1. Giwudziso muni hi nga dzi girago?

INA dzimbe dzitepo u ngu garadzega tepo u dundrugeyago khesi si na dugeleyago mindru wa tshigu, nya nga gu fuviswa nya wukhongeyi nya malipha, gu wugedwa khu Goge wa Magoge ni nyimpi ya Harmagedhoni? U nga dzi wudzisa gu khuwe: ‘Ina nyi na simama na nyi tumbegide tepo silo sesi nyo thise si na giregago?’ Wa gu ba u pimisa khu siwudziso sesi, malito ya Jesu ma gomogo avba nya lowo nya litshina ma na gu phasa. Jesu a di embeya Vapizane vaye gu khuye: “Mu nga garadzegi myonyo yanu. Khodwani.” (Joh. 14:1) Gukhodwa nya gu tiye gu na hi phasa gu timiseya esi si na giregago mindru wa tshigu.

2. Hi nga tiyisa kharini gukhodwa gwathu nigu ginani hi na bhulago khigyo avba nya ndrima yeyi?

² Ha gu dundrugeya khesi hi girago tepo gukhodwa gwathu gu lingwago, hi nati esi hi na girago gasi gu tiyisa gukhodwa gwathu. Ha gu dundrugeya khesi hi girago tepo hi lingwago hi nati omu hi yedego gu tshukwadzisa gasi gu tiyisa gukhodwa gwathu. Tepo yatshavbo hi timiseyago gilingo, gukhodwa gwathu go tiya nigu isoso si na hi phasa gu timiseya silingo hi na tshanganago naso mindru wa tshigu. Avba nya ndrima yeyi, hi na wona 4 silingo si yeyedzago gu khiso vapizane va Jesu va di yede gu engedzeya gukhodwa gwawe. Khu gu landreya, hi na wona edzi hi nga timiseyago khidzo sigaradzo nyo fane muhuno ni edzi si hi nga dzi dongiseyago khidzo gu emisana ni esi si na giregago mindru wa tshigu.

3. Malito ya Jesu ma gomogo omu ga Matewu 6:30, 33, ma gu hi phasa gu pwisisa ginani?

³ Si olovelegide gu hungo nya ndranga a dzi garadzeya gu ninga mwangadzi waye ni sanana saye guhodza nyo eneye, sombo ni wulanga nyo khale. Silo sesi khandri tepo yatshavbo si vbevbugago gu  si mana ga dzitepo dzedzi nyo garadze. Vambe vandriyathu va ngu luza thumo wawe nigu ambari va dzi garadzago, si ngu va garadzeya gu mana yimbe mithumo. Vambe va ngu bomba mithumo yi si yeligo gu girwa khu Makristo. Ga siemo nya nga esi hi yede gu tiyisa gukhodwa gwathu nyo khethu Jehovha a na ninga ndranga yathu satshavbo yi si vbwetago. Jesu vegide esi guagani ga vapizane vaye avba nya Ganelo ya Gigomoni. (Leri Matewu 6:30, 33.) Ha gu tiyisega gu khethu Jehovha kha na nga hi diga, hi na si kodza gu simama gu vega gupima avba nyo thumeye Jehovha. Tepo hi wonago edzi Jehovha a hi phasago khidzo khu nyamani, ha gu hidzimeya ga Jehovha nigu gukhodwa gwathu go tiyiswa.

4-5. Ginani gi phasidego ndranga nyo khaguri tepo yi nga ba yi garadzega khu gu vbweta silo nya gu dzi vbanyise khiso?

⁴ Nga wona edzi ndranga mweyo yi vbanyago Venezuela yi hakhidego khidzo giphaso gya Jehovha tepo yi nga ba yi emisana ni gigaradzo nyo vbwete silo nyo dzi vbanyise. Gale, ndranga ya Castro yi di gu si kodza gu mana dzitsapawu nyo eneye gasi gu dzi vbanyisa kholu va di gu thuma avba nya gipeto gyawe. Khu hwane, gu di vboha tsawa nya vathu wu nga ba wuri ni siphisa wu nga ta va tutumisa khu vbale wu bwe wu dzega gipeto gyawe. Papayi wa Castro a ranwago gu pwani khu Miguel, a di khuye: “Muhuno ha gu lima ga wulanga nya wudugwana hi nga lomba ga muthu nyo khaguri. Tshigu ni tshigu nyi di gu pheya gu khu gombeya ga Jehovha gasi a hi ninga esi hi si vbwetago litshigu lolo.” Womi nya ndranga yeyi kha wu vbevbugi, ganiolu khu gu tumba gu khavo Papayi wathu nya lihaladzo a na va ninga esi va si vbwetago tshigu ni tshigu, ndranga ya Castro tepo yatshavbo yi ngu manega mitshanganoni ni gu patega thumoni nyo tshumayele. Avo va thangiside Mufumo womini gwawe nigu Jehovha a va ningide esi va nga ba va si vbweta.

⁵ Ndrani nya tepo yeyi nyo garadze, Miguel ni mwangadzi waye Yurai, va vegide gupima avba nya edzi Jehovha a nga ba a va khathaleya khidzo. Dzimbe dzitepo, Jehovha a di gu thumisa vandriyathu gasi gu va ninga esi va nga ba va si vbweta mwendro gu phasa Miguel gu mana thumo. Ga dzimbe dzitepo, Jehovha a di gu thumisa Bheteli gasi gu va ninga esi va nga ba va si vbweta. Jehovha gima kha va diga nigu kha nga handro wakone, gukhodwa ga ndranga yeyi go engedzeya gu tiya. Hwane nyo wone edzi Jehovha a va phasidego khidzo, gyanana gyawe nya koma nya gyagadzyana nyo pwani khu Yoselin, gya ri khigyo: “Si ngu tiyisa gu wona edzi Jehovha a hi phasidego khidzo. Uye pari yangu nigu nyi ngu tumba gu kheni tepo yatshavbo uye a na nyi phasa.” A di engedza gambe, khuye: “Sigaradzo hi tshanganidego naso ndrangani gwathu si hi dongisede gasi gu emisana ni silingo mindru wa tshigu.”

6. U nga tiyisa kharini gukhodwa gwago tepo u tshanganago ni gigaradzo nyo hamuge dzitsapawu gasi gu dzi vbanyisa?

⁶ Ina u ngu emisana ni gigaradzo nyo hamuge dzitsapawu? Abari gu ina, khu lisine u womo ga tepo nyo garadze. Ganiolu, u nga londrola tepo yeyi nyo garadze gasi gu tiyisa gukhodwa gwago. Gombeya ga Jehovha u bwe u leri malito ya Jesu ma gomogo omu ga Matewu 6:25-34 u bwe u dundrugeya khayo. Dundrugeya khu siyeyedzo sa matshiguni yathu si yeyedzago gu khiso Jehovha a ngu phasa vale va dzi garadzeyago gu mu thumeya. (1 Kor. 15:58) Wa gu gira isoso, u na  engedzeya gu tiyisega gu khuwe Jehovha a na gu phasa kha nga edzi a phasidego khidzo vambe va nga ba vari ni sigaradzo nyo fane ni esi sago. Uye a ngu siti esi u si vbwetago nigu uye a ngu dziti edzi a na gu ningago khidzo silo soso. Wa gu wona edzi Jehovha a gu phasago khidzo womini gwago, gukhodwa gwago gu na engedzeya gu tiya nigu u na timiseya sigaradzo nya sikhongolo si na giregago mindru wa tshigu. — Habh. 3:17, 18.

7. Guya khu Matewu 8:23-26, “gingulu nya gikhongolo” gi lingide kharini gukhodwa ga vapizane?

⁷ Tepo Jesu ni vapizane vaye va nga ba va gimbiya khu ngalava, va di tshangana ni gingulu nya gikhongolo. Khu kharato, Jesu a di thumisa giemo gyogyo gasi gu va phasa gu pwisisa gu khavo va di yede gu tiyisa gukhodwa gwawe. (Leri Matewu 8:23-26.) Gingulu gi diri gikhongolo ngudzu nyo bwe mati ma beya ni ngalavani, ganiolu Jesu a di gu lade magurulani. Na va gu thava, vapizane vaye va di mu wusa va bwe va mu lomba gu khavo a va vbulugisa. Khavbovbo, Jesu a di va embeya gu khuye: “Khu ginani mu thavago? Vathu nya gukhodwa nya gudugwana!” Vapizane va di yede gu pwisisa gu khavo Jehovha a diri ni makodzelo nya gu vbulugise Jesu ni ava va nga ba vari naye. Ginani hi gi hevbulago? Gukhodwa nyo tiye gu nga hi phasa gu timiseya gingulu nya gikhongolo mwendro sigaradzo si fanago ni “gingulu nya gikhongolo.”

8-9. Gukhodwa ga Anel gu lingidwe kharini nigu ginani gi mu phasidego?

⁸ Nga wona edzi gu tiyisidwego khidzo gukhodwa ga ndriyathu moyo nya nyamayi nya gikwendra nyo pwani khu Anel, a vbanyago Porto Rico khu kotani nya olu a timisedego sigaradzo nya sikhongolo. Uye a di tshangana ni “gingulu nya gikhongolo” kamo. Gigaradzo gi phede khu 2017 tepo gingulu nya gikhongolo nyo pwani Maria gi nga tshugunula ndranga ya Anel. Nigu, khu kotani nya gingulu gegi, uye a di luza thumo. Anel a di khuye: “Ndrani nya matshigu yaya nyo garadze, nyi di gu garadzega, ganiolu nyi hevbulede gu tumba Jehovha khu gu gombeya gwaye, nyi bwe nyi si dzumeleyi gu kheni gu garadzega gu nyi tandregisa gu gira esi nyi nga ba nyi si kodza.”

⁹ Anel a ganede gu khuye gu engisa gu mu phaside gu timiseya sigaradzo a nga tshagana naso. Uye a di khuye: “Gu landra sileletelo hi ningwago khu hengeledzano ya Jehovha si nyi phaside gu simama na nyi rude. Jehovha a nyi phaside khu gu thumisa vandriyathu nigu avo va nyi tiyiside va bwe va nyi ninga esi nyi nga ba nyi si vbweta gasi gu dzi vbanyisa.” Uye a di engedza gambe khuye: “Jehovha a nyi ningide nya singi guvbindra esi nyi nga mu lomba nigu gukhodwa gwangu gu di engedzeya gu tiyiswa.”

10. Ginani u nga girago wa gu tshangana ni gigaradzo nya gikhongolo?

¹⁰ Ina wa gu tshangana ni “gingulu nya gikhongolo” womini wago? Yimbe tepo adzina wa gu tshaniseka khu kotani nya gingulu mwendro adzina wa gu tshangana ni madwali nya makhongolo ma vbedzago tshivba nyo bwe ma gu gira u si giti ni gilo nyo gire. U nga tshuka u garadzega, ganiolu u nga digi gu garadzega gu gu himbedzeya gu tumba Jehovha. Hidzimeya gwaye khu nombelo. Tiyisa gukhodwa gwago khu gu dundrugeya khedzi Jehovha a gu phasidego khidzo gale. (Ndzi.  77:11, 12) Tiyisega gu khuwe Jehovha gima kha na nga gu diga.

11. Khu ginani hi yedego gu dzi emiseya gu engisa ava va thangeyago?

¹¹ Ginani gambe gi nga gu phasago gu timiseya silingo? Kha nga esi Anel a ganedego, igyo gi na hi phasago gu engisa. Hevbuleya gu tumba ava va tumbwago khu Jehovha ni Jesu. Dzimbe dzitepo ava va thangeyago va nga tshuka va hi ninga sileletelo si girago gu khatshi avba gwathu kha si pwali. Ambari ulolo, Jehovha a ngu kategisa ava va engisago. Ha gu mana isoso omu nya Lito laye ni ga matshango nya sithumi nyo tumbege si vbulugisidego womi waso khu gu engisa. (Ekiso. 14:1-4; 2 Dzik. 20:17) Dundrugeya khu siyeyedzo soso. Wo gira isoso, u na engedzeya gu dziemiseya gwago nyo engise sileletelo hi ningwago khu hengeledzano ya Jehovha olu ni mindru ga tshigu. (Hebh. 13:17) Khu gu gira isoso, u na ba uri mwalo gighelo nyo thave tshanisa nya yikhongolo yi na tago nugunugu. — Mav. 3:25.

12. Luka 18:1-8, a gu fananisa kharini gu manega ni gukhodwa ni gu timiseya gu pharwa khu ndziya nya mba yadi?

¹² Jesu a di gu dziti gu khuye gu pharwa khu ndziya nya mba yadi si di hadzi linga gukhodwa ga vapizane vaye. Gasi gu va phasa gu emisana ni gigaradzo gegi, Jesu a va ningide gipimaniso gi gomogo omu nya libhuku la Luka. Jesu o ganeya khu noni mweyo yi nga ba yi tala gu hongola ga mulamuli nya mba si wadi yi ya lomba gu khiyo a yi lamula. Iyo yi di gu tiyisega gu khiyo yo simama gu lomba, mulamuli wule a di hadzi gu yi hlamula. Khu gu hegisa, mulamuli wule a di yi hlamula kamo. Ginani hi gi hevbulago? Jehovha lulamide, khu kharato Jesu a di khuye: “Ina Nungungulu khuye a na gumba lamula sihathwa saye, si mu ranago wutshigu ni mihani?” (Leri Luka 18:1-8.) Jesu a di engedza gambe khuye: “Ina gikhati a na wuyago Mwamana wa Muthu, a nata mana gukhodwa [gogu, MN] tigoni, gani?” Ha gu pharwa khu ndziya nya mba yadi, hi yede gu laphisa monyo hi bwe hi timiseya gasi hi yeyedza gu khethu hi na ni gukhodwa nyo tiye gu fana ni noni yile. Gukhodwa gogo, gu na hi gira hi tiyisega gu khethu Jehovha a na hi phasa. Hi yede gu khodwa gambe gu khethu nombelo wu na ni tshivba. Dzimbe dzitepo milombelo yathu yi nga hlamudwa khu ndziya hi nga ba ha sa yi vireya.

13. Nombelo wu phaside kharini ndranga mweyo yi nga pharwa khu ndziya nya mba yadi?

¹³ Nga wona giyeyedzo gya ndriyathu moyo nya nyamayi nyo pwani khu Vero, a vbanyago Republica Democrática de Congo. Mwama wa Vero a nga ba a si thumeyi Jehovha ni gyanana gyaye nya gyadzyana nya 15 myaga, si lombide gu va khuga khumo va nga ba va vbanya tepo va nga wugedwa khu tsawa nya masotshwa. Ndziyani, na va gu gimbiya, ndranga ya Vero yi di emiswa khu tsawa moyo nya masotshwa va bwe va va embeya gu khavo va di hadzi gu va songa. Tepo Vero a nga pheya gu liya, gyanana gyaye nya gyadzyana gi di zama gu mu degudzeya khu gu gombeya khu lito nya gu khugege gi bwe gi phindra phindra lina la Jehovha avba nya nombelo wagyo. Tepo gi nga vbedza, muthangeyi nya masotshwa a di gi wudzisa khuye: “Nyamahegyanawe, khu mani a nga gu  hevbudza gu gombeya?” Nyamahegyane a di mu hlamula khuye: “Khu mamayi wangu a nga nyi hevbudza, khu gu thumisa giyeyedzo gi gomogo umo ga Matewu 6:9-13.” Muthangeyi wule a di embeya nyamahegyane wule khuye: “Gimbiya khu gurula uwe ni vavelegi vago nigu Jehovha Nungungulu wanu a na mi sayise!”

14. Ginani adzina gi na lingago gukhodwa gwathu nigu ginani gi na hi phasago gu timiseya?

¹⁴ Matshango yaya ma gu hi phasa gu wona edzi nombelo wu gu na ni lisima khidzo. Ganiolu, ahanti nombelo wago wa gu mba hlamudwa khu gu vbiredza mwendro khu ndziya nyo hlamadzise? Gufana ni noni ya avba nya gipimaniso gya Jesu, simama gu gombeya na wu gu tumba gu khuwe Nungungulu gima kha na nga gu diga, nigu uye a na hlamula milombelo yago khu ndziya nyo khaguri nigu khu tepo yakone. Simama gu lomba Jehovha liphuvbo nya guage. (Filp. 4:13) Dundruga gu khuwe Jehovha a na gu ninga makategwa nya mangi nyo bwe u divaledwa khu dzitshanisa dza gale. Wa gu timiseya sigaradzo na wu phaswa khu Jehovha u na si kodza gu timiseya silingo mindru wa tshigu. — 1 Ped. 1:6, 7.

15. Guya khu Matewu 17:19, 20, gigaradzo muni egi vapizane va Jesu va tshanganidego nagyo?

¹⁵ Jesu hevbudzide Vapizane vaye gu khuye gukhodwa gu di hadzi gu va phasa gu pala sigaradzo. (Leri Matewu 17:19, 20.) Ga tepo nyo khaguri avo kha va si kodza gu tutumisa lidhimoni, ambari ga dzimbe dzitepo va nga ba va si kodza gu gira isoso. Khu ginani va nga tandrega? Jesu a di va tshamuseya gu khuye avo va di yede gu engedzeya gukhodwa gwawe. Uye a di va embeya gu khuye mwa gu manega ni gukhodwa nya gu eneye mu di hadzi gu kodza gu timiseya sigaradzo, ambari sigaradzo na ri sikhongolo ngudzu nyo bwe si gira khatshi gigomo nya gikhongolo. Muhuno, anethu hi nga tshangana ni sigaradzo nyo bwe hi pimisa gu khethu kha hi na nga si kodza gu si timiseya.

16. Gukhodwa gu phaside kharini Geydi gu timiseya hwane nya gu ba mwama waye a songidwe?

¹⁶ Wona giyeyedzo gya ndriyathu moyo nya nyamayi nyo pwani khu Geydi a vbanyago Guatemala. Mwama waye, a di songwa tepo a nga ba a wuya khu mitshanganoni nya libandla. Gukhodwa ga Geydi gu mu phaside kharini gu timiseya ambari olu a nga ba apwa wuvi nya wukhongolo ngudzu? Uye wari khuye: “Nombelo wu nyi phaside gu rinya sigaradzo sangu ga Jehovha nyi bwe nyi dzipwa na nyi rude. Nyi wonide edzi Jehovha a nga ba a nyi phasa khidzo khu gu thumisa va ndragani gwangu ni dzipari libandlani. Gu pharega thumoni wa Jehovha si nyi phaside gu vbugula wuvi wangu nigu si nyi phaside gu mba garadzega ngudzu khu wumindru. Hwane nyo tshangane ni gigaradzo gegi, nyi hevbude gu kheni ni gyevbini gigaradzo nyi na tshanganago nagyo mindru wa tshigu, nyi na gi kodza gu gi timiseya khu gu phaswa khu Jehovha, Jesu ni hengeledzano yaye.”

17. Ginani hi nga girago ha gu tshangana ni gigaradzo nya gikhongolo nyo fane ni gigomo?

¹⁷ Ina wa gu tshaniseka khu kotani nya olu u fedwego khu muthu u mu golago? Dzi ninge tepo nya gu tiyise gukhodwa gwago avbo nya gutumba nya gu wuswe ga ava va fudego khu gu hevbula matimo nya Bhibhiliya ya ava va wusidwego khu  gufani. Ina wa gu tshaniseka khu kotani nya olu givbango gimwegyo nya ndranga yago gi dusidwego libandlani? Hevbula gasi gu tiyisega gu khuye ndziya eyi Nungungulu a kawukago khiyo tepo yatshavbo khyadi. Ni gevbini gigaradzo u tshanganago nagyo, gi wone kha nga lithomo nyo tiyise gukhodwa gwago. Embeya Jehovha edzi u dzipwago khidzo, u nga khali wenga, ganiolu dzi tshanganise ni vandriyathu. (Mav. 18:1) Gira silo si na gu phasago gu timiseya, ambari sa gu lomba gu gira isoso na wu gu liya khu esi si gu dugeledego. (Ndzi. 126:5, 6) Simama gu hongola mitshanganoni, thumoni nyo tshumayele ni gu hevbula Bhibhiliya. Nigu, simama gu dundrugeya khu silo nyo tsakise esi Jehovha a tumbisago gu gu ninga mindru wa tshigu. Wa gu wona edzi Jehovha a gu phasago khidzo olu, gukhodwa gwago gu na engedzeya gu tiya.

18. Wa gu tugula gu khuwe gukhodwa gwago kha gwa tiya, ginani u nga girago?

¹⁸ Abari gu silingo u tshanganidego naso gale mwendro olu si yeyedzide gu khiso u mwalo gukhodwa nyo tiye, u nga vbeyi tshivba. Wona isoso kha nga lithomo nya gu tiyise gukhodwa gwago. Lomba sasimweso si lombidwego khu vapostoli va Jesu avo va nga khavo: “Engedzela gukhodwa gwathu.” (Luka 17:5) Nigu, dundrugeya khu siyeyedzo hi nga bhula khiso avba nya ndrima yeyi. Gu fana ni Miguel ni Yurai, dundruga dzatsavbo dzitepo Jehovha a gu phasidego. Gu fana ni gyanana gya Vero ni Anel gombeya ga Jehovha khu monyo wago watshavbo, ngundzungudzu wa gu ba u tshangana ni gigaradzo nya gikhongolo. Nigu, gu fana ni Geydi, dziti gu khuwe Jehovha adzina a na gu phasa khu gu thumisa vandrangani gwago mwendro dzipari dzago. Wa gu diga Jehovha a gu phasa gu timiseya sigaradzo sago olu, u na tiyisega gu khuwe Jehovha a na gu phasa gu timiseya silingo adzina u na tshanganago naso mindru wa tshigu.

19. Jesu a di gu tiyisega khu ginani, nigu ginani u nga tiyisegago khigyo nuwe?

¹⁹ Jesu phaside vapizane vaye gu wona avbo va yedego gu engedzeya gukhodwa gwawe, ganiolu uye gima kha kanakana gu khuye khu gu phaswa khu Jehovha avo va di hadzi gu si kodza gu timiseya silingo mindru wa tshigu. (Joh. 14:1; 16:33) Uye a di gu tiyisega gu khuye gukhodwa gu di hadzi gu phasa gitshungu nya gikhongolo gu vbuluga avbo nya tshanisa nya yikhongolo. (Gutu. 7:9, 14) Ina uwe u na ba u romo avba nya gitshungu nya gikhongolo? Khu gu phaswa khu Jehovha u na ba u romo, wa gu gira satshavbo u si kodzago olu gasi gu tiyisa gukhodwa gwago! — Hebh. 10:39.