “ Edzi hi nga phasago khidzo sihevbuli sathu nya Bhibhiliya gu manega ni lihaladzo nyo tiye khu Nungungulu.”)

⁸ Dundruga gu khuwe Jesu a hi rumide gu phasa vambe gu “landrisa satshavbo” a hi  leletedego. Isoso sa gu pata milayo mivili nya lisima ngudzu, a gu gu haladza Nungungulu ni muthu-kwanu nigu milayo yeyi yi ngu pwanana gwadi ni thumo nyo tshumayele ni gu gira vapizane. (Mat. 22:37-39) Khu gwevbini gu pwana ga kone? Gighelo nya litshina gi hi girago hi tshumayela, lihaladzo lathu khu Nungungulu ni muthu-kwanu. Simbe sihevbuli nya Bhibhiliya si ngupwa hwanga sa gu dundrugeya khu thumo nyo tshumayele. Ganiolu, hi nga si tiyisegisa gu khethu khu gu phaswa khu Jehovha si na pala hwanga wowo. (Ndzi. 18:1-3; Mav. 29:25) Kwadru yi gimbileyanago ni ndrima yeyi yi ngu tshamuseya esi hi nga girago gasi gu phasa gihevbuli gyathu gu haladza ngudzu Nungungulu. Ni esi libandla li nga girago gasi gu phasa sihevbuli nya Bhibhiliya gu yeyedza lihaladzo nya likhongolo khu Nungungulu.

9. Avba nya giyeyedzo nya muthu a hevbuleyago gu gimbidzisa movha, gihevbuli gi nga hevbula silo nya lisima khu ndziya muni?

⁹ Nga dundrugeya gambe khu muthu a hevbuleyago gu gimbidzisa movha. Tepo a gimbidzisago nari ni muhevbudzi waye a gu hevbula khu dzindziya muni? Khu gu engiseya gwadi muhevbudzi waye a bwe a khedziseya edzi vambe va gimbidzisago khidzo. Khu giyeyedzo, muhevbudzi a nga yeyedza gihevbuli gyaye mumbe mugimbidzisi nya movha, edzi a gimbidzisago khidzo khu ndziya nya gu si vbevbugeya vambe gu thanga. Mwendro a nga gi yeyedza mumbe mugimbidzisi a finarigo dziluju gasi dzi si gendzi vambe, a bwe a gi kutsa gu gira sasimweso. Siyeyedzo sesi sa gu phasa gihevbuli guti esi gi nga girago gya gu ba gi gimbidzisa.

10. Ginani gi na phasago gihevbuli nya Bhibhiliya gu dandra khu liphuvboni?

¹⁰ Khu ndziya nyo fane, gihevbuli nya Bhibhiliya gi pheyago gu thumeya Jehovha kha gi hevbuli basi khavba nya muhevbudzi wagyo, ganiolu, gi ngu hevbula gambe khavba nya siyeyedzo nya simbe sithumi sa Jehovha. Khu kharato, ginani gi nga phasago gihevbuli nya Bhibhiliya gu dandra khu liphuvboni? Gu manega mitshanganoni nya wuKristo. Khu ginani? Khu gu, esi gi na si hevbulago mitshanganoni si na gi phasa gu tiyisa gukhodwa gwagyo si bwe si gi phasa gu engedzeya lihaladzo lagyo khu Nungungulu. (Mith. 15:30-32) Gimbe gambe khu gu, mitshanganoni muhevbudzi a nga tivegisa gihevbuli gyaye ga vandriyathu va tshanganidego ni sigaradzo nyo fane niso sagyo. Gihevbuli gi na wona siyeyedzo nya sadi sa vandriyathu va yeyedzago lihaladzo libandlani. Nga dundrugeya khu siyeyedzo si landreyago.

11. Siyeyedzo muni esi gihevbuli gi nga si wonago libandlani nigu isoso si nga gi kuha kharini?

¹¹ Gihevbuli nya nyamayi gi dandrisago sanana gyonga, gi hevbude khu giyeyedzo gya ndriyathu nya nyamayi a gomogo ga giemo nyo fane. Gu wona gu dzigaradza ogu ndriyathu nya nyamayi a gu girago gasi guta mitshanganoni nya libandla ni sanana saye, si kuhide monyo nya gihevbuli. Gihevbuli nya Bhibhiliya nya mwama gi zamago gu diga gu daha gi tide muhuweleyi nyo khaguri oyu a nga ba ari ni gigaradzo gya gimwegyo ganiolu a si kodzidego gu gi pala. Muhuweleyi bhulede gihevbuli khedzi lihaladzo laye khu Jehovha li mu kutsidego khidzo gu landrisa sileletelo sa Nungungulu. (2 Kor. 7:1; Filp. 4:13) Hwane nyo ba muhuweleyi a bhulede gihevbuli khedzi a si kodzidego khidzo gu ema gu daha, a di khuye u nga si kodza nuwe. Isoso si tiyiside gihevbuli si bwe si gi gira gi khodwa gu khigyo gi nga si kodza nigyo. Nyamahegyane a gu gihevbuli nya Bhibhiliya wonide ndriyathu moyo nya gyagadzyana a gu Fakazi ya Jehovha a tsakidego womini. Tepo gihevbuli nya Bhibhiliya gi nga wona edzi ndriyathu wule a tsakidego khidzo, gi vbwetide guti sighelo si girago ndriyathu wule a tsaka tepo yatshavbo.

12. Khu ginani hi ganeyago gu khethu vatshavbo libandlani va nga gira gilo nyo khaguri gasi gu phasa sihevbuli nya Bhibhiliya?

 ¹² Tepo sihevbuli nya Bhibhiliya sitigo vahuweleyi nyo hambanehambane nyo tumbege, iso si na hevbula khu giyeyedzo gyawe edzi si nga landrisago khidzo gileletelo gya Kristo nyo haladze Nungungulu ni muthu-kwanu. (Joh. 13:35; 1 Thim. 4:12) Kha nga hi si wonidego, gihevbuli nya Bhibhiliya gi nga hevbula nya singi ga vahuweleyi va emisanidego ni sigaradzo nyo fane niso sagyo. Gihevbuli gi nga hevbula khu siyeyedzo soso sa vandriyathu gasi gu wona gu vbindrugedza gi yedego gu gira gasi gi khala mupizane wa Kristo. (Dhet. 30:11) Vatshavbo libandlani va nga gira gilo nyo khaguri gasi gu phasa sihevbuli nya Bhibhiliya gu dandra khu liphuvboni. (Mat. 5:16) Ginani u girago gasi gu kutsa sihevbuli nya Bhibhiliya si tago mitshanganoni?

13-14. Jesu a va pharide kharini vapostoli vaye tepo va nga ba va vbede tshivba?

¹³ Gu vbwetega hi phasa vandriyathu va vbodego khu liphuvboni gu patega gambe thumoni nyo tshumayele ni gu gira vapizane. Ndziya eyi Jesu a pharidego khiyo vapostoli vaye tepo va nga ba va vbede tshivba, sa gu yeyedza esi hi yedego gu gira anethu muhuno.

¹⁴ Tepo a nga ba ari vbafuvbi ni gu songwa, vapostoli “va di mu diga va gu thava vatshavbo.” (Marko 14:50; Joh. 16:32) Ginani a giridego Jesu tepo vapostoli vaye va nga ba va vbede tshivba? Hwane nyo ba a wusidwe, Jesu embede valandreyi vaye nyo khaguri khuye: “Mu nga thavi gilo; indrani muya tivisa vandriyangu [khenu nyi wusidwe khu gufani].” (Mat. 28:10a) Jesu kha tsukula vapostoli vaye. Ambari olu va nga ba va mu digide, uye a va ranide khuye “vandriyangu.” Gu fana ni Jehovha, Jesu yeyedzide wuhindzi ni gu divaleya. — 2 Dzipf. 13:23.

15. Ha gu dzipwa kharini khu vale va emidego gu patega thumoni nyo tshumayele?

¹⁵ Khu ndziya nyo fane anethu gu vbwetega hi yeyedza ngudzu gu khatala khu vale va emidego gu patega thumoni nyo tshumayele. Avo vandriyathu nigu hi ngu va haladza ngudzu! Hi ngu dundruga gwatshavbo gu dzigaradza va gu giridego gasi gu thumeya Jehovha nigu vambe va vbodego olu, va thumide khu myaga nya yingi ngudzu. (Hebh. 6:10) Khu lisine, hi ngu va suva ngudzu! (Luka 15:4-7) Gu fana ni Jesu, hi nga yeyedza kharini gu khethu hi ngu khatala khavo?

16. Hi nga yeyedza kharini gu khethu hi ngu khatala khu vandriyathu va vbodego khu liphuvboni?

¹⁶ Va ninge konvhite nya mitshangano. Mweyo nya dzindziya eyi Jesu a tiyisidego khiyo vapostoli vaye va nga ba va vbede tshivba gu va rana gasi vata tshangana naye. (Mat. 28:10b; 1 Kor. 15:6) Khu ndziya nyo fane, anethu hi nga kutsa vandriyathu va vbodego khu liphuvboni guta mitshanganoni vo ba va si giri isoso. Hi ngu dziti gu khethu hi nga va rana tepo nyo pheye va si dzumeyi, ganiolu, kha hi yeli gu tsukula. Jesu tsakide ngudzu kholu vapizane vaye va hakhidego konvhite yaye. — Fananisa Matewu 28:16; ni Luka 15:6.

17. Ginani hi yedego gu gira tepo ndriyathu a vbodego khu liphuvboni a tago mitshanganoni?

¹⁷ Va hoyozeye. Jesu hoyozede vapizani vaye tepo va nga ya tshangana naye. Uye kha vireya gu khuye va pheya khavo va mu hoyozeya, ganiolu, a di va hidzimeleya a bwe a bhula navo. (Mat. 28:18) Ginani hi na girago tepo ndriyathu a vbodego khu liphuvboni a vbohago Salawuni nya Mufumo? Hi yede gu pheya khethu hi mu hidzimeleya hi bwe hi mu hoyozeya. Gupheyani adzina hi nga garadzega khu gu khethu hi na ganeya ginani. Ganiolu, gasi a dzipwa na romo gaya hi nga ganeya malitwana basi ma yeyedzago edzi hi tsakago khidzo khu gu mu wona.

18. Hi nga tiyisa kharini vahuweleyi va vbodego khu liphuvboni?

 ¹⁸ Va tiyise. Si nga gira vapizane va Jesu na va pimiside gu khavo kha va na nga si kodza gu tshumayela mafuni gwatshavbo. Jesu tiyiside valandreyi vaye khuye: “Eni nyi na bani nyiri nanu gikhati gyatshavbo.” (Mat. 28:20) Malito yoyo ma phaside kharini vapizane vaye? Nya mba hweya va di pheya “gu huwelela mahungu nya yadi.” (Mith. 5:42) Vahuweleyi va vbodego khu liphuvboni a navo vo vbweta gu tiyiswa. Avo adzina va nga thava gu pheya thumo nyo tshumayele gambe. Hi nga va tiyisegisa gu khethu avo kha va na nga gira thumo wowu nyo tshumayele vonga. Va gu ba va dongide hi nga duga navo thumoni nyo tshumayele. Avo va na tsaka ngudzu khu giphaso gyathu tepo va pheledzago gu tshumayela mahungu nya yadi. Ha gu yeyedza ava va vbodego khu liphuvboni gu khethu ha gu va wona kha nga vandriyathu, avo va na pheledza gu manega ni sighingi nigu isoso si na gira gu libandla latshavbo li tsaka.

19. Ginani hi dogoreyago gu gira nigu khu ginani?

¹⁹ Hi na simama ni thumo nyo tshumayele ni gu gira vapizane kala lini? Kala gu hegisani nya litigo leli la Sathane. (Mat. 28:20; wona Glossario, “Final do sistema de coisas.”) Ina hi dzi emisede gu tshumayela ni gu gira vapizane kala yi vboha tepo yeyi? Hi dzi emisede gu gira isoso kamo! Ethu hi ngu tsaka khu gu thumisa tepo yathu, tshivba yathu ni dzithomba dzathu gasi gu mana vale ‘va dzi emisedego gu hakha guvbanya nya gupindruge.’ (Mith. 13:48) Ha gu gira isoso, ha gu landreya giyeyedzo gya Jesu. Uye a di khuye: “Guhodza gwangu khu gu gira guhaladza ga wule a nga nyi rumelago ni gu gira mithumo yaye.” (Joh. 4:34; 17:4) Isoso khiso anethu hi si dogoreyago gu gira. Ethu ha gu vbweta gu vbedzisa thumo owu hi ningidwego. (Joh. 20:21) Nigu ha gu vbweta gu khethu vambe gu pata ni ava va vbodego khu liphuvboni va timiseya ni ethu thumoni wowu. — Mat. 24:13.

20. Guya khu Vafilipi 4:13, khu ginani hi nga ganeyago gu khethu hi na si kodza gu vbedzisa thumo owu Jesu a hi ningidego?

²⁰ Khu lisine, kha si vbevbugi gu tadzisa gileletelo egi Jesu a hi ningidego. Ganiolu, kha hi giri thumo wowu honga, Jesu tumbiside gu khuye a na ba ari ni ethu. Tepo hi girago vapizane, ha gu thuma “gumogo ni Nungungulu” ni Jesu Kristo nuye. (1 Kor. 3:9; 2 Kor. 2:17) Khu kharato, hi nga si kodza gu gira thumo wowu. Si ngu tsakisa nigu lithomo nya likhongolo ngudzu gu gira thumo wowu hi bwe hi phasa vambe gu gira sasimweso. — Leri Vafilipi 4:13.